Mangyeg Rag-o ti Napalalo a Kinaparabur

KAS naayat a Kristiano a manangaywan, pudno a maseknan ni apostol Pablo iti pagimbagan dagiti kapammatianna ken kayatna a tulongan ida. (2 Corinto 11:28) Isu nga idi ngalay ti dekada 50 iti umuna a siglo iti Kadawyan a Panawentayo, idi nangyurnos iti panagkolekta para kadagiti agkasapulan a Kristiano idiay Judea, ginundawayanna ti nangisuro iti napateg a leksion maipapan iti kinaparabur. Impaganetget ni Pablo a napateg unay ken Jehova ti naragsak a panangted: “Tunggal maysa aramidenna koma kas iti inkeddengna iti pusona, saan nga iti dakes a nakem wenno iti sidong ti pannakapilit, ta ti Dios ayatenna ti naragsak a manangited.”​—2 Corinto 9:7.

Naparabur Nupay Nakaro ti Kinakurapay

Saan a nalatak iti kagimongan ti kaaduan a Kristiano idi umuna a siglo. Kinuna ni Pablo a ‘saan nga adu [kadakuada] ti mannakabalin.’ Isuda dagiti “nakapuy a bambanag ti lubong,” “dagiti awan mamaayna a bambanag ti lubong.” (1 Corinto 1:26-28) Kas pagarigan, “nakaro ti kinakurapay” ken ‘pannakaparigat’ dagiti Kristiano idiay Macedonia. Kaskasdi, dagiti napakumbaba a manamati a taga Macedonia ti nagkiddaw iti pribilehio a tumulong iti pinansial para “iti ministerio a naikeddeng kadagiti sasanto”; ket sigun iti pammaneknek ni Pablo, intedda ti “nalablabes ngem iti pudno a kabaelanda”!​—2 Corinto 8:1-4.

Ngem saan a marukod ti kinaparabur sigun iti kaadu ti naited. Imbes ketdi, napateg ti motibo, kinamasindadaan a tumulong, ken kasasaad ti puso. Impasimudaag ni Pablo kadagiti Kristiano a taga Corinto a nairaman nga agpadpada ti isip ken puso iti panagkontribusion. Kinunana: Ammok ti kinamanagsaganayo iti panunot nga ipaspasindayagko kadagiti taga Macedonia maipapan kadakayo, . . . ket ti regtayo ginutugotna ti kaaduan kadakuada.” ‘Inkeddeng ti pusoda’ a mangted a sipaparabur.​—2 Corinto 9:2, 7.

‘Siaannugot ti Nakemda’

Mabalin a silalagip pay la ni apostol Pablo iti maysa a nagkauna a pagwadan ti naparabur a panangted, ti napasamak idiay let-ang nasurok a 15 a siglo ti napalabas sakbay ti kaaldawanna. Nawayawayaan dagiti 12 a tribu ti Israel manipud pannakaadipen idiay Egipto. Addada idin iti sakaanan ti Bantay Sinai, idi imbilin ni Jehova a mangbangonda iti tabernakulo a pagdayawan ken kargaanda dayta kadagiti alikamen a pagdayaw. Agkasapulan daytoy iti adu a sanikua, ket naawis ti nasion nga agkontribusion.

Ania ti inaramid dagiti Israelita? “Immayda, tunggal maysa a natignay ti pusona ken siaannugot ti nakemna, inyegda ti isagut ken Jehova, a maipaay iti pannakaaramid ti tolda ti gimong.” (Exodo 35:21) Adu kadi ti insagut daydi a nasion? Nakaad-adu! Kastoy ti naipadamag ken Moises: “Ti iyeg dagiti tattao ad-adu unay ngem ti umanay a maipaay iti aramid nga imbilin ni Jehova a maaramid.”​—Exodo 36:5.

