Ti Gamengtayo, Moderno-aldaw a Ministerio ti Kinadayag

“Ngem addaankami kadagitoy a gameng kadagiti damili a basiha, tapno ti naindaklan a pannakabalin biang koma ti Dios a saan a kadakami.”​—2 CORINTO 4:7.

1. (a) Ania a nadayag a gameng ti mabalin nga ikutantayo, ken apay? (b) Kasanot’ panangiladawan ti Biblia iti pannakaipaay ti Mosaiko a Linteg?

TI MINISTERIO ti panangikaskasaba iti “daytoy naimbag a damag ti pagarian” bayat ti panagngudo ti sistema dagiti bambanag ket pudno a maysa a gameng, kapapatgan a sanikua. Gapu ta ni Jehova ket Dios a nadayag, ti panagserbi iti Dios ket ministerio ti kinadayag, gapuna maysa a gameng. (Mateo 24:14; 2 Corinto 3:18–4:1) Maipapan iti nadayag a pannakaiyeg ti Mosaiko a Linteg, daytat’ naisurat idiay Exodo 34:29, 30: “Ket naaramid nga idi simmalog ni Moises iti Bantay Sinai nga iniggamanna ti dua a taptapi ti Pammaneknek idi simmalog iti bantay, ket ni Moises saanna nga ammo idi a ti rupana rimmaniag gapu ta nakisasao ken Jehova. Ket idi a ni Aaron ken amin dagiti annak ti Israel nakitada ni Moises, adtoy! ti kudil ti rupana nagraniag ket isuda nagbutengda nga umasideg kenkuana.”

2. Aniat’ inladawan ti serbisio ti Mosaiko a Linteg, ngem apay a nadaydayag ti naud-udi a ministerio?

² Dagiti Ex 34 bersikulo 32 inggat’ 34 inayonda: “Ket iti kalpasanna amin dagiti annak ti Israel immasidegda kenkuana, ket intedna a bilbilin ti amin a sinao kenkuana ni Jehova idiay Bantay Sinai. Ket ni Moises idi nalpasna ti pannakisaona kadakuada, inkabilna ti maysa nga abbong iti rupana. Ngem ni Moises idi napan iti sango ni Jehova a makisao kenkuana, inikkatna ti abbong inggana iti ipapanawna.” Ti serbisio ti Mosaiko a Linteg iladladawanna ti ministerio ti baro a tulag babaen iti Manangibabaet, a ni Jesu-Kristo. Gapuna, no ti dati a ministerio ket nadayag, dinto ketdin ad-adda pay ti naud-udi, “ti kinaministro ti espiritu,” a lab-awanna iti dayagna! (2 Corinto 3:7-11) Nadaydayag agsipud ta addaan dayag nga agtalinaed, ket dagiti adipen ni Jesu-Kristo makiramanda iti dayta.​—Roma 12:11.

3. (a) Aniat’ rebbeng a pudno maipapan kadagiti Saksi ni Jehova, ngem apay a saan a nalawag daytoy iti adu a tattao? (b) Aniat’ mangpaneknek a naiyeg ni Moises iti nadayag a presensia ni Jehova?

³ Maikuna, ngarud, a ti ministerio dagiti Saksi ni Jehova ket nadayag. Daytoy, nupay kasta, ket saan a nalawag iti adu a tattao a binulsek ti ulbod a relihion. Nupay adut’ addaan iti Biblia ket mabalin a basaenda dayta, awanandat’ ‘mata a makakita.’ (2 Pedro 1:5-9) Tapno maikkat ti abbong iti matada, masapul a bumaw-ingda ken Jehova iti pammati, ta idi napan ni Moises iti imatang ni Jehova, inikkatna ti abbong a nangkalub iti matana manipud kadagiti Judio. (2 Corinto 3:16) Mabuteng dagiti Israelita a kumita iti dayag ti Dios iti rupa ti manangibabaetda ket indawatda a maabbongan koma manipud iti matmatada. No kasano a ti phosphorescent a banag a naisarang iti lawag mangiruar iti silnag iti kasipngetan, kasta met ni Moises, ti manangibabaetda, inyanninagna ti dayag ni Jehova, a mangpaneknek nga isut’ naggapu iti imatang ni Jehova.

