“Naan-anay nga Itungpalmo ti Ministeriom”

“Tungpalem a naimbag ti pagrebbengam.”​—2 TIMOTEO 4:5, Byington.

1, 2. Nupay managebanghelio ti amin a Kristiano, ania ti Nainkasuratan a kalikagum kadagiti panglakayen?

MAYSAKA kadi a mangiwarwaragawag iti Pagarian? No wen, agyamanka ken ni Jehova a Dios gapu iti daytoy a nagsayaat a pribilehio. Maysaka kadi a panglakayen iti kongregasion? Kanayonan dayta a pribilehio manipud ken ni Jehova. Ngem ditay koma liplipatan a saan a ti nagaw-attayo nga edukasion wenno ti kinalaingtayo nga agpalawag ti makagapu a kualipikadotayo iti ministerio wenno agbalin a panglakayen iti kongregasion. Ni Jehova ti naan-anay a nangkualipikar kadatayo iti ministerio, ken gapu ta dadduma kadatayo ti nakaragpat kadagiti espesipiko a Nainkasuratan a pagalagadan isu a pribilehioda ti agserbi kas manangaywan.​—2 Corinto 3:5, 6; 1 Timoteo 3:1-7.

² Managebanghelio ti amin a dedikado a Kristiano, ngem dagiti manangaywan, wenno papanglakayen, ti nangnangruna a nasken a mangipakita iti nasayaat nga ulidan iti ministerio. Dagiti panglakayen nga “agtrabaho a sipipinget iti panagsao ken panangisuro” ipatpateg ida ti Dios ken ni Kristo, agraman dagiti padada a Saksi ni Jehova. (1 Timoteo 5:17; Efeso 5:23; Hebreo 6:10-12) Iti aniaman a kasasaad, ti panangisuro ti maysa a panglakayen ket nasken a makapasalun-at iti naespirituan, ta kinuna ni apostol Pablo iti manangaywan a ni Timoteo: “Addanto las-ud ti tiempo a saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda; ket iyadayodanto dagiti lapayagda iti kinapudno, idinto ta maisiasidanto nga agturong iti ulbod a sarsarita. Sika, nupay kasta, agtalinaedka a sipupuot iti amin a bambanag, anusam ti dakes, aramidem ti trabaho ti managebanghelio, naan-anay nga itungpalmo ti ministeriom.”​—2 Timoteo 4:3-5.

3. Ania dagiti nasken nga aramiden tapno dagiti ulbod a sursuro dida madangran ti espiritualidad ti kongregasion?

³ Tapno dagiti ulbod a sursuro dida madangran ti espiritualidad ti kongregasion, nasken a suroten ti maysa a panglakayen ti balakad ni Pablo: “Agparbengkayo iti amin a banag, . . . tungpalem a naimbag ti pagrebbengam.” (2 Timoteo 4:5, Byington) Wen, ti maysa a panglakayen nasken a ‘naan-anay nga itungpalna ti ministeriona.’ Maaramidna dayta no asikasuenna a naimbag ti amin nga annongenna, nga awan ti maliwayanna wenno parparawpaw nga itungpalna. Mapagtalkan ti kasta a tao uray kadagiti babassit a banag.​—Lucas 12:48; 16:10.

4. Ania ti tumulong kadatayo a mangitungpal a naan-anay iti ministerio?

⁴ Ti naan-anay a panangitungpal iti ministeriotayo dina kanayon a kalikaguman ti ad-adu a tiempo. Imbes ketdi, kalikagumanna ti epektibo a panangusar iti tiempo. Ti natimbeng a panangusar iti tiempo tulonganna ti amin a Kristiano a mangiringpas kadagiti bambanag iti ministerio. Tapno ad-adu ti panawenna a mangasaba, masapul nga organisado ti maysa a panglakayen tapno matimbengna ti eskediulna ken tapno ammona no ania a trabaho ti mabalinna nga italek kadagiti dadduma ken no kasano nga aramidenna dayta. (Hebreo 13:17) Natural laeng a ti maysa a mararaem a panglakayen aramidenna ti pasetna, kas ken Nehemias, a personal a nakiraman iti panangbangon kadagiti pader ti Jerusalem. (Nehemias 5:16) Ken amin nga adipen ni Jehova nasken a regular a makipasetda iti panangikasaba iti Pagarian.​—1 Corinto 9:16-18.

