Ipakaammo ti Naimbag a Damag Maipapan iti Di Kaikarian a Kinamanangngaasi

1, 2. Kasano nga impakita ni apostol Pablo nga isu ket agyaman iti di kaikarian a kinamanangngaasi ti Dios?

GAPU iti kapadasanna, maikuna ni apostol Pablo: “Ti di kaikarian a kinamanangngaasi [ti Dios] kaniak saan a nagbalin nga ubbaw.” (Basaen ti 1 Corinto 15:9, 10.) Ammo ni Pablo a saanna a nagbannogan ken saan a maikari iti dakkel nga asi ti Dios ta indadanesna idi dagiti Kristiano.

² Idi dandanin agpatingga ti biag ni Pablo, insuratna ken Timoteo: “Agyamanak ken Kristo Jesus nga Apotayo, a nangted kaniak iti pannakabalin, agsipud ta imbilangnak a matalek babaen ti panangtudingna kaniak iti maysa a ministerio.” (1 Tim. 1:12-14) Ania dayta a ministerio? Imbaga ni Pablo kadagiti panglakayen iti kongregasion iti Efeso ti ramanen dayta. Kinunana: “Diak ilalaen ti kararuak a kas napateg kaniak, maturposko la ketdi ti tarayek ken ti ministerio nga inawatko ken Apo Jesus, tapno naan-anay a mangsaksiak iti naimbag a damag ti di kaikarian a kinamanangngaasi ti Dios.”​—Ara. 20:24.

3. Ania a naisangsangayan a ministerio ti naited ken Pablo? (Kitaen ti ladawan iti rugi ti artikulo.)

³ Ania a “naimbag a damag” ti inkasaba ni Pablo a mangitampok iti di kaikarian a kinamanangngaasi ni Jehova? Kinunana kadagiti Kristiano idiay Efeso: “Nangngegyo ti maipapan iti kinamayordomo ti di kaikarian a kinamanangngaasi ti Dios a naited kaniak maipaay kadakayo.” (Efe. 3:1, 2) Naibilin ken Pablo nga ipakaammona ti naimbag a damag kadagiti saan a Judio tapno mairamanda met kadagidiay maayaban nga agbalin a kadua ni Kristo iti Mesianiko a Pagarian. (Basaen ti Efeso 3:5-8.) Nagsayaat nga ulidan kadagiti Kristiano ita ti kinaregta ni Pablo iti ministeriona ken impakitana a saan nga “ubbaw” ti impaay ti Dios a di kaikarian a kinamanangngaasi kenkuana.

MATIGNAYKA KADI GAPU ITI DI KAIKARIAN A KINAMANANGNGAASI TI DIOS?

4, 5. Apay a maikunatayo a ti “naimbag a damag ti pagarian” ket isu met laeng ti naimbag a damag ti “di kaikarian a kinamanangngaasi ti Dios”?

⁴ Kadagitoy maudi nga al-aldaw, naibilin kadagiti adipen ni Jehova nga ikasabada “daytoy naimbag a damag ti pagarian . . . iti intero a mapagnaedan a daga” kas pammaneknek iti amin a nasion. (Mat. 24:14) Ti mensahe nga ipakpakaammotayo ket isu met laeng ti “naimbag a damag ti di kaikarian a kinamanangngaasi ti Dios” ta amin a bendision nga awatentayto babaen ti panagturay ti Pagarian ket gapu iti di kaikarian a kinamanangngaasi ni Jehova babaen ken Kristo. (Efe. 1:3) Kas ken Pablo, ipakpakitatayo met kadi nga agyamantayo iti di kaikarian a kinamanangngaasi ni Jehova babaen ti naregta a pannakiraman iti ministerio?​—Basaen ti Roma 1:14-16.

⁵ Iti napalabas nga artikulo, naammuantayo no kasano a magunggonaantayo iti di kaikarian a kinamanangngaasi ni Jehova iti nadumaduma a pamay-an nupay managbasoltayo. Aramidentayo ngarud ti amin a kabaelantayo a mangipakaammo iti amin a tao no kasano nga ipakpakita ni Jehova ti ayatna ken no kasano a magunggonaanda iti dayta. Ania ti dadduma nga aspeto ti di kaikarian a kinamanangngaasi ti Dios ti masapul nga ipakaammotayo iti sabsabali tapno matarusan ken maapresiarda?

