Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w86 10/1 pp. 10-14
  • Liwliwa Manipud Dios ti Talna

Awan video-na ti napilim.

Pasensiakan, adda problema iti pannakai-load ti video.

  • Liwliwa Manipud Dios ti Talna
  • Ti Pagwanawanan Mangibumbunannag iti Pagarian ni Jehova—1986
  • Subtitulo
  • Umasping a Material
  • ‘Iti Kaaddana’
  • Al-alagaden nga Agpaay a Pagimbagantayo
  • Maliwliwa Babaen ti Namnama ti Panagungar
  • Ti Panagsasagadsad ti Panagungar
  • “Dagiti Natay Mapagungardanto”
    Ti Pagwanawanan Mangibumbunannag iti Pagarian ni Jehova—1998
  • Librot’ Biblia Numero 52—1 Taga Tesalonica
    “Amin a Kasuratan Impaltiing ti Dios ket Naimbag”
  • Ti Panagungar—Sigurado a Namnama!
    Ti Pagwanawanan Mangibumbunannag iti Pagarian ni Jehova (Pagadalan)—2020
  • Adda Bileg ti Namnama a Panagungar
    Ti Pagwanawanan Mangibumbunannag iti Pagarian ni Jehova—2000
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—1986
w86 10/1 pp. 10-14

Liwliwa Manipud Dios ti Talna

“Ngarud pangliwliwayo iti maysa ken maysa dagitoy a sasao.”​—1 TESALONICA 4:8.

1. Ania a dawdawat ni Pablo ti nangipakita ti interesna iti talna?

NI Pablo, nga apostol, tarigagayanna unay a ti kongregasion Kristiano rebbeng a tagiragsakenna ti talna. Gapuna, 13 kadagiti sursuratna, a naitalimeng nga agpaay kadatayo iti naipaltiing a Kasuratan, ti nanglukat babaen iti iyaararawna a dagidiay sursuratanna tagiragsakenda koma ti talna manipud iti Dios. Kas pangarigan, iti daydiay kaipaspasdek a kongregasion idiay Tesalonica, nagsurat ni Pablo: “Parabur ken talna koma kadakayo.” Iti asidegen ti ungto dayta met laeng a surat, inyararawna: “Ket ti met laeng Dios ti talna pagsantuennakayo koma a maan-anay. Ket ti nakem ken kararua ken ti bagiyo maaywananda koma nga awan pakapilawanda a maipaay iti kaadda ni apotayo a Jesu-Kristo.”​—1 Tesalonica 1:1; 5:23.

2. (a) Ania a pakaseknan ti imparangarang ni Pablo iti kongregasion? (b) Kasano a dagiti panglakayen a Kristiano itatta masuroda ti ulidan ni Pablo?

2 Saan nga inlisi ni Pablo ken dagiti kakaduana ti bagbagida iti ‘panagtrabaho ken panagbannog’ iti tengnga dagidiay baro a manamati. Kuna ni Pablo: “No di ket naemmakami iti tengngayo, a kas ti ina nga agtagibi dungdungoenna dagiti annakna met laeng. Kasta met, ti panagdungngomi kadakayo, ket siaayatkami a mangipaay kadakayo saan laeng a ti naimbag a damag ti Dios, no di ket dagiti pay kararuami, ta nagbalinkayo a patgenmi unay.” Ditay aya a marikna kadagidiay a sasao ti nakasingsinged a pannakaseknan, ti pudpudno, nauneg a panagayat a narikna ni Pablo nga agpaay iti dayta a kongregasion? Pudno unay, dayta maysa a padron wenno pagwadan iti kita ti ayat a masapul nga ipakita dagiti panglakayen a Kristiano kadagiti 50,000 a kongregasion dagiti Saksi ni Jehova iti intero a daga itatta.​—1 Tesalonica 2:7-9; Juan 13:34, 35; 15:12-14.

