Agimtuod Dagiti Agtutubo . . .

Kasano a Matagikuak ti Kinapudno?

“Napadakkelak a maysa kadagiti Saksi ni Jehova, ket kanayon a patiek a no napadakkelka a kasta, aktual nga ammom ni Jehova. Kamaliak gayam!”​—Antoinette.

“ANIA ti kinapudno?” Ni Poncio Pilato, ti tao a nangyawat ken Jesus tapno mapapatay, ti nangyimtuod iti dayta a nalatak a saludsod. (Juan 18:38) Nupay kasta, nabatad nga inggagara ni Pilato nga iyimtuod dayta tapno serraanna​—saan a lukatan​—ti napasnek a saritaan. Talaga a saan nga interesado iti “kinapudno.” Sika ngay? Interesadoka kadi iti kinapudno?

Adun a siglo nga inut-utob dagiti pilosopo no ania ti kinapudno, ngem nakababain ta bassit laeng ti nagbanagan ti panagreggetda. Nupay kasta, masarakam ti sungbat ti saludsod ni Pilato. Insuro ni Jesu-Kristo a ti Sao ti Dios ket kinapudno. Nasaona met ti bagina kas “ti kinapudno.” Ket insurat ni apostol Juan: “Ti kinapudno dimteng baeten ken Jesus.” (Juan 1:17; 14:6; 17:17) Dagiti amin a Nakristianuan a pannursuro, nga idi agangay ket nagbalin a paset ti Biblia, ket maawagan met ngarud a “ti kinapudno” wenno “ti kinapudno ti naimbag a damag.” (Tito 1:14; Galacia 2:14; 2 Juan 1, 2) Nairaman kadagitoy a Nakristianuan a pannursuro dagiti banag a kas iti personal a nagan ti Dios, ti pannakaipasdek ti Pagarian ti Dios, ti panagungar, ken ti subbot ni Jesus.​—Salmo 83:18; Mateo 6:9, 10; 20:28; Juan 5:28, 29.

Rinibu nga agtutubo ti sinuruan dagiti Nakristianuan a nagannak iti kinapudno ti Biblia. Ngem kaipapanan kadi daytoy a ‘magmagna[da] iti kinapudno’? (3 Juan 3, 4) Saan met ketdi. Kas pagarigan, napadakkel ti agtawen 21 a ni Jennifer kas maysa kadagiti Saksi ni Jehova. Malagipna: “Itugtugotnak idi ni nanangko kadagiti kombension dagiti Saksi ket imparipiripna kaniak a panunotekon ti agpabautisar. Ngem kinunak iti bagik a ‘Pulos a diak kayat ti agbalin a Saksi. Kayatko laeng ti agragragsak!’”

Patien ti dadduma nga agtutubo ti naisuro kadakuada, ngem saanda a napatanor ti nauneg a pannakaawat iti pudno nga isursuro ti Biblia. Ania ti peggadna? Namakdaar ni Jesus a dadduma a tattao “awananda a mismo iti ramut.” Dagita ket ‘agtalinaed iti maysa a tiempo; kalpasanna apaman a tumaud ti rigat wenno pannakaidadanes gapu iti sao, maitibkolda.’ (Marcos 4:17) Kabaelan met dagiti dadduma nga ilawlawag ti sumagmamano a naibasar-Biblia a patpatienda, ngem saanda a naam-ammo ni Jehova iti personal a wagas. Kuna ti maysa nga agtutubo a babai nga agnagan Aneesa: “Ti panagkunak, awan ti napaypayso a relasionko ken Jehova idi ubingak . . . Pagarupko a nagpannuray laeng dayta iti relasion dagiti nagannakko kenkuana.”

Ania ti sasaadem iti daytoy a banag? Ni aya Jehova ket Dios la ngamin dagiti nagannak kenka? Wenno kas iti salmista ti Biblia, maikunam: “Nagkammatalekak kenka, O Jehova: kinunak, sika ti Diosko”? (Salmo 31:14) Nalabit kasapulan ti tured tapno mabigbigmo dagiti kinapudno. Kunaen ti agtutubo a lalaki nga agnagan Alexander: “Para kaniak, ti napudno a panangusig iti bagi ti umuna nga addang.” Kalpasan ti panangutobmo iti bagim, nalabit maamirismo a talaga a saanmo pay a pulos a napaneknekan ti kinapudno (dagiti amin a Nakristianuan a pannursuro) a mismo. Awan pay ti nabileg a determinasionmo, ket agparang nga awan panggep, awan pudno a direksion ti biagmo.