Ania ti pinansial a kasasaad dagiti Israelita iti daydi a tiempo? Saan pay idi a nabayag, nakakaasida nga adipen, ‘napadagsenanda kadagiti aw-awit,’ ‘napait ti biagda,’ ‘naladingit.’ (Exodo 1:11, 14; 3:7; 5:10-18) Agparang ngarud a napanglawda. Pudno, addada arban ken pangen a tugot-tugot dagiti Israelita idi pimmanawda iti daga a nakaadipenanda. (Exodo 12:32) Ngem nalabit a saan unay nga adu, yantangay di nagbayag kalpasan ti ipapanawda idiay Egipto, nagreklamoda nga awan ti karne wenno tinapay a kanenda.​—Exodo 16:3.

Nangalaan ngarud dagiti Israelita kadagiti bambanag nga intedda para iti pannakabangon ti tabernakulo? Kadagiti dati nga appoda, dagiti Egipcio. Kuna ti Biblia: “Dagiti annak ti Israel . . . nagdawatanda dagiti Egipcio kadagiti alikamen a pirak ken al-alikamen a balitok, ken pagpagan-anay. . . . Inyawat [dagiti Egipcio] kadakuada dagiti dinawatda.” Ni Jehova, saan a ni Paraon, ti adda iti likudan daytoy a kinaparabur dagiti Egipcio. Kuna ti nadibinuan a rekord: “Ni Jehova pinaraburanna dagiti tattao iti imatang dagiti Egipcio, iti kasta nga inyawatda kadakuada dagiti dinawatda.”​—Exodo 12:35, 36.

Mailadawanyo ngarud ti narikna idi dagiti Israelita. Nagsagaba iti nakas-ang a pannakaadipen ken kinapanglaw ti adu a kaputotan. Ita, nawayadan ken adda kinabaknangda. No iranudda ngay ti dadduma kadagita a kinabaknang? Mabalin a minatmatanda koma dayta a nagrigatanda ket kalinteganda a bukodan. Nupay kasta, idi nakiddaw ti pinansial a panangsuportada iti nasin-aw a panagdayaw, nangtedda​—ket saan a mapilpilit wenno nakedngan! Dida linipatan a ni Jehova ti naggapuan dagiti material nga ik-ikutanda. Sibubuslon ngarud nga intedda dagiti pirak, balitok, ken animalda. ‘Natulnog ti pusoda.’ ‘Natignay ti pusoda.’ ‘Siaannugot ti nakemda.’ Pudno dayta a “maysa a daton a sibubulos a nakem ken Jehova.”​—Exodo 25:1-9; 35:4-9, 20-29; 36:3-7.

Sidadaan a Mangted

Saan a kanayon a marukod ti kinaparabur ti maysa a tao iti kadakkel ti kontribusionna. Palpaliiwen naminsan ni Jesu-Kristo dagiti tattao a mangipispisok iti kuarta kadagiti baul ti gameng idiay templo. Adu a sinsilio ti impisok dagiti nabaknang, ngem inapresiar ni Jesus ti marigrigat a balo a nakitana a nangipisok iti dua a babassit a sinsilio a bassit unay ti balorna. Kinunana: “Daytoy a balo, nupay napanglaw, nangipisok iti ad-adu ngem iti impisokda amin. . . . Manipud iti panagkasapulanna impisokna ti isuamin a pagbiag nga adda kenkuana.”​—Lucas 21:1-4; Marcos 12:41-44.

Maikanatad iti panangmatmat ni Jesus ti imbaga ni Pablo kadagiti taga Corinto. No maipapan iti panagkontribusion para kadagiti agkasapulan a kapammatianna, kastoy ti napaliiw ni Pablo: “No ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.” (2 Corinto 8:12) Wen, saan a pinnadakkelan wenno pagdidinniligen dagiti kontribusion. Mangted ti maysa a tao sigun iti kabaelanna, ket maay-ayo ni Jehova no naparabur ti maysa.

