Ti Panangmatmat ti Biblia

Pudno Aya a ni Jesus ti Anak ti Dios?

BUYOGEN ti napigsa a pammati a kinuna ni apostol Pedro ken Jesus: “Sika ti Kristo, ti Anak ti sibibiag a Dios.” (Mateo 16:16) Maysa daytoy kadagiti adu a panangdakamat ti Biblia ken Jesus kas ti Anak ti Dios, sasao a nangtignay iti nadumaduma a reaksion dagiti relihioso.

Adu kadagiti mamati a ni Jesu-Kristo ti Dios ti marigatan a mangilawlawag no apay a naawagan iti Anak ti Dios. Ngem nainkalintegan laeng a saan a mabalin nga akmenna dagitoy a dua a posision. Pampanunoten ti dadduma a ni Jesus ket napateg a persona iti napalabas a tiempo, maysa a masirib a tao, wenno nalabit pudno a mammadto ti Dios, ngem awanen ti natantan-ok a saadna. Ania ti pudno nga isursuro ti Biblia? Napateg kadi no ania ti patiem?

Inauna nga Anak ti Dios

Isursuro ti Biblia nga adda idi tiempo nga agmaymaysa ti Dios. Gapu iti ayatna, inkeddengna nga iranud ti biag babaen ti panagbalinna nga ama​—ngem saan a kas iti ama a tao. Imbes ketdi, inusar ni Jehova ti di matukod a pannakabalinna nga agparsua tapno mangbukel iti sibibiag ken nasaririt a persona​—“ti pangrugian ti panamarsua ti Dios,” a pagaammotayo itan kas ni Jesu-Kristo. (Apocalipsis 3:14; Proverbio 8:22) Agsipud ta ni Jesus ti direkta a pinarsua ti Dios idi agmaymaysa pay laeng ti Dios, nainkalintegan laeng a ni Jesus ket naawagan ‘ti bugbugtong nga anak’ ken “ti inauna iti isuamin a parsua.”​—Juan 1:14; Colosas 1:15.

Nalawag ngarud a kas ti inauna kadagiti pinarsua ti Dios, saan a mabalin a ni Jesus ti Namarsua, “ti maymaysa a Dios.” (1 Timoteo 1:17) Iti sabali a bangir, inikkan ti Dios ti Anakna iti adu a pribilehio. Kas pagarigan, babaen ken Jesus, pinarsua ti Dios ti “amin a sabsabali pay a bambanag,” agraman dagiti anghel. Dagitoy nga anghel ti natukoy kas “annak ti Dios”​—ni Jehova met ti Nangted iti Biagda.​—Colosas 1:16; Job 1:6; 38:7.

Kalpasan nga insaganana ti daga tapno pagtaengan ti tao, nabatad a ti inauna nga Anakna ti kasarsarita ti Dios idi kinunana: “Aramidenta ti tao iti ladawanta.” (Genesis 1:26; Proverbio 8:22-31) Gapuna, pinarsua met ni Jehova ni Adan, ti immuna a tao nga anak ti Dios, babaen iti espiritu a parsua a nagbalin a ni Jesus.​—Lucas 3:38.

Nagbalin ni Jesus a Tao nga Anak ti Dios

Impalgak ni apostol Juan kadatayo nga idi naituding a tiempo, ti espiritu nga Anak ti Dios “nagbalin a lasag ken nakipagnaed kadatayo.” (Juan 1:14) Tapno maibanagna daytoy a panagbalbaliw ti kasasaad ni Jesus, simimilagro nga inyakar ti Dios ti biag ni Jesus manipud langit agingga iti aanakan ti Judio a birhen a ni Maria. Iti kasta, nagtalinaed ni Jesus kas Anak ti Dios, nupay maysan a tao. Kanayonanna, yantangay ti Dios ti nangted iti biag ken Jesus, saan a ti asinoman a tao, naipasngay ni Jesus kas perpekto, nga awanan basol. “Ti mayanak maawaganto iti nasantuan, Anak ti Dios,” kinuna ni anghel Gabriel ken Maria.​—Lucas 1:35; Hebreo 7:26.