5. Ania koma ti panangmatmattayo iti ministerio?

⁵ Anian a nagragsak ti trabahotayo kas manangiwaragawag iti naipasdeken a Pagarian idiay langit! Sigurado nga ipategtayo ti pribilehiotayo a mangikasaba iti naimbag a damag iti intero a daga sakbay a dumteng ti panungpalan. (Mateo 24:14) Nupay imperpektotayo, makapabileg ti sasao ni Pablo: “Addaankami itoy a gameng [ti ministerio] kadagiti damili a basehas, tapno ti pannakabalin a nalablabes ngem ti gagangay biang koma ti Dios ket saan nga agtaud iti bagbagimi.” (2 Corinto 4:7) Wen, makaipaaytayo iti makaay-ayo a panagserbi​—ngem babaen laeng ti pigsa ken sirib a naggapu iti Dios.​—1 Corinto 1:26-31.

Panangyanninaw iti Dayag ti Dios

6. Ania ti naggidiatan ti natural nga Israel ken ti naespirituan nga Israel?

⁶ No maipapan kadagiti napulotan a Kristiano, kuna ni Pablo a ti Dios ti “namagbalin kadakami a makaanayen a kualipikado a ministro ti maysa a baro a tulag.” Pinaggidiatna ti baro a tulag a naited iti naespirituan nga Israel babaen ken Jesu-Kristo ken ti daan a Linteg ti tulag a naited iti natural nga Israel babaen ken Moises. Innayon ni Pablo nga idi simmalog ni Moises manipud iti Bantay Sinai nga awitna dagiti tapi ti bato a naglaon kadagiti Sangapulo a Bilin, nakaranraniag ti rupana a di maperreng dagiti Israelita. Ngem idi agangay, nakarkaro pay ti napasamak gapu ta “napangudel dagiti pannakabalin ti isipda” ket naabbungotan dagiti pusoda. Ngem idi nagsublida ken ni Jehova buyogen ti naimpusuan a debosion, naikkat ti abbungot. Simmaruno a tinukoy ni Pablo ti ministerio a naitalek kadagidiay adda iti baro a tulag. Kunana: “Datayo amin, . . . nga addaan iti di naabbungotan a ruprupa iyanninawtayo ti dayag ni Jehova a kasla kadagiti sarming.” (2 Corinto 3:6-8, 14-18; Exodo 34:29-35) Ti “sabsabali a karnero” ni Jesus ita pribilehioda met nga iyanninaw ti dayag ni Jehova.​—Juan 10:16.

7. Kasano a dagiti tattao mayanninawda ti dayag ti Dios?

⁷ Kasano a dagiti managbasol a tattao mayanninawda ti dayag ti Dios, yantangay awan ti tao a makakita iti Dios ket kaskasdi nga agbiag? (Exodo 33:20) Bueno, malaksid iti mismo a kinadayag ni Jehova, nadayag ti panggepna a mangalangon iti kinasoberanona babaen ti Pagarianna. Dagiti kinapudno a nainaig iti Pagarian ket paset dagiti “natan-ok a bambanag ti Dios” nga inwaragawag dagidiay immawat iti nasantuan nga espiritu idi Pentecostes 33 K.P. (Aramid 2:11) Babaen ti panangiwanwan ti espiritu, naan-anay a naitungpalda ti ministerio a naitalek kadakuada.​—Aramid 1:8.

8. No maipapan iti ministerio, ania ti determinado nga inaramid ni Pablo?

⁸ Aniaman ti mapasamak, determinado ni Pablo a naan-anay a mangitungpal iti ministeriona. Insuratna: “Yantangay adda kadakami daytoy a ministerio sigun iti asi a naipakita kadakami, saankami a sumuko; no di ket nagpanawanmi ti mailimlimed a bambanag nga ibain, a saan a magmagna a sisisikap, wenno lalaokan ti sao ti Dios, no di ket babaen ti panangiparangarang iti kinapudno nga irekrekomendami ti bagbagimi iti tunggal natauan a konsiensia iti imatang ti Dios.” (2 Corinto 4:1, 2) Babaen iti “daytoy a ministerio” a tinukoy ni Pablo, naipakaammo ti kinapudno ken nairakurak ti naespirituan a lawag.

