Tulonganyo Ida nga Agsubli iti Kabiitan a Panawen!
“Siasino ti papananminto? Addaanka iti sasao ti agnanayon a biag.”—JUAN 6:68.
1. Ania ti kinuna ni Pedro idi adu nga adalan ti nangpanaw ken Jesus?
ADDA idi gundaway nga adu kadagiti adalan ni Jesu-Kristo ti nangpanaw kenkuana gapu ta dida nagustuan ti maysa kadagiti pannursurona. “Kayatyo kadi met ti mapan?” inyimtuodna kadagiti apostolna. Simmungbat ni Pedro: “Apo, iti siasino ti papananminto? Addaanka iti sasao ti agnanayon a biag.” (Juan 6:51-69) Awanen ti sabali pay a papananda. Ti Judaismo ket awanan iti “sasao ti agnanayon a biag,” ken sigurado a saan met a masarakan ita ti kasta iti Babilonia a Dakkel, ti sangalubongan nga imperio ti palso a relihion. Para iti siasinoman a naiwawa manipud iti arban ti Dios ngem kayatda a paragsaken ni Jehova, ‘orasen tapno agriingda’ ket agsublidan iti arban.—Roma 13:11.
2. Ania ti rumbeng a laglagipen mainaig kadagiti kompidensial wenno hudisial a banag?
2 Impakita ni Jehova ti pannakaseknanna kadagiti napukaw a karnero ti Israel. (Basaen ti Ezequiel 34:15, 16.) Umasping iti dayta, dagiti Kristiano a panglakayen ket addaan iti tarigagay ken responsabilidad a tumulong iti marakarnero a naiwawa manipud iti arban. No natudingan ti agibumbunannag a mangyadal iti maysa a di aktibo nga agtarigagay a matulongan, ania ti rumbeng nga aramidenna no maammuanna a dayta a di aktibo ket nakaaramid iti nadagsen a basol? Imbes a balakadanna maipapan iti aniaman a hudisial wenno kompidensial a banag, rumbeng nga isingasingna kenkuana a makisarita kadagiti panglakayen. No saan nga aramiden dayta ti di aktibo, ti mismo nga agibumbunannag ti rumbeng a mangipakaammo kadagiti panglakayen.—Lev. 5:1; Gal. 6:1.
3. Ania ti reaksion ti tao nga addaan iti 100 a karnero idi nasarakanna ti maysa a napukaw?
3 Iti immun-una nga artikulo, nadakamat ti pangngarig ni Jesus maipapan iti maysa a tao nga addaan iti 100 a karnero. Idi adda maysa nga awan iti arban, pinanawanna ti 99 ket sinapulna ti mapukpukaw a karnero. Anian a ragsakna idi nasarakanna ti napukaw! (Luc. 15:4-7) Kasta met ti mariknatayo no ti maysa a di aktibo ket agsublin iti arban. Gapu iti panagayat dagiti panglakayen ken ti dadduma a kameng ti kongregasion, mabalin a sinarungkarandan ti maysa a di aktibo. Kayatda met a makita nga isu ket agsublin iti arban tapno matagiragsakna ti tulong, pannalaknib, ken bendision ti Dios. (Deut. 33:27; Sal. 91:14; Prov. 10:22) No adda gundawayda a makatulong, ania ti mabalinda nga aramiden?
4. Ania ti maadaltayo iti Galacia 6:2, 5?
4 Mabalin a paregtaenda ti maysa a di aktibo nga agsublin iti kongregasion babaen ti siaasi a panangibatadda kenkuana nga ay-ayaten ni Jehova dagiti karnerona ken kalkalikagumanna dagiti kabaelantayo laeng nga aramiden. Karaman kadagitoy ti panagadal iti Kasuratan, pannakigimong, ken panangikasaba iti naimbag a damag ti Pagarian. Mabalin a maitutop a basaenda ti Galacia 6:2, 5 ken dakamatenda a makapagtitinnulong dagiti Kristiano a mangawit kadagiti pakadagsenan ti maysa ken maysa, ngem “tunggal maysa awitennanto ti bukodna nga awit” wenno ti responsabilidadna ken Jehova. Saan a mabalin a sabali ti agmatalek iti Dios agpaay kadatayo.
