Impakpakauna Kadi ti Biblia ti Kababalin ken Ar-aramid Dagiti Tattao Ita?

Sungbat ti Biblia

Wen, impakpakauna ti Biblia a kumaro pay ti kinadakes dagiti tattao iti panawentayo. Ipakita dayta a saanen a suroten ti kaaduan a tattao dagiti paglintegan iti moral ken dagiti nagsayaat a kababalin a makatulong iti kagimongan.a (2 Timoteo 3:1-5) Ngem impakpakauna met ti Biblia nga adda dagiti tattao a saan a kasta ti kababalin ken ar-aramidenda. Imbes ketdi, ikagkagumaanda a labanan dagiti dakes nga impluensia iti tulong ti Dios, ken ti panagpampanunot ken ar-aramidenda ket maitunos iti pagayatan ti Dios.—Isaias 2:2, 3.

Iti daytoy nga artikulo

Ania ti impakpakauna ti Biblia a kababalin ken ar-aramid dagiti tattao ita?

Ipakita ti Biblia dagiti nagduduma a dakes a kababalin ken ar-aramid a normalen ita, gapu ta iyun-una dagiti tattao ti bagbagida. Dagiti tattao ket “awanan panagteppel,” ‘ay-ayatenda laeng ti bagbagida,’ ken ‘ay-ayatenda ti ragragsak imbes a ti Dios.’—2 Timoteo 3:2-4.

Kas iti naipadto, dagiti tattao ita ket bagbagida laeng ti pampanunotenda, no ania ti pagsayaatanda, no ania ti pagragsakanda, ken dadduma pay. Nakanornormalen dagitoy ken kasla kumarkaro pay. Iyun-una ti adu a tattao ti pagsayaatanda isu a “kagurada ti kinaimbag,” ken saanda a maapresiar dagiti nasayaat a kababalin. Gapu ta ‘saanda a managyaman,’ saanda a maapresiar ti adda kadakuada wenno ti ar-aramiden ti dadduma para kadakuada.—2 Timoteo 3:2, 3.

Dagitoy ti dadduma a kababalin nga epekto ti panangyun-una dagiti tattao iti bagida nga agserbi kas pagilasinan iti tiempotayo:

Naagum. Nakaad-adu ita ti “managayat iti kuarta.” Rukodenda pay ketdi ti balligida iti kaadu ti kuarta wenno dagiti banag nga adda kadakuada.—2 Timoteo 3:2.
Napannakkel. Adu ita ti “napangas, natangsit,” ken “napannakkel.” (2 Timoteo 3:2, 4) Ipalastogda ti abilidad, kababalin, wenno kinabaknangda.
Manangpadakes. Nakaad-adu ita ti “agsasao maibusor iti Dios ken iti tao” ken “manangpadakes.” (2 Timoteo 3:2, 3) Isuda dagiti mangin-insulto iti dadduma a tattao wenno iti Dios wenno mangibagbaga iti kinaulbod maipapan kadakuada.
Manangipapilit. Adu a tattao ti “saan a matalek,” “saanda a kayat ti makitulag,” “traidor,” ken “natangken ti uloda.” (2 Timoteo 3:2-4) Ipakpakitada dagitoy a kababalin ta saanda a kayat ti makitulag, saanda nga agbirok kadagiti solusion, wenno saanda a tungpalen dagiti inkarida.
Bayolente. Adu ita ti “nauyong,” nalaka nga agpungtot a kaaduanna nga agturong iti kinaranggas.—2 Timoteo 3:3.
Kinadakes. Impakpakauna ni Jesus a ‘kumaro ti kinadakes’ iti panawentayo. (Mateo 24:12) Impadtona met nga umadu ti “riribuk,” wenno “panaggugulo.”—Lucas 21:9, footnote.
Bimmaaw ti ayat iti pamilia. Gapu ta umad-adu dagiti ‘nasukir kadagiti nagannakda’ ken “awanan iti ayat [kadagiti kapamiliada],” umad-adu met ti mabaybay-an, maab-abuso, ken mamalmaltrato.—2 Timoteo 3:2, 3.
Pagparparangenda a relihiosoda. Umad-adu dagiti tattao a ‘kasla relihioso ngem saanda nga agbibiag a kasta.’ (2 Timoteo 3:5) Imbes a surotenda ti pagayatan ti Dios, sursurotenda dagiti lider ti relihion a mangibagbaga laeng kadagiti kayatda a mangngeg.—2 Timoteo 4:3, 4.