9, 10. Kasano a posible a mayanninaw ti dayag ni Jehova?

⁹ No maipapan iti Gubuayan ti pisikal ken naespirituan a lawag, insurat ni Pablo: “Ti Dios ti nagkuna: ‘Agsilnag koma ti silaw manipud iti sipnget,’ ket isu nagsilnag iti puspusotayo tapno lawagan ida iti nadayag a pannakaammo iti Dios babaen ti langa ni Kristo.” (2 Corinto 4:6; Genesis 1:2-5) Gapu ta naparaburantayo iti di magatadan a pribilehio kas ministro ti Dios, pagtalinaedentayo koma a nadalus ti bagitayo tapno mayanninawtayo ti dayag ni Jehova kas kadagiti sarming.

¹⁰ Dagiti indibidual a nakullaapan iti naespirituan dida makita ti dayag ni Jehova wenno ti panangyanninaw kenkuana ni Jesu-Kristo, ti Dakdakkel a Moises. Ngem kas ad-adipen ni Jehova, makitatayo ti nadayag a lawag babaen ti Kasuratan ket iyanninawtayo dayta kadagiti sabsabali. Tapno dagidiay adda ita iti naespirituan a kinasipnget malasatanda ti pannakadadael, kasapulanda ti lawag manipud iti Dios. Buyogen ngarud ti dakkel a rag-o ken regta, agtulnogtayo iti bilin ti Dios a pagsilnagentayo ti silawtayo iti kasipngetan agpaay iti pakaidayawan ni Jehova.

Pagsilnagenyo ti Silawyo Kadagiti Panagadal iti Biblia

11. Ania ti kinuna ni Jesus maipapan iti panangisilnag iti silawtayo, ken ania ti maysa a pamay-an a maaramidtayo dayta iti ministeriotayo?

¹¹ Kinuna ni Jesus kadagiti pasurotna: “Dakayo ti silaw ti lubong. Ti maysa a siudad saan a mabalin nga ilemmeng no naisaad iti rabaw ti maysa a bantay. Gangtan ti tattao ti maysa a pagsilawan ket ikabilda dayta, saan nga iti sirok ti pagsukat a labba, no di ket iti pagsaadan ti silaw, ket silnaganna amin dagidiay adda iti balay. Kasta met agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.” (Mateo 5:14-16) Ti nasayaat a konduktatayo tignayenna ti dadduma a mangidayaw iti Dios. (1 Pedro 2:12) Ti nadumaduma a benneg ti panagebangheliotayo mangtedda iti adu a gundaway tapno mapagsilnagtayo ti silawtayo. Maysa kadagiti kangrunaan a panggeptayo isu ti panangisilnag iti naespirituan a lawag manipud iti Sao ti Dios babaen ti epektibo a panangyadal iti Biblia iti pagtaengan. Maysa daytoy a napateg a pamay-an tapno naan-anay a maitungpal ti ministeriotayo. Aniada a singasing ti tumulong kadatayo a mangikondukta iti panagadal iti Biblia a makagutugot iti puso dagiti agsapsapul iti kinapudno?

12. Kasano a nainaig ti kararag iti panangyadal iti Biblia?

¹² No ikararagtayo daytoy ken ni Jehova, ipakpakitatayo a desididotayo a mangyadal iti Biblia. Mangipakita met a napateg kadatayo ti panangtulong kadagiti dadduma a gumun-od iti pannakaammo maipapan iti Dios. (Ezequiel 33:7-9) Sigurado a sungbatan ni Jehova dagiti kararagtayo ken bendisionanna ti sipapakinakem a panagreggettayo iti ministerio. (1 Juan 5:14, 15) Ngem saantay laeng nga ikararag a makasaraktayo iti mayadalan iti Biblia. No nakaipasdektayo iti maysa a panagadal, ti panangikararag ken panangmennamenna kadagiti espesipiko a kasapulan ti estudiante tulongannatayo a mangikondukta a sieepektibo iti tunggal panagadal.​—Roma 12:12.

