NADIOSAN A DEBOSION

Nauneg a panagraem, panagdaydayaw, ken panagserbi iti Dios buyogen ti kinasungdo iti sapasap a kinasoberanona. Inusar ti Kasuratan ti Griego a sao a eu·seʹbei·a ken dagiti pangiladawan a sao (adjective), pangkadua a sao (adverb), ken berbo a nainaig iti dayta. Ti pormana a nombre a naaramat iti Biblia ket mabalin a literal a maipatarus kas “naan-anay a panagraem” ken tumukoy iti panagraem wenno debosion iti daydiay pudpudno a nasantuan ken nalinteg. (Idiligyo ti 2Pe 1:6, Int.) Ti kasungani ti “nadiosan a debosion” ket “di kinanadiosan” wenno “kaawan panagraem” (Gr., a·seʹbei·a).

Iti Christian Words, kastoy ti insurat ni Nigel Turner: “Agparang no dadduma ti eusebeia kadagiti agdama a surat a ti kaipapananna ket mangipasimudaag iti personal a narelihiosuan a debosion . . . ngem ti ad-adda a pangkaaduan a kaipapananna iti nalatak a Griego idi panawen dagiti Romano ket ‘kinasungdo.’ . . . Kadagiti Kristiano, ti eusebeia ti kangatuan a kita ti debosion iti Dios.” (1981, p. 111) Ar-aramaten ti Biblia ti sasao a “nadiosan a debosion” a tumukoy iti personal a debosion ken Jehova a Dios buyogen ti kinasungdo.

Ti nainaig a pangiladawan a sao a eu·se·besʹ, a kaipapananna ti “napeklan; addaan nadiosan a debosion,” ket agparang iti Aramid 10:2, 7; 2 Pedro 2:9. Sigun ken John A. H. Tittmann, ti eu·se·besʹ ket “ipasimudaagna ti nauneg a panagraem iti Dios a maiparangarang a mismo babaen kadagiti aramid, nangnangruna iti panagdaydayaw iti Dios; . . . [eu·se·besʹ] daydiay mangipakita iti kasta a debosion babaen ti ar-aramid.”​—Remarks on the Synonyms of the New Testament, Edinburgh, 1833, Tomo I, p. 253, 254.

Ti berbo a eu·se·beʹo ket naaramat iti 1 Timoteo 5:4 mainaig iti kababalin ti annak wenno appoko kadagiti balo nga inada wenno kadagiti apongda a baket. Kunaen ni Edward Robinson iti librona nga A Greek and English Lexicon of the New Testament (1885, p. 307), a ti eu·se·beʹo ket mabalin a kaipapananna ti panagbalin a nasungdo iti uray asino. Gapu itoy, kastoy ti mabasa iti dadduma a patarus iti daytoy a teksto: “Umuna iti amin, rumbeng a sursuruenda pay nga aramiden ti annongenda kadagiti bukodda a pamilia.” (JB; idiligyo ti The New English Bible ken ti The Bible in Basic English.) Ngem ti Dios ti Nangipasdek iti urnos ti pamilia (Efe 3:14, 15), ket inyarig ti Biblia ti sangakabbalayan ti Dios iti maysa a pamilia. Gapuna, ti nauneg a panagraem, wenno nadiosan a debosion, kadagiti relasion ti pamilia iti Kristiano a sangakabbalayan ket nauneg a panagraem dayta iti Dios ken panagtulnog iti bilbilinna maipapan iti pamilia ken umiso a kababalin dagiti kameng ti pamilia. Maitunos iti daytoy a pannakaawat ti pannakaipatarus daytoy a teksto kas: “No ti asinoman a balo a babai addaan iti annak wenno appoko, sursuruen koma nga umuna dagitoy ti panangannurot iti nadiosan a debosion iti bukodda a sangakabbalayan.”​—NW.