Ania ti epekto iti dadduma ti panangyun-una dagiti tattao iti bagbagida?

Gapu ta adu dagiti mangyun-una iti bagbagida, adu a tattao ita ti apektado ti emosion ken isipda. (Eclesiastes 7:7) Kas pagarigan, dagiti managayat iti kuarta saurenda ti dadduma. Dagiti tattao nga awanan iti ayat iti padada a tao abusuenda dagiti kapamiliada, isu a mabalin a madepres wenno agpakamatayda. Ken dagiti traidor wenno saan a matalek a tattao masaktanda dagiti biktimada ken mabalin nga agpaut dayta a saem.

Apay a dumakdakes dagiti tattao?

Ilawlawag ti Biblia dagiti rason iti panagbalbaliw dagiti tattao:

Lumamlamiis ngamin ti ayat iti Dios ken iti kaarruba. (Mateo 24:12) Isu nga umad-adu met dagiti mangyun-una iti bagbagida.
Manipud langit naitapuak ditoy daga ni Satanas a Diablo. (Apocalipsis 12:9, 12) Manipud idin, umad-adun dagiti maim-impluensiaanna a tattao nga agbalin a dakes ken mangyun-una iti bagbagida.—1 Juan 5:19.

Ania ngarud ti aramidentayo ta dumakdakesen dagiti tattao?

Kuna ti Sao ti Dios: “Adaywam dagitoy a tattao.” (2 Timoteo 3:5, Ti Baro a Naimbag a Damag Biblia) Saanna a kayat a sawen nga isinatayo ti bagitayo kadagiti tattao. Imbes ketdi, masapul a saantayo a makigayyem kadagidiay mangyun-una iti bagbagida ken saan nga agbuteng iti Dios.—Santiago 4:4.

Agbalinto kadi a dakes ti amin a tao?

Saan. Impakpakauna ti Biblia nga addanto dagiti ‘agsennaay ken umasug gapu iti amin a dakes a maar-aramid.’ (Ezekiel 9:4) Saanda nga iyun-una ti bagbagida ken sursurotenda dagiti paglintegan ti Dios. Makita iti panagsasao ken ar-aramidenda a naidumada iti kaaduan a tattao. (Malakias 3:16, 18) Kas pagarigan, kayatda a natalna ti relasionda iti amin a tattao ken saanda a makigubat ken mangdangran iti dadduma.—Mikias 4:3.

Nakagulgulonto kadi unay ti intero a lubong?

Saan. Saanto a mapno ti lubong iti gulo ken kinadakes. Imbes ketdi, dandanin dadaelen ti Dios dagiti tattao a saan a sumursurot kadagiti lintegna. (Salmo 37:38) Iyegnanto ti “baro a daga,” a tumukoy iti baro a kagimongan dagiti tattao ditoy daga ket agbiagto nga agnanayon dagiti naemma a tattao iti natalna a lubong. (2 Pedro 3:13; Salmo 37:11, 29) Saan laeng a tagtagainep daytoy a namnama. Uray ita, tultulongan ti Biblia dagiti tattao nga agbalbaliw tapno surotenda dagiti paglintegan ti Dios.—Efeso 4:23, 24.

a Ipakita ti padto ti Biblia ken dagiti mapaspasamak ita nga agbibiagtayon “iti maudi nga al-aldaw,” a “delikado” wenno “narigat a tiempo.” (2 Timoteo 3:1) Tapno ad-adu pay ti maammuam, kitaem ti artikulo nga “Ania ti Pagilasinan Dagiti ‘Maudi nga Aldaw,’ Wenno ‘Tiempo ti Panungpalan’?””