“Ti Bileg nga Ad-adda Ngem ti Gagangay”
KASANO kaadu a panagsagaba ti maibturan ti maysa a Kristiano? Ita, dagiti Kristiano iti intero a lubong sangsanguenda ti kinapanglaw, panagsisina ti pamilia, pannakadidigra iti emosion, sakit, gubgubat, ken pannakaidadanes. Nainrasonan kadi nga inanamaen a masalimetmetanda ti kinatarnaw iti laksid amin dagitoy? Kuna ni apostol Pablo a nainrasonan. Insuratna: “Kadagiti isuamin addaanak ti bileg gapu iti daydiay mamapigsa kaniak.”—Filipos 4:13.
Impakitan ti historia a ti pigsa manipud ken Jehova ket pudno nga umdas kadagiti amin a banag. Kas pangarigan, kabayatan ti panagturay a Nazi idiay Alemania, nagsagaba dagiti Saksi ni Jehova iti narungsot a pannakaidadanes. Nakapagibturda kadi? Ti libro a Les Bibelforscher et le nazisme (The Bible Students and Nazism) kunaenna: “Agpapan pay amin dagiti pannakababaot, pammutbuteng, ken panangiparit, agpapan pay dagiti pannakaibabain iti publiko, dagiti pannakibalud ken pannakaipriso kadagiti kampo konsentrasion, dagiti Estudiante ti Biblia [dagiti Saksi ni Jehova] dida pulos impalubos a ‘mabaliwan ti adalda.’”
Kadagiti kampo konsentrasion, dagiti Saksi ket mabigbigda babaen iti babassit a lila a trianggulo kadagiti ima ti badoda ken naisinada para iti naidumduma a kinarungsot. Daytoy kadi ti nangburak kadakuada? Kuna ni sikolohista a Bruno Bettelheim a “dida laeng impakita dagiti di gagangay a rukod ti natauan a pannakaidayaw ken moral a kababalin, no di ket kasla nasalaknibanda maibusor iti isu met laeng a kapadasan iti kampo a di nagbayag isut’ nangdadael kadagiti tattao nga imbilang a mararaem dagiti managpaliiw pampanunot a gagayyemko ken siak.”
Wen, naaddaandat’ ‘pigsa kadagiti isuamin.’ Apay? Gapu ta nagpannurayda ken Jehova. Kuna ni Pablo: “Ngem addaankami iti daytoy a gameng kadagiti damili a basehas, tapno ti bileg nga ad-adda ngem ti gagangay biang koma ti Dios ket saan a kadakami.” (2 Corinto 4:7) No maipasangokayo man iti makasuot a kasasaad, kumita a sitatalek ken Jehova maipaay iti tulong. Gapu ta mapapigsakayo babaen iti ipaayna a bileg nga ad-adda ngem ti gagangay, kabaelanyonto ti agibtur.—Lucas 11:13.