13. Ania ti makatulong kadatayo a mangikondukta iti epektibo a panangyadal iti Biblia?

¹³ Tapno epektibo ti panangyadal iti Biblia, masapul nga agsaganatayo a naimbag iti tunggal panagadal. No kasla ditay kabaelan, nalabit a makatulong ti panangpaliiw no kasano ti panangikondukta ti manangaywan iti Panagadal iti Libro ti Kongregasion iti kada lawas. Mabalintay met ti sagpaminsan a kumuyog kadagiti agibumbunannag iti Pagarian a naaddaan kadagiti nasayaat a resulta ti panangyadal iti Biblia. Siempre, masapul met nga usigentayo ti kababalin ken wagas ti panangisuro ni Jesu-Kristo.

14. Kasanotayo a madanon ti puso ti iyad-adalantayo iti Biblia?

¹⁴ Pagragsakan ni Jesus nga aramiden ti pagayatan ti nailangitan nga Amana ken isarita ti maipapan iti Dios. (Salmo 40:8) Naalumamay ken nadanonna ti puso dagidiay agdengdengngeg kenkuana. (Mateo 11:28-30) Ikagumaantayo ngarud a danonen ti puso dagidiay iyad-adalantayo iti Biblia. Tapno maaramidtayo dayta, nasken nga agsaganatayo iti tunggal panagadal, a sipapanunot iti kasasaad ti estudiante. Kas pagarigan, no dimmakkel ti estudiante iti maysa a kultura a di mamati iti Biblia, masapul a kombinsirentayo a pudno ti Biblia. Gapuna, masapul a mangdakamattayo iti adu a teksto ken ilawlawag dagita.

Ilawlawag Dagiti Ilustrasion Kadagiti Iyad-adalantayo

15, 16. (a) Kasanotayo a matulongan ti maysa nga estudiante no dina matarusan ti maysa nga ilustrasion iti Biblia? (b) Ania ti aramidentayo no ti maysa kadagiti publikasiontayo ket nagusar iti ilustrasion a narigat a maawatan ti maysa nga agad-adal iti Biblia?

¹⁵ Nalabit a ti iyad-adalan iti Biblia ket saan a pamiliar iti maysa nga ilustrasion a naaramat iti Kasuratan. Kas pagarigan, mabalin a dina maawatan no ania ti kayat a sawen ni Jesus idi kinunana a maikabil ti pagsilawan iti pagsaadan ti silaw. (Marcos 4:21, 22) Tuktukoyen ni Jesus ti maysa a kadaanan a lampara a nasindian. Maikabil ti kasta a pagsilawan iti maysa a nairanta a pagsaadan ket iti kasta, malawaganna ti maysa a paset ti balay. Nalabit a kasapulan ti panagsukimat kadagiti suheto a “Lamp” (Pagsilawan) ken “Lampstand” (Pagsaadan ti Silaw) iti publikasion a kas iti Insight on the Scriptures tapno malawlawagan ti ilustrasion ni Jesus.a Anian a makapnek ti mangyadal iti Biblia no makaipaay iti eksplanasion a maawatan ken maapresiar ti estudiante!

¹⁶ Mabalin a ti maysa a katulongan iti panagadal iti Biblia ket naglaon iti ilustrasion a narigat a maawatan ti estudiante. Ilawlawagyo koma a naimbag dayta, wenno mangusar iti sabali nga ilustrasion a pareho ti puntona. Mabalin nga ipagpaganetget ti publikasion a napateg iti relasion ti agassawa ti nasayaat a kapareha ken naannayas a panagtinnulong. Kas panangyilustrar iti dayta, mabalin a nadakamat ti maysa a tao nga agpalpallayog iti trapeze, umibbat iti dayta, ket sippawen ti kaparehana a sirkero. Ngem imbes nga usaren dayta nga ilustrasion, ti kinapateg ti nasayaat a kapareha ken naannayas a panagtinnulong ket mabalin a mayilustrar babaen ti ar-aramiden dagiti trabahador a panagpipinnasa kadagiti kahon no agidiskargada manipud iti bapor.

