Dagiti Parikut ti Sangatauan Asidegen nga Agpatingga!

“LIMITADO ti magapuanan ti panangsaranay ti tao no saan a paset dayta ti dakdakkel a plano ken no awan ti napolitikaan a suportana a nairanta a mangrisut kadagiti kangrunaan a pakaigapuan ti panagdadangadang. Maulit-ulit nga ipakita ti paspasamak a saan nga umdas ti panangsaranay ti tao a mangsolbar kadagiti parikut maigapu iti politika.”​—The State of the World’s Refugees 2000.

Iti laksid ti adu a panangsaranay ti tao, agtultuloy nga umir-irteng dagiti parikut ti sangatauan. Ania ti manamnama nga agpaut a napolitikaan a solusion? Kinapudnona, nagbassit laeng. Ngem pakasarakantayo pay koma iti solusion? Iti nabagas a sasaona iti rugi ti suratna kadagiti Kristiano idiay Efeso, inlawlawag ni apostol Pablo no kasano a pagpatinggaen ti Dios ti amin a parikut ti sangatauan. Impasimudaagna pay no ania nga ahensia ti usaren ti Dios a mangaramid iti daytoy​—ahensia a mangsolbar kadagiti kangrunaan a pakaigapuan ti amin a parikut a mangparparigat kadatayo ita. Apay a diyo usigen ti kunaen ni Pablo? Masarakan ti sasaona iti Efeso 1:3-10.

“Tapno Ummongen a Sangsangkamaysa Manen ken Kristo ti Amin a Bambanag”

Kuna ti apostol a ti panggep ti Dios ket maipaay iti inawaganna a “maysa a panangaywan [wenno panangimanehar iti bambanag] agingga iti naan-anay a pagpatinggaan dagiti naituding a tiempo.” Ania ti kaipapanan daytoy? Kaipapananna nga adda ti intuding ti Dios a tiempo nga aramidenna dayta “tapno ummongen a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.” (Efeso 1:10) Wen, nangrugin nga ipatungpal ti Dios ti urnos tapno mapagtutunos manen ti amin a banag idiay langit ken ditoy daga iti sidong ti direkta a panangiturongna. Makapainteres ti kinuna ti eskolar iti Biblia a ni J. H. Thayer mainaig iti termino a naipatarus nga “ummongen a sangsangkamaysa manen”: “Pagkaykaysaen manen maipaay kenkuana . . . ti amin a banag ken parsua (a pinagsisina ti basol agingga ita) iti nagkaykaysa a kasasaad kas kakadua ni Kristo.”

Dayta ti mangipatuldo no apay a masapul nga aramiden ti Dios daytoy maigapu iti damo a pannakasinasina. Iti rugrugi ti historia ti tao, dagiti immuna a nagannak kadatayo, da Adan ken Eva, simmurotda ken Satanas a Diablo iti panagrebelde maibusor iti Dios. Kinaykayatda ti nagwaywayas babaen ti panangikeddengda iti bukodda no ania ti naimbag ken dakes. (Genesis 3:1-5) Maitunos iti hustisia ti Dios, nailaksidda iti pamilia ti Dios ket napukawda ti relasionda kenkuana. Impatawidda iti sangatauan ti kinaimperpekto a nangyeg kadagiti amin a nagdakes a resulta a mapaspasarantayo ita.​—Roma 5:12.

Temporario a Pannakaipalubos ti Dakes

‘Apay nga impalubos ti Dios nga aramidenda dayta?’ mabalin nga adda mangisaludsod. ‘Apay a dina laengen inusar ti pannakabalinna kas kangatuan ket inaramidna ti pagayatanna, ket iti kasta nalapdan koma dagiti amin a saem ken panagsagaba a mapaspasarantayo ita?’ Nalaka la a panunoten ti kasta. Ngem ania a talaga ti paneknekan ti panangusar iti kasta a mangdaeg a pannakabalin? Makaay-ayo wenno anamonganyo kadi ti maysa nga adda la dina kinayat, gudasenna ti amin a bumusor agsipud ta adda pannakabalinna a mangaramid iti dayta? Sigurado a saan.

Saan a ti bileg ti mannakabalin-amin a Dios ti talaga a kinarit dagidi a rebelde. Ti ad-adda a kinaritda ket ti kalinteganna a mangituray ken no nalinteg ti panangiturayna. Tapno mamimpinsan a malawagan dagiti napataud a napapateg nga isyu, pinalubosan ni Jehova dagiti parsuana nga aramidenda ti kaykayatda nga awan ti direkta a panangiturongna bayat ti nakedngan a tiempo. (Eclesiastes 3:1; Lucas 21:24) Inton agngudo dayta a tiempo, bumallaet tapno naan-anay nga iturayanna manen ti daga. Iti dayta a kanito, nakalawlawagton a ti wagas ti panangiturayna ti kakaisuna a pamay-an a mangipanamnama iti manayon a talna, kinaragsak, ken kinarang-ay kadagiti agnaed ditoy daga. Kalpasanna, mapukawton nga agnanayon ti amin a manangirurumen ditoy lubong.​—Salmo 72:12-14; Daniel 2:44.