3. (a) Kasano a nagunggonaan ni Timoteo ti kongregasion idiay Tesalonica? (b) Daytoy ti umas-asping iti ania itatta?

3 Ti Mannulisog, ni Satanas, ti nangyeg rigat kadagidiay a Kristiano idiay Tesalonica. Gapuna ni Pablo imbaonna ni Timoteo kadakuada, tapno ‘papigsaen ken liwliwaenna ida maipapan ti pammatida.’ Ni Timoteo ti nagsubli ken Pablo idiay Atenas nga addaan iti naragsak a damag maipapan iti kinamatalek ken ayatda. Amin ti naliwliwa unay a makaammo iti pammati ken kinatarnaw ti tunggal maysa, ket nagtultuloyda nga agdawdawat iti Dios a punuan ti aniaman a pagkuranganda. (1 Tesalonica 3:1, 2, 5-7, 10) Daytoy, met, ti mangisarsarming kadagiti nateokratikuan nga urnos itatta, a dagiti agdaldaliasat a manangaywan ti mangpabpabileg kadagiti kongregasion, uray pay sadiay dagiti Saksi ni Jehova agserserbida iti sidong ti pannakaiparit wenno napait a pannakaidadanes.​—Isaias 32:1, 2.

‘Iti Kaaddana’

4, 5. (a) Ania a dawat ti inaramid ni Pablo ditoy, ket apay a daytat’ rebbeng a makapainteres a nangnangruna kadatayo itatta? (b) Apay a ti kaaldawantayo ti nangnangruna nga adda pategna?

4 Sinerraan ni apostol Pablo daytoy a paset ti suratna babaen iti daytoy a panagdawat: “Ket aramiden koma ti Apo a dumakkelkayo ken aduankayo iti ayat iti maysa ken maysa, ken kadagiti isuamin a tattao, a kas met iti panagayatmi kadakayo; tapno mapapigsa dagiti puspusoyo, iti kinasanto nga awan ti pakapilawanda, iti sanguanan ti Dios ken Amatayo inton kaadda ni Apotayo a Jesus a buyogen dagiti isuamin a sasantona.”​—1 Tesalonica 3:12, 13.

5 Kumitkita ditoy ni Pablo iti nakaad-adayo a masanguanan, iti tiempo ti “kaadda [ni Jesus] ken ti panungpalan ti sistema dagiti bambanag” inton “ti Anak ti tao umayto agraman ti dayagna ken amin dagiti anghel maikuyog kenkuana.” Ti nailangitan nga Aritayo dimteng idi 1914. Manipud iti nadayag a di makita a tronona, uk-ukomen itan ni Jesus dagiti nasnasion ken il-ili ti daga, a paglalasinlasinen dagiti napakumbaba, kimmarnero a tattao a maipaay iti pannakaispal ti “dakkel a rigat” ken agpaay iti biag nga agnanayon iti maysa a paraiso a daga.​—Mateo 24:3-21; 25:31-34, 41, 46.

Al-alagaden nga Agpaay a Pagimbagantayo

6. Ania a pammagbaga ni Pablo ti masapul nga intay ipangag itan?

6 Maysakay aya a mangragragpat iti dayta a kalat ti biag nga agnanayon? No kasta, masapul nga ipangagyo ti insurat ditoy ni Pablo kadagiti taga Tesalonica: “Kamaudiananna, kakabsat, dawatenmi ken bagbagaandakayo ken Apo Jesus, a kas iti sinursuroyo kadakami no kasano ti rebbengyo a pannagna ken panangay-ay iti Dios, kas ar-aramidenyo met, rumang-aykayo a rumang-ay. Ta ammoyo no ania dagiti al-alagaden nga intedmi kadakayo gapu ken Apo Jesus.” (1 Tesalonica 4:1, 2) Aniada ti sumagmamano kadagiti “al-alagaden” nga impaganetget ditoy ni Pablo?