Naiwawada Kadi Gapu “Kadagiti Pakaringgoran iti Biag”?
5, 6. (a) Apay a nasken nga agimdengtayo a naimbag iti ibagbaga dagiti di aktibo a kapammatiantayo? (b) Kasanom a matulongan dagiti di aktibo a mangamiris a madangdangranda gapu iti dida pannakitimpuyog iti ili ni Jehova?
5 Tapno ammoda no kasano a matulongan ti di aktibo a kapammatian, dagiti panglakayen wenno ti dadduma pay a nataengan iti naespirituan nga agibumbunannag ket nasken nga agimdengda a naimbag no adda iyebkas dagiti kasta a kapammatianda. Ipapantayon a maysaka a panglakayen a sumarsarungkar iti agassawa a nagbalin a di aktibon iti kongregasion gapu “kadagiti pakaringgoran iti biag.” (Luc. 21:34) Nalabit a nagbalindan a di aktibo gapu kadagiti pinansial a parikut wenno nadagdagsenen a responsabilidadda iti pamilia. Nalabit mariknada a kasapulanda ti mapalag-anan kadagiti responsabilidadda, ngem mabalinmo nga ipaganetget a saan a solusion ti panangiputputongda iti bagida. (Basaen ti Proverbio 18:1.) Mabalin a sitataktika nga iyimtuodmo kadakuada: “Naragragsakkayo kadi sipud idi insardengyon ti makigimong? Simmayaat kadi ti kasasaad ti pamiliayo? Marikriknayo pay la kadi ti rag-o nga itden ti panagtalek ken Jehova?”—Neh. 8:10.
6 Mabalin a makatulong ti panangutob dagiti di aktibo kadagiti kasta a saludsod tapno maamirisda a ti didan pannakitimtimpuyog iti kongregasion ti makagapu a kimmapuy ti espiritualidadda ket saanen a kas iti dati ti kinaragsakda. (Mat. 5:3; Heb. 10:24, 25) Posible met a matulonganda a mangamiris a maikapkapisda iti rag-o nga itden ti panangikasaba iti naimbag a damag gapu ta didan makipaspaset iti dayta. (Mat. 28:19, 20) No kasta, ania ngarud ti nainsiriban nga aramiden dagiti di aktibo?
7. Ania ti mabalintay nga iparegta kadagidiay naiwawa manipud iti arban?
7 Kinuna ni Jesus: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag . . . Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak.” (Luc. 21:34-36) Dagidiay naiwawa manipud iti arban ngem kayatda manen ti maaddaan iti rag-o a sagsagrapenda idi ket mabalintayo a paregtaen nga agkararag tapno kumiddaw iti nasantuan nga espiritu ken tulong ti Dios. Paregtaentayo met ida nga agtignay maitunos kadagiti kararagda.—Luc. 11:13.
Naitibkolda Kadi?
8, 9. Ania ti mabalin nga ilawlawag ti maysa a panglakayen iti naitibkol?
8 Gapu iti kinaimperpektotayo, rumsua dagiti personal a di pagkikinnaawatan, ket mabalin a pakaitibkolan dayta ti maysa. Adda dagiti naitibkol idi nakaaramid iti basol ti maysa a mararaem a kabsat. No kasta ti napasamak iti maysa a di aktibo, mabalin nga ipaganetget ti sumarsarungkar a panglakayen a saan a ni Jehova ti makagapu iti aniaman a pakaitibkolan. Apay koma ngarud a gupden ti maysa ti relasionna iti Dios ken iti kongregasion? Imbes ketdi, saan kadi a rumbeng nga itultuloyna ti agserbi iti Dios, nga agtalek nga ammo ti “Ukom ti intero a daga” no ania ti napasamak ket tamingennanto ti bambanag iti umiso a pamay-an? (Gen. 18:25; Col. 3:23-25) No ti maysa a tao ket literal a naitibkol ken natuang, dina la ketdi gagaraen ti agtalinaed iti dayta a posision a dinan ikagumaan pay ti bumangon.
