Dakayo nga Agtutubo—Kasano a Makapagsaganakayo nga Agpabautisar?
“Ti panangaramid iti pagayatam, O Diosko, nagragsakak.”—SAL. 40:8.
1, 2. (a) Ilawlawagmo no apay a serioso nga addang ti panagpabautisar. (b) Ania ti masapul a siguraduen ti maysa sakbay nga agpabautisar, ken apay?
MAYSAKA kadi nga agtutubo nga agplamplano nga agpabautisar? No kasta, agur-uray kenka ti kadakkelan a pribilehio a mabalin a magun-odan ti tao. Ngem kas naibagan iti napalabas nga artikulo, ti panagpabautisar ket serioso nga addang. Ipakitana a nagdedikarkan ken Jehova—ti naimpusuan a panagkarim nga agserbika kenkuana iti agnanayon ken iyun-unam ti pagayatanna ngem ti aniaman a banag iti biagmo. Ngarud, agpabautisarka laeng no kabaelamon nga aramiden dayta a desision, personal a desisionmo dayta, ken maawatam no ania ti kaipapanan ti dedikasion.
2 No ngay saanka a sigurado no nakasaganakan nga agpabautisar? Wenno kayatmon ti agpabautisar ngem ibaga dagiti nagannakmo nga agurayka pay, nalabit agingga nga agmataenganka pay iti naespirituan? No kasta ti kasasaadmo, saanka a maupay. Imbes ketdi, gundawayam daytoy a tiempo tapno rumang-ayka, ket di agbayag, mabalinmon ti agpabautisar. Bayat a laglagipem dayta, panunotem no kasano a maaddaanka kadagiti kalat maipapan kadagiti (1) patpatiem, (2) tigtignaymo, ken (3) panagyamanmo.
DAGITI PATPATIEM
3, 4. Ania ti masursuro dagiti agtutubo iti ulidan ni Timoteo?
3 Panunotem no kasanom a sungbatan dagitoy a saludsod: Apay a mamatiak nga adda Dios? Apay a kombinsidoak a ti Biblia ti naipaltiing a Sao ti Dios? Apay a mamatiak a ti panagbiag maitunos kadagiti moral a pagalagadan ti Dios ket nasaysayaat ngem ti panangtulad iti panagbiag ti lubong? Saan a nairanta dagita a saludsod tapno mangpataud iti panagduadua iti panunotmo. Imbes ketdi, makatulong dagitoy tapno masurotmo ti balakad ni apostol Pablo: ‘Paneknekanyo iti bagiyo ti naimbag ken makaay-ayo ken naan-anay a pagayatan ti Dios.’ (Roma 12:2) Ngem apay a dagiti Kristiano idiay Roma masapul a paneknekanda iti bagida ti maysa a banag a pinatidan?
4 Usigentayo ti maysa a pagarigan iti Biblia. Nalaing ni Timoteo iti Kasuratan. Insuro da nanangna ken lolana “manipud kinamaladaga.” Nupay kasta, imparegta ni Pablo ken Timoteo: “Agtultuloyka iti bambanag a nasursurom ken nakaguyugoyam a patien.” (2 Tim. 3:14, 15) Sigun iti maysa a reperensia, ti orihinal a sao para iti “nakaguyugoyam” ket adda kaipapananna a “tapno masigurado ken makombinsir a pudno ti maysa a banag.” Kombinsido ni Timoteo a naammuannan ti kinapudno. Pinatina dayta saan a gapu ta insuro da nanangna ken lolana, no di ket inadalna a mismo dayta ket naguyugoy a mamati.—Basaen ti Roma 12:1.
5, 6. Apay a napateg a masursurom nga usaren ti ‘pannakabalinmo nga agrason’ bayat nga ubingka pay?
5 Sika ngay? Nalabit nabayagen a naammuam ti kinapudno. No kasta, pagbalinem a kalat nga usigen a naimbag dagiti rason no apay a patiem dagita. Dayta ti mangpabileg iti pammatim ken makatulong kenka tapno maliklikam ti sumurot lattan iti panangpilit dagiti kaedadmo, ti panangallukoy ti lubong, wenno uray ti rikriknam.