IPAKAAMMO TI NAIMBAG A DAMAG MAIPAPAN ITI SUBBOT

6, 7. No ilawlawagtayo ti subbot kadagiti tattao, kasano nga ipakpakaammotayo ti naimbag a damag maipapan iti di kaikarian a kinamanangngaasi ti Dios?

⁶ Iti napanuynoy a lubong a pagbibiagantayo, saanen a marikna dagiti tattao a nakabasolda uray agaramidda iti dakes, isu nga adu ti saan a makatarus no apay a kasapulan ti tao ti subbot. Kasta met, umad-adu dagiti makabigbig a saanda a naragsak uray aramidenda ti kaykayatda. No makisaritada laeng kadagiti Saksi ni Jehova a matarusanda no ania ti basol, no ania ti epektona kadatayo, ken no ania ti aramidentayo tapno saantayo a maadipen iti basol. Mabang-aran dagiti napudno a tattao a makaammo a gapu iti kasta unay nga ayat ken iti di kaikarian a kinamanangngaasi ni Jehova, imbaonna ti Anakna ditoy daga tapno subbotennatayo manipud iti basol ken ipapatay.​—1 Juan 4:9, 10.

⁷ Insurat ni Pablo maipapan iti dungdungnguen ni Jehova nga Anakna: “Babaen kenkuana [ni Jesus] addaantayo iti pannakaluk-at babaen ti subbot baeten iti dara dayta, wen, ti pannakapakawan dagiti labsingtayo, maitunos iti kinabaknang ti di kaikarian a kinamanangngaasina [ni Jehova].” (Efe. 1:7) Ti subbot a daton ni Kristo ti kadakkelan a pammaneknek nga ay-ayatennatayo ti Dios ken mangipakita nga aglaplapusanan ti di kaikarian a kinamanangngaasina. Maragsakantayo a makaammo a no ipakitatayo ti pammati iti naiparukpok a dara ni Jesus, mapakawan dagiti basoltayo ken madalusan ti konsiensiatayo! (Heb. 9:14) Dayta ket naimbag a damag a masapul a maipakaammo iti sabsabali!

TULONGAN DAGITI TATTAO NGA AGBALIN A GAYYEM TI DIOS

8. Apay a dagiti managbasol a tattao masapul a maikappiada iti Dios?

⁸ Responsabilidadtayo nga ipakaammo kadagiti tattao a mabalin nga agbalinda a gayyem ti Namarsua. No saanda nga ipakita ti pammati iti daton ni Jesus, ibilang ida ti Dios a kabusorna. Insurat ni apostol Juan: “Ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag, ngem agtalinaed kenkuana ti pungtot ti Dios.” (Juan 3:36) Makaparagsak ta gapu iti daton ni Kristo, mabalin a maikappiatayo iti Dios. Kinuna ni Pablo: “Dakayo a naisina idi ken kabkabusor agsipud ta dagiti panunotyo addada kadagiti aramid a nadangkes, inkappianakayo manen ita babaen ti nainlasagan a bagi dayta babaen ti ipapatayna.”​—Col. 1:21, 22.

9, 10. (a) Ania nga annongen ti inted ni Kristo kadagiti napulotan a kakabsatna? (b) Kasano a tultulongan ti “sabsabali a karnero” dagiti napulotan a kakabsatda?

⁹ Inted ni Kristo kadagiti napulotan a kakabsatna ditoy daga ti inawagan ni Pablo a “ministerio ti pannakikappia.” Inlawlawag daytoy ni Pablo iti suratna kadagiti napulotan a Kristiano idi umuna a siglo: “Amin a bambanag naggapuda iti Dios, a nangikappia kadatayo iti bagina babaen ken Kristo ken nangted kadakami iti ministerio ti pannakikappia, awan sabali, a ti lubong inkappia ti Dios iti bagina babaen ken Kristo, saanna nga insingir kadakuada dagiti labsingda, ket intalekna kadakami ti sao ti pannakikappia. Dakami ngarud ket embahador a mangisunsuno ken Kristo, a kasla agpakpakaasi ti Dios babaen kadakami. Kas dagiti suno ni Kristo ipakaasimi: ‘Makikappiakayo iti Dios.’”​—2 Cor. 5:18-20.

¹⁰ Ibilang ti “sabsabali a karnero” a pribilehioda a tulongan dagiti napulotan a kakabsatda iti daytoy a ministerio. (Juan 10:16) Kas pannakabagi ni Kristo, dakkel ti maar-aramidanda iti panangisuro kadagiti tattao maipapan iti naespirituan a kinapudno ken tultulonganda ida a maaddaan iti personal a relasion ken Jehova. Daytoy ket nagpateg a paset iti naan-anay a panangipakaammo iti naimbag a damag maipapan iti di kaikarian a kinamanangngaasi ti Dios.

