Dagiti Saludsod Manipud Kadagiti Managbasa

Agpayso kadi nga inasawa ni Faraon ni Sara, ti asawa ni Abraham, kas agparang manipud panangipaulog ti Genesis 12:19 kadagiti dadduma a bersion ti Biblia?

Saan, ni Faraon ket nalapdan a mangala ken Sara (Sarai) kas asawana. Ngarud, ti dayaw ken kinatakneng ni Sara ket saan a naikompromiso.

Matulongantayo a makakita iti daytoy babaen panangsukimat iti kasasaad iti kontekstona. Ti maysa a panagbisin ti nangpilit ken Abraham (Abram) nga agkamang idiay Egipto iti apagbiit. Isut’ nagamak nga amangan no agpeggad ti biagna sadiay gapu iti nalibnos nga asawana, a ni Sara. Di pay nakaputot ni Abraham ken Sara idi, gapuna a no isut’ napapatay idiay Egipto, madadaelen ti linia ti Bin-i, ti Bin-i a pakabendisionan ti amin a pamilia ti daga. (Genesis 12:1-3) Gapuna a binilin ni Abraham ni Sara a mangiyam-ammo iti bagina kas kabsatna a babai, gapu ta kinapudnona ket isut’ kabsatna iti ama.​—Genesis 12:10-13; 20:12.

Ti panagbutengna ket saan nga awan nakaibatayanna. Inlawlawag ni eskolar nga August Knobel: “Kiniddaw ni Abraham ken Sara nga iyam-ammona ti bagina kas kabsatna a babai idiay Egipto tapno isut’ saan a mapapatay. No isu ket mamatmatan kas maysa a naasawaan a babai, mabalin laeng nga isut’ maala ti maysa nga Egipcio babaen panangpapatayna iti asawana ken agtagikua kenkuana; no isu ket mamatmatan kas kabsatna a babai, adda posibilidad ti pannakagun-od kenkuana manipud iti kabsatna a lalaki babaen iti nasayaat a pamay-an.”

Dagiti prinsipe ti Egipto, nupay kasta, dida nakitulag ken Abraham maipapan iti panangasawa ni Faraon ken Sara. Basta impanda laeng ni nalibnos a Sara iti balay ni Faraon, ket ti agturay iti Egipto inikkanna kadagiti sagut ti maipatpato a kabsatna a lalaki, ni Abraham. Ngem simmaruno iti daytoy, sinagid ni Jehova ti sangakabbalayan ni Faraon kadagiti saplit. Idi a ti pudno a kasasaad ket naipanayag ken Faraon iti sumagmamano a di nadakamat a pamay-an, kunana ken Abraham: “Apay-apay kinunam, ‘Isu kabsatko,’ iti kasta isu ti nangalaak nga asawaen? Ita ngarud, adtoy ti asawam. Alaem ket inkan!”​—Genesis 12:14-19.

Ti The New English Bible ken sabsabali pay a patarus ti Biblia ipaulogda ti adda iti ngato a naiyitaliko a paset ti bersikulo nga “iti kasta isu ti innalak nga asawa” wenno umasping a sasao. Nupay saan met a talaga a palso a patarus, ti kakasta a sasao ket makaited panangipagarup a pudno nga inasawa ni Faraon ni Sara, a ti panagasawada ket pudno a naibanag. Mabalin a mapaliiw nga idiay Genesis 12:19 ti Hebreo a verbo a naipaulog nga “alaen” ket adda iti imperfect state, a mangipabpabigbig iti maysa a tignay a di pay nakumpleto. Ipaulog ti New World Translation daytoy a Hebreo a verbo maitunos iti konteksto ken iti pamay-an a silalawag a mangisilnag iti kasasaad ti verbo​—“iti kasta isu ti nangalaak nga asawaen”.a Nupay ni Faraon “alaenna koman” ni Sara kas asawana, isut’ saan pay a nakaaramid iti aniaman a pamay-an wenno nainaig a seremonia.

Nupay masansan a nababalawen ni Abraham gapu iti panangipamusposanna iti dayta a banag, isut’ nagtignay maipaay iti intereses ti naikari a Bin-i ken iti amin ngarud a sangatauan.​—Genesis 3:15; 22:17, 18; Galacia 3:16.

Iti maidilig a gundaway a mabalin a napeggad met, ni Isaac pinaglibakna met ti asawana, ni Rebecca, iti naasawaan a kasasaadna. Iti dayta a banag ti anakda a ni Jacob, nga isu ti pagtaudan ti linia ti Bin-i, ket naiyanaken ken nalawag a maysan nga agtutubo a lalaki. (Genesis 25:20-27; 26:1-11) Uray kasta, ti motibo iti likudan daytoy a nalinteg a panangsikap ket nalabit isu met laeng iti motibo ni Abraham. Kabayatan ti bisin agnanaed idi ni Isaac ken ti pamiliana idiay masakopan ti ari a Filisteo a managan Abimelech. No naammuanna a ni Rebecca ket naiyasawa ken Isaac, nalabit a pinapatay koma ni Abimelech ti amin a sangakabbalayan ni Isaac, a kinaipapananna koma ti pannakatay ni Jacob. Iti daytoy a kaso met, nakibiang ni Jehova tapno salaknibanna dagiti adipenna ken ti linia ti Bin-i.

[Footnote]