7. (a) Ania a nagpateg nga ‘alagaden’ ti naited ditoy? (b) Iti intay panangawat iti espiritu ti Dios, apay a ditay koma pulos di agan-annad?

7 Ti umuna nga ‘alagaden’ ket maipapan kadagiti naimbag a moral. Sipaprangka a kinuna ni Pablo: “Ta daytoy ti pagayatan ti Dios, isu ti pannakapagsantoyo, nga idianyo koma ti pannakikamalala; a tunggal maysa kadakayo ammona koma a salimetmetan ti asawana met laeng a mabuyogan ti kinasanto ken kinadayaw, saan nga iti tarigagay ti derrep a kasla kadagiti adda iti nasnasion a dida ammo ti Dios.” Makaparagsak, ‘naammuantayo’ ti Dios ken ti Anakna, ni Jesu-Kristo, ket ragragpatentayo ti biag nga agnanayon. Anian a nakababain no palubosantay dagiti bagbagitayo a maiguyod nga agsubli iti nailubongan a lugnak ti imoralidad! Nakalkaldaang a kunaen, a dadduma nailasatda dagiti adu a tawtawen kadagiti kampo konsentrasion ken pagbaludan, wenno nangbusbosda iti intero a panagbiagda iti naregta a serbisio kas misionero, tapno palubosan laeng ti Mannulisog a makakemmeg kadakuada iti kamaudiananna a di agbambantay wenno agsipsiput maipapan iti moral. Gaput’ pannakaawatda iti nasantuan nga espiritu ti Dios, sapay koma ta ditay ‘pagleddaangen’ dayta babaen iti di umiso a kababalin a seksual!​—1 Tesalonica 4:3-8; Juan 17:3; 1 Corinto 10:12, 13; Efeso 4:30.

8, 9. (a) Ania ti “ayat a nainkabsatan”? (b) Kasano ti intay panangsukay iti kasta nga ayat, ket ania dagiti gunggonana?

8 Ti sumaganad nga ‘alagaden’ ni Pablo ket maipapan iti phil·a·del·phiʹa, ti “nainkabsatan nga ayat.” (1 Tesalonica 4:9, 10) Daytoy ket maysa a naisangsangayan a panangiparangarang iti naprinsipiuan nga ayat, a·gaʹpe, a sibabara nga inrekomendar met ni Pablo ditoy idiay bersikulo 9, agraman idiay kapitulo 3, bersikulo 6 ken 12. Ti phil·a·del·phiʹa ket maysa a nakasingsinged a panangdungngo, kaawatan kas daydiay adda iti nagbaetan ni Jesus ken Pedro, ken iti nagbaetan da David ken Jonatan. (Juan 21:15-17; 1 Samuel 20:17; 2 Samuel 1:26) Daytat’ mabalin a mainayon iti a·gaʹpe iti panangpabileg iti nasinged a panagkakadua, kas makita, kas pangarigan, iti agpadpada a rag-o ti panagtitimpuyog a makitkita ti adu kadagiti Saksi ni Jehova iti ministerio a panagpayunir ken dadduma pay a nateokratikuan nga ar-aramid.

9 Kuna ni Pablo: “Aramidenyo met dayta a rumang-aykayo a rumang-ay.” Mabalintay a palawaen a kanayon ti ayattayo a nainkabsatan. Daytoy nagsayaat a kualidad ti nangnangruna nga aglipias no dagiti panglakayen ken ministerial nga ad-adipen ti mangidaulo iti naregta a serbisio ti Pagarian. No amin dagiti adda iti kongregasion ket pagbalinenda nga okupado ti bagbagida iti ‘umuna a panangsapul ti Pagarian,’ dagiti di pagkikinnaawatan gapu iti natauan a kinaimperpekto, ti panagrupak dagiti personalidad ken dagiti umas-asping a problema agbalinda laeng a segundario. Kanayon koma nga ikabiltayo dagiti matmatatayo iti kalat!​—Mateo 6:20, 21, 33; 2 Corinto 4:18.

