Kas ehemplo, padasenyo a mennamennaen ti sasao ni apostol Pablo a masarakan iti 2 Corinto 7:1: “Gapuna, yantangay adda kadatayo dagitoy a kari, dungdunguen, dalusantayo koma dagiti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” Alaenyo ti kababagas dagitoy a sasao. Isaludsodyo iti bagiyo, ‘Ania “dagitoy a kari” a dinakamat ni Pablo?’ Babaen ti panangbasa iti konteksto, makitayo a kuna dagiti immun-una a bersikulo: “‘“Rummuarkayo manipud iti tengngada, ket isinayo ti bagbagiyo,” kuna ni Jehova, “ket isardengyo ti mangsagsagid iti di nadalus a banag”’; ‘“ket awatenkayto.”’ ‘“Ket agbalinakto nga ama kadakayo, ket dakayonto dagiti annak a lallaki ken babbai kaniak,” kuna ni Jehova a Mannakabalin-amin.’”​—2 Corinto 6:17, 18.

Ti bilin ni Pablo a ‘dalusan ti bagbagitayo manipud iti pakatulawan’ ket napupuersa ita! Kas napigsa a pakagutugotan a mangaramid iti kasta, kari ti Dios nga ‘awatennatayo,’ kayatna a sawen, saluadan ken aywanannatayo. ‘Matagiragsakko ngata ti nadekket a relasion kenkuana​—kas iti relasion ti maysa nga anak iti ama?’ mabalinyo nga isaludsod iti bagiyo. Saan kadi a makaallukoy unay ti kapanunotan nga ‘awaten’ wenno ay-ayatennatayo ti masirib, managayat a Dios? No kasla karkarna dayta a kapanunotan kadakayo, paliiwenyo ti pamay-an a panangyebkas dagiti managayat nga amma iti ayat ken dungngoda kadagiti annakda. Ita darepdepenyo ti kasta a singgalut iti nagbaetanyo ken ni Jehova! No ad-adda a mennamennaenyo dayta, ad-adda a rumayray ti tarigagayyo a maaddaan iti kasta a relasion.

Ngem tandaananyo: Posible laeng ti panagbalin a nadekket iti Dios no “isardengyo ti mangsagsagid iti di nadalus a banag.” Isaludsodyo iti bagiyo: ‘Saan kadi a ti pannakaadikto iti tabako mairaman kadagiti “di nadalus a banag” a kondenaren ti Dios? Ti ngata panagusar iti dayta ket “pakatulawan iti lasag,” nga isarsarangna ti bagik iti amin a kita ti peggad iti salun-at? Tangay ni Jehova ket maysa a nadalus, wenno “nasantuan,” a Dios, anamonganna ngata ti inggagara a panangtulawko iti bagik iti kastoy a pamay-an?’ (1 Pedro 1:15, 16) Imutektekanyo ta mamakdaar met ni Pablo maibusor iti ‘pakatulawan iti espiritu ti maysa,’ wenno pagannayasan ti isip. Isaludsodyo iti bagiyo: ‘Daytoy kadi a pannakaadikto iturayanna ti panagpampanunotko? Ikagkagumaak kadi a penken ti tarigagayko, nalabit iti pagpeggadan ti salun-atko, ti pamiliak, wenno ti pay ketdi takderko iti imatang ti Dios? Kasano kagrabe nga impalubosko a dadaelen ti pannakaadikto iti tabako ti biagko?’ Ti panangsango kadagitoy mangupay a saludsod mabalin nga ipaayannakayo iti tured a mangisardeng!

Sakbay a naammuanda ti kinapudno, adda mula ti pagassawaan a Lin a 1,300 a bua a palma iti dagada. Nupay urayenna ti lima a tawen sakbay a panguartaan dagiti mula, iti panawen nga agbunga iti husto dagitoy, mangnamnama ti pagassawaan a Lin a makaganarda iti $77,000 kada tawen. Idi umadanin ti damo a panagapit, kasapulan a mangaramid ti pagassawaan a Lin iti napateg a pangngeddeng. Naammuanda babaen ti panagadalda iti Biblia a dagiti Kristiano masapul a dalusanda ti bagida “iti tunggal pakatulawan ti lasag ken iti espiritu” babaen ti panangliklik iti panagusar, wenno panangitandudo, iti narugit nga aramid a kas iti panagsigarilio, panagabuso iti droga, ken panagmama. (2 Corinto 7:1) Aniat’ aramidenda?

Gapu ta makonsiensia, inkeddeng ni Mr. Lin nga isardeng ti panagadalna. Kabayatanna, inlako ni Mrs. Lin dagiti bua manipud iti sumagmamano kadagiti datin a mulada a palma ket nakaganar iti nasurok a $3,000. Pangramanan laeng daytoy iti asidegen a maganarda no pagtalinaedenda dagiti mulada. Nupay kasta, ni Mr. Lin ket sidsidiren latta ti konsiensiana.

Inut-utobna a naimbag daytoy a banag agingga a, maysa nga aldaw, indawatna kadagiti Saksi iti lugarda a pukanenda dagiti buana a palma. Inlawlawag dagiti Saksi nga isu ti agdesision iti dayta; kayatna a sawen, isu ti masapul a ‘mangawit iti bukodna nga awit’ ket isu a mismo ti mangpukan kadagiti mula. (Galacia 6:4, 5) Pinaregtada a laglagipenna ti kari iti 1 Corinto 10:13, a kunana: “Awan ti sulisog a dimteng kadakayo malaksid ti kadawyan kadagiti tattao. Ngem ti Dios matalek, ket dinanto palubosan a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” Kasta met, nakirinnason kenkuana dagiti Saksi: “No dakami ti mangpukan kadagiti mulam, amangan no pagbabawyamto dayta ket pabasolennakami iti pannakalugim.” Di nagbayag kalpasanna, nariing ni Mrs. Lin iti ungor ti de-motor a ragadi. Pukpukanen ni lakayna ken ti annakna dagiti bua a palma!

Napaneknekan ni Mr. Lin a pudno ti kari ni Jehova. Nakagun-od iti trabaho a nangipaay kenkuana iti nadalus a konsiensia, a timmulong kenkuana nga agbalin a manangidaydayaw ken Jehova. Nabautisaran iti maysa nga asamblea sirkito dagiti Saksi ni Jehova idi Abril 1996.