Ti Personal a Panagadal a Mangkabal Kadatayo kas Mannursuro
“Utobem dagitoy a banag; maipamaysaka kadakuada, tapno ti panagrang-aymo maiparangarang iti amin a tattao. Itultuloymo nga asikasuen ti bagim ken ti isursurom.”—1 TIMOTEO 4:15, 16.
1. Ania ti agpayso maipapan iti tiempo ken personal a panagadal?
“TA ITI tunggal banag adda naituding a tiempo,” kuna ti Biblia iti Eclesiastes 3:1. Awan duadua a pudno dayta iti personal a panagadal. Marigatan ti adu a mangutob kadagiti naespirituan a bambanag no saan nga umiso ti tiempo wenno lugar. Kas pagarigan, kalpasan ti agmalem a makabannog a trabaho ken makabsog a pangrabii, kayatmo pay kadi ti agadal, nangnangruna no addaka iti paboritom a tugaw iti sanguanan ti telebision? Mabalin a saan. Ania ngarud ti remediona? Nalawag a masapul nga ikeddengtayo no kaano ken sadino ti pagadalantayo yantangay kayattayo a magun-od ti kasayaatan a resulta ti panagreggettayo.
2. Ania ti masansan a kasayaatan a tiempo ti personal a panagadal?
2 Para iti dadduma, ti agsapa ti kasayaatan a tiempo nga agadalda bayat a kadawyanna a mas alertoda. Dadduma ti agadal iti apagbiit kabayatan ti panaginana iti aldaw. Imutektekanyo kadagiti sumaruno a pagarigan ti pannakadakamat ti tiempo agpaay kadagiti napateg a naespirituan nga aktibidad. Insurat ni David nga ari ti nagkauna nga Israel: “Iti bigat ipangngegmo kaniak ti naayat a kinamanangngaasim, ta kenka inkabilko ti panagtalekko. Ipakaammom kaniak ti dalan a rebbeng a pagnaak, ta kenka intag-ayko ti kararuak.” (Salmo 143:8) Imparangarang ni propeta Isaias ti umasping a panangipateg idi kinunana: “Ti met laeng Soberano nga Apo Jehova intedna kaniak ti dila dagidiay nasursuruan, tapno maammuak no kasano a sungbatak iti maysa a sao daydiay nabannog. Mangriing iti binigat; riingenna ti lapayagko tapno dumngeg a kas kadagidiay nasursuruan.” Ti punto isu daytoy: masapul nga agadal ken napasnek a makisaritatayo ken ni Jehova no presko ti panunottayo, aniaman dayta nga oras ti aldaw.—Isaias 50:4, 5; Salmo 5:3; 88:13.
3. Aniada a kasasaad ti makatulong iti epektibo a panagadal?
3 Ti sabali pay a makatulong iti epektibo a panagadal isu ti ditay panagtugaw kadagiti komportable unay a tugaw wenno sofa. Saan a makatulong daytoy iti panagtalinaed nga alerto. No agad-adaltayo, masapul a mariing ti isiptayo, ta ad-adda a makapatuglep no komportable unay ti kasasaad. Makatulong met iti panagadal ken panagmennamenna ti relatibo a kinaulimek ken panangliklik kadagiti pakasingaan. Saantayo a naan-anay a magunggonaan no agadaltayo bayat nga agtoktokar ti radio, nakalukat ti telebision, wenno adda dagiti ubbing nga as-asikasuen. Idi kayat ni Jesus ti agmennamenna, napan iti naulimek a lugar. Dinakamatna met ti pateg ti panagbirok iti pribado a lugar a pagkararagan.—Mateo 6:6; 14:13; Marcos 6:30-32.
Personal a Panagadal a Mangkabal Kadatayo a Sumungbat
4, 5. Kadagiti ania a pamay-an a praktikal a makatulong ti broshur a Kalikaguman?