Nupay awan a talaga ti tao a mangpabaknang ken Jehova, a makinkukua iti amin a banag, ti panagkontribusion ket maysa a pribilehio a maaprobetsar dagiti agdaydayaw tapno maiparangarang ti ayatda kenkuana. (1 Cronicas 29:14-17) Mangyeg iti rag-o ken bendision ti Dios dagiti panagkontribusion a nabuyogan iti umiso a motibo ken mangitandudo iti umiso a panagdayaw, imbes a tapno pagpannakkel wenno gapu iti managimbubukod a motibo. (Mateo 6:1-4) Kinuna ni Jesus: “Ad-adu ti kinaragsak iti panangted ngem iti panangawat.” (Aramid 20:35) Masagraptayo dayta a kinaragsak babaen ti panangusartay iti pigsatayo nga agserbi ken Jehova ken babaen ti panangilatang iti dadduma kadagiti material a sanikuatayo tapno pangsuporta iti pudno a panagdayaw ken pangsaranay kadagiti maikari.​—1 Corinto 16:1, 2.

Sidadaan a Panangted Ita

Maragragsakan ita dagiti Saksi ni Jehova a makakita iti sangalubongan a panagrang-ay ti pannakaikasaba “daytoy naimbag a damag ti pagarian.” (Mateo 24:14) Iti naudi a dekada ti maika-20 a siglo, nasurok a 3,000,000 a tattao ti nabautisaran kas simbolo ti dedikasionda ken Jehova a Dios, ket agarup 30,000 a kongregasion ti nabuangay. Wen, ti kakatlo kadagiti kongregasion dagiti Saksi ni Jehova iti agdama ket nabukel iti naglabas a sangapulo a tawen! Kaaduan kadagitoy a panagrang-ay ket bunga ti kinaanep dagiti napasnek a Kristiano a nangusar iti tiempo ken pigsada tapno agsarungkar ken ipakaammo iti padada a tattao ti maipapan kadagiti panggep ni Jehova. Ti dadduma a panagrang-ay ket resulta ti trabaho dagiti misionero, a nangpanaw kadagiti pagtaenganda tapno makatulongda a mangikasaba iti Pagarian kadagiti adayo a pagilian. Gapu kadagita a panagrang-ay, nabukel dagiti baro a sirkito, a nangkalikagum iti pannakadutok dagiti baro a manangaywan ti sirkito. Kanayonanna, kasapulan ti ad-adu pay a Biblia a mausar iti panangasaba ken personal a panagadal. Masapul met dagiti kanayonan a nayimprenta a literatura. Ket iti adu a pagilian, mapalpalawa wenno masuksuktan dagiti patakder ti sanga nga opisina kadagiti daddadakkel a pasilidad. Naipaay amin dagitoy a kanayonan a kasapulan babaen ti tulong dagiti boluntario a kontribusion manipud iti ili ni Jehova.

Panagkasapulan Kadagiti Kingdom Hall

Gapu iti panagadu dagiti Saksi ni Jehova, nabatad a masapul unay dagiti Kingdom Hall. Ipakita dagiti naangay a surbey idi rugrugi ti tawen 2000 a nasurok a 11,000 a Kingdom Hall ti masapul kadagiti napanglaw a pagilian a limitado iti pinansial. Kitaenyo ti Angola. Iti laksid ti gerra sibil, tagtagiragsaken ti pagilian ti agarup 10 a porsiento a panagrang-ay iti bilang dagiti agibumbunannag iti Pagarian kada tawen. Nupay kasta, aggigimong iti ruar ti kaaduan kadagiti 675 a kongregasion iti daytoy a nalawa a pagilian iti Africa. Adda laeng 22 a Kingdom Hall iti pagilian ket kadagitoy, 12 laeng ti addaan iti atep.

