Asidegen ti Pannakaispal Babaen ti Pagarian ti Dios!
“Umay koma ti pagariam. Maaramid koma ti pagayatam, kas sadi langit, kasta met iti daga.”—MAT. 6:10.
1. Ania ti kangrunaan a pannursuro ni Jesus?
ITI Sermonna iti Bantay, dinakamat ni Jesu-Kristo ti pagtuladan a kararag a nangsumario iti kangrunaan a pannursurona. Insurona kadagiti pasurotna nga ikararagda iti Dios: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mat. 6:9-13) Ni Jesus “napan nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios.” (Luc. 8:1) Indagadag ni Kristo kadagiti pasurotna: ‘Itultuloyyo a sapulen nga umuna ti pagarian ken ti kinalinteg ti Dios.’ (Mat. 6:33) Bayat ti panangusigyo iti daytoy nga artikulo, kumitakayo kadagiti pamay-an a mausaryo daytoy a material iti ministerioyo. Kas pagarigan, panunotenyo no kasanoyo a sungbatan dagitoy a saludsod: Kasano ti kinapateg ti mensahe maipapan iti Pagarian? Iti ania a kasapulan a maispal ti sangatauan? Ken kasano ti panangispal ti Pagarian ti Dios?
2. Kasano ti kinapateg ti mensahe maipapan ti Pagarian?
2 Impakpakauna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mat. 24:14) Nakapatpateg ti naimbag a damag maipapan ti Pagarian ti Dios. Kinapudnona, dayta ti kapatgan a mensahe iti lubong! Iti nasurok a 100,000 a kongregasion dagiti Saksi ni Jehova iti intero a lubong, agarup pito a milion nga ad-adipen ti Dios ti makipaspaset iti kasaknapan pay laeng a trabaho a panangasaba, nga ipakpakaammoda kadagiti tattao a naipasdeken ti Pagarian. Ti pannakaipasdek dayta ket naimbag a damag agsipud ta kaipapananna a nangipasdeken ti Dios iti maysa a gobierno idiay langit a naan-anay a mangituray iti daga. Babaen ti panagturay dayta a Pagarian, maaramidto ti pagayatan ni Jehova ditoy daga a kas sadi langit.
3, 4. Anianto ti resulta ti pannakaaramid ti pagayatan ti Dios ditoy daga?
3 Ania ti mapasamak iti sangatauan no maaramidton ti pagayatan ti Dios ditoy daga? Ni Jehova “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” (Apoc. 21:4) Dagiti tattao ket saandanton nga agsakit wenno matay gapu iti natawid a basol ken kinaimperpekto. Dagiti natay nga adda iti lagip ti Dios maaddaandanton iti gundaway nga agbiag nga agnanayon, gapu ta ikarkari ti Biblia: “Addanto panagungar agpadpada dagiti nalinteg ken dagiti nakillo.” (Ara. 24:15) Awanton ti gubat, sakit, wenno bisin, ken mapagbalinton a paraiso ti daga. Uray dagiti napeggad nga animal naamodanton kadagiti tattao ken iti maysa ken maysa.—Sal. 46:9; 72:16; Isa. 11:6-9; 33:24; Luc. 23:43.
4 Nakasaysayaat dagita a bendision nga itden ti panagturay ti Pagarian. Gapuna, ditay pagsiddaawan a ti padto ti Biblia dakamatenna ti biag iti dayta a tiempo babaen kadagitoy a makaliwliwa a sasao: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” Ngem ania ti mapasamak kadagiti manangriribuk? Impakpakauna ti Kasuratan: “Iti apagbiit laengen a kanito, ket daydiay nadangkes awanton.” Ngem “dagidiay mangin-inanama ken Jehova isuda ti mangtagikuanto iti daga.”—Sal. 37:9-11.