4 Makapnek ti personal a panagadal no usarentayo ti nadumaduma a katulongan iti panagadal iti Biblia tapno ad-adda nga umuneg ti pannakaawattayo iti maysa a suheto, nangnangruna no aramidentayo dayta tapno masungbatan dagiti napasnek a saludsod ti maysa a tao. (1 Timoteo 1:4; 2 Timoteo 2:23) Kas pangrugian, adu a kabbaro ti mangadal iti broshur nga Ania ti Kalikaguman ti Dios Kadatayo?,a a magun-od ita iti 261 a lenguahe. Nakasimsimple ngem espesipiko daytoy a publikasion, a naan-anay a naibatay iti Biblia. Tulonganna dagiti agbasbasa tapno nalakada a maawatan no ania dagiti kalikaguman ti Dios mainaig iti umiso a panagdayaw. Ngem gapu ta broshur daytoy, saanna a mailawlawag a detalyado ti tunggal suheto. No adda dagiti nauneg a saludsod ti estudianteyo maipapan kadagiti suheto ti Biblia nga ad-adalenyo, pangsarakanyo kadagiti kanayonan nga impormasion ti Biblia a tumulong kenkuana a mangsungbat kadagita a saludsod?
5 Kadagidiay addaan iti Watchtower Library iti CD-ROM iti pagsasaoda, nalakada la nga agsirarak kadagiti nagadu a gubuayan ti impormasion iti kompiuter. Ngem kasano ngay dagiti tattao nga awanan kadagita nga alikamen? Sukimatentayo ti dua a topiko a nausig iti broshur a Kalikaguman tapno makitatayo no kasano a mapalawa ti pannakaawattayo ken mabaelantayo ti sumungbat a mas detalyado—nangnangruna no adda mangyimtuod kadagiti saludsod a kas iti, Siasino ti Dios, ken siasino a talaga ni Jesus?—Exodo 5:2; Lucas 9:18-20; 1 Pedro 3:15.
Siasino ti Dios?
6, 7. (a) Ania a saludsod ti tumaud maipapan iti Dios? (b) Ania a nagpateg a punto ti saan a nadakamat ti maysa a klero iti palawagna?
6 Ti Leksion 2 iti broshur a Kalikaguman sungbatanna ti napateg a saludsod a, Siasino ti Dios? Napateg daytoy a punto yantangay saan a makapagdayaw ti maysa iti pudno a Dios no dina ammo wenno nalabit pagduaduaanna ti kaadda ti Dios. (Roma 1:19, 20; Hebreo 11:6) Ngem nadumaduma ti kapanunotan dagiti tattao no siasino ti Dios. (1 Corinto 8:4-6) Nagduduma ti sungbat ti tunggal narelihiosuan a pilosopia no maipapan iti kinasiasino ti Dios. Kaaduan a relihion iti Kakristianuan ti mamati a ti Dios ket maysa a Trinidad. Maysa a prominente a klero iti Estados Unidos ti nangted iti palawag a napauluan “Am-ammoyo Kadi ti Dios?” ngem dina pulos dinakamat ti nagan ti Dios, uray adu a daras a nagadaw iti Hebreo a Kasuratan. Siempre, nagadaw ngamin iti patarus ti Biblia a nangusar iti saan nga espesipiko ken awan naganna nga “Apo” imbes a Jehova wenno Yahweh.
7 Anian a nagpateg a punto ti saan a nadakamat ti klero idi inadawna ti Jeremias 31:33, 34: “‘Saanton a masapul nga isuroda dagiti kaarruba ken kailianda a mangammo iti APO [Hebreo, Jehova]. Ammodakto dagiti amin a tattao, natan-ok man wenno nanumo. . . .’ Daytoy ti sao ti APO [Hebreo, Jehova].” Inusarna ti maysa a patarus a nangikkat iti Jehova, ti naisangsangayan a nagan ti Dios.—Salmo 103:1, 2, Naimbag a Damag Biblia.