6 No masursurom nga usaren ti ‘pannakabalinmo nga agrason’ bayat nga ubingka pay, makapagsaganaka a mangsungbat kadagiti saludsod dagiti kapatadam kas iti: ‘Kasano a masiguradom nga adda Dios? Apay a ti maysa a naayat a Dios ipalpalubosna ti kinadakes? Kasano a maibagam nga awan ti nagtaudan ti Dios?’ No nakasaganaka, saan a kumapuy ti pammatim gapu kadagita a saludsod, no di ket ad-adda a maparegtaka nga agadal.
7-9. Ilawlawagmo no kasano a makatulong dagiti serye ti giya iti panagadal nga “Ania a Talaga ti Isursuro ti Biblia?” a makita online tapno mapabilegmo ti patpatiem.
7 Makatulong ti napasnek a personal a panagadal tapno masungbatam dagiti saludsod, malawlawagan dagiti pagduaduaam, ken ad-adda a kombinsidoka kadagiti patpatiem. (Ara. 17:11) Adu dagiti alikamen a naipaay kadatayo a makatulong kenka a mangaramid iti dayta. Napaneknekan ti adu a makatulong ti panangadal iti broshur a The Origin of Life—Five Questions Worth Asking ken ti libro nga Is There a Creator Who Cares About You? Mainayon pay, adu nga agtutubo ti naragsakan ken nagunggonaan iti makita online nga “Ania a Talaga ti Isursuro ti Biblia?” Daytoy a serye dagiti giya iti panagadal ket makita iti jw.org. Kitaem ti PANNURSURO TI BIBLIA. Tunggal giya iti panagadal iti daytoy a serye ket nadisenio a mangtulong kenka a mangpabileg iti pammatim iti maysa a topiko ti Biblia.
8 Adu ti naammuamon maipapan iti Biblia, isu a mabalin a dagus a masungbatam dagiti saludsod a naiparang kadagitoy a giya iti panagadal. Ngem apay a siguradoka kadagiti sungbatmo? Dagiti giya iti panagadal tignayennaka a mangikalintegan kadagiti adu a teksto ken kalpasanna isuratmo dagiti kapanunotam maipapan kadagita. Makatulong dagita kenka a mangpanunot no kasanom nga ilawlawag iti sabsabali dagiti naibatay iti Biblia a patpatiem. Adu nga agtutubo ti matultulongan iti makita online nga “Ania a Talaga ti Isursuro ti Biblia?” tapno bumileg ti patpatienda. No agus-usarka iti Internet, apay a saanmo a pagbalinen daytoy a serye a paset ti personal a panagadalmo?
9 Ti panangpabileg iti patpatiem ket maysa a napateg nga addang nga agturong iti panagpabautisar. Kinuna ti maysa a tin-edyer a kabsat a babai: “Sakbay a nagpabautisarak, nagadalak iti Biblia ket nakitak a daytoy ti pudno a relihion. Ket iti inaldaw a panagbiagko, bumilbileg dayta a pammatik.”
TI TIGTIGNAYMO
10. Apay a manamnama a ti bautisado a Kristiano maitunos dagiti tigtignayna iti pammatina?
10 Kuna ti Biblia: “Ti pammati, no awan ar-aramidna, ket natay.” (Sant. 2:17) No nabileg ti pammatim, manamnama a makita dayta iti tigtignaymo. Ania a tigtignay? Ibaga ti Biblia ti maipapan iti “nasantuan a panagbibiag ken ar-aramid ti nadiosan a debosion.”—Basaen ti 2 Pedro 3:11.