9 Iti panangikagumaan ti panglakayen a tumulong iti maysa a naitibkol nga agsubli iti arban, mabalin a dakamatenna nga adda dagidiay nakaamiris nga awan itan ti kaimudingan ti banag a nakaitibkolanda idi. Kinapudnona, mabalin nga awan pay ketdi itan ti situasion a nakaitibkolanda idi. No ti maysa ket naitibkol gapu iti naited kenkuana a disiplina, mabalin a makatulong kenkuana ti panagutob buyogen ti kararag tapno maamirisna nga adda nagbiddutanna ket rumbeng a dina koma impalubos a naitibkol gapu iti disiplina.—Sal. 119:165; Heb. 12:5-13.
Gapu Kadi iti Maysa a Pannursuro?
10, 11. Ania a pannakirinnason ti mabalin nga epektibo iti panangtulong iti maysa a naiduma ti pannakaawatna iti dadduma a pannursuro ti Biblia?
10 Adda dagiti nangpanaw iti arban ti Dios gapu ta dida anamongan ti dadduma a Nainkasuratan a pannursuro. Dagiti Israelita a nawayawayaan manipud iti panangadipen ti Egipto ‘nalipatanda ti ar-aramid ti Dios’ agpaay kadakuada ket “saanda nga inuray ti pammatigmaanna.” (Sal. 106:13) Mabalin a makatulong no ipalagip iti di aktibo a “ti matalek ken masirib nga adipen” ket mangipapaay iti agkakasayaat a naespirituan a taraon. (Mat. 24:45) Maigapu iti dayta a naammuanna ti kinapudno idi damo. Isu nga apay a dina pasublien ti determinasionna a magna manen iti kinapudno?—2 Juan 4.
11 Iti panangikagumaan ti panglakayen a tumulong kadagidiay naiwawa manipud iti arban ti Dios, mabalin a dakamatenna ti maipapan kadagidi adalan a nangpanaw ken Jesus gapu ta dida nagustuan ti maysa kadagiti pannursurona. (Juan 6:53, 66) Gapu ta didan nakitimpuyog ken Kristo ken kadagiti matalek a pasurotna, napukaw ti panangipategda kadagiti naespirituan a banag agraman ti rag-oda. Adda kadi sabali pay a pakagun-odan iti nabaknang a naespirituan a taraon a nasarakan dagiti simmardeng a makitimpuyog iti kongregasion Kristiano? Awan, agsipud ta awanen ti sabali pay a pakagun-odanda iti dayta!
Gapu Kadi iti Naaramidna a Basol?
12, 13. Kasano a matulongan ti maysa a naiwawa manipud iti arban no ipudnona nga isu ket nakaaramid iti nadagsen a basol?
12 Dadduma ti simmardengen a mangasaba ken makigimong gapu ta nakaaramidda iti nadagsen a basol. Mabalin a mapanunotda a mailaksidda no ipudnoda kadagiti panglakayen ti basolda. Ngem saanda a mailaksid iti kongregasion no insardengdan ti di Nainkasuratan nga aramidda ken no sipapasnek nga agbabbabawida. (2 Cor. 7:10, 11) Imbes ketdi, maabrasada manen, ken ipaayan ida dagiti panglakayen iti naespirituan a tulong a kasapulanda.
13 No maysaka a nataenganen iti naespirituan nga agibumbunannag a nakiddaw a tumulong iti maysa a di aktibo, ania ti rumbeng nga aramidem no ibagana kenka nga adda naaramidna a nadagsen a basol? Kas iti nadakamat itayen, imbes a makibiangka iti situasion, ibalakadmo nga iyumanna dayta kadagiti panglakayen. No dina kayat nga aramiden dayta, ipakpakitam a maseknanka iti nagan ni Jehova ken iti naespirituan a kinadalus ti kongregasion babaen ti panagtignaymo a maitunos iti panangiwanwan ti Dios kadagiti kasta a banag. (Basaen ti Levitico 5:1.) Ammuen dagiti panglakayen no kasano a matulongan ti siasinoman nga agtarigagay nga agsubli ken agbiag maitunos iti pagayatan ti Dios. Mabalin a kasapulan ti naayat a panangdisiplina. (Heb. 12:7-11) No bigbigen ti maysa nga isu ket nagbasol iti Dios, insardengnan ti naaramidanna a basol, ken naimpusuan nga agbabbabawi, isu ket tulongan dagiti panglakayen tapno magun-odna ti pammakawan ni Jehova.—Isa. 1:18; 55:7; Sant. 5:13-16.