17. Ania ti masursurotayo ken ni Jesus mainaig kadagiti ilustrasion?

¹⁷ Mabalin nga agkalikagum iti nasaksakbay a panagsagana ti panangusar iti alternatibo nga ilustrasion. Ngem mangipakita dayta nga adda personal nga interestayo iti iyad-adalantayo iti Biblia. Nagusar ni Jesus kadagiti simple nga ilustrasion tapno agbalin a nalawag dagiti narigat a suheto. Naglaon kadagiti kasta a pagarigan ti Sermonna iti Bantay, ken ipakita ti Biblia nga epektibo ti panangisurona kadagiti agdengdengngeg kenkuana. (Mateo 5:1–7:29) Inan-anusan ni Jesus nga inlawlawag dagiti bambanag gapu ta maseknan unay kadagiti sabsabali.​—Mateo 16:5-12.

18. Ania ti maisingasing maipapan kadagiti teksto a nadakamat kadagiti publikasiontayo?

¹⁸ Ti pannakaseknantayo kadagiti sabsabali tignayennatayo a ‘makirinnason manipud iti Kasuratan.’ (Aramid 17:2,  3) Agkalikagum daytoy iti sikakararag a panagadal ken nainsiriban a panangusar kadagiti publikasion nga ipapaay ti “matalek a mayordomo.” (Lucas 12:42-44) Kas pagarigan, adu a teksto ti inadaw ti libro a Pannakaammo a Mangiturong iti Biag nga Agnanayon.b Gapu ta kurang ti espasio, dadduma a teksto ti nadakamat ngem saan a naadaw. Bayat ti panagadal iti Biblia, napateg a basaen ken ilawlawag ti dadduma kadagitoy a nadakamat a teksto. Total, naibatay iti Sao ti Dios ti isursurotayo, ken nabileg ti pannakabalinna. (Hebreo 4:12) Agpannuraykayo iti Biblia iti intero a panagadal, a masansan nga usaren dagiti teksto a masarakan kadagiti parapo. Tulonganyo a makita ti estudiante no ania ti ibaga ti Biblia maipapan iti maysa a banag wenno aramid. Pagreggetanyo nga ipakita no kasano a magunggonaan ti estudiante no agtulnog iti Dios.​—Isaias 48:17, 18.

Agusar Kadagiti Mamagpanunot a Saludsod

19, 20. (a) Apay a mangusar kadagiti mangaon iti kapanunotan a saludsod no mangyad-adal iti Biblia? (b) Ania ti mabalin nga aramiden no agkalikagum iti kanayonan a panangusig ti maysa a suheto?

¹⁹ Ti nasigo a panangusar ni Jesus kadagiti saludsod tinulonganna dagiti tattao nga agpanunot. (Mateo 17:24-27) No usarentayo dagiti mangaon iti kapanunotan a saludsod iti wagas a di mapabainan ti estudiante, mabalin nga ipalgak dagiti sungbatna no ania ti panangmatmatna iti maysa a banag. Mabalin nga adda pay la dagiti panangmatmatna a di maitunos iti kasuratan. Kas pagarigan, mabalin a patienna ti Trinidad. Iti kapitulo 3, ipakita ti libro a Pannakaammo a saan a nagparang iti Biblia ti sao a “Trinidad.” Nangadaw ken nangdakamat dayta a libro kadagiti teksto a mangipakita nga agduma da Jehova ken Jesus, ken saan a maysa a persona ti nasantuan nga espiritu no di ket aktibo a puersa ti Dios. Mabalin nga umanayen ti panangibasa ken panangilawlawag kadagitoy a teksto ti Biblia. Ngem ania ngay no saan nga umdas dayta? Nalabit a kalpasan ti sumaruno a panagadal, mabalin a mangbusbos iti sumagmamano a tiempo a pagsaritaan dayta a suheto nga usaren ti sabali a publikasion dagiti Saksi ni Jehova a mangilawlawag iti dayta, kas iti broshur a Rumbeng Aya a Patienyo ti Trinidad? Kalpasanna, mabalintayo nga ituloy ti panagadal iti libro a Pannakaammo.