8. Ania ti mangilawlawag iti kinapateg ti panagusar iti nagan ti Dios?
8 Ilawlawag ti Salmo 8:9 no apay a napateg nga usaren ti nagan ni Jehova: “O Jehova nga Apomi, anian a nagdaeg ti naganmo iti intero a daga!” Idiligyo dayta iti: “O APO, nga Apomi, maiparangarang ti kinadayagmo iti sangalubongan!” (Naimbag a Damag Biblia) Kaskasdi, kas nailawlawag iti immuna nga artikulo, magun-odtayo ti “mismo a pannakaammo iti Dios” no agpaiwanwantayo iti Saona. Ngem ania a katulongan iti panagadal iti Biblia ti nalaka a mangsungbat kadagiti saludsod maipapan iti kinapateg ti nagan ti Dios?—Proverbio 2:1-6.
9. (a) Ania a publikasion ti tumulong kadatayo a mangilawlawag iti kinapateg ti panangusar iti nagan ti Dios? (b) Kasano a ti adu nga agipatpatarus napaayda a mangraem iti nagan ti Dios?
9 Mabalintayo nga usaren ti broshur a Ti Nasantuan a Nagan nga Agtalinaed iti Agnanayon, a naipatarus iti 69 a lenguahe.b Ti seksion a napauluan “Ti Nagan ti Dios—Ti Kaipapananna ken Pannakaibalikasna” (panid 6-11) nalawag nga ipakitana a ti Hebreo a Tetragrammaton (manipud iti Griego, a kaipapananna “uppat a letra”) ket nagparang iti agarup 7,000 a daras iti nagkauna a Hebreo a teksto. Ngem dagiti klero ken agipatpatarus a kameng ti Judaismo ken Kakristianuan ginagarada nga inikkat dayta kadagiti kaaduan a Biblia a patarusda.c Kasano nga ibagada nga ammoda ti Dios ken addaanda iti naanamongan a relasion kenkuana no dida met awagan ti Dios iti naganna? Ti pudno a naganna ti pangrugian ti pannakaawat no ania dagiti panggepna ken ti kinasiasinona. Maysa pay, ania ngarud ti pateg ti kinuna ni Jesus iti modelo a kararag nga “Amami nga adda iti langlangit, masantipikar koma ti naganmo” no saan met laeng a mausar ti nagan ti Dios?—Mateo 6:9; Juan 5:43; 17:6.
Siasino ni Jesu-Kristo?
10. Kadagiti ania a wagas a magun-odtayo ti detalyado a salaysay ti biag ken ministerio ni Jesus?
10 Ti Leksion 3 iti broshur a Kalikaguman ket napauluan iti “Siasino ni Jesu-Kristo?” Iti innem laeng a parapo, mangted daytoy iti ababa a salaysay maipapan ken Jesus, ti namunganayanna, ken ti panggepna nga immay ditoy daga. Malaksid kadagiti mismo a salaysay ti Ebanghelio, no kayatyo ti kompleto a salaysay ti biagna, awanen ti nasaysayaat pay ngem iti Ti Katan-okan a Tao a Nagbiag Pay Laeng a magun-od iti 111 a lenguahe.* Naglaon daytoy a libro iti kompleto a kronolohikal a salaysay ti biag ni Kristo ken dagiti sursurona, maibatay iti uppat nga Ebanghelio. Saklawen ti 133 a kapitulo dagiti pasamak iti biag ken ministerio ni Jesus. Para iti naiduma, detalyado a panangsukimat iti dayta, mabalinyo a kitaen ti Insight, Tomo 2, iti sidong ti paulo a “Jesus Christ.”
11. (a) Ania ti nakaidumaan ti pammati dagiti Saksi ni Jehova maipapan ken Jesus? (b) Ania ti sumagmamano a teksto iti Biblia a nalawag a mangbalusingsing iti doktrina a Trinidad, ken ania a publikasion ti makatulong iti daytoy a banag?