5. Anianto ti mapasamak iti agdama a sistema ti bambanag?
5 Tapno maaramid amin dagitoy, masapul a mapukaw ti agdama a sistema ti bambanag agraman ti amin nga agririnnisiris a gobierno, relihion, ken komersial a sistema. Ket dayta ti talaga nga aramidento ti nailangitan a gobierno. Napaltiingan ni propeta Daniel a mangipakpakauna: “Iti kaaldawan dagidiay nga ar-ari [nga agturturay itan] mangipasdekto ti Dios ti langit iti maysa a pagarian [idiay langit] a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy [agdama] a pagarian, ket dayta agtalinaedto agingga kadagiti tiempo a di nakedngan.” (Dan. 2:44) Kalpasan dayta, ti Pagarian ti Dios—a maysa a baro a nailangitan a gobierno—iturayannan ti maysa a baro a kagimongan ditoy daga. Addanto “baro a langlangit ken baro a daga . . . , ket kadagitoy agtaeng ti kinalinteg.”—2 Ped. 3:13.
Dakdakkel Ita ti Panagkasapulan a Maispal
6. Kasano a dineskribir ti Biblia ti kinadakes daytoy nadangkes a lubong?
6 Idi nagrebelde da Satanas, Adan, ken Eva maibusor iti Dios gapu iti tarigagayda a mangikeddeng no ania ti naimbag ken no ania ti dakes, nangrugi ti makadidigra a kasasaad iti pakasaritaan ti tao. Sakbay ti sangalubongan a Layus, nasurok a 1,600 a tawen ti napalabasen, “ti kinadakes ti tao naruay iti daga ken tunggal pagannayasan ti pampanunot ti pusona dakes laeng iti amin a tiempo.” (Gen. 6:5) Agarup 1,300 a tawen kalpasanna, nakita ni Solomon a nakadakdakes ti kasasaad isu nga insuratna: “Pinadayawak dagiti natay a natayen imbes a dagiti sibibiag a sibibiag pay laeng. Gapuna nasaysayaat ngem isuda a dua daydiay saan pay a naadda, a saan a nakakita iti aramid a makadidigra a maar-aramid iti baba ti init.” (Ecl. 4:2, 3) Kalpasan ti agarup 3,000 a tawen, nagtultuloy ti panagraira ti kinadakes iti kaaldawantayo.
7. Apay nga ad-adda ita a kasapulan ti panangispal ti Dios?
7 Nupay nabayagen nga agraraira ti kinadakes, ti panangispal ti Pagarian ket ad-adda a kasapulan ita ngem iti aniaman a sabali a tiempo. Ti kasasaad iti naglabas a 100 a tawen ket dakdakes ngem iti aniaman a tiempo sakbay dayta, ken agtultuloy a dumakdakes. Kas pagarigan, impadamag ti Worldwatch Institute: “Mamitlo nga ad-adu ti bilang dagiti natay kadagiti gubat iti daytoy [maika-20] a siglo no idilig iti bilang dagiti natay iti amin a gubat idi umuna a siglo K.P. agingga idi 1899.” Sipud idi 1914, nasurok a 100 a milion ti natay kadagiti gubat! Pinattapatta ti maysa nga ensiklopedia nga 60 a milion ti natay idi Gubat Sangalubongan II. Gapu ta addaanen iti nuklear nga igam ti dadduma a pagilian, kabaelanen ti tao nga ikisap dagiti dadakkel a paset ti populasion ti lubong. Ken iti laksid dagiti panagrang-ay iti tay-ak ti siensia ken medisina, agarup lima a milion nga ubbing ti matmatay iti tinawen gapu iti bisin.—Kitaen ti kapitulo 9 ti libro nga Ania a Talaga ti Isursuro ti Biblia?
8. Ania ti nabatad a paneknekan ti rinibribu a tawen a panagturay ti tao?
8 Saan a nagsardeng ti kinadakes iti laksid dagiti panagregget ti tao. Dagiti napolitikaan, nakomersialan, ken narelihiosuan nga institusion ti lubong dida pulos naited dagiti kangrunaan a kasapulan ti tao tapno masagrapna koma ti talna, kinarang-ay, ken salun-at. Imbes a risutenda dagiti dadakkel a parikut a mangparparigat ita iti sangatauan, pinakaroda ketdi dagitoy. Ti rinibribu a tawen a panagturay ti tao paneknekanna la ketdi ti kinapudno a “saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jer. 10:23) Wen, “ti tao dinominaranna ti tao iti pakadangrananna.” (Ecl. 8:9) Kanayonanna, “ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa.”—Roma 8:22.
