Sadinot’ Pangalaanda iti Bilegda?

NO MINGMINGANYO a naimbag ti kulibangbang iti daytoy a ladawan, makitayo a maysa kadagiti uppat a payakna ti naan-anay nga awan usarna. Nupay kasta, agtultuloy pay laeng a makakaan ken makatayab ti kulibangbang. Saan a karkarna daytoy a kaso. Napaliiw a makapagtultuloy dagiti kulibangbang iti inaldaw a trabahoda uray awanen ti 70 porsiento ti payakda.

Kasta met, adu a tattao ti mangipakita iti kinatibker. Iti laksid dagiti nadagsen a parikut iti pisikal wenno emosion, dida sumuko.​—Idiligyo ti 2 Corinto 4:16.

Personal a nagsagaba ni apostol Pablo kadagiti nakaro a rigat kadagidi panagdaliasatna kas misionero. Nasapsaplit, nababaut, naubor, ken naibalud. Mainayon pay, nagsagaba iti maysa a kita ti an-annayen, nalabit parikut kadagiti matana, a masansan a “siit iti lasag” kenkuana.​—2 Corinto 12:7-9; Galacia 4:15.

Maysa a Kristiano a panglakayen nga agnagan David, a nakidangadang iti nakaro a panagliday iti sumagmamano a tawen, mamati a napateg iti panagimbagna ti bileg ni Jehova. “Adu a daras a kasla mapukpukaw ti nagrigat a gun-oden nga irarang-ay,” ilawlawagna. “Idi naipasangoak iti kasta a pannakaupay, intalekko ti bagik ken Jehova, ket pudno a sinaranaynak. Addada gundaway a nagkararagak iti adu nga oras iti maysa a tiempo. No makisaritaak ken Jehova, maikkat ti ladingitko ken pannakariknak iti kinaawan serserbina. Nakidangadangak kadagiti panawen ti nakaro a panagkapuy, ngem pagyamanan ken Jehova, manipud iti daytoy a panagkapuy dumteng ti bileg​—uray ti bileg tapno tumulong iti sabsabali.”

Pinabileg ni Jehova a Dios ni Pablo. Gapuna, naikunana: “Inton nakapuyak, iti kasta nabilegak.” (2 Corinto 12:10) Wen, dagiti pagkapkapuyan ni Pablo ti nangisuro kenkuana nga agpannuray iti inted-Dios a bileg. “Ta kadagiti amin a bambanag addaanak iti bileg gapu iti daydiay mangted kaniak iti pannakabalin,” kinuna ti apostol. (Filipos 4:13) Pudno a pabilgen ni Jehova dagiti adipenna.