4. Kasanot’ panangtulad dagiti di mamati a tattao itatta kadagiti Judio idi ugma, ngem aniat’ di pagbutngan dagiti adalan ti Dakdakkel a Moises?

⁴ Ni Moises inladawanna ti dakkel a Propeta ti Dios, a ni Jesu-Kristo. Kas iti nangiladawan kenkuana, daytoy Dakdakkel a Moises ket natured a direkta a mangimatang iti dayag ni Jehova. Agingga itoy nga aldaw, nupay kasta, dagiti di mamati a tattao a binulsek ti Diablo ken ti Binababilonia a relihionna tuladenda dagiti Judio idi ugma ket agkitakitda a mangmatmat, wenno mangawat, iti dayag ti Dakdakkel a Moises, ni Jesu-Kristo. (2 Corinto 3:12-15) Kaskasdi, dagiti pudno nga adalanna dida agbuteng a kumita iti aninag ti dayag ni Jehova kas naisilnag manipud iti rupa ni Jesu-Kristo. Nawayawayaan manipud impluensia ti Babilonia, mapaturedda a mangipakita ti dayag ti Dios. “Iti kasta,” insurat ni Pablo, “idinto nga adda kadakami ti dakkel unay nga inanama, agsaokami a situtured.”​—2 Corinto 3:12.

Manangiyanninag iti Dayag ti Dios

5. Kasanotay a maiyanninag ti dayag ti Dios ket agbalin a kas ken Moises idiay tuktok ti bantay iti presensia ni Jehova?

⁵ Inikkat ni Jesu-Kristo ti abbong babaen iti panangipalgak ken panangiwaragawagna ken Jehova a Dios kadatayo. (Juan 1:14, 17, 18) Gapuna, rumaniagtayo koma, ket iti kasta rumaniag ti dayag ti Dios babaen “ti lawag ti ebanghelio ti dayag ni Kristo, isu a ladawan ti Dios,” nga iwarwaragawagtayo. Ti raniagna ket “isut’ nadayag a pannakaammo iti Dios iti langa ni Kristo.” Masapul nga iyanninagtay daytoy a dayag babaen iti panangisarita iti dayag ni Jehova ken ti dayag ti Pagarianna baeten ti Anakna. (2 Corinto 4:4-6) Kas ken ni Moises idiay tuktok ti bantay iti imatang ni Jehova, dagiti Saksina ditoy daga saanda nga abbongan ti puspusoda manipud iti dayag ni Jehova. Agsiddaawda iti dayag a maiyanninag iti rupa ti Anak ni Jehova ken Ari, a ni Jesu-Kristo. Gapuna, masapul nga isilnagda kadagiti dadduma ti lawag maipapan iti dayag ti Dios.

6. Kasanot’ panangiladawan ni Pablo iti ministeriotayo iti kinadayag idiay 2 Corinto 3:18, ket kadagiti ania a wagas a datayo ngarud ket “nabalbaliwan”?

⁶ Kadagiti amin a pada a saksi ti dayag ni Jehova, ni apostol Pablo dineskribirna dayta kadagitoy a sasao: “Ngem datay amin, iti rupatayo awan abbongna ket kasla sarming nga ipakpakitatayo ti dayag ni Jehova, ket mabalbaliwan nga umasping met la kenkuana a mapadayagtayo a mapadayag, kas naggapu iti Espiritu ni Jehova.” (2 Corinto 3:18) Mientras ad-adu ti awatentayo a dayag daytoy a lawag, ad-adda met ti rebbeng a panagsilnagtayo, ket iti kasta ad-adda met ti pannakabalbaliwtayo. Mapabaro dagiti isip ket maatorda, nupay awan mapaliiw a panagbalbaliw ti bagi wenno ti rupa. Ti lawag ti nadayag a mensahe nga isilnagtayo isut’ mangpataud iti pakaidumaan kadatayo. Mabalbaliwan ti kabibiagtayo tapno agbalin a kas ken Kristo, bayat nga irugitayo nga ibanag ti napribilehiuan a serbisio iti panangisaknap iti daytoy a nadayag a silaw kadagiti dadduma.​—Hebreo 13:15.