10. Kas dagiti Kristiano, kasano ti intay mabalin a ‘pannagna a sitatakneng?’

10 Insinggalut ditoy ni Pablo ti sabali manen nga ‘alagaden’​—a pagbalinentay a kalat ti panagbiag a sitatalna, a sanguentayo dagiti kabukbukodantayo a pagkasapulan met laeng, ken agtrabaho kadagiti im-imatayo. Bayat ti ‘pampannagnatayo a sitatakneng’ iti inaldaw-aldaw a panagbiagtayo, nga ipampamatmat nga agpadpada ti ayat nga addaan prinsipio ken nainkabsatan nga ayat, aminto dagiti pagkasapulantayo maipaayto.​—1 Tesalonica 4:11, 12; Juan 13:35; Roma 12:10-12.

Maliwliwa Babaen ti Namnama ti Panagungar

11. (a) Apay nga ita inyam-ammo ni Pablo ti panagungar? (b) Kasano ti panangapektar daytoy a balakad ni Pablo kadatayo?

11 Sumaganad a tukoyen ti apostol ti naindaklan a namnama ti panagungar. Ngem apay nga inserrek ni Pablo daytoy a topiko? Kayatna a papigsaen dagiti kakabsatna a mangibtur kadagiti pannakaidadanes nga um-umay kadakuada. Agpegpeggadda iti pannakapukawda ti biagda. Agparang nga iti dayta a panawen dadduma ti naturogen ken patay. Dagiti kapammatianda kasapulanda ti liwliwa. (1 Tesalonica 2:14-20) Babaen iti panangpampanunotda a ti “kaadda” ni Kristo ti asidegen, mabalin a pampanunotenda met no anianto ti mapasamak kadagidiay a natayen. Ti insurat ni Pablo ita ti mangted saan laeng a kadagidiay napukawda dagiti Kristiano nga inay-ayatda no di ket pammaregta met tapno agibtur agingga iti ibebettak iti “aldaw” ni Jehova. Ti balakad ni Pablo ti rebbeng a makatulong kadatay amin a mangipakita iti naespirituan a kinatibker bayat nga agtultuloytayo a mangiwaragawag ti naimbag a damag, nga agur-uray iti naan-anay a panungpalan daytoy a sistema dagiti bambanag.​—2 Tesalonica 1:6-10.

12. Ania a pudpudno a liwliwa ti adda kadatayo no matay ti maysa nga inay-ayattayo, ket manipud iti ania a gubuayan?

12 Kuna ni Pablo: “Ngem dikami kayat nga awan ti ammoyo, kakabsat, maipapan kadagiti naturogen ken patay; tapno dikayo agladingit a kas kadagiti dadduma nga awan inanamada.” (1 Tesalonica 4:13) Anian a liwliwa ken talna ti panunot ti masarakan iti namnama ti panagungar! Agarup lima a tawen ti kamaudiananna, lukatan ni Pablo ti maikadua a suratna kadagiti Kristiano idiay Corinto babaen ti panagkunana: “Parabur ken talna ti Dios nga Amatayo ken ni Apo Jesu-Kristo maadda koma kadakayo. Madaydayaw koma ti Dios ken Ama ni Apotayo a Jesu-Kristo, ti Ama dagiti asi ken Dios ti amin a liwliwa, isu a mangliwliwa kadakami iti isuamin a pagladladingitanmi, tapno mabalinmi a liwliwa dagiti adda iti uray ania a pagladingitan gapu iti liwliwa a pangliwliwa met laeng ti Dios kadakami.”​—2 Corinto 1:2-4.

13, 14. (a) Apay a kayat ni Pablo a mapakaammuan dagiti Kristiano maipapan iti kaiyulogan ti ipapatay? (b) Aniat’ ipakita dagiti Kasuratan a kasasaad dagiti natay?