11 Iti Kakristianuan, ti kontrobersia mainaig ken Jesus ket naisentro iti kasasaadna kas “Anak ti Dios” ken “Dios Anak”—iti sabali a pannao, ti isyu mainaig iti inawagan ti Catechism of the Catholic Church a “ti kangrunaan a misterio iti Nakristianuan a pammati,” ti Trinidad. Naiduma dagiti Saksi ni Jehova kadagiti relihion ti Kakristianuan. Patienda a saan a Dios ni Jesus no di ket pinarsua ti Dios. Nagsayaat ti pannakausig daytoy a suheto iti broshur a Rumbeng Kadi a Patienyo ti Trinidad?, a naipatarus iti 95 a lenguahe.d Sumagmamano kadagiti adu a kasuratan a mangbalusingsing iti doktrina a Trinidad isu ti Marcos 13:32 ken 1 Corinto 15:24, 28.
12. Ania a kanayonan a saludsod ti nasken nga usigentayo?
12 Ti kalkalpas a panangusig maipapan iti Dios ken ni Jesu-Kristo ipakitana ti nadumaduma a pamay-an ti personal a panagadal buyogen ti panggep a matulongan a gumun-od iti umiso a pannakaammo dagidiay saan pay a nasursuruan iti kinapudno iti Biblia. (Juan 17:3) Ngem komusta dagidiay nabayagen a kameng ti kongregasion Kristiano? Gapu ta adun ti pannakaammoda iti Biblia, kasapulanda pay kadi nga ipaayan iti atension ti personal a panagadalda iti Sao ni Jehova?
Apay nga ‘Itultuloy nga Asikasuen’?
13. Ania ti mabalin a di umiso a panangmatmat ti dadduma iti personal a panagadal?
13 Dadduma a nabayagen a kameng ti kongregasion ti nalabit naruam nga agpannuray iti pannakaammo iti Biblia a nagun-odda idi kabbaroda pay la a Saksi ni Jehova. Nalaka la nga ibaga: “Saan a kas kadagiti kabbaro, diakon kasapulan ti naanep a panagadal. Total, adun a daras a nasukimatkon ti Biblia ken dagiti naibatay-Biblia a publikasion kadagiti naglabas a tawen.” Kasla met laengen ibagbagam: “Diak kasapulan nga ipaayan iti dakkel nga atension ti pannanganko, ta adun ti nakanko.” Ammotayo a masapul nga agtultuloy a mangan ti bagi kadagiti nasustansia, umiso ti pannakalutona a taraon, tapno agtalinaed a nasalun-at ken nasaranta. Anian nga ad-adda a pudno dayta no iti panangtaginayon iti naespirituan a salun-at ken pigsatayo!—Hebreo 5:12-14.
14. Apay a nasken nga agtultuloy nga asikasuentayo ti bagitayo?
14 Gapuna, nabayagtayo man nga agad-adal iti Biblia wenno saan, kasapulantayo amin nga ipangag ti balakad ni Pablo ken ni Timoteo, a maysa idin a nataengan ken responsable a manangaywan: “Itultuloymo nga asikasuen ti bagim ken ti isursurom. Agtalinaedka kadagitoy a banag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.” (1 Timoteo 4:15, 16) Apay a nasken nga ipapusotayo ti balakad ni Pablo? Laglagipenyo a kinuna ni Pablo a makidangdangadangtayo “kadagiti pangallilaw a pamuspusan ti Diablo” ken “kadagiti nadangkes nga espiritu a puersa kadagiti nailangitan a disso.” Ken imballaag ni apostol Pedro nga “agsapsapul [ti Diablo] iti alun-onenna,” ket mabalin a maysa kadatayo ti alun-onenna. Mabalin a gundawayanna ti nalabes a panagkompiansatayo iti bagi.—Efeso 6:11, 12; 1 Pedro 5:8.