Kadagiti Nakristianuan a gimong dagiti Saksi ni Jehova, masansan a kankantaenda ti kansion a napauluan, “Tagikuaem ti Kinapudno.”a Nalabit a maitutop kenka dayta a balakad. Ngem kasano a maaramidam dayta? Pangrugiam?

Paneknekam Dayta iti Bagim

Idiay Roma 12:2, masarakantay ti balakad ni apostol Pablo: ‘Paneknekanyo iti bagbagiyo ti naimbag ken makaay-ayo ken perpekto a pagayatan ti Dios.’ Ngem kasano a maaramidam dayta? Babaen ti pananggun-od iti “umiso a pannakaammo iti kinapudno.” (Tito 1:1) Saan a pinati dagiti nagkauna nga umili ti siudad ti Berea dagiti nangngeganda a didan inusig dayta. Imbes ketdi, “siaannad a [sinukimatda] ti Kasuratan iti inaldaw no agpayso dagitoy a bambanag [nga ad-adalenda].”​—Aramid 17:11.

Naamiris ti agtutubo a Kristiano nga agnagan Erin a kasapulan a kasta met ti aramidenna. Malagipna: “Nagsirarakak. Inimtuodko ti bagik, ‘Kasano a maammuak a daytoy ti umiso a relihion? Kasano a maammuak nga adda Dios nga agnagan Jehova?’” Apay a dika mangirugi iti personal a programa ti panagadalmo? Nalabit mangrugika babaen iti naibasar-Biblia a libro a ti Pannakaammo a Mangiturong iti Biag nga Awan Inggana.b Basaem a naimbag dayta. Kitaem amin dagiti nadakamat a teksto iti Kasuratan ken usigem no kasano ti pannakainaigda iti naisalaysay. Mabalin a masdaawkanto a naiduma gayam ti pannakaawatmo iti kinapudno inton agbalinkan a “mangmangged nga awan ti aniaman nga ibainna, nga aramatem a siuumiso ti sao ti kinapudno”!​—2 Timoteo 2:15.

Kinuna ni apostol Pedro a “narigat a maawatan” ti sumagmamano a bambanag iti Biblia, ket maamirismonto nga agpayso daytoy. (2 Pedro 3:16) Ngem matulongannaka ti espiritu ti Dios a mangtarus kadagiti naririgat a tema. (1 Corinto 2:11, 12) Agkararagka a tulongannaka ti Dios no marigatanka a mangtarus iti maysa a banag. (Salmo 119:10, 11, 27) Padasem met ti agsirarak kadagiti publikasion ti Watchtower Society. No saanka a sigurado no kasano a maaramidam dayta, agpatulongka. Matulongandaka dagiti nagannak kenka wenno nalabit ti dadduma a nataengan a miembro iti kongregasion Kristiano.

Laglagipem a saanka nga agad-adal tapno paglastogmo ti pannakaammom kadagiti dadduma. Ilawlawag ti agtutubo nga agnagan Collin: “Ad-adalem dagiti galad ni Jehova.” Iwayaam ti agmennamenna iti basbasaem tapno mayukuok dayta iti pusom.​—Salmo 1:2, 3.

Makatulong met kenka ti pannakitimpuyogmo iti kongregasion kadagiti Nakristianuan a gimong. Ngamin, kas iti insurat ni apostol Pablo, ti kongregasion ket “adigi ken sadiri ti kinapudno.” (1 Timoteo 3:15) Ireklamo ti dadduma nga agtutubo a makauma kano dagiti Nakristianuan a gimong. “Ngem no saanka nga agsagsagana para kadagiti gimong,” ipalagip ni agtutubo a Collin, “saanka unay a magunggonaan kadagita.” Isu nga isaganam a nasaksakbay dagiti leksionmo. Ad-adda a makapainteres dagiti gimong no makipasetka​—saan laeng nga agbuybuya.

Makumikom Unay nga Agadal?

Ipapantayon a gapu iti trabahom iti eskuelaan ken balay, nalabit a makakarit ti panangiwaya nga agadal. Insurat ti agtutubo nga agnagan Susan: “Adun a tawen nga agregreggetak tangay ammok a kasapulan nga agsaganaak kadagiti gimong ken personal nga agadalak, ngem pulos a diak idi naaramidan dayta.”