Kasta met la ti kasasaad iti Democratic Republic of Congo. Nupay adda agarup 300 a kongregasion iti kabesera a siudad ti Kinshasa, adda laeng sangapulo a Kingdom Hall sadiay. Naganat nga agkasapulan iti nasurok a 1,500 a Kingdom Hall ti intero a pagilian. Gapu iti napartak a panagrang-ay kadagiti pagilian ti Makindaya a Europa, inreport ti Russia ken Ukraine a kasapulanda ti ginasut a Kingdom Hall. Ti napartak nga irarang-ay idiay Latin America ket nakakadkadlaw idiay Brazil, nga addaan iti nasurok a kagudua a milion a Saksi ket agkasapulan iti adu pay a Kingdom Hall.

Tapno maipaay dagiti kasapulan kadagita a pagilian, inyussuat dagiti Saksi ni Jehova ti maysa a napartak a programa ti panagbangon kadagiti Kingdom Hall. Daytoy a programa ket masupsuportaran babaen ti nabuslon a kontribusion dagiti kakabsat iti sangalubongan, tapno maaddaan uray dagiti kapanglawan a kongregasion iti mayanatup a lugar a pagdayawan.

Kas idi panawen ti nagkauna nga Israel, adu ti mairingpas gapu ta napasnek dagiti Kristiano a ‘mangidayaw ken Jehova babaen ti napapateg a bambanagda.’ (Proverbio 3:9, 10) Kayat ti Bagi a Manarawidwid dagiti Saksi ni Jehova nga alaen daytoy a gundaway tapno iyebkas ti napalaus a panagyaman kadagidiay natignay ti pusoda a nangted iti boluntario a tulong. Makapagtalektayo met nga agtultuloy ti espiritu ni Jehova a mangtignay iti puspuso dagiti agdaydayaw kenkuana tapno suportaranda iti kasapulan ti agtultuloy a rumangrang-ay a trabaho ti Pagarian.

Bayat nga agtultuloy ti sangalubongan a panagsaknap, sapay koma ta itultuloytayo a sapulen dagiti gundaway a maiparangarang ti kinaragsak ken kinamasindadaantayo a mangusar iti pigsa, panawen, ken sanikuatayo. Ket sapay koma ta masagraptayo ti pudpudno a rag-o nga itden ti kasta a panangted.

[Kahon iti panid 29]

‘USARENYO A NAINSIRIBAN!’

“Sangapulo ti tawenko. Impatulodko daytoy a gatad tapno paggatangyo iti papel wenno aniaman a material a pangaramidyo kadagiti libro.”​—Cindy.

“Kayatko nga ipatulod daytoy a gatad kadakayo tapno ad-adu pay ti maaramidyo a libro para kadakami. Naurnongko daytoy a gatad babaen ti panangtulongko ken tatangko. Usarenyo ngarud a nainsiriban!”​—Pam, agtawen iti pito.

“Maladingitanak gapu iti napasamak a bagyo. Sapay koma ta dikay naan-ano. Daytoy [$2, E.U.] laeng ti kuartak idiay banko.”​—Allison, agtawen iti uppat.

“Rudy ti naganko, ket 11 ti tawenko. Innem ti tawen ni adingko a Ralph. Dua ket kagudua met ni adingko a Judith. Tallo a bulan a nagurnongkami manipud iti balonmi nga ageskuela tapno makatulongkami kadagiti kakabsat idiay [pagilian a riniribuk ti gubat]. Nakaurnongkami iti 20 a doliar nga isu ti impatulodmi ita.”

“Maladingitanak para kadagiti kakabsat [a dinangran ti bagyo]. Adda nasapulak a 17 a doliar iti pannakipagtrabahok ken tatangko. Makaammokayon no ania ti pangusaranyo iti daytoy.”​—Maclean, agtawen iti walo.

[Kahon iti panid 31]

Dagiti Pamay-an ti Dadduma a Mangted iti

KONTRIBUSION PARA ITI SANGALUBONGAN A TRABAHO

Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a nasuratan iti “Contributions for the Society’s Worldwide Work​—Matthew 24:14.” Kada bulan ipatulod dagiti kongregasion dagitoy a kantidad iti sangalubongan a hedkuarter sadi Brooklyn, New York, wenno iti lokal a sanga nga opisina.

