“Dika Sumuksuko”
IDI naipasngay, ni Wilma Rudolph bassit ken masaksakit. Isut’ agtawenen iti uppat idi mangrugi a magna. Kalpasanna nagsakit iti scarlet fever ken pulmonia. Nupay isut’ nakalasat, naparalisado ti makattigid a sakana. Determinado a makapagnanto ni Wilma, minasahe ni nanangna ti kimmuttongen a sakana ket insurona dagiti tallo nga inauna nga annakna a mangaramid met iti kasta. Gapuna adda uppat nga agsusublat a “mangmasahe ken ni Wilma” iti inaldaw.
Idi agtawenen ni Wilma iti walo, nakapagnan nga addaan iti brace ti sakana. Di nagbayag isut’ agtarayen ken agay-ayamen. Isut’ determinado a mangparmek iti lappedna. Ti arsisio ti nangtulong kenkuana, ken kasta met ti balakad ni nanangna: “Dika sumuksuko.”
Di simmuko ni Wilma. Ket idi 1960, idiay Olimpiada idiay Roma, Italia, isut’ nakaawat iti tallo a balitok a medalia. Isut’ nangabak iti 100- ken 200-metros a panagtaray ken isut’ immuna iti maudi a paset iti 400-metros a panagtaray.
Bayat ti umuna a gubat sangalubongan, idi isut’ ubing a lalaki nga agedad iti pito, ni Glenn Cunningham nagsagaba iti makapapeggad-biag a pannakauram ti sakana. Binusbosna ti adu a bulbulan iti kama ket naibaga kenkuana a dinto makapagnan a pulos. Inaldaw nga inil-ilot ni nanangna dagiti nadangran a piskelna ken pinaregtana a magna ken agtaray. Di simmuko ni Glenn. Kinapudnona, isut’ nangabak kamaudiananna iti 21 kadagiti 31 a 1,600 metros a panagtaray iti natikub a pagtarayan iti Madison Square Garden. Ket, idi 1934, nangipasdek iti sangalubongan a rekord para iti maysa milia a tarayen.
Iti dadduma a paset iti biag datay amin sanguentayo ti maysa a kita wenno sabali a pakaupayan. Masansan daytat’ parikut iti salun-at. Imbes nga agpaabak, anian a nagsayaatan ti agbalin a determinado a di sumuko! “Ditay sumuksuko,” insurat ni apostol Pablo mainaig kadagiti naespirituan a panangikagumaan. “Uray pay no ti tao a makinruar [ti pisikal a bagitayo] kumapuy a kumapuy, ti tao a makin-uneg mapabaro [wenno mapabileg] nga inaldaw.”—2 Corinto 4:16.
[Picture Credit Line iti panid 31]
UPI/Bettmann Newsphotos