Nasursuro ni Susan a ‘gatangen ti tiempo’ kadagiti saan unay a napateg a raragpaten. (Efeso 5:15, 16) Umuna, nangaramid iti listaan dagiti amin a kasapulanna nga adalen. Kalpasanna, nangyeskediul iti panawen tapno adalenna ida. Ngem nangiwaya met iti sumagmamano a tiempo iti panagpalpaliwa. Ibalakadna: “Dika iyeskediul ti tunggal nawaya a tiempo. Kasapulantay amin ti agaliwaksay.” Nalabit makatulong met kenka no adda eskediulmo.

Iranudmo ti Maad-adalmo

Nangnangruna a makatulong ti panangusarmo iti maad-adalmo no pagbalinem dayta a paset ti biagmo. Padasem a suruan ti maysa a tao. Kinuna ti salmista: “Ti ngiwatko agsaonto iti kinasirib, ket ti pampanunot toy pusok addaanto iti pannakaawat.”​—Salmo 49:3.

No dimo ibain ti naimbag a damag, sidadaankanto a mangiranud iti dayta kadagiti kaeskuelaam ken nalabit iti dadduma pay a maam-ammom. (Roma 1:16) Babaen iti panangaprobetsarmo kadagita a gundaway nga iranud ti kinapudno kadagiti sabsabali, us-usaremto ti ad-adalem; ket iti daytoy a pamay-an, mayukuokmonto ti kinapudno iti panunotmo ken iti pusom.

Agaluadka Kadagiti Pakitimtimpuyogam

Nagsayaat nga irarang-ay iti naespirituan ti naaramidan ti sumagmamano a Kristiano idi umuna a siglo. Ngem kasapulan idi a suratan ida ni apostol Pablo, a nangyimtuod: “Siasino ti nanglapped kadakayo iti panagtultuloyyo nga agtulnog iti kinapudno?” (Galacia 5:7) Adda umasping a napasamak ken agtutubo nga agnagan Alex. Impudnona a natungday dagiti panagreggetna nga agadal iti Sao ti Dios gapu iti “pannakikuyogna kadagiti dakes a katimpuyog.” Tapno rumang-ayka iti naespirituan, nalabit a kasapulan met a mangaramidka iti sumagmamano a panagbalbaliw iti daytoy a benneg.

Iti kasumbangirna, talaga a makatulong dagiti naimbag a katimpuyog iti irarang-aymo. Kuna ti Proverbio 27:17: “Ti landok patademenna ti landok; kasta met ti tao patademenna ti langa ti gayyemna.” Mangsapulka kadagiti nasayaat a pagulidanan​—tattao a mangyap-aplikar iti kinapudno iti mismo a panagbiagda. Nalabit a masarakam ida iti mismo a pagtaengam. Malagip ni agtutubo a Jennifer: “Ni apongko a lakay ti kasayaatan a pagsarmingak. Kanayon a tallo nga oras nga agsagana para iti panagadal ti kongregasionmi iti Biblia no Domingo. Kitaenna iti nadumaduma a patarus ti Biblia ti tunggal teksto iti maadal ken kitaenna ti kaipapanan dagiti sasao iti diksionariona. Nalaing kadagiti di unay madakdakamat a kinapudno iti Biblia. Mapagsaludsodam iti aniaman, ket masarakanna ti sungbat.”

No tagikuaem ti kinapudno, magun-odam ti kapatgan nga ikutan​—banag a saanmo nga isukat iti aniaman a gatad. Isu a dika matmatan ti kinapudno a “relihion [laeng] dagiti nagannak [kenka].” Ti determinasionmo koma ket kas iti salmista a nangikuna: “No da ama ken ina baybay-andak, ni ngad Jehova pidutennakto.” (Salmo 27:10) No paypaysuem nga ammuen ti isursuro ti Biblia, patiem dayta, iranudmo dagiti patpatiem kadagiti sabsabali ken, kangrunaanna, agbiagka a maitunos kadagitoy a patpatien, ipakpakitam a tinagikuamon ti kinapudno.

[Dagiti Footnote]

[Ladawan iti panid 13]

Paneknekam a kukuam ti kinapudno babaen ti panagsirarak ken personal a panagadalmo