Ti pammatalged iti panagbalin ni Jesus nga anak bayat a naglasag ket naggapu iti Amana a mismo. Idi nabautisaran ni Jesus, nakita ni Juan a Mammautisar a naglukat ti langit sa adda timek a nangngegna manipud langit a nagkuna: “Daytoy ti Anakko, ti dungdungnguen, nga inanamongak.” (Mateo 3:16, 17) Di pakasdaawan nga imbaga ni Juan kadagiti adalanna: “Nakitak dayta, ken sinaksiak a daytoy isu ti Anak ti Dios.”​—Juan 1:34.

Kabayatan ti ministerio ni Jesus ditoy daga, saan nga inwaragawag ni Jesus ti kinapudno nga isu ti Mesias, ti Anak ti Dios. (Marcos 8:29, 30) Masansan a binay-anna lattan a dagiti tattao ti makaamiris babaen ti panagimdengda kadagiti pannursurona, babaen ti panangpaliiwda iti panagbiagna, ken ti pannakakitada iti adu a milagrona, a kaaduan ket inaramidna iti publiko. Kas pagarigan, inagasanna ‘amin dagidiay nakaro ti kasasaadda, dagiti naparigatan iti nadumaduma a sagubanit ken tuok.’ (Mateo 4:24, 25; 7:28, 29; 12:15) Dagiti bulsek, tuleng, pilay, ken masaksakit, immayda amin ken Jesus, ket pinaimbagna ida. Pinagungarna pay ketdi dagiti natay! (Mateo 11:4-6) Iti imatang dagiti adalanna, simimilagro a nagna ni Jesus iti rabaw ti danum ken pinagtalnana ti angin ken dalluyon kabayatan ti napigsa a bagyo. Gapu iti daytoy a panangipakitana iti pannakabalin, natignay dagiti adalanna a mangibaga iti: “Pudno a sika ti Anak ti Dios.”​—Mateo 14:24-33.

No Kasano a Matulongannaka ti Anak ti Dios

Apay nga inyakar ti Dios ditoy daga manipud langit ti bugbugtong nga anakna tapno matay iti nasaem a wagas? “Tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Wen, ni Jesus ‘maitedna ti kararuana kas subbot a kasukat dagiti adu’ babaen laeng iti ipapatayna. (Mateo 20:28) Kinapudnona, iti intero a historia, awanen ti nangipakita iti natantan-ok nga ayat iti sangatauan no di laeng ni Jehova ken ti inauna nga Anakna.​—Roma 8:32.

Kalpasan ti ipapatayna, ni Jesus ket “naideklara nga Anak ti Dios” iti naisangsangayan unay ken nabileg a wagas, “babaen ti panagungar kadagiti natay” ken napagbiag kas maysa nga espiritu nga Anak ti Dios. (Roma 1:4; 1 Pedro 3:18) Kalpasan ti dandani 19 a siglo a panagurayna a siaanus iti sibay ni Amana, naitrono ni Jesus kas Ari ti Pagarian ti Dios​—maysa a nailangitan a gobierno nga asidegen nga agturay iti intero a daga.​—Salmo 2:7, 8; Daniel 7:13, 14.

Kayatyo kadi a magun-odan ti anamong daytoy a mannakabalin nga Anak ti Dios? No kasta, parparegtaendakayo a sukimatenyo dagiti pannursurona ken iyaplikaryo ida iti biagyo. Kinuna a mismo ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Wen, talaga a napateg ti patpatien ti maysa maipapan iti Anak ti Dios!​—Juan 3:18; 14:6; 1 Timoteo 6:19.

NAPANUNOTMO KADIN?

◼ Kasano a ni Jesus ti bugbugtong nga Anak ti Dios?​—Juan 1:3, 14; Apocalipsis 3:14.

◼ Apay a mabalinmo a patien a ni Jesus ti Anak ti Dios?​—Mateo 3:16, 17.

◼ Kasano a magunggonaanka iti panamati ken Jesus kas ti Anak ti Dios?​—Juan 3:16; Juan 14:6; 17:3.

[Dagiti Ladawan iti panid 12, 13]

Dagiti nainsiriban a pannursuro ken nabileg a milagro ni Jesus ti nangpaneknek nga isu ket saan nga ordinario a tao