Malagipyo Pay Aya?
Tinagiragsakyo aya ti panangbasa kadagiti nabiit pay a ruar Ti Pagwanawanan? Ngarud, kitaenyo no masungbatanyo dagiti sumaganad a salsaludsod:
◻ Yantangay naikeddeng dagiti nasukir nga anghel idiay Tartaro, aniat’ kinaipapanan daytoy kadakuada? (2 Pedro 2:4)
Awanen lugar nga okuparanda iti nasantuan nga organisasion ni Jehova ken nagessatdan manipud nadiosan a lawag. Nupay kasta, agan-andarda pay laeng iti sidong ti panangiturong ni Satanas ken agtultuloy iti nasinged a pannakidennada kadagiti tattao, a pagregreggetanda nga iturayan dagiti lallaki, babbai, ken uray pay dagiti ub-ubbing. (Apocalipsis 12:12, 17)—4/15, panid 14.
◻ Apay a nasken a “guraen ti dakes” iti mata ni Jehova? (Salmo 97:10)
Dagidiay manggura ti dakes saanda a biruken dagiti pamay-an tapno agpennekda iti dayta. Iti kasumbangirna, dagiti tattao a saan a manggura iti dayta mabalin nga iti pisikal idianda dayta ngem iti pampanunotda tartarigagayanda a makiramanda koma kadagiti dakes a bambanag.—4/15, panid 21.
◻ Iti ilustrasion ni Jesus iti talento, ania a nadayaw a leksion ti naiwayat nga agpaay kadagiti isuamin nga agkuna a paspasurot ni Kristo? (Mateo 25:14-30)
Masapul nga agtrabahoda a mangparang-ay kadagiti kukua ti nailangitan nga Apoda babaen iti pannakiramanda a naan-anay iti panangaskasaba. Babaen laeng iti dayta a maipasigurado kadakuada ti panangawat ti komendasion ni Jesus ket magunggonaanda. Iti kasta maliklikandat’ pannakaipalladawda iti kasipngetan idiay ruar ken pannakadadael iti kamaudianan.—5/1, panid 9.
◻ Aniat’ kayat a sawen ni Jesus idi imbagana kadagiti adalanna nga agkararagda: “Ket dinakam iyeg iti pannakasulisog”? (Mateo 6:13)
Saan koma nga ipakatarusan dagitoy a sasao a kaipapananna a ni Jehova ti mangsulsulisog kadatayo nga agbasol. Imbes ketdi, datayo, iti epektona, mabalintay a dawaten ken Jehova a dinatay koma palubosan a matnag no masulisog wenno mapilitan a sumukir kenkuana. Mabalintay ti umararaw ken Amatayo nga iwanwanna dagiti addangtayo tapno awan komat’ sulisog nga umay kadatayo a nakadagdagsen unay nga ibturan. (1 Corinto 10:13)—5/15, panid 19.
◻ Maiyanatup kadi para iti Kristiano a maindieksionan ti kapaset ti dara, kas iti immune globulin wenno albumin?
Iti panagtulnog iti linteg ti Dios, saan nga awaten dagiti Kristiano ti panangiyalison kadagiti kangrunaan a kompuesto ti dara—ti plasma, dagiti nalabaga a selula, puraw a selula, wenno platelets. Dadduma kadagiti Saksi ni Jehova, nupay kasta, mariknada iti konsiensiada a mabalindat’ umawat ti indieksion ti maysa kadagiti babassit a kapaset ti protina iti plasma. Makapainteres, ta dadduma kadagitoy a protina ti natural a lumasat manipud ti pagayusan ti dara ti babai a masikog nga agturong iti naisina a sistema ti dara iti sikogna.—6/1, panid, 30, 31.
◻ Aniat’ panggep a sinerbian ti panangbuggo ni Jesus iti saka dagiti adalanna iti naudi a balido a Paskua?
Ni Jesus ti mangisursuro kadagiti adalanna ti leksion iti kinapakumbaba. Awan koma ti asinoman a birukenna ti kangrunaan a puesto, a pampanunoten nga isut’ importante unay. Imbes ketdi, amin rebbeng a tuladenda ti ulidan ni Jesus ken situtulokda koma nga agserbi iti maysa ken maysa nga awan panangidumdumana, uray no kasano a di makaay-ayo ken kababa ti maysa a trabaho. (Juan 13:12-17)—6/15, panid 9.
◻ Iti ania a pannakaawat a dagiti Judio idiay Berea ‘siaannad a sinuksukimatda’ dagiti Kasuratan? (Aramid 17:11)
Saan a gapu ta dagiti taga Berea nagduaduaanda ni Pablo ken ti mensahe nga inyegna kadakuada, no di ket nagsukimatda tapno paneknekan a ni Jesus isut’ Mesias. Nga adu kadakuada ti nagbalin a manamati ipakitana a ti motiboda ket umiso. (Aramid 17:12)—6/15, panid 18.
◻ Ania ti “libro dagiti Gubat ni Jehova?” (Numeros 21:14)
Daytoy idi ti mapagtalkan a historia dagiti gubat ti Dios a maipaay iti ilina. Nalabit nangrugi dayta iti panagballigi ni Abraham kontra kadagiti armado a manangraut iti Naikari a Daga kas nailanad idiay Genesis kapitulo 14. Ti grande a pagultimuan ti libro isunto “ti gubat ti dakkel nga aldaw ti Dios a Mannakabalin-amin” inton Har–Magedon. (Apocalipsis 16:14, 16)—7/1, panid 20, 22.
◻ Kasano a ti Saot’ Dios, a ti Biblia, tulongannatayo nga ibturan ti ut-ot?
Ti Biblia ibagana kadatayo no apay a pinalubosan ni Jehova ti ut-ot ken ipasigurona met kadatayo a ti ut-ot dandanin agpatingga. (Roma 5:12; Apocalipsis 21:1-5)—7/15, panid 4, 5.
◻ Kasano a ti ili ti Dios itatta “kasla sarming nga iyanninagna ti dayag ni Jehova”? (2 Corinto 3:18)
Ti dayag ti Dios agraniag babaen “ti lawag ti naimbag a damag ti dayag ni Kristo, isu a ladawan ti Dios.” Isarsarming dagiti Saksi ni Jehova daytoy a dayag babaen ti panagsaoda iti dayag ni Jehova ken ti dayag ti Pagarianna babaen iti Anakna. (2 Corinto 4:4-6)—7/15, panid 15, 16.
◻ Kaano a rebbeng a mabautisaran ti maysa a tao?
Ti bautismo ket maysa nga addang nga alaen inton ti maysa nakaaramiden ti naan-anay, awan ikedkedkedna, ken awan kondisionna a dedikasion ken Jehova baeten ken Kristo Jesus tapno aramiden ti pagayatan ti Dios.—8/1, panid 14.