13 Di kayat ti apostol nga agbalintayo nga awan ammona maipapan ti kasasaad dagiti natay. Iti agangay, umayto ti naindaklan nga apostasia kadagiti agkunkuna a Kristiano, a gapu iti daytoy agsublidanto kadagiti pilosopia a Binababilonia ken pilosopia a Griego. Dagita nga apostata ti mangawatto iti doktrina ni Plato maipapan iti nainkasigudan a di ipapatay ti kararua nga isu itan ti pamunganayan a sursuro ti sangalubongan nga imperio ti ulbod a relihion. Ti kasla misterio a naipalikmut iti “sumaruno a biag,” dayta man ket idiay langit, purgatorio, wenno iti maysa a lugar iti agnanayon a pagtutuokan, awan ti maipaayna a pudno a liwliwa. Mainayon pay, ti nainkasigudan a di ipapatay wenno imortalidad suppiatenna ti doktrina ti panagungar, ta kasano a ti maysa ket mapagungarto manen iti biag no ti kararua ket di met matay?

14 Ditoy nagsurat ni Pablo “maipapan kadagiti naturogen ken patay.” Wen, “matmaturog.” Ti maysa a tao a matmaturog ket awan puotna iti uray aniaman ket saan a makaaramid iti aniaman a trabaho. (Idiligyo iti Eclesiastes 9:5, 10.) Adda met okasion kabayatan ti ministerio ni Jesus idi a kinunana a ni Lazaro ket “matmaturog” ket isu, ni Jesus, ti mapan tapno “riingenna iti turogna.” Idi di naawatan dagiti adalan ni Kristo dagidi a sasao, “Idin kinuna ngarud ni Jesus a silalawag kadakuada: ‘Ni Lazaro natay.’” Dagiti kakabsat a babbai ni Lazaro, da Marta ken Maria, ti naliwliwada gapu iti namnama ti panagungar, ket ni Jesus ti nangyeg pay kadakuada ti kanayonan a liwliwa. Ngem anian ti pannakapabileg ti pammatida idi a ni Jesus pinagungarna ti gayyemna, a natayen iti uppat nga aldaw manipud iti pannaturog ken patay!​—Juan 11:11-14, 21-25, 43-45.

15. (a) Kasano a ti namnamatayo iti panagungar ket mapabileg? (b) Kasano a datayo ti mabalin a matulongan a bumagay iti ipapatay ti maysa nga inay-ayat?

15 Dayta a milagro agraman dagiti dadduma pay nga aramid ni Jesus a panangpagungar, ken nangnangruna ti panangpagungar ni Jehova ken ni Jesus a mismo​—amin dagitoy dokumentado unay a pasamak ti mangpabileg iti panagtalektayo iti nakaskasdaaw a namnama ti panagungar. (Lucas 7:11-17; 8:49-56; 1 Corinto 15:3-8) Pudno, ni patay ti mangyeg ti ladingit ken lulua ket nagrigat ti bumagay iti kaawanen ti maysa a dinungdungngo. Ngem anian a liwliwa ken bileg ti magun-odantay manipud iti pammasiguro a ti Soberano nga Apo a ni Jehova “inalimonna nga agnanayon ni patay, ket . . . punasennanto dagiti lulua kadagiti isuamin a ruprupa”! (Isaias 25:8; Apocalipsis 21:4) Maysa kadagiti kasayaatan nga agas ti ladingit isut’ panagbalin nga okupado iti serbisio ti Dios ti talna, nga ipaay kadagiti dadduma ti makaparagsak-puso a namnama ti Pagarian a siyayaman nga inawattay met a mismo.​—Idiligyo iti Aramid 20:35.

Ti Panagsasagadsad ti Panagungar

16, 17. (a) Kasano a mapukawton “ti maudi a kabusor”? (b) Ania a panagsasagadsad ti panagungar ti ilawlawag ita ni Pablo?