“Sakbay ti Pannakabangon ti Lubong”

Nabayagen a pinanggep ni Jehova nga aramiden amin dagitoy. Kinuna ni Pablo a “sakbay ti pannakabangon ti lubong.” (Efeso 1:4) Saan a sakbay dayta ti pannakaparsua ti daga wenno ni Adan ken Eva. “Nasayaat unay” dayta a lubong, ken saan pay a napasamak ti iyaalsa. (Genesis 1:31) Ania ngarud ti “lubong” a tuktukoyen ni apostol Pablo? Ti lubong dagiti kaputotan ni Adan ken Eva​—ti managbasol, imperpekto a lubong ti sangatauan a mabalin a masubbot. Sakbay nga adda ti naipasngay nga annak, ammon ni Jehova no ania ti aramidenna tapno makaipaay iti bang-ar kadagiti mabalin a masubbot a kaputotan ni Adan.​—Roma 8:20.

Siempre, dina ipasimudaag a ti Soberano iti uniberso aramidenna ti bambanag a kas iti pamay-an ti tao. Agsipud ta ammo dagiti tattao a mabalin a tumaud ti emerhensia, mangiplanoda iti nagduduma a detalyado nga estratehia kas solusion. Ngem ti mannakabalin-amin a Dios impaulogna laeng ti panggepna ket tungtungpalenna dayta. Kaskasdi, inlawlawag ni Pablo no kasano nga inkeddeng ni Jehova a solbaren dagiti parikut tapno maiyegna ti permanente a bang-ar iti sangatauan. Ania dagitoy a pamay-an?

Siasino ti Mangipaay iti Bang-ar?

Inlawlawag ni Pablo a dagiti napulotan iti espiritu a pasurot ni Kristo addaanda iti naisangsangayan nga akem iti panangrisut iti danios nga inyeg ti basol ni Adan. Ni Jehova ‘pinilinatayo a maikaykaysa ken Kristo,’ kuna ni Pablo, a makipagturay ken Jesus iti nailangitan a Pagarianna. Iti kanayonan a panangilawlawagna iti daytoy, kuna ni Pablo a ni Jehova “intudingnatayo a nasakbay iti pannakaampon kas annak maipaay kenkuana babaen ken Jesu-Kristo.” (Efeso 1:4, 5) Siempre, ni Jehova saanna a pinili, wenno tinudingan, ida a nasaksakbay kas indibidual. Imbes ketdi, tinudinganna ida a nasaksakbay kas maysa a grupo dagiti matalek ken dedikado a tattao a makiraman ken Kristo iti panangrisut iti danios iti sangatauan nga inyeg ni Satanas a Diablo, kaduana da Adan ken Eva.​—Lucas 12:32; Hebreo 2:14-18.

Anian a naindaklan a banag! Iti damo a panangkaritna iti kinasoberano ti Dios, impasimudaag ni Satanas nga adda problema iti tao a pinarsua ti Dios​—a no marigatan ken maguyugoyda, agrebeldeda amin maibusor iti turay ti Dios. (Job 1:7-12; 2:2-5) Idi agangay, iti dramatiko a panangiparangna iti “nadayag a di kaikarian a kinamanangngaasina,” impakita ni Jehova a Dios ti kompiansana kadagiti parsuana ditoy daga babaen ti panangamponna iti dadduma a managbasol iti pamilia ni Adan tapno agbalin a kas naespirituan nga annakna. Maayaban dagiti kameng daytoy a bassit a grupo tapno agserbida idiay langit. Maipaay iti ania a panggep?​—Efeso 1:3-6; Juan 14:2, 3; 1 Tesalonica 4:15-17; 1 Pedro 1:3, 4.

Kuna ni apostol Pablo a dagitoy a naampon nga annak ti Dios ‘makipagtawidda ken Kristo’ iti nailangitan a Pagarianna. (Roma 8:14-17) Kas ar-ari ken papadi, makiramanda a mangikkat iti saem ken panagsagaba a mapaspasaran ita ti sangatauan. (Apocalipsis 5:10) Pudno, “ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.” Ngem din agbayag, dagitoy a naisangsangayan a napili nga annak ti Dios agtignaydanto a kadua ni Jesu-Kristo, ket amin a natulnog a tattao “mawayawayaanto iti pannakaadipen iti panagrupsa ken maaddaan [manen] iti nadayag a wayawaya ti annak ti Dios.”​—Roma 8:18-22.

