Salsaludsod Dagiti Agbasbasa

Kunaen ti Colosas 1:16 maipapan iti Anak ti Dios nga “amin a sabsabali pay a bambanag naparsuada babaen kenkuana ken maipaay kenkuana.” Iti ania nga anag a naparsua amin a banag “maipaay” iti Anak ti Dios, ni Jesus?

Inusar ni Jehova ti bugbugtong nga Anakna kas mamangulo nga agobra iti pannakaparsua ti amin a dadduma pay a bambanag, kayatna a sawen, amin a bambanag malaksid ken Jesus a mismo. (Proverbio 8:27-30; Juan 1:3) Umiso laeng a maragsakan ti Anak kadagitoy a gapuanan, ket iti daytoy nga anag a “maipaay” dagitoy kenkuana.

Ammotayo a dagiti natauan a nagannak kanayon nga ekspektarenda a makagun-odda iti dakkel a ragsak iti pataudenda​—dagiti annakda. Gapuna, ti proverbio ti Biblia dakamatenna ti ‘anak a pakasarakan [ni amana] iti ragsak.’ (Proverbio 3:12; 29:17) Kasta met, pagrag-oan met idi ni Jehova a Dios ti Israel no matalek dagiti tattaona. (Salmo 44:3; 119:108; 147:11) Maragsakan met iti kinamatalek dagiti nasungdo kenkuana iti panawentayo.​—Proverbio 12:22; Hebreo 10:38.

Gapuna, maitutop a ti Dios tarigagayanna a maragsakan ti katrabahuanna, ni Jesus, kadagiti gapuananna. Kinapudnona, kunaen ti Proverbio 8:31 a ti Anak ‘naragsakan iti nabunga a disso iti dagana, ket ti bambanag a pakaay-ayatanna mainaig iti annak ti tattao.’ Iti daytoy nga anag a kunaen ti Colosas 1:16: “Amin a sabsabali pay a bambanag naparsuada babaen kenkuana ken maipaay kenkuana.”