Nangyeg iti Rag-o ti Panagsubli ti Anak
14. Iti bukodmo a sasao, isalaysaymo ti pangngarig ni Jesus maipapan iti barayuboy nga anak.
14 Iti panangikagumaanna a tumulong iti maysa a karnero a naiwawa, daydiay natudingan a tumulong mabalinna nga usaren ti pangngarig ni Jesus iti Lucas 15:11-24. Iti dayta a pangngarig, maysa nga agkabannuag a lalaki ti nangwaldas iti tawidna iti nalulok a panagbiag. Idi agangay, kinarurodna ti imoral a biagna. Idi kasta unayen ti bisin ken iliwna, inkeddengnan ti agawid! Idi adda pay iti adayo, nakita ni amana ket timmaray a simmabat kenkuana. Gapu iti kasta unay a rag-o, inappungol ken inagkanna a sidudungngo ti anakna. No dayta a pangngarig ket utoben ti maysa a naiwawa, mabalin a magutugot nga agsubli iti arban. Yantangay asidegen a madadael daytoy agdama a sistema ti bambanag, masapul ngarud nga agsublin iti kabiitan a panawen.
15. Ania dagiti makagapu a naiwawa ti dadduma manipud iti kongregasion?
15 Kaaduan nga immikay iti kongregasion ket saanda nga eksakto a kas iti barayuboy nga anak. Adda dagiti in-inut a naiwawa, kas iti di nayangkla a bangka nga in-inut nga immadayo iti takdang. Ti met sabsabali ket madagdagsenan unay gapu kadagiti pakaringgoran isu a nabaybay-anda ti relasionda ken Jehova. Dadduma met ti naitibkol iti maysa a kakongregasionda, wenno immikayda gapu ta adda Nainkasuratan a pannursuro a dida anamongan. Adda met sumagmamano a nakaaramid iti mailabsing iti Kasuratan. Nupay kasta, dagiti balakad a mainaig iti tunggal maysa kadagita a situasion ket mabalin a makatulong kenka a mangbadang kadagidiay nangpanaw iti arban gapu kadagita wenno iti dadduma pay a rason ket iti kasta, agsublida sakbay a naladaw ti amin.
“Maragsakankami iti Panagsublim, Nakkong!”
16-18. (a) Kasano a nakatulong ti maysa a panglakayen iti kabsat a nagbalin a di aktibo iti adu a tawen? (b) Apay a nagbalin a di aktibo dayta a kabsat, kasano a natulongan, ken kasano nga inawat ti kongregasion?
16 Kinuna ti maysa a Kristiano a panglakayen: “Pakaseknan unay ti bagi dagiti panglakayen a sarungkaran dagiti di aktibo. Malagipko ti maysa a kabsat nga inyadalak ken tinulongak a mangammo iti kinapudno. Gapu ta agarup 25 a tawenen a di aktibo ken nadagsen unay ti parikutna, inlawlawagko no kasano a makatulong ti panangyaplikarna kadagiti prinsipio iti Biblia. Idi agangay, nangrugin a makigimong ken immanamong a mayadalan iti Biblia tapno mapabileg ti determinasionna nga agsubli iti arban.”
17 Apay a nagbalin a di aktibo dayta a kabsat? Inaminna: “Impangpangrunak ngamin dagiti nailubongan a bambanag imbes a ti relasionko ken Jehova. Nagangayanna, insardengkon ti agadal, mangasaba, ken makigimong. Diak napupuotan a saanak gayamen a makitimtimpuyog iti kongregasion. Ngem nakasubliak iti kongregasion babaen iti personal ken napasnek a tulong ti maysa a panglakayen.” Nangrugi a mapalag-anan kadagiti parikutna kalpasan nga immannugot a mayadalan iti Biblia. Kinunana: “Naamirisko a ti kurang iti biagko ket ti ayat ken panangiwanwan ni Jehova ken ti organisasionna.”
