“Ipakitayo a Managyamankayo”

◼ Maulit-ulit nga iparparegta ti Biblia kadagiti agdaydayaw iti Dios nga agbalinda a managyaman. Kuna ti Salmo 92:1 a “nasayaat ti agyaman ken Jehova.” Imbalakad met ni apostol Pablo: “Ipakitayo a managyamankayo.”—Colosas 3:15.

Nasayaat ti agbalin a managyaman. Kinuna ni Propesor Robert Emmons iti University of California idiay Davis: “Patpatalgedan itan dagiti managsirarak maipapan iti kinamanagyaman a makatulong unay dayta tapno madaerantayo dagiti inaldaw a parikut nangruna ti panagsikor, ken tapno maaddaantayo iti panagtalek iti bagitayo.”

Impatuldo ti magasin a Time ti dadduma pay a pagimbaganna: “No idilig kadagiti amin a tattao, dagiti managyaman ket. . . nagangganaygay ken ad-adda a positiboda, manmanoda nga agsikor ken makapasar iti nakaro a depression.”

Ngem nakalkaldaang ta impadto ti Biblia a “kadagiti maudi nga aldaw,” adu a tattao ti ‘managayatto iti bagbagida’ ken “saan a managyaman.” (2 Timoteo 3:1-5) Ania ti aramiden dagiti pudno a Kristiano tapno saanda a maimpluensiaan kadagiti kasta a kababalin? Kuna ti Autor ti Biblia: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam.” (Isaias 48:17) No agtulnogtayo kadagiti linteg ti Dios, maliklikantayo ti nakaro a kinaliday a mapaspasaran dagidiay mangipangpangruna kadagiti inaagum nga aramid. Kanayonanna, mainanamatayo a makitkita ni Jehova dagiti panagreggettayo ket gunggonaannatayo. (Hebreo 6:10) Dagita a pagimbagan ti mangtignay kadatayo nga ‘agyaman ken Jehova.’—Salmo 107:8.