7. Aniat’ gubuayan ti pudpudno a dayag, ket kasanotay a maiyebkas ti kasta a dayag?

⁷ Amin dagitoy a panagbalbaliw ket maigapu iti espiritu, wenno aktibo a puersa, ti Dios. Ti klero ti Kakristianuan saanda nga iyanninag ti dayag ni Jehova a Dios imbes ketdi bumaw-ingda kadagiti panagpabuya tapno makaatrakar iti publiko. Ti dayag ket saantay a kukua, ket saantay a rebbeng nga arkosan ti bagbagitayo kadagiti naranga nga eklesiastikal a kagay a lino, balitok, ken sumilsilap nga alahas. Ti pudpudno a dayag naggapu iti espiritu ti Dios ket naiyebkas iti panangited iti nadayag a pammaneknek maipapan iti Espiritu ni Jehova.

Amin a Napribilehiuan nga Agikut ti Lawag

8, 9. Ania a pammaregta ti ited kadatayo ni Pablo idiay 2 Corinto 4:1, 2, ket ania a determinasion ti kalikagumanna iti biangtayo?

⁸ Idiay 2 Corinto 4:1, 2, mabasatayo: “Gapuna, idinto ta adda kadakami daytoy a ministerio kas iti pannakagun-odmi ti asi, saankami nga agkapuy; no di ket nagpanawanmi dagiti mailemlemmeng a nakababain, a dikam agsiksikap ken saanmi a killuen ti sao ti Dios, no di ket iti panangiparangarang ti pudno irekomendarmi ti bagimi iti konsiensia dagiti amin a tattao iti imatang ti Dios.” Ti Dios naaddaan ti asi kadatayo tapno tudingannatayo iti daytoy a ministerio. Maysa daytoy a pammagbaga tapno mapabilegtayo nga agtultuloy a situtured, ket daytoy ti aramidentayto! Yantangay naparaburantayo iti lawag manipud Sao ti Dios, maobligartayo a mangisilnag iti dayta kadagiti dadduma.​—Idiligyo iti Mateo 5:14-16.

⁹ Dagiti banag nga ibain ti tattao, a kas iti panagkusit, ilemmengda babaen iti panagulbod ken panangallilaw. Ngem awan ti panggapuantay nga agbain gapu ta ti mensahe ken trabahotayo ket saan a kinukusit no di ket nalinteg ken napudno. Gapuna, mabalintayo nga isilnag ti naan-anay a dayag ti lawag. Ditay tamingen ti Sao ti Dios a siuulbod. Ti panangaramid iti kasta kaipapanannat’ panangtaming iti dayta a siaagum maipaay iti personal a gunggona, dayag, bentaha, ken nailubongan a pannakabalin ken tapno maliklikan ti ibubusor ken pannakaidadanes manipud iti lubong. Dagidiay di agbuteng nga umadani ken Jehova buyogen ti di naabbongan a ruprupa ken tapno matmatan ti nadayag a lawag ti kinapudno saandanto met nga agbuteng a sumango iti responsabilidadda. Palubosandanto a ti lawag maiyanninag manipud kadakuada.

10. Apay a saan a basol dagiti Saksi ni Jehova no ti naimbag a damag ti Pagarian ket naabbongan iti panangmatmat ti dadduma a tattao?

¹⁰ No adda asinoman a ti naimbag a damag ti Pagarian ket naabbongan manipud iti imatangda, saan a basol dayta dagiti Saksi ni Jehova no di ket basolda a mismo dayta. Ti naimbag a damag ti Pagarian ket saan a mailemlemmeng. Nalatak ti sangalubongan a panangaskasaba a trabaho dagiti Saksi ni Jehova. Ngarud, maikunada a kas ken apostol Pablo: “Daytoy a banag ket saan a naaramid iti suli.” Pudno unay, kas insuratna, ti naimbag a damag ket “naikaskasaba iti amin a parsua iti baba ti langit.”​—Aramid 26:26; Colosas 1:23.