IPAKAAMMO TI NAIMBAG A DAMAG A DENGGEN TI DIOS DAGITI KARARAG

11, 12. Apay a naimbag a damag para kadagiti tattao a maammuanda a mabalinda ti agkararag ken Jehova?

¹¹ Adu a tattao ti agkararag ta lumag-an ti riknada, ngem saanda a mamati a dengdenggen ti Dios dagiti kararagda. Masapul a maammuanda a ni Jehova ti “Managdengngeg iti kararag.” Insurat ni salmista David: “O Managdengngeg iti kararag, kenka a mismo umayto dagiti tattao iti isuamin a lasag. Ti bambanag a biddut napaneknekan a nabilbilegda ngem siak. No maipapan kadagiti salungasingmi, sika abbongamto ida.”​—Sal. 65:2, 3.

¹² Imbaga ni Jesus kadagiti adalanna: “No dawatenyo ti aniaman a banag iti naganko, aramidekto dayta.” (Juan 14:14) Nalawag a ti kayat a sawen ti “aniaman” ket aniaman a banag a maitunos iti pagayatan ni Jehova. Ipasigurado kadatayo ni Juan: “Daytoy ti adda kadatayo a panagtalek kenkuana, nga, uray ania ti dawatentayo maitunos iti pagayatanna, denggennatayo.” (1 Juan 5:14) Talaga a nagsayaat nga isuro iti sabsabali a ti kararag ket saan laeng a basta mangpasayaat iti rikrikna, no di ket nagsayaat a pamay-an tapno umadanitayo iti “trono ti di kaikarian a kinamanangngaasi” ni Jehova! (Heb. 4:16) No isurotayo kadakuada no ania ti umiso a pamay-an ti panagkararag, no asino ti umiso a pagkararaganda, ken no ania dagiti umiso nga ikararagda, matulongantayo ida nga umadani ken Jehova ken maliwliwada iti tiempo ti rigat.​—Sal. 4:1; 145:18.

TI DI KAIKARIAN A KINAMANANGNGAASI ITI BARO A SISTEMA TI BAMBANAG

13, 14. (a) Ania ti naisangsangayan a pribilehio dagiti napulotan iti masanguanan? (b) Anianto ti naisangsangayan a trabaho nga aramiden dagiti napulotan para kadagiti tattao?

¹³ Ipakitanto ni Jehova ti di kaikarian a kinamanangngaasina uray inton agpatingga ti agdama a dakes a sistema ti bambanag. Maipapan iti naisangsangayan a pribilehio nga inted ti Dios iti 144,000, a naayaban a makipagturay ken Kristo iti nailangitan a Pagarianna, insurat ni Pablo: “Ti Dios, a nabaknang iti asi, gapu iti naindaklan nga ayat a pinangayatna kadatayo, pinagbiagnatayo a maikanunong ken Kristo, uray pay idi nataytayo kadagiti labsing​—babaen ti di kaikarian a kinamanangngaasi naisalakankayo​—ket imbangonnatayo a sangsangkamaysa ken pinagtugawnatayo a sangsangkamaysa kadagiti nailangitan a disso a maikaykaysa ken Kristo Jesus, tapno kadagiti mapasungad a sistema ti bambanag maiparangarang koma ti manglab-aw a kinabaknang ti di kaikarian a kinamanangngaasina iti kinamanagparaburna kadatayo a maikaykaysa ken Kristo Jesus.”​—Efe. 2:4-7.

¹⁴ Saantayo a mailadawan dagiti nakaskasdaaw a bambanag nga insagana ni Jehova para kadagiti napulotan a Kristiano apaman a makipagturayda ken Kristo idiay langit. (Luc. 22:28-30; Fil. 3:20, 21; 1 Juan 3:2) Nangnangruna nga ipakitanto kadakuada ni Jehova “ti manglab-aw a kinabaknang ti di kaikarian a kinamanangngaasina.” Dagitoy ti mangbukel iti “Baro a Jerusalem,” ti nobia ni Kristo. (Apoc. 3:12; 17:14; 21:2, 9, 10) Kaduanto ida ni Jesus a mangpaimbag kadagiti nasion, a tulonganda dagiti natulnog a tattao a mawayawayaan iti basol ken ipapatay ken agbalin a perpekto.​—Basaen ti Apocalipsis 22:1, 2, 17.