9. Ania dagiti kasasaad nga ekspektaren dagiti pudno a Kristiano bayat dagitoy “maudi nga aldaw”?
9 Maipapan iti tiempotayo, impakpakauna ti Biblia: “Kadagiti maudi nga aldaw dumtengto dagiti napeggad a tiempo a narigat a pakilangenan.” Kalpasan ti panangdeskribirna kadagiti kasasaad iti maudi nga al-aldaw iti sidong ti panangituray ti tao, kuna ti padto: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay.” (Basaen ti 2 Timoteo 3:1-5, 13.) Kasta ti ekspektaren dagiti Kristiano, ta “ti intero a lubong adda iti pannakabalin daydiay nadangkes” a ni Satanas. (1 Juan 5:19) Ngem ti naimbag a damag ket asidegen nga ispalen ti Dios dagidiay mangay-ayat kenkuana. Maispaldanto iti daytoy a lubong, a sipapartak a kumarkaro ti kinadakesna.
Daydiay Kakaisuna a Gubuayan ti Panangispal
10. Apay a ni Jehova ti kakaisuna a mapagtalkan a Gubuayan ti panangispal?
10 Bayat nga ikasabayo ti naimbag a damag, ilawlawagyo a ni Jehova ti kakaisuna a mapagtalkan a Gubuayan ti panangispal. Isu laeng ti addaan iti pannakabalin ken tarigagay a mangispal kadagiti adipenna manipud iti aniaman a dakes a kasasaad. (Ara. 4:24, 31; Apoc. 4:11) Masiguradotayo a ni Jehova kanayon nga ispalenna ti ilina ken tungpalenna dagiti panggepna gapu ta insapatana: “Sigurado a kas iti imbalabalak, kasta ti mapasamakto.” Ti saona “saanto nga agsubli [kenkuana] nga awanan kadagiti nagbanagan.”—Basaen ti Isaias 14:24, 25; 55:10, 11.
11, 12. Ania ti impanamnama ti Dios kadagiti adipenna?
11 Impanamnama ni Jehova nga ispalenna dagiti adipenna no iwayatna ti inkeddengna a panangdadael kadagiti nadangkes. Idi ibaonna ni propeta Jeremias tapno situtured a makisao kadagiti managdakdakes, kinuna ti Dios: “Dika agbuteng.” Apay? “Addaak kenka tapno ispalenka.” (Jer. 1:8) Kasta met, idi asidegen a dadaelenna ti nadangkes a Sodoma ken Gomorra, nangibaon ni Jehova iti dua nga anghel a mangiwardas kenni Lot ken iti pamiliana tapno natalgedda a makaruar iti dayta a lugar. Kalpasanna, “pinagtudo ni Jehova iti asupre ken apuy . . . iti Sodoma ken iti Gomorra.”—Gen. 19:15, 24, 25.
12 Uray sangalubongan ti didigra, kabaelan nga ispalen ni Jehova dagidiay mangar-aramid iti pagayatanna. Idi dinadaelna ti nagkauna a dakes a lubong babaen daydi Layus, “inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay.” (2 Ped. 2:5) Inton dadaelenna ti agdama a dakes a lubong, ispalento manen ni Jehova dagiti nalinteg a tattao. Kunaen ngarud ti Saona: “Sapulenyo ni Jehova, dakayo amin a naemma iti daga . . . Sapulenyo ti kinalinteg, sapulenyo ti kinaemma. Nalabit maitalimengkayo iti aldaw ti unget ni Jehova.” (Sof. 2:3) Kas resulta dayta a sangalubongan a panangdadael, ‘dagiti napalungdo agtaengdanto iti daga, ngem dagiti nadangkes magessatdanto iti dayta.’—Prov. 2:21, 22.