16 Ti pammatitayo ti napigsa a ni Kristo, “ti immuna a bunga” ti panagungar ket itan naitronon iti makanawan ti Dios kadagiti langlangit, ti an-anayennanto ti nadayag a pangpanggep ti Pagarian ni Jehova. (Hebreo 6:17, 18; 10:12, 13) Kas kinuna ni Pablo iti sabali a suratna: “Ta isu [ni Jesu-Kristo] masapul nga agari agingga iti panangikabilna kadagiti kabusorna iti babaen dagiti saksakana. Ti maudi a kabusor a mapukawto, isu ni patay.” Kasano? Iti pasetna babaen iti panagungar ken ti pannakaikkat kadagiti epekto ti Adamiko nga ipapatay. Kalkalpas pay laeng nga inlawlawag ti apostol dayta iti kastoy a pamay-an: “Ta yantangay gapu iti tao immay ni patay, gapu iti tao immay met ti panagungar dagiti natay. Ta kas matayda amin ken Adan, kasta met mapagbiagdanto amin ken Kristo. Ngem tunggal maysa iti batangna: Ni Kristo ti umuna a bunga, sumaruno dagiti kukua ni Kristo iti kaaddana.” (1 Corinto 15:20-26) Iti daytoy a panagsasagadsad ti panagungar ti sumaruno a tukoyen ni Pablo iti umuna a suratna kadagiti taga Tesalonica, a kunkunana:

17 “Ta no patientayo a ni Jesus natay ket nagungar, kasta met ti Dios iyegnanto dagiti maturog ken Jesus nga ikuyog kenkuana. Ta daytoy ti ibagami kadakayo babaen ti sao ni Jehova, a datayo a sibibiag, datayo nga agbati agingga iti kaadda ti Apo saantayonto nga unaan dagiti naturogen ken patay; ta ti Apo met laeng aggapunto sadi langit a buyogen ti ariwawa, ti timek ti arkanghel ken ti trompeta ti Dios, ket dagiti natay ken Kristo bumangondanto nga umuna.”​—1 Tesalonica 4:14-16.

18. Kaanonto ti pannakapagungar dagiti napulotan a “naturogen ken patay”?

18 Kalpasan ti 1914, kabayatan ti “kaadda” ni Jesus iti pannakabalin ti Pagarian, isu, kas ti arkanghel, ti mangibaonto ti nailangitan a bilin nga agpaay kadagidiay “natay ken Kristo” tapno aguurnongda. Iti kaso dagita a napulotan a “naturogen ken patay,” daytoy kasla trompeta a panangawag awagannanto ti naespirituan a panagungarda idiay langit. Nabayagen nga imparang Ti Pagwanawanan a daytoy a panagungar dagiti napulotan a Kristiano manipud ken patay ti nangrugin idi tawen 1918.

19. Kaano ken kasano a dagidiay natda “maitayabdanto kadagiti ul-ulep,” ket agpaay iti ania a panggep?

19 Nupay kasta, anianto met ti maipapan kadagiti natda pay a napulotan a Kristiano ditoy daga, a maysa a bumasbassit a grupo a kurangen ngem 10,000? Uray met dagitoy, masapul nga an-anayenda ti naindagaan a kurso ti panagbiagda iti kinamatalek. A kasla ket tay kaduana ida bayat ti kaadda ni Kristo, insurat ni Pablo: “Kalpasanna, datayo a sibibiag, datayo a mabati, maitayabtayo a mabati kadagiti ul-ulep a sumabet iti Apo, iti tangatang; ket iti kasta kankanayon nga addatayto iti Apo.” (1 Tesalonica 4:17; idiligyo iti Apocalipsis 1:10.) Gapuna, inton tiempona, amin dagiti 144,000 mapagungardanton kas papadi ken ar-ari idiay nailangitan a Bantay Sion a kadua ti Kordero, ni Jesu-Kristo. “Daytoy ti umuna a panagungar.” (Apocalipsis 14:1, 4; 20:4, 5) Ngem aniat’ agur-uray kadagiti binilbilion iti sangatauan nga adda pay laeng kadagiti tanemda?