18 Kasano nga inawat ti kongregasion dayta a kabsat? Kinunana: “Mariknak a kaslaak daydiay barayuboy nga anak nga insalaysay ni Jesu-Kristo. Kinapudnona, idi nagsubliak iti kongregasion, maysa kadagiti baketen a kabsat nga addan sadiay 30 a tawenen ti napalabas ken kaskasdi a simamatalek nga agserserbi ken Jehova ti nangikuna kaniak, ‘Maragsakankami iti panagsublim, Nakkong!’ Natukay unay ti pusok iti dayta. Talaga a nakasubliakon. Isu a kayatko nga iyebkas ti napasnek a panangapresiarko iti ayat, kinabara, kinaanus, ken pannakaseknan nga impakita kaniak dayta a panglakayen ken ti intero a kongregasion. Ti panagayatda kenni Jehova ken iti padada a tattao ket talaga a nakatulong kaniak nga agsubli iti arban.”
Idagadagyo nga Agtignaydan!
19, 20. Kasanoyo a maparegta dagiti di aktibo tapno agsublida iti kabiitan a panawen, ken kasanoyo a maipakita kadakuada a saan a nalabes ti namnamaen ti Dios kadatayo?
19 Agbibiagtayon kadagiti maudi nga aldaw ket asidegen ti panungpalan ti agdama a sistema ti bambanag. Gapuna, paregtaenyo dagiti di aktibo a tumabunoda kadagiti Nakristianuan a gimong. Idagadagyo kadakuada a rugiandan a dagus ti makigimong. Ipalagipyo kadakuada nga ikagkagumaan ni Satanas a dadaelen ti relasionda iti Dios ken tapno panunotenda a mabang-aranda kadagiti pakadagsenan iti biag no baybay-anda ti pudno a panagdayaw. Mabalinyo nga ipanamnama kadakuada a magun-odantayo laeng ti pudpudno a bang-ar babaen ti panagbalintayo a matalek a pasurot ni Jesus.—Basaen ti Mateo 11:28-30.
20 Ipalagipyo kadagiti di aktibo a namnamaen ti Dios nga aramidentayo no ania ti kabaelantayo. Di nagbayag sakbay ti ipapatay ni Jesus, ni Maria a kabsat ni Lazaro ket nababalaw gapu ta binukbokanna ti ulo ni Jesus iti nagngina a bangbanglo a lana. Ngem kinuna ni Jesus: “Baybay-anyo. . . . Inaramidna ti nabalinanna.” (Mar. 14:6-8) Pinadayawan ni Jesus ti marigrigat a balo a babai a nangitinnag iti nagbassit a kontribusion iti templo. Inaramidna met no ania ti kabaelanna. (Luc. 21:1-4) Kabaelan ti kaaduan kadatayo ti makigimong ken mangasaba. Babaen ti tulong ni Jehova, kabaelan met nga aramiden dagita ti adu kadagiti di aktibo iti agdama.
21, 22. Ania ti mabalinyo nga ipanamnama kadagidiay agsubli ken Jehova?
21 No ti maysa nga inaktibo ket bumdengen a sumango kadagiti kakabsat, mabalin nga ipalagipmo kadakuada ti rag-o nga inyeg ti panagawid ti barayuboy nga anak. Dagidiay agsubli iti kongregasion ket mangyeg met iti rag-o. Paregtaenyo ida tapno agtignaydan a mangbusor iti Diablo ken umadani iti Dios.—Sant. 4:7, 8.
22 Dagidiay agsubli ken Jehova ket sirarag-o a maabrasa. (Un. 3:40) Awan duadua a nakaragragsakda idi agserserbida iti Dios. Adu a bendision iti masanguanan ti agur-uray kadagidiay agsubli iti arban iti kabiitan a panawen!
Ania ti Sungbatmo?
• Kasano a matulongam ti maysa a Kristiano a naitibkol ken nagbalin a di aktibo?
• Ania a pannakirinnason ti mabalin a makatulong iti maysa a nangpanaw iti arban ti Dios gapu iti personal a kapanunotanna maipapan iti maysa a pannursuro?
• Kasano a matulongam ti maysa a bumdeng nga agsubli iti kongregasion?
[Ladawan iti panid 13]
Agimdengka a naimbag no adda ibaga ti maysa a di aktibo a kapammatiam
[Ladawan iti panid 15]
Mabalin a matignay ti dadduma nga agsubli iti arban no utobenda ti pangngarig ni Jesus maipapan iti barayuboy nga anak