15. Ania ti mangkabal kadatayo iti naespirituan, ken kasanotayo a mamantener dayta?
15 Ania ngarud ti mangkabal kadatayo? Palagipannatayo ni apostol Pablo: “Alaenyo ti naan-anay a kabal manipud iti Dios, tapno mabalinanyo ti sumaranget iti nadangkes nga aldaw ket, kalpasan a naan-anay a naaramidyon ti amin a bambanag, makapagtakderkayo a sititibker.” (Efeso 6:13) Ti kinaepektibo dayta a naespirituan a kabal ket agpannuray saan laeng nga iti orihinal a kalidadna no di pay ket iti regular a pannakamantener. Gapuna, ti naan-anay a kabal manipud iti Dios iramanna dagiti baro a pannakailawlawag ti Sao ti Dios. Daytoy ti mangipakita a napateg a makidanggaytayo iti lawag ti kinapudno nga ipalgak ni Jehova babaen ti Saona ken ti matalek ken masirib a klase adipen. Napateg ti regular a personal a panagadal iti Biblia ken kadagiti naibatay-Biblia a publikasion tapno mamantener ti naespirituan a kabaltayo.—Mateo 24:45-47; Efeso 6:14, 15.
16. Ania ti mabalintayo nga aramiden tapno masiguradotayo a nasayaat ti kasasaad ti ‘dakkel a kalasag ti pammatitayo’?
16 Intampok ni Pablo ti maysa a napateg a paset ti kabaltayo, “ti dakkel a kalasag ti pammati,” a mausartayo a mangsangga ken mangparmek kadagiti sumsumged a gayang ni Satanas, kas kadagiti ulbod a pammabasol ken sursuro dagiti apostata. (Efeso 6:16) Gapuna, napateg a sukimatentayo no kasano kalagda ti kalasag ti pammatitayo ken no aniada nga addang ti aramidentayo a mangmantener ken mangpabileg iti dayta. Kas pagarigan, mabalin nga isaludsodyo: ‘Ania ti ar-aramidek a panagsagana para iti linawas a panagadal iti Biblia babaen ti panangusar iti Ti Pagwanawanan? Nagadalak kadi a naimbag tapno ‘maiparegtak ti ayat ken nasayaat nga ar-aramid’ babaen kadagiti nabagas a sungbatko iti gimong? Basbasaek kadi dagiti teksto iti Biblia a nadakamat ngem saan a naadaw? Parparegtaek kadi ti dadduma babaen ti narayray a pannakipasetko kadagiti gimong? Nakired dagiti naespirituan a taraontayo, ket masapul a mennamennaen a naimbag tapno naan-anay a magunggonaantayo.—Hebreo 5:14; 10:24.
17. (a) Ania a sabidong ti us-usaren ni Satanas tapno padasenna a pakapuyen ti espiritualidadtayo? (b) Ania ti mangparmek iti pangsabidong ni Satanas?
17 Ammo ni Satanas dagiti pagkapuyan ti imperpekto a tattao, ket nasikap dagiti silona. Ti maysa kadagiti pamay-anna a mangisaknap iti dakes nga impluensiana isu ti pornograpia a naglaka a mabuya kadagiti telebision, Internet, video, ken nayimprenta a publikasion. Dadduma a Kristiano ti nangipalubos kadagita a banag a mangsabidong iti kimmapuy a kabalda, ket nagturong dayta iti pannakapukaw dagiti pribilehioda iti kongregasion wenno nangyeg kadagiti dakes a bunga. (Efeso 4:17-19) Ania ti mangparmek iti naespirituan a pangsabidong ni Satanas? Masapul a ditay liwayan ti regular a personal a panagadaltayo iti Biblia, dagiti Nakristianuan a gimong, ken ti naan-anay a kabal a naggapu iti Dios. Dagitoy ti mangted kadatayo iti abilidad a mangilasin iti umiso ken di umiso ken manggura iti karimon ti Dios.—Salmo 97:10; Roma 12:9.