11. Ilawlawagmo ti kaipapanan ti sasao a “nasantuan a panagbibiag.”
11 Tapno maipakitam ti “nasantuan a panagbibiag,” masapul a nadalus ti panagbiagmo. No maipapan iti dayta, ania ti makunam iti bagim? Kas pagarigan, panunotem ti napalabas nga innem a bulan. Kasano nga impakitam a ti ‘pannakabalin ti pannakaawatmo’ ket nasanay a mangilasin iti umiso ken di umiso? (Heb. 5:14) Adda kadi dagiti malagipmo a situasion a pinagkedkedam ti maysa a sulisog wenno ti panangpilit dagiti kapatadam? Nasayaat kadi ti pakasarsaritaan ti pammatim gapu iti kababalinmo iti eskuelaan? Itaktakderam kadi ti pammatim kadagiti kaklasem imbes a tuladem ida tapno maliklikam ti pananguyawda? (1 Ped. 4:3, 4) Siempre, awan ti perpekto. Uray dagiti nabayagen nga adipen ni Jehova mabalin a mabainda no dadduma a mangitakder iti patpatienda. Nupay kasta, ti maysa a nagdedikar ken Jehova masapul nga ipagpannakkelna ti panangawit iti nagan ti Dios, ket ipakitana dayta babaen ti kababalinna.
12. Ania ti dadduma nga “ar-aramid ti nadiosan a debosion,” ken ania koma ti panangmatmatmo kadagita?
12 Dagiti ngay “ar-aramid ti nadiosan a debosion”? Ramanen dagitoy dagiti aktibidad iti kongregasion, kas iti pannakigimong ken panangasaba. Karaman met dagiti naespirituan nga aktibidad a saan a makita ti sabsabali, kas iti panagkararag ken personal a panagadal. Ti maysa a nangidedikar iti biagna ken Jehova saanna nga ibilang dagitoy nga ar-aramid kas obligasion laeng. Imbes ketdi, tuladenna ti kababalin ni Ari David a nagkuna: “Ti panangaramid iti pagayatam, O Diosko, nagragsakak, ket ti lintegmo adda kadagiti makin-uneg a pasetko.”—Sal. 40:8.
13, 14. Ania ti makatulong kenka tapno maaramidmo dagiti “ar-aramid ti nadiosan a debosion,” ken kasano a nagunggonaan dagiti agtutubo iti daytoy?
13 Tapno matulonganka a mangikeddeng kadagiti kalatmo, adda worksheet iti panid 308 ken 309 iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2. Isingasing daytoy a worksheet nga isuratmo dagiti sungbatmo kadagiti saludsod a kas iti, “Kasano kaespesipiko dagiti kararagmo, ken ania ti ipasimudaagda no maipapan iti panagayatmo ken Jehova?” “Ania dagiti karaman iti personal a panagadalmo?” “Mangasabaka kadi uray no saan a mangasaba dagiti dadakkelmo?” Addaan pay ti worksheet iti pagsuratan kadagiti kalat a kayatmo a gun-oden maipapan iti panagkararag, personal a panagadal, ken ti panangasabam.
14 Nakita ti adu nga agtutubo nga agplamplano nga agpabautisar a nagpateg daytoy a worksheet. Kinuna ti agtutubo a kabsat nga agnagan iti Tilda: “Inusarko ti worksheet a mangikeddeng kadagiti kalatko. Saggaysa a rinagpatko dagita, ket nakasaganaakon nga agpabautisar kalpasan ti agarup makatawen.” Nagunggonaan met ti maysa a kabsat nga agnagan iti Patrick. Kinunana: “Ammokon dagiti kalatko, ngem idi insuratko, ad-adda a naikagumaak a rinagpat dagitoy.”
Itultuloymo kadi ti agserbi ken Jehova uray no sumardeng dagiti nagannakmo? (Kitaen ti parapo 15)
15. Ilawlawagmo no apay a masapul a personal a desisionmo ti panagdedikar.
15 Daytoy ti maysa kadagiti kapatgan a saludsod a makita iti worksheet: “Agserbika kadi ken Jehova uray no sumardeng nga agserbi dagiti gagayyem