Ti ‘Sagrado a Palimed ti Nadiosan a Debosion.’ Ni Jesu-Kristo ti kangrunaan nga ulidan ti nadiosan a debosion. Insurat ni apostol Pablo ken Timoteo: “Pudno unay, ti sagrado a palimed daytoy nadiosan a debosion maawat a naindaklan: ‘Isu naiparangarang iti lasag, naideklara a nalinteg iti espiritu, nagparang kadagiti anghel, naikaskasaba kadagiti nasion, napapati iti lubong, naawat idiay ngato iti kinadayag.’” (1Ti 3:16) Saan a nakaipasdek iti perpekto nga ulidan ti nadiosan a debosion ti perpekto a tao a ni Adan. Uray met ti asinoman kadagiti annakna ta nayanakda nga imperpekto. Asino laeng ngarud ti makaipasdek iti perpekto nga ulidan? Ti iyaay ti Anak ti Dios ditoy daga ken ti panangsalimetmetna iti kinatarnawna ti nagpaay a sungbat, nga impalgakna ti solusion iti sagrado a palimed. Isu ti rumbeng a tuladen ni Timoteo kas perpekto nga ulidan ti kababalin a nangiparangarang iti nadiosan a debosion.​—1Ti 3:15.

Ni Jesu-Kristo laeng ti kakaisuna a tao a naan-anay a nakaiparangarang iti nadiosan a debosion iti isuamin a banag, a pinaneknekanna a kabaelan met ti naindagaan a tao a taginayonen ti kasta a debosion. Uray iti sidong dagiti nakaro a pakasuotan, agingga iti panagpatingga ti naindagaan a biagna, nagtalinaed ni Jesus a “nasungdo, awanan allilaw, di natulawan, naisina kadagiti managbasol.” (Heb 7:26) Awan a pulos ti pakapilawan ti kinatarnawna a mayakusar kenkuana iti sanguanan iti Dios. Kinunana sakbay ti ipapatayna: “Pinarmekko ti lubong,” kasta met, “Um-umayen ti agturay iti lubong. Ket awan pannakabalinna kaniak.” (Jn 16:33; 14:30) Awan masarakan a kinakillo kenkuana. Siuumiso a maikunana kadagiti kabusorna: “Siasino kadakayo ti mangipaneknek a nakabasolak?” (Jn 8:46) Naisangsangayan unay ti sungbat iti “sagrado a palimed daytoy nadiosan a debosion” ken nakapatpateg unay nga agpaay iti sangatauan ta kasapulan a maiwaragawag iti intero a lubong. Ni Jesu-Kristo a mismo ti nakaibasaran ti Nakristianuan a nadiosan a debosion ken kababalin iti kongregasion.

Napateg ti Panagsanay nga Addaan Pannakapnek. Napateg ti nainget a panagsanay ti maysa a Kristiano tapno maaddaan iti naan-anay a nadiosan a debosion. Ramanenna ti panangibtur iti ibubusor ken pannakaidadanes. (2Ti 3:12) Ti kalat, wenno panggep, ti maysa a tao iti panangsanayna iti bagina ket saan a tapno gumun-od iti inaagum a materialistiko a gunggona. Ngem adda gunggona a magun-odan ti maysa a mapneken iti kasasaadna, nga agtultuloy a mangipakita iti nadiosan a debosion buyogen ti pannakapnek. “Addaan kari a biag itan,” nga isu ti naespirituan a salun-at, pannakapnek, kinaragsak, ken panggep iti biag. Addaan met iti kari iti daydiay biag “nga umay.”​—1Ti 4:7, 8; 6:6-8; idiligyo ti Pr 3:7, 8; 4:20-22.

Nupay mabalin nga agpasar iti pannakaidadanes ken rigat ti maysa a tao nga addaan nadiosan a debosion, di rumbeng nga agbuteng, ta “ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.” (2Pe 2:9) Binalakadan ni apostol Pedro dagiti Kristiano nga inayonda iti panagibturda ti nadiosan a debosion. (2Pe 1:5, 6) Indagadagna kadakuada a mailasinda koma kas tattao nga addaan iti “nasantuan a panagbibiag ken ar-aramid ti nadiosan a debosion” tapno malasatanda ti pannakaukom inton aldaw ni Jehova.​—2Pe 3:7, 10, 11; 1Pe 4:18.