13. Kasano a maispal dagiti pimmusayen nga adipen ni Jehova?
13 Ngem adu nga adipen ti Dios ti natayen gapu iti sakit, panangidadanes, ken dadduma pay a makagapu. (Mat. 24:9) Kasano ngarud ti pannakaispalda? Kas nadakamaten, “addanto panagungar . . . dagiti nalinteg.” (Ara. 24:15) Anian a makaliwliwa a maammuan nga awan ti makalapped ken Jehova iti panangispalna kadagiti adipenna!
Maysa a Nalinteg a Gobierno
14. Apay a makapagtalektayo a ti Pagarian ti Dios ket maysa a nalinteg a gobierno?
14 Iti ministerioyo, mabalinyo nga ilawlawag a ti nailangitan a Pagarian ni Jehova ket maysa a nalinteg a gobierno. Maitutop dayta yantangay iyanninawna dagiti nakasaysayaat a galad ti Dios a kas iti kinahustisia, kinalinteg, ket ayat. (Deut. 32:4; 1 Juan 4:8) Ti panangituray iti Pagarian ket impabiang ti Dios ken Jesu-Kristo, ti kangrunaan a kualipikado a mangituray iti daga. Panggep met ni Jehova nga adda 144,000 a napulotan a Kristiano a maala manipud ditoy daga ken mapagungar iti nailangitan a biag kas makipagtawid met a kakadua ni Kristo a mangituray iti daga.—Apoc. 14:1-5.
15. Pagdiligenyo ti turay ti Pagarian ti Dios ken ti turay ti tao.
15 Anian a nagdakkel ti nagdumaan ti turay ni Jesus ken dagiti 144,000 no idilig iti turay dagiti imperpekto a tattao! Dagiti agturay daytoy sistema ti bambanag ket masansan a nagbalinda a naulpit ken insungsongda dagiti iturayanda a makigubat, a nagresulta iti ipapatay ti minilmilion. Di pagsiddaawan nga ibalakad ti kasuratan a ditay agtalek iti tao, “a kenkuana awan pannakaisalakan”! (Sal. 146:3) Anian a naiduma ti naayat a panagturay ti Kristo! Kinuna ni Jesus: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.”—Mat. 11:28-30.
Asidegen nga Agpatingga Dagiti Maudi nga Aldaw!
16. Kasano ti panagngudo dagiti maudi nga aldaw?
16 Sipud idi tawen 1914, daytoy a lubong ket nakagtengen kadagiti maudi nga aldaw, wenno “ti panungpalan ti sistema ti bambanag.” (Mat. 24:3) Nakaas-asidegen a mapasamak ti inawagan ni Jesus a “dakkel a rigat.” (Basaen ti Mateo 24:21.) Babaen dayta nga awan kaaspingna a rigat, mapukawton ti intero a lubong ni Satanas. Ngem kasano a mangrugi ti dakkel a rigat? Ken kasano nga agpatingga?
17. Ania ti ipasimudaag ti Biblia no maipapan iti panangrugi ti dakkel a rigat?
17 Kellaatto ti panangrugi ti dakkel a rigat. Wen, ti “aldaw ni Jehova” ket kellaatto a dumteng “inton sasawenda: ‘Talna ken talged!’” (Basaen ti 1 Tesalonica 5:2, 3.) Ti naipakpakauna a rigat ket mangrugi inton panunoten dagiti nasion nga asidegen a marisutda dagiti dadakkel a parikutda. Maklaatto ti lubong gapu iti kellaat a pannakadadael ti “Babilonia a Dakkel,” ti sangalubongan nga imperio ti palso a relihion. Masdaawto dagiti ari ken dadduma pay inton maiwayat ti panangukom iti Babilonia a Dakkel.—Apoc. 17:1-6, 18; 18:9, 10, 15, 16, 19.