11. Apay a naabbongan ti nadayag a naimbag a damag iti kaaduan ti sangatauan?

¹¹ Dagidiay nakailemmengan ti naimbag a damag ti Pagarian ket bumusbusorda, dagidiay binulsek ti Diablo. (Idiligyo ti Mateo 12:30.) Malaksid no umikayda manipud iti ulbod a relihion ken kadagiti silo ti Diablo, nakalineada maipaay iti pannakadadael. Iti sidong ti impluensia ti demonio, dagita a tattao abbongotanda dagiti mismo a matada, ta ni apostol Pablo kunaenna idiay 2 Corinto 4:3-5: “Ket no ti ministeriomi naabbongan pay laeng, naabbongan a maipaay kadagiti mapukaw, kadakuada a ti dios a nailubongan binulsekna dagiti isip dagiti saan a mamati, tapno di agraniag kadakuada ti lawag ti ebanghelio ti dayag ni Kristo, isu a ladawan ti Dios. Ta dikam ikaskasaba ti bagbagimi, no di ni Kristo Jesus nga Apo, ket dakami dagiti kas adipenyo gapu ken Jesus.”

12. Maidilig kadagiti bulsek ti is-isipda, kasanot’ panagtignay ti ili ni Jehova kadagiti sasao idiay 2 Corinto 4:6?

¹² Dagidiay bulsek ti isipda saanda a kayat ti mamati. Ti saanda a panamati waknitanna ti isipda iti iraraut dagiti demonio. (1 Timoteo 4:1) Saanda a makita ti dayag ni Jehova wenno ti pannakaisilnagna iti langa ni Jesus, ti Dakdakkel a Moises. Ti ili ni Jehova magun-odanna ti nadayag a lawag manipud iti Biblia ket isilnagda dayta kadagiti dadduma. Gapuna amin nga adipen ti Dios ket agikut iti lawag, ket ti Dios ibilinna a sumilnag ti lawag. Ti lawag masapul a maiyanninag manipud iti ili ni Jehova ket maisilnagda kadagiti dadduma nga adda iti kasipngetan ken agpegpeggad iti pannakadadael. Daytoy ket kas iti panagkuna ti 2 Corinto 4:6: “Ta ti Dios kinunana: ‘Tumpuarto ti silaw iti kasipngetan,’ isu a naglawag kadagiti pusotayo a maipaay iti panaglawag ti pannakaammo iti dayag ti Dios iti langa ni Kristo.” Maitunos iti daytoy, dagiti Saksi ni Jehova agtulnogda iti nadiosan a bilin ket paranniagenda ti lawagda kadagiti dadduma, a pakaipadayagan ti Dios.

Nadayag a Gameng kadagiti Narasi a Basiha

13. Aniat’ resulta ti panangikumit iti nasantuan a serbisio kas agikut iti silaw kadagiti parsua iti lasag?

¹³ Iti daytoy di mailadawan a grande a pribilehio ti panagserbi, nasken unay a dagiti agikut iti lawag paneknekanda a maikarida a maaddaan iti lawag babaen iti panangsalimetmet iti kinatarnawda iti Dios. Tapno maibanag daytoy nakaskasdaaw a pribilehio ti panagserbi, saan nga inusar ti Dios dagiti nasantuan nga anghel, nga agtarigagay a kumita kadagiti bambanag, no di ket impaayna daytoy nasantuan a serbisio kadagiti naparsua iti lasag. (1 Pedro 1:12) Inaramidna daytoy maipaay iti pannakaitan-ok iti bukodna a puersa iti tengnga ti kinakapuy ti tao. Kas kunaen ti 2 Corinto 4:7: “Ngem, addaankami iti daytoy a gameng kadagiti damili a basiha, tapno ti naindaklan a pannakabalin biang koma ti Dios a saan a kadakami.”

14. (a) Ania “daytoy a gameng dagiti damili a basiha” (b) Apay a da Moises ken Jesu-Kristo masiribda nga ehemplo kadatayo no maipapan iti gameng?