Ti Bileg ti Nadiosan a Debosion. Masapul a bigbigen ti maysa a tao nga agkunkuna nga addaan iti nadiosan a debosion ti bileg dayta a mangbalbaliw iti personalidadna ken masapul a napudno ken napasnek iti panangsurotna iti kinanadiosan. (1Ti 6:11; Efe 4:20-24) Masapul a bigbigenna a ti parangarang ti Dios iti dana ti nadiosan a debosion ket ti mismo a Saona, isu a masapul a tungpalen dayta a tao dagiti bilin a nailanad iti dayta. (Tit 1:1; 2Pe 1:3) Yantangay ti Dios a mismo ti pangipaayan ti nadiosan a debosion, ti Sao ken espirituna ti tumulong iti maysa a tao tapno maam-ammona unay ni Jehova ken suminged kenkuana ken tapno agbalin a kas kenkuana​—agbalin a tumutulad kenkuana. (Efe 5:1) Iti kasta, ad-adda pay a mayanninaw ti maysa a tao dagiti nagsasayaat a kualidad ni Jehova a Dios.​—2Co 3:18.

No ti asinoman nga agkunkuna nga agserserbi iti Dios ket agtalek kadagiti bukodna a kapanunotan imbes nga annurotenna ti Biblia ken no ti sursurona ket saan a “maitunos iti nadiosan a debosion,” ngarud saan a maipakita ti kasta a mannursuro ti debosionna iti Dios, iti kasta “adda sakitna iti isip.” (1Ti 6:3, 4) Pinakdaaran ni apostol Pablo ti ub-ubing a padana a ministro a ni Timoteo maipapan kadagidiay saan a nadiosan a tattao nga agkunkuna nga addaanda iti debosion iti Dios. Pinalagipanna ni Timoteo nga aramatenna a siuumiso ti Sao ti kinapudno, nga adaywanna dagiti ubbaw a panagsasao a sumalungasing iti nasantuan, tapno saan a maisiasi ni Timoteo iti dana ti nadiosan a debosion. Kalpasanna, impatuldona a tumaud dagiti tattao nga agaramid iti amin a kita ti kinadangkes, nga agpammarangda nga addaan iti maysa a kita ti nadiosan a debosion ngem libakenda ti pannakabalin dayta. (2Ti 2:15, 16; 3:1-5) Impakita met ni Judas a ti kakasta a tattao ket awanan iti pudpudno a panagraem iti Dios wenno debosion kenkuana, saanda met a raemen wenno tagipatgen ti di kaikarian a kinamanangngaasina. Ar-aramaten ti kakasta a tattao ti kinanadiosan maipaay iti materialistiko wenno nainlasagan a gunggona. Ti panaginsisingpetda ket maibutaktak gapu iti nalulok a kababalinda.​—Jud 4.

Ania ti tuktukoyen ni Pablo a “misterio daytoy a kinakillo”?

Ipakita daytoy nga adda sabali pay a misterio, a naan-anay a maisupadi iti “sagrado a palimed” ni Jehova. Isu “ti misterio daytoy a kinakillo.” Maysa a misterio daytoy kadagiti pudno a Kristiano agsipud ta idi kaaldawan ni apostol Pablo, saan pay a masinunuo no siasino dagiti piho a mangbukel iti “tao ti kinakillo.” Uray pay kalpasan a mailasinen no siasino dagiti mangbukel iti dayta a “tao,” ti pakabigbiganna ket agtultuloy a misterio iti kaaduan a tattao agsipud ta ti kinadangkesna ket ar-aramidenna babaen ti panagpammarangna ken kasla addaan iti nadiosan a debosion. Kinapudnona, panagapostata dayta manipud pudno a nadiosan a debosion. Kinuna ni Pablo a “ti misterio daytoy a kinakillo” ket addan idi kaaldawanna, ta adda idin ti impluensia ti kinadakes iti kongregasion Kristiano, idi agangay isu ti nagtaudan dayta nga apostata a grupo. Kamaudiananna, inton maiparangarang ti kaadda ni Jesu-Kristo papatayenna daytoy nga apostata. Daytoy nga apostata a “tao” a tigtignayen ni Satanas ket itan-oknanto ti bagina “iti ngatuen ti tunggal maysa a maawagan ‘dios’ wenno banag a daydayawen” (Gr., seʹba·sma). Gapuna, kas maysa nga instrumento ni Satanas, daytoy kangrunaan a bumusbusor iti Dios ket mangallilaw iti kasta unay ken iturongna iti pannakadadael dagidiay mangan-annurot iti ar-aramidna. Epektibo ti panagtignay ti “tao ti kinakillo” gapu ta ilemlemmengna ti kinadangkesna babaen ti panagpammarangna nga addaan iti nadiosan a debosion.​—2Te 2:3-12; idiligyo ti Mt 7:15, 21-23.