15, 16. Iti masanguanan, kasano nga ipakita ni Jehova ti di kaikarian a kinamanangngaasina iti “sabsabali a karnero”?

¹⁵ Mabasatayo iti Efeso 2:7 nga ipakita ti Dios ti di kaikarian a kinamanangngaasina iti “mapasungad a sistema ti bambanag.” Sigurado a masaksianto dagiti tattao iti baro a sistema ti bambanag ni Jehova ditoy daga “ti manglab-aw a kinabaknang ti di kaikarian a kinamanangngaasina.” (Luc. 18:29, 30) Maysa kadagiti naindaklan a panangipakita ni Jehova iti nagsayaat a kinamanangngaasina ket ti pannakapagungar dagiti tattao manipud iti tanem. (Job 14:13-15; Juan 5:28, 29) Dagiti matalek a lallaki ken babbai a natay sakbay ti ipapatay ni Kristo, kasta met ti amin a “sabsabali a karnero” a matay a matalek bayat ti maudi nga al-aldaw, agungardanto tapno agtultuloy nga agserbida ken Jehova.

¹⁶ Mapagungarto met dagiti minilion a tattao a natay a saan a nakaam-ammo iti Dios. Maaddaandanto iti gundaway nga agpaituray ken Jehova. Insurat ni Juan: “Nakitak dagiti natay, dagiti dadakkel ken dagiti babassit, a sitatakder iti sanguanan ti trono, ket naukrad dagiti lukot. Ngem sabali pay a lukot ti naukrad; dayta ti lukot ti biag. Ket naukom dagiti natay manipud kadagidiay banag a naisurat kadagiti lukot sigun kadagiti aramidda. Ket ti baybay inyawatna dagidiay natay nga adda kenkuana, ket ni patay ken ti Hades inyawatda dagidiay natay nga adda kadakuada, ket naukomda a tumunggal maysa sigun kadagiti aramidda.” (Apoc. 20:12, 13) Siempre, dagiti mapagungar masapul a masursuroda no kasano nga iyaplikar dagiti prinsipio ti Dios a masarakan iti Biblia. Masapul met a tungpalenda dagiti baro nga instruksion a maipalgak kadagiti “lukot” a mangipakaammo kadagiti kalikaguman ni Jehova iti panagbiag iti baro a sistema ti bambanag. Ti pannakaipalgak dagiti linaon dagitoy a lukot ket sabali pay a pakakitaan iti di kaikarian a kinamanangngaasi ni Jehova.

ITULTULOY NGA IPAKAAMMO TI NAIMBAG A DAMAG

17. Ania koma ti laglagipentayo no mangasabatayo?

¹⁷ Bayat nga umas-asideg ti panungpalan, ad-adda pay a masapul nga ikasabatayo ti naimbag a damag maipapan iti Pagarian! (Mar. 13:10) Talaga nga itampok ti naimbag a damag ti di kaikarian a kinamanangngaasi ni Jehova. Laglagipentayo koma dayta no mangasabatayo. Ti panggeptayo ket tapno maidaydayaw ni Jehova. Maaramidantayo dayta no ibagatayo kadagiti tattao nga amin a kari maipapan kadagiti bendision iti baro a lubong ket ebkas ti kinamanangngaasi ni Jehova.

18, 19. Kasano nga idaydayawtayo ti di kaikarian a kinamanangngaasi ni Jehova?

¹⁸ No kasabaantayo ti sabsabali, ilawlawagtayo nga iti sidong ti panagturay ti Pagarian ni Kristo, naan-anayton a sagrapen dagiti tattao ti epekto ti subbot ken in-inut nga agbalinda a perpekto. Kuna ti Biblia: “Ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.” (Roma 8:21) Mapasamak laeng dayta gapu iti naisangsangayan a kinamanangngaasi ni Jehova.

¹⁹ Pribilehiotayo nga ipakaammo iti amin a dumngeg ti maipapan iti makaparagsak a kari a mabasa iti Apocalipsis 21:4, 5: “Punasento [ti Dios] ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Ket kinuna ni Jehova, daydiay situtugaw iti trono: “Adtoy! Pagbalbalinek a baro ti amin a bambanag.” Kunana pay: “Isuratmo, agsipud ta dagitoy a sasao matalek ken napudnoda.” No naregtatayo a mangikasaba iti daytoy a naimbag a damag iti sabsabali, talaga nga idaydayawtayo ti di kaikarian a kinamanangngaasi ni Jehova!