¹⁴ Dagiti basiha idi ugma ket masansan a nausar kas pagkargaan kadagiti napateg a sanikua. Ania daytoy nadayag a gameng nga ik-ikutan dagiti Saksi ni Jehova kadagiti narasi, damili a basiha​—iti mismo a bagida, kas nakapuy a parparsua manipud iti tapuk ti daga? Daytoy a gameng ket saan laeng a lawag a simmilnag iti pusoda. Isut’ ministerio dayta a lawag, a ti ministerio, wenno serbisio, ket masapul a maaramid kadagiti natauan a bagi. Ti ministerio isut’ panangisaknap iti lawag nga insilnag ti Dios kadagiti pusoda. Daytoy a ministerio ket naimbag a gameng gapu ta daytat’ napateg a pribilehio ti panagserbi a pakiramanan itatta saan laeng a dagiti napulotan a natda ti “bassit nga ipastoran” ngem kasta met ti “dakkel a bunggoy” dagiti “sabsabali a karnero” ti Naimbag a Pastor, a ni Jesu-Kristo. (Lucas 12:32; Juan 10:14-16; Apocalipsis 7:9) Ni Moises ken ti iladladawanna, a ni Jesu-Kristo, ket masiribda nga ehemplo kadatayo, tapno ipamaysatayo ti puspusotayo iti daytoy a gameng ti nadiosan a panagserbi, “ta no adino ti yan ti gamengyo, addanto met idiay ti pusoyo.”​—Mateo 6:19-21; Hebreo 11:26.

15, 16. (a) Kasano a ti pannakabalin a nangatngato ngem gagangay naipakita nga aggapu iti Dios ket saan a manipud iti mismo a bagbagitayo? (b) Apay a mapaayto amin nga ibubusor ti lubong a mangburak kadagiti damili a basiha ti Dios?

¹⁵ Kasano, ngarud, a ti puersa a nabilbileg ngem ti gagangay maipakita a naggapu iti Dios ket saan nga iti bagbagitayo? Iti daytoy a pamay-an: Ti kasta a narasi, damili a basiha a kas kadatayo a mangikut iti daytoy a maipatpateg a serbisio ken nakaibaonan ket di maikari ken ditay pulos maaddaan iti kasta a dayaw iti bagbagitayo. Kasta met, datayo a Saksi ni Jehova iturayannatayo ti amin a kita ti panangpilit ti kabusor tapno padasennatay a buongen ken bettaken tapno saantayo a maikari a mangawit iti trabaho manipud iti Dios. Gapuna, rebbeng a ti puersa ti Dakkel a Komisioner ti tumulong kadatayo a mangandor iti nakaro a di umiso a panangtaming daytoy a lubong ken tapno masalimetmetan a sititibker ti nakaibaonan ket mapaneknekan a maikari nga agtalinaed iti serbisiona. Gapuna, amin dagiti ibubusor ti lubong mapaayto a mangbuong kadagiti damili a basiha ken rabsuten kadakuada ti napateg a gameng, ta naisurat idiay 2 Corinto 4:8-12:

¹⁶ “Kadagiti isuamin a disso mailetankami, ngem saan a maparigat unay; agduaduakami, ngem saan a maikkat ti inanamami; naidadaneskami, ngem saan a nabaybay-an; naituangkami, ngem saan kami a napukaw. Nga itugtugotmi nga agnanayon iti bagimi ti ipapatay ni Jesus, tapno ti biag ni Jesus maiparangarang met iti bagimi. Ta dakami nga agbiag agnanayon a maiyawatkami ken patay gapu ken Jesus, tapno ti biag met ni Jesus maiparangarang iti lasagmi a matay. Iti kasta ni patay agaramid kadakami, ngem ti biag [babaen ti panangikaskasaba ti naimbag a damag ti Pagarian] kadakayo.”

Ti Dakkel a Bunggoy Ipategna Unay “Daytoy a Gameng”

17. Kasanot’ panangipateg ti dakkel a bunggoy iti “daytoy a gameng” ti ministerio ti kinadayag?

¹⁷ “Ni patay agaramid kadakami, ngem biag kadakayo.” Daytoy a sasao agaplikar kadagiti napulotan iti espiritu a Kristiano. Kaskasdi, mabalin a pagpanunotennatayo maipapan iti relasion ti napulotan a natda ti Dios iti dakkel a bunggoy dagiti sabsabali a karnero. Ammo dagiti napulotan a kasapulan a turposenda iti kamaudiananna ti naindagaan a kursoda iti ipapatay a kas inaramid ni Jesus, ngem adda kakaduada a makiraman iti nadayag a gameng iti panagserbi, a tumulong kadakuada babaen iti panangaramidda iti kaaduan a paset ti trabaho ti panangikaskasaba ti naimbag a damag ti Pagarian. Kas ti napulotan a natda, ti dakkel a bunggoy dagiti sabsabali a karnero itatta apresiarenda a ti kakaisuna a gameng a makalasat iti naapuy a bakal ti Armagedon ken agtultuloy a di mapuoran ken di mapukaw iti baro a lubong ket isu daytoy gameng ti nasantuan a ministerio, ti panagserbi ken Jehova a Dios ken ti nadayag nga Arina, ni Jesu-Kristo. Ti dakkel a bunggoy salimetmetanda dayta a sisitibker, “agserbida kenkuana [ti Dios] iti aldaw ken rabii.”​—Apocalipsis 7:15.

