Malagipyo Pay Aya?

Nasarakanyo kadi dagiti nabiit pay a ruar iti Ti Pagwanawanan a praktikal ti pategna kadakayo? Ngarud apay a dikay suoten ti memoriayo kadagiti sumaganad:

◻ Apay a ni Timoteo ket maysa a nagsayaatan nga ulidan a suroten dagiti agtutubo?

Insakripisio ni Timoteo iti makunkuna a gagangay a panagbiag iti pagtaengan tapno agbalin a maysa a mapagtalkan, matalek a kadua ni Pablo. Isut’ nagtalinaed a kadua ni Pablo iti sidong ti aniaman a rigat, a timmulong kenkuana iti trabaho a panangasaba babaen iti situtulok a panagserbina iti sadinoman a nakaitudinganna. (Filipos 2:19, 20)​—8/15, panid 14.

◻ Ania dagiti kualipikasion a maipaay iti bautismo?

Ti kandidato iti bautismo masapul a maawatanna no ania ti nairaman. Pudno a tarigagayanna ti agserbi ken Jehova agsipud ta isut’ agayat Kenkuana. Ipakitana daytoy babaen ti panangipangagna kadagiti moral a kababalin a sapulen ti Dios ken ti panangiraman iti pammatina kadagiti dadduma. Kasapulanna met ti panangaramidna iti personal a dedikasion ken Jehova babaen iti kararag.​—8/15, panid 16.

◻ Apay a dakes ti panangeksperimento iti espiritismo?

Ti panangeksperimento iti espiritismo kaiyariganna ti panangayat iti guraen ni Jehova. (Proverbio 6:16-19) Kinapudnona, dayta ket kapada iti panangidian ken ni Jehova ken ti pannakidasig iti kangrunaan a kabusor ti Dios ken dagiti manangsuportarna.​—9/1, panid 5.

◻ Ania ti “libro a pakalaglagipan” a nasao iti Malakias 3:16?

Manipud idi tiempo ni Abel a nagtultuloyen, ti Dios palpaliiwennan, a kasla mangisursurat iti maysa a libro, kadagidiay mabalin a masubbot iti sangatauan a maikari iti pakalaglagipan no maipapan iti biag nga agnanayon. Daytoy a “libro iti pakalaglagipan” ket isu met laeng “ti libro iti biag” ken “ti lukot iti biag.” (Apocalipsis 3:5; 17:8; Mateo 23:35)​—9/1, panid 29.

◻ Ania ti mamagbalin a napateg iti maysa a pudno a gayyem?

Kanayon a mabalinmo ti dumawat iti tulong, balakad, pannakaliwliwa, ken nabara a pannakikadua iti maysa a pudno a gayyem.​—9/15, panid 3, 4.

◻ Ania ti makapapatay nga “angin” daytoy a lubong?

Dayta ket pangkaaduan nga espiritu, wenno kangrunaan a kababalin iti kinaagum ken panagsalungasing, nga imparangarang dagiti tattao a naisina manipud iti Dios. (Efeso 2:2; 1 Corinto 2:12)​—9/15, panid 11.

◻ Tapno ti maysa a relihion addaan iti praktikal a pateg ania ti masapul nga aramidenna?

Masapul nga agbunga iti nasaayaat a bunga. Masapul a mangpataud kadagiti nasaysayaat a tattao. Masapul a kabaelanna ti mangilawlawag no apay a dagiti bambanag ket kasta ti kasasaadda ditoy daga itatta. Ket masapul a maipasagepsepna iti isip ken puso dagiti tattao ti sigurado a namnama a maipaay iti masanguanan. (Mateo 7:17-20)​—10/1, panid 7.

◻ Ania ti saan a naibanag ti Repormasion?

Dadduma a nasapa a repormador ti nangarapaap iti pannakaisubli kadagiti pagalagadan iti Biblia, iti nadalus a Kinakristiano. Daytoy nga arapaap ket pulos a di naibanag. Bayat ti panaglabas ti tiempo, dagiti kangrunaan a doktrina iti ig-iglesia a Protestante, nasional man wenno saan, ket nangnangruna a maitunos kadagidiay doktrina iti Iglesia Katolika Romana.​—10/1, panid 25.

◻ Ania ti nangiturong iti di nasayaat a pannakaukom ni Moises ken ni Aaron a simmaruno iti pasamak idiay Cades-barnea?

Ti Salmo 106:32, 33 mangipaay iti pannakaawat iti daytoy a pasamak, a mangipakita a ni Moises nagtignay gapu iti dakes nga espiritu ket ‘nagsao a sikakas-ang babaen kadagiti bibigna.’ Babaen kadagiti napungtot a sasao, inturongna ti atension iti bagina ken ni Aaron imbes a ken Jehova, isu a pudno a simimilagro a makaipaay iti danum. Iti kastoy a pamay-an ni Moises dina ‘sinantifikar ti Dios iti imatang dagiti tattao.’ (Numeros 27:12-14)​—10/15, panid 31.

◻ Ania a nagtan-ok a panggep ti nagserbian ti Linteg ti Dios a naited iti Israel?

Ti Linteg ket naited iti Israel tapno taginayonnenna a nadalus ti nasion iti pisikal, naespirituan, mental, ken iti moral.​—11/1, panid 12.

◻ Ania dagiti dadduma a tulong iti panangtaginayon iti nadalus a kinawaywayas?

Kankanayon nga agkararag a maipaay iti espiritu ti Dios ken iti tulongna a mangipakita iti bungbungana. Pampanunotenyo ken iyaplikar ti balakad iti Sao ti Dios. Liklikan ti pornograpia ken dagiti imoral a panaglinglingay. Annadanyo ti pannakilangenyo. Liklikanyo dagiti amin a dakes a panagsasao ken naalas a panagang-angaw.​—11/15, panid 20.

◻ Ania dagiti nakaro a nagdumaan iti panangagas a nailanad iti Biblia ken dagidiay nga ar-aramiden dagiti mangngagas babaen iti pammati (faith healers) itatta?

Ni Jesus ken dagiti adalanna saanda a nagsingir iti bayad a maipaay iti panangagasda. Dagiti panangagas a naaramid iti panawen ti pannakaisurat iti Biblia ket giddato wenno naaramid iti ababa a tiempo.​—12/1, panid 4, 5.

◻ Aniada dagiti dadduma a gunggona iti panagkanta a sipipigsa iti pudno a panagdayaw?

Ti personal a pannakiramantayo iti publiko a panagdayaw ket bumileg. Ti panagkanta mangipaay iti nasayaat a pammaneknek kadagiti kabbaro. Kangrunaanna, dakdakkel a dayaw ti maipaay ken Jehova.​—12/1, panid 27.