Maragsakantayo a Mangusar iti Biagtayo nga Agserbi ken Jehova!
1 Siraragsak ni apostol Pablo a “naan-anay a mabusbos” tapno maitungpalna ti Nakristianuan a ministeriona. (2 Cor. 12:15) Umasping iti dayta, adu a Kristiano ita ti agtartrabaho a sipipinget kas payunir. Dagidiay addaan kadagiti nadagsen a responsabilidad iti pamilia iwaywayaanda ti makiraman iti ministerio iti tunggal lawas nupay okupadoda. Dagidiay met addaan kadagiti nakaro a parikut iti salun-at us-usarenda ti limitado a pigsada a mangitandudo kadagiti interes ti Pagarian. Anian a makaparegta a makita ti ili ni Jehova, aniaman ti edad wenno kasasaadda, a mangus-usar iti biagda nga agserbi ken Jehova!
2 Ayat Kadagiti Kaarruba: Maaddaantayo iti nadalus a konsiensia no aramidentayo ti amin a kabaelantayo nga agserbi ken Jehova, ken mangiparangarang iti ayattayo iti Dios ken kadagiti kaarruba. Gapu ta inusar ni Pablo ti kararuana a nangiranud iti naimbag a damag, siraragsak a naikunana: “Ayabankayo tapno iti daytoy met laeng nga aldaw saksianyo a nadalusak iti dara dagiti amin a tattao.” (Ara. 20:24, 26; 1 Tes. 2:8) Ti pannakiraman iti ministerio agingga nga ipalubos ti kasasaadtayo ilikliknatayo manipud iti panagbasol iti dara.—Ezeq. 3:18-21.
3 Ti napinget a panangtulong kadagiti sabsabali ket mangyeg kadatayo iti ragsak. (Ara. 20:35) Kinuna ti maysa a kabsat a lalaki: “Pudno a nabannogak no makaawidak iti rabii kalpasan ti agmalmalem a panagserbik ken Jehova. Ngem naragsakak, ken agyamanak kenni Jehova ta inikkannak iti rag-o nga awan ti asinoman a makaagaw.”
4 Ayat iti Dios: Ti kapatgan a rason no apay nga us-usarentayo ti biagtayo nga agserbi ken Jehova ket gapu ta maay-ayo ti nailangitan nga Amatayo. Ti ayattayo iti Dios ti mangtignay kadatayo a mangtungpal kadagiti bilinna, a pakairamanan ti panangasaba ken panangaramid iti adalan. (1 Juan 5:3) Uray no manangyaleng-aleng wenno bumusor dagiti tattao, sirarag-o nga itultuloytayo ti agtrabaho a sipipinget maipaay ken Jehova.
5 Saan a daytoy ti panawen tapno guminadtayo nga agserbi. Agbibiagtayon iti panawen ti panagani. (Mat. 9:37) Masansan nga agtrabaho iti adu nga oras ti maysa a mannalon bayat ti panawen ti panagani gapu ta limitado ti panawenna a mangurnong kadagiti apitna sakbay a marpek dagitoy. Limitado met ti panawen para iti naespirituan a panagani. Bayat a sipapanunottayo iti tiempo a pagbibiagantayo, sapay koma ta napingettayo amin nga agtultuloy a mangusar iti biagtayo iti ministerio.—Luc. 13:24; 1 Cor. 7:29-31.