“Pannakaluk-at Babaen ti Subbot”

Napagbalin amin a posible dagitoy babaen ti kasayaatan ken katan-okan nga ebkas ti di kaikarian a kinamanangngaasi ti Dios maipaay iti lubong ti sangatauan a mabalin a masubbot​—ti daton a pangsubbot ni Jesu-Kristo. Insurat ni Pablo: “Babaen ken [Jesu-Kristo] addaantayo iti pannakaluk-at babaen ti subbot baeten iti dara dayta, wen, ti pannakapakawan dagiti labsingtayo, maitunos iti kinabaknang ti di kaikarian a kinamanangngaasina.”​—Efeso 1:7.

Ni Jesu-Kristo ti kangrunaan a persona iti pannakaibanag ti panggep ti Dios. (Hebreo 2:10) Ti daton a pangsubbotna ti nangipaay iti legal a pagibatayan ni Jehova a mangampon kadagiti dadduma a kaputotan ni Adan tapno agbalinda a kameng ti nailangitan a pamiliana ken mangpabang-ar iti sangatauan kadagiti bunga ti basol ni Adan, a di madadael ti panagkompiansa kadagiti linteg ken prinsipiona. (Mateo 20:28; 1 Timoteo 2:6) Inaramid ni Jehova dagiti bambanag iti pamay-an a maitandudo ti kinalintegna ken maragpat dagiti kalikaguman ti perpekto a hustisia.​—Roma 3:22-26.

Ti “Sagrado a Palimed” ti Dios

Iti rinibu a tawen, saan a naan-anay nga impalgak ti Dios no kasano nga itungpalna ti panggepna maipaay iti daga. Idi umuna a siglo K.P., ‘impakaammona kadagiti Kristiano ti sagrado a palimed ti pagayatanna.’ (Efeso 1:9) Nalawag a natarusan da Pablo ken dagiti kakaduana a napulotan a Kristiano ti naindaklan nga akem a naipaannong ken Jesu-Kristo no maipapan iti pannakaibanag ti panggep ti Dios. Nangrugi met a natarusanda ti naisangsangayan nga akemda kas makipagtawid ken ni Kristo iti nailangitan a Pagarianna. (Efeso 3:5, 6, 8-11) Wen, ti gobierno a Pagarian iti sidong ni Jesu-Kristo ken dagiti kakaduana nga agturay isu ti ahensia nga usaren ti Dios a mangyeg iti manayon a talna, saan laeng nga idiay langit no di pay ket ditoy daga. (Mateo 6:9, 10) Babaen dayta, isubli ni Jehova ti kasasaad ditoy daga kas iti orihinal a panggepna.​—Isaias 45:18; 65:21-23; Aramid 3:21.

Asidegen ti naituding a tiempo inton direkta nga agtignay a mangikkat iti amin a panangirurumen ken kinaawan hustisia ditoy daga. Ngem, kinapudnona, ti proseso ti panangisubli ket inrugin ni Jehova idi Pentecostes 33 K.P. Kasano? Babaen ti panangirugina idi a mangurnong ‘iti bambanag idiay langit,’ dagidiay makipagturay ken Kristo idiay langit. Karaman a naurnong dagiti Kristiano idiay Efeso. (Efeso 2:4-7) Iti di pay unay nabayag, iti tiempotayo, ur-urnongen ni Jehova “ti bambanag iti daga.” (Efeso 1:10) Babaen ti sangalubongan a kampania a panangasaba, ipakpakaammona iti amin a nasion ti naimbag a damag maipapan iti gobierno a Pagarianna nga iturayan ni Jesu-Kristo. Para kadagiti mangipangag, uray itan maur-urnongda iti lugar nga adda naespirituan a pannalaknib ken panangpaimbag. (Juan 10:16) Din agbayag, iti nadalusan a paraiso a daga, mapasaranda ti naan-anay a pannakawayawaya manipud iti amin a kinaawan hustisia ken panagsagaba.​—2 Pedro 3:13; Apocalipsis 11:18.

“Adun a dadakkel nga addang” ti inaramid ti tao a pangsaranay tapno matulongan ti nairurumen a sangatauan. (The State of the World’s Children 2000) Ngem ti kasayaatan nga addang isu ti asidegen nga ibaballaet ni Kristo Jesus ken dagiti kakaduana nga agturay iti nailangitan a gobierno a Pagarian. Naan-anay a solbarenda amin a kangrunaan a pakaigapuan ti dangadang ken amin a dadduma a kinadakes a mangparparigat kadatayo. Pagpatinggaenda amin a parikut ti sangatauan.​—Apocalipsis 21:1-4.

[Dagiti Ladawan iti panid 4]

Dagiti panangsaranay ti tao dida nasolbar dagiti parikut ti sangatauan

[Ladawan iti panid 6]

Ti daton a pangsubbot ni Kristo ti nangipaay iti sangatauan iti pannakabang-ar manipud iti basol ni Adan

[Ladawan iti panid 7]

Posible a makasarak iti naespirituan a pannalaknib ken panangpaimbag ita

[Dagiti Ladawan iti panid 7]

Iti din agbayag, babaen ti Mesianiko a Pagarian, addanto ti naan-anay a pannakabang-ar kadagiti parikut