²⁰ Ania ngay no makaklaat wenno saan nga umiso ti sungbatna iti maysa a mangaon iti kapanunotan a saludsod. No nairaman ti panagsigarilio, wenno dadduma a sensitibo a suheto, mabalin nga isingasing nga ituloytayo ti panagadal ket pagsaritaantayto dayta a banag iti sabali a gundaway. No ammotayo nga agsigsigarilio pay laeng ti iyad-adalantayo, agsukimattayo kadagiti naipablaak nga impormasion a makatulong kenkuana a rumang-ay iti naespirituan. Bayat nga ikagumaantayo a danonen ti puso ti iyad-adalantayo, ikararagtayo a tulongan ni Jehova a rumang-ay iti naespirituan.

21. Ania ti mabalin a resultana no ibagaytayo ti panangisurotayo kadagiti espesipiko a kasapulan ti estudiante ti Biblia?

²¹ Buyogen ti panagsagana a naimbag ken iti tulong ni Jehova, awan duadua a maipaaytayo ti maitutop a wagas ti panangisuro a maibagay kadagiti espesipiko a kasapulan ti estudiante ti Biblia. Inton agangay, mabalin a matulongantayo a mangparang-ay iti nasged a panagayatna iti Dios. Matulongantayo met a mangpatanor iti panagraem ken apresasion iti organisasion ni Jehova. Ken anian a makapnek no bigbigen ti estudiante ti Biblia a ti ‘Dios pudno nga adda iti tengngatayo’! (1 Corinto 14:24, 25) Sapay ngarud koma ta mangikonduktatayo kadagiti epektibo a panagadal iti Biblia ken aramidentayo ti amin a kabaelantayo a tumulong kadagiti dadduma nga agbalin nga adalan ni Jesus.

Maysa a Gameng a Nasken nga Ipateg

22, 23. Ania ti kasapulan tapno naan-anay a maitungpaltayo ti ministeriotayo?

²² Tapno naan-anay a maitungpal ti ministeriotayo, masapul nga agpannuraytayo iti bileg a naggapu iti Dios. No maipapan iti ministerio, sinuratan ni Pablo dagiti padana a napulotan a Kristiano: “Addaankami itoy a gameng kadagiti damili a basehas, tapno ti pannakabalin a nalablabes ngem ti gagangay biang koma ti Dios ket saan nga agtaud iti bagbagimi.”​—2 Corinto 4:7.

²³ Napulotan man wenno kameng ti “sabsabali a karnero,” mayarigtay kadagiti narasi a damili a basehas. (Juan 10:16) Kaskasdi, ipaayannatayo ni Jehova iti bileg a kasapulantayo tapno matungpaltayo ti annongentayo aniaman ti tubeng a maipasango kadatayo. (Juan 16:13; Filipos 4:13) Sapay ngarud koma ta naan-anay nga agtalektayo ken ni Jehova, ipategtayo ti naindaklan a serbisiotayo, ken naan-anay nga itungpaltayo ti ministeriotayo.

[Footnotes]

Ania ti Sungbatyo?

• Ania ti mabalin nga aramiden dagiti panglakayen tapno naan-anay a maitungpalda ti ministerioda?

• Kasanotayo a maparang-ay ti kinaepektibo ti panangyadaltayo iti Biblia?

• Ania ti aramidenyo no adda ilustrasion a saan a maawatan ti iyad-adalanyo iti Biblia wenno kasapulan ti kanayonan nga impormasion maipapan iti maysa a suheto?

[Ladawan iti panid 16]

Mangisuro dagiti Kristiano a panglakayen iti kongregasion ken tumulongda a mangsanay kadagiti kapammatian iti ministerio

[Ladawan iti panid 18]

Ti panangikondukta kadagiti epektibo a panagadal iti Biblia ket maysa a pamay-an a mapagsilnagtayo ti silawtayo