18. Kasano a matulongannatayo “ti kampilan ti espiritu” iti naespirituan a pannakidangadangtayo?
18 No taginayonentayo ti regular a panagadaltayo iti Biblia, saan laeng a lumagda ti kabaltayo gapu iti umiso a pannakaammo iti Sao ti Dios no di pay ket epektibo ti pannakidangadangtayo babaen ti “kampilan ti espiritu, a dayta ti, sao ti Dios.” Ti sao ti Dios ket “natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.” (Efeso 6:17; Hebreo 4:12) No dumteng ti pannulisog ket usarentayo a naimbag dayta a “kampilan,” nalakatayo a mailasin ti agparang nga awan peggadna, wenno kasla makaay-ayo pay ketdi a banag, ket maibutaktak dayta kas makapapatay a silo ti nadangkes. Ti adu a pannakaammo ken pannakaawattayo iti Biblia ti tumulong kadatayo a mangilaksid iti dakes ken mangaramid iti naimbag. Gapuna, masapul nga iyimtuodtayo amin iti bagitayo: ‘Natadem kadi ti kampilak, wenno aglatlati? Marigatanak kadi a manglagip kadagiti teksto ti Biblia a mangpabileg iti pannakidangadangko?’ Taginayonentayo koma ti nasayaat nga ugali iti personal a panagadal iti Biblia tapno masarangettayo ti Diablo.—Efeso 4:22-24.
19. Ania dagiti magunggonatayo no ipasnektayo ti personal a panagadal?
19 Insurat ni Pablo: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” No ipapusotayo ti sasao ni Pablo ken ni Timoteo, mapabilegtayo ti espiritualidadtayo ken mapagbalintayo nga ad-adda nga epektibo ti ministeriotayo. Ad-adda a makagunggona iti kongregasion dagiti naespirituan a panglakayen ken ministerial nga adipen, ket makapagtalinaedtayo a natibker iti pammati.—2 Timoteo 3:16, 17; Mateo 7:24-27.
[Footnotes]
a Gagangay a no malpas nga adalen ti kabbaro nga interesado ti broshur a Kalikaguman, isarunona nga adalen ti libro a Pannakaammo a Mangiturong iti Biag nga Agnanayon, agpada nga impablaak dagiti Saksi ni Jehova. Dagiti linaonda nga impormasion ti tumulong a mangikkat kadagiti bangen a manglapped iti naespirituan a panagrang-ay.
b Impablaak dagiti Saksi ni Jehova. Kadagidiay addaan iti Insight on the Scriptures iti pagsasaoda, mabalinda a sukimaten ti Tomo 2, iti sidong ti paulo a “Jehovah.”
c Iti sumagmamano nga Español ken Catalonian a patarus, nakakadkadlaw ti panangipatarusda iti Hebreo a Tetragrammaton, ta inusarda ti “Yavé,” “Yahveh,” “Jahvè,” ken “Jehová.”
d Impablaak dagiti Saksi ni Jehova.
Malagipyo Kadi?
• Aniada a kasasaad ti makatulong iti epektibo a personal a panagadal?
• Ania ti nagkurangan ti adu a patarus ti Biblia no maipapan iti nagan ti Dios?
• Aniada a teksto ti Biblia ti usarenyo a mangbalusingsing iti sursuro a Trinidad?
• Ania ti masapul nga aramidentayo tapno masalakniban ti bagitayo manipud kadagiti silo ni Satanas, uray nabayagtayon a pudno a Kristiano?
[Dagiti Ladawan iti panid 19]
Tapno epektibo ti personal a panagadal, kasapulanyo ti kombiniente a lugar nga awan ti makasinga
[Dagiti Ladawan iti panid 23]
Natadem kadi wenno aglatlati ti ‘kampilanyo’?