18. Anianto ti aramiden ni Jehova inton rauten ni Satanas ti ilina?
18 Iti kritikal a kanito, “addanto dagiti pagilasinan iti init ken bulan ken kadagiti bituen,” ken “ti pagilasinan ti Anak ti tao agparangto iti langit.” Kalpasanna, mabalintayto ti ‘tumakder a sililinteg agsipud ta ti pannakaispaltayo umas-asidegen.’ (Luc. 21:25-28; Mat. 24:29, 30) Ni Satanas, wenno Gog, iturongnanto dagiti puersana maibusor iti ili ti Dios. Ngem no maipapan kadagiti mangrautto kadagiti matalek nga adipenna, kinuna ni Jehova: “Ti mangsagid kadakayo sagidenna ti bukel ti matak.” (Zac. 2:8) Gapuna, saanto nga agballigi ti panagregget ni Satanas a mangdadael kadakuada. Apay? Agsipud ta agtignayto a dagus ti Soberano nga Apo a ni Jehova tapno ispalenna dagiti adipenna.—Ezeq. 38:9, 18.
19. Apay a makapagtalektayo nga agtignayto dagiti buyot ti Dios a mangdadael iti sistema ni Satanas?
19 Inton agtignay ti Dios maibusor kadagiti nasion, ‘maammuandanto nga isu ni Jehova.’ (Ezeq. 36:23) Ibaonnanto dagiti buyot a mangiwayat iti panangukomna—dagiti linaklaksa nga espiritu a parsua nga idauluan ni Kristo Jesus—a manggibus kadagiti nabatbati iti sistema ni Satanas ditoy daga. (Apoc. 19:11-19) No lagipentayo nga iti maysa laeng a rabii, maysa laeng nga anghel ti “nangkabil iti sangagasut walopulo ket lima a ribu” a kabusor ti Dios, makapagtalektayo a nakalaklakanto a dadaelen ti nailangitan a buyot ti amin a paset ti sistema ni Satanas ditoy daga bayat ti panagpatingga ti dakkel a rigat inton Armagedon. (2 Ar. 19:35; Apoc. 16:14, 16) Maigarangugongto ni Satanas ken dagiti demoniona iti mangliwengliweng nga abut iti sangaribu a tawen. Kalpasanna, madadaeldanton.—Apoc. 20:1-3.
20. Ania ti itungpal ni Jehova babaen ti Pagarian?
20 Maikkatto ngarud ti kinadakes idiay langit ken ditoy daga, ket dagiti nalinteg a tattao agbiagdanto nga agnanayon iti daytoy a planeta. Iti dayta a gundaway, mapaneknekanto ni Jehova nga isu ket Naindaklan a Manangispal. (Sal. 145:20) Babaen ti Pagarian, alangonennanto ti kinasoberanona, santipikarenna ti nasantuan a naganna, ken itungpalna ti naindaklan a panggepna para iti daga. Sapay koma ta maaddaanka iti dakkel a rag-o iti ministeriom bayat nga iwarwaragawagmo ti naimbag a damag ken tultulongam dagidiay “agannayas iti agnanayon a biag” tapno mabigbigda nga asidegen ti panangispal babaen ti Pagarian ti Dios!—Ara. 13:48.
Malagipyo Kadi?
• Kasano nga intampok ni Jesus ti kinapateg ti Pagarian?
• Apay nga ad-adda ita ti panagkasapulan a maispal ngem iti aniaman a tiempo iti naglabas?
• Ania dagiti ekspektarentayo a mapasamak bayat ti dakkel a rigat?
• Kasano a paneknekan ni Jehova nga isu ket Naindaklan a Manangispal?
[Dagiti Ladawan iti panid 12, 13]
Impakpakauna ti Sao ti Dios ti awan pay kaaspingna a sangalubongan a panangasaba iti kaaldawantayo
[Ladawan iti panid 15]
Maispalnatayo ni Jehova, no kasano a naispalna ni Noe ken ti pamiliana
[Ladawan iti panid 16]
Ni Jehova “punasennanto ti amin a lua . . . , ket awanton ni patay.”—Apoc. 21:4