20, 21. (a) Aniat’ adda iti masanguanan dagiti binilbilion iti sangatauan nga adda pay kadagiti tantanemda? (b) Ania a grupo ti di kasapulan a matayto pay manipud iti daga, ken apay? (c) No dagiti indibidual iti daytoy a grupo ti rebbeng a matay, ania a naragsak a panginanamaan ti adda nga agpaay kadakuada?

20 Numan pay di sawen nga espisipiko ni Pablo dagitoy iti umuna a suratna kadagiti taga Tesalonica, ipasiguro ti Apocalipsis 20:12 kadatayo a “dagiti natay, babassit ken dadakkel,” ket mapagungardanto nga agtakder iti sanguanan ti trono a pangukoman ti Dios. (Kitaenyo met ti Juan 5:28, 29.) Nupay kasta, “maysa a dakkel a bunggoy” itatta nga agbilangen kadagiti minilmilion ti naur-urnongen iti sanguanan dayta a trono. Kas maysa a grupo, dagitoyto ti maisalakan a sibibiag a lumasat iti dayta umadanin a “dakkel a rigat.” Isuda ti ipaspastoran ti Kordero ket maiturongda kadagiti “ubbog ti danum ti biag,” tapno saandanton a kasapulan a matay manipud iti daga. Ngem gapu iti kinalakay wenno iti di mapakpakadaan a pasamak, mabalin a dadduma kadakuada ti matayto pay bayat iti “kaadda” ti Apo. (Apocalipsis 7:9, 14, 17; Eclesiastes 9:11) Ania met ngay ti maipapan kadagitoy?

21 Ti nakaragragsak a namnama iti nasapa a panagungar ti agur-uray kadagiti amin kadagita a “sabsabali a karnero.” (Juan 10:16) Ti pammati ken ar-aramidda, kas ken Abraham idi ugma, ti nangiyegen kadakuada iti kasasaad a pannakipagayam iti Dios. Kas kadagiti lallaki ken babbai iti pammati a nailadawan iti Hebreo kapitulo 11, dagitoy moderno-aldaw a “sabsabali a karnero” ti nakaibturen kadagiti pakasusuotan. Nainkalintegan laeng ngarud, aglak-amdanto ti “nasaysayaat a panagungar,” awan duadua nasapa iti panawen kalpasan ti Armagedon. (Hebreo 11:35; Santiago 2:23) Pudno unay, tunggal maysa a, babaen ti pammati, ‘nangan iti lasag ni Jesus ken imminum iti darana’ makiramandanto iti kaitungpalan ti karina: “Isu . . . adda biagna nga agnanayon, ket isu pagungarekto iti iti kamaudianan nga aldaw.”​—Juan 6:54; Roma 5:18, 21; 6:23.

22. Kasanot’ intay panangliwliwa iti maysa ken maysa?

22 Kalpasan ti panangsalaysayna ti nadayag a namnama ti panagungar, impatigmaan ni Pablo: “Ngarud pangliwliwayo iti maysa ken maysa dagitoy a sasao.” (1 Tesalonica 4:18) Kalpasanna sinalaysayna pay dagiti napateg a bambanag maipapan iti kaadda ni Apotayo a Jesus.” (1 Tesalonica 5:23) Ania dagitoy? Kitaenyo ti artikulo a “Talna Manipud iti Dios​—Kaano?”

Kas Pananggupgop​—

◻ Ania a dawat ti inaramid ni Pablo maipaay kadagiti Kristiano?

◻ Ania nga “al-alagaden” ti inted ti apostol nga agpaay iti pagimbagantayo?

◻ Kasano a ti Sao ti Dios liwliwaennatayo maipapan kadagiti natay?

◻ Ania a panagsasagadsad ti panagungar ti insalaysay ni Pablo?

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share