18. (a) Aniat’ mabiiten a mapasamak iti sinasaur a dayag daytoy a lubong? (b) Ania a “dayag” ti di inawat ni Jesus, ket babaen iti panangaramidna iti ania a nagun-odanna ti dakdakkel a dayag?

¹⁸ Din agbayag, pagpatinggaenton ti Dios ti ulbod a dayag daytoy agdama a dakes a sistema dagiti bambanag​—maysa a “dayag” a nagtultuloy nanipud idi inyeg ni Satanas a Diablo ni Jesus iti nangato a bantay ket impakitana kenkuana ti amin a pagpagarian ti lubong ken “ti dayag dagitoy.” (Lucas 4:5, 6) Di inawat ni Jesus ti pannakaiyopreser ti dayag manipud iti kasta a gubuayan ket intultuloyna a sinurot ti kurso ti panagtignay ditoy daga nga inanamongan ti Dios. Gaput’ panangaramidna iti kasta, makoronaanto iti dayag a nangatngato uray iti dayag a tinagiragsakna, kas bugbugtong nga Anak ti Dios, idiay langit sakbay ti panangasikasona iti tudingna ditoy daga kas imbalabala ni Jehova.​—Juan 5:36; 17:5; Filipos 2:9-11.

19. Ania a nadayaw a pribilehio ti panagserbi ti ngangnganin naan-anay a maibanag, ket aniat’ determinasiontayo iti daytoy a banag?

¹⁹ Ti naipadto a panungpalan daytoy napalalot’ kinadakesna a sistema ti bambanag saanto a dumteng sakbay ti pannakaipaay ti pammaneknek ti Pagarian iti intero a daga a kas grande a pagultimuan ti trabaho dagiti adalan ni Jesu-Kristo, dagiti Saksi ni Jehova. (Mateo 24:14) Maipapaay ti pammaneknek ti Pagarian iti pitupulo ket lima a tawtawenen, ket kas ipakita dagiti pasamak iti lubong iti panawentayo, dayta naipadto a panungpalan asidegen. Kabayatanna, ti nadayaw a pribilehio a pannakiraman iti ministerio ti naarian, nasantuan a gobierno ket asidegen ti naan-anay a pannakaitungpalna. (Mateo, kapitulo 24, 25; Marcos, kapitulo 13; Lucas, kapitulo 21) Ti pribilehiotayo a makiraman iti panangipaay iti sangalubongan a pammaneknek iti naipasdeken a Pagarian ket pudno a nadayag a gameng nga ipatpateg unay dagiti Saksi ni Jehova, kas ad-adalan ti naitronon nga Anakna, a ni Jesu-Kristo. Pagreggetanda unay a salimetmetan dayta agingga a makompleto ti pammaneknek ti Pagarian ket ti Mannakabalin-amin a Dios, a ni Jehova, balangatannan ti kasasaad iti uniberso babaen ti bukodna a personal a pammaneknek iti sapasap a kinasoberanona.​—Sofonias 3:8.

Ania dagiti Sungbatyo?

◻ Apay a nadayag ti ministerio dagiti Saksi ni Jehova?

◻ Apay a ti naimbag a damag naabbongan kadagiti nagadu a tattao itatta?

◻ Ania “daytoy gameng dagiti damili a basiha”?

◻ Apay a nangusar ni Jesus iti narasi, damili a basiha a maipaay iti maipatpateg a panagserbi?

◻ Kasanot’ panangipateg ti ili ni Jehova iti “daytoy a gameng,” ken apay?

[Ladawan iti panid 17]

Ti dayag ti Dios naiyanninag manipud iti langa ni Jesu-Kristo, ti Dakdakkel a Moises. Dagiti Saksi ni Jehova naaddaandat’ pribilehio a manggun-od iti nadayag a lawag manipud iti Biblia ket isilnag dayta kadagiti dadduma