Mabalin met nga ipatulod a direkta dagiti boluntario a donasion a kuarta iti Treasurer’s Office ti Watch Tower Bible and Tract Society of the Philippines, P. O. Box 2044, 1060 Manila, wenno iti opisina ti Sosiedad iti pagilianyo. Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibaga a dayta ket direkta a sagut.

URNOS ITI KONDISIONAL A DONASION

Mabalin nga italek ti kuarta iti Watch Tower Society babaen ti naisangsangayan nga urnos a, no dumteng ti personal a pakasapulan ti nangidonar, maisubli ti donasion kenkuana. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat nga address.

NAIPLANO A PANANGTED

Malaksid pay kadagiti direkta a sagut a kuarta ken dagiti kondisional a donasion a kuarta, addada pay sabali a pamay-an ti panangted nga agpaay iti serbisio ti Pagarian iti intero a lubong. Mairaman kadagitoy ti:

Insurance: Mabalin a ti Watch Tower Society ti maipanagan kas benepisario ti life insurance policy wenno ti retirement/pension plan.

Deposito iti Banko: Mabalin nga italek wenno payable on death iti Watch Tower Society dagiti deposito iti banko, certificate of deposit, wenno individual retirement account, maitunos kadagiti alagaden ti lokal a banko.

Stock ken Bond: Mabalin nga idonar dagiti stock ken bond iti Watch Tower Society kas maysa a direkta a sagut.

Real Estate: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba iti life estate iti nangidonar, a makapagtultuloy nga agnaed sadiay bayat a sibibiag. Makiuman koma ti maysa iti Sosiedad sakbay ti legal a panangyallatiw kadagiti papeles ti aniaman a real estate iti Sosiedad.

Testamento ken Trust: Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Sosiedad ti mabalin a maipanagan kas benepisario iti maysa a trust agreement. Mabalin nga addada bentahana iti buis no maysa a relihioso nga organisasion ti benepisario ti trust.

Kas ipasimudaag ti termino a “naiplano a panangted,” dagitoy a kita ti donasion kasapulanda ti panagplano daydiay mangidonar. Tapno matulongan dagiti indibidual nga agtarigagay a mangbenepisio iti Sosiedad baeten ti nagduduma a kita ti naiplano a panangted, insagana ti Sosiedad ti broshur a napauluan Charitable Planning to Benefit Kingdom Service Worldwide (iti Ingles ken Español a pagsasao). Naisurat daytoy a broshur a pangsungbat kadagiti adu a saludsod a naawat ti Sosiedad maipapan kadagiti sagut, testamento, ken trust. Naglaon pay kadagiti kanayonan a makatulong nga impormasion kadagiti panagplano iti sanikua, pinansial, ken buis. Ket nairanta daytoy a tumulong kadagiti indibidual idiay Estados Unidos nga agpalplano a mangipaay iti espesial a sagut iti Sosiedad itan wenno mangibatida iti ipatawid inton pumusayda tapno mapilida ti kasayaatan ken kaalistuan a metodo sigun kadagiti sirkumstansiada a mismo ken ti pamiliada. Mabalinyo ti maaddaan iti kastoy a broshur babaen ti direkta a panangkiddawyo iti kopia manipud Charitable Planning Office.

Kalpasan a nabasada ti broshur ken nakiumanda iti Charitable Planning Office, adu dagidiay nakatulong iti Sosiedad ket maigiddato iti dayta, naaprobetsarda dagiti benepisio no iti panagbuis. Pakaammuanyo koma ti Charitable Planning Office ket umawatkayo iti kopia ti aniaman a nesesita a dokumento maipapan iti uray ania kadagitoy nga urnos. No interesadokayo iti aniaman kadagitoy nga urnos a naiplano a panangted, makiumankayo koma iti Charitable Planning Office, babaen ti surat wenno telepono, iti address a nailista iti baba wenno iti opisina ti Sosiedad iti pagilianyo.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (845) 306-0707