KINAMANAGPASAKUP

Sitatallugod a tumulok, agpalugod, wenno agpaituray​—kadagiti nangatngato, iti linteg, wenno iti piho nga urnos ti bambanag. Karaman kadagitoy ti panagpasakup ni Jesu-Kristo iti Amana (1Co 15:27, 28), ti kongregasion Kristiano ken Jesus (Efe 5:24) ken iti Dios (Heb 12:9; San 4:7), ti tunggal maysa a Kristiano kadagidiay mangidadaulo iti kongregasion (1Co 16:15, 16; Heb 13:17, Rbi8 ftn; 1Pe 5:5), dagiti Kristiano a babbai iti urnos iti kongregasion maipapan iti panangisuro (1Ti 2:11), dagiti adipen kadagiti makinkukua kadakuada (Tit 2:9; 1Pe 2:18), ti assawa a babbai kadagiti assawada (Efe 5:22; Col 3:18; Tit 2:5; 1Pe 3:1, 5), ti annak kadagiti nagannakda (1Ti 3:4; idiligyo ti Lu 2:51; Efe 6:1), ken dagiti iturayan kadagiti agtuturay wenno kadagiti nangatngato nga autoridad (Ro 13:1, 5; Tit 3:1; 1Pe 2:13).​—Kitaenyo ti KINAULO; NANGATNGATO NGA AUTORIDAD; PANAGTULNOG.

Ti kinamanagpasakup, wenno panagpaituray, nga iparangarang ti maysa a Kristiano kadagiti tattao ramanenna ti konsiensia ken tartarawidwidan dayta ti relasionna iti Dios. Ngarud, no ti kinamanagpasakup mangiturong iti pannakikompromiso wenno panangsalungasing iti nadibinuan a linteg, masapul a ti Dios ti pagtulnogan imbes a ti tattao. (Ara 5:29) Gapuna, da Pablo ken Bernabe ‘saanda a timmulok babaen ti panagpasakup’ kadagitoy a sinankakabsat a, maisupadi iti naipalgak a panggep ti Dios, mangiruprupir iti panagpakugit ken panangannurot iti Mosaiko a Linteg kas makalkalikaguman iti pananggun-od iti pannakaisalakan.​—Ga 2:3-5; idiligyo ti Ara 15:1, 24-29.

Naipakita iti 2 Corinto 9:13 a dagiti naited a kontribusion maipagapu kadagiti marigrigat a pada a Kristiano ket pammaneknek ti kinamanagpasakup ti maysa a tao iti naimbag a damag, yantangay pagrebbengan ti maysa a Kristiano a tulongan dagiti marigrigat a kapammatian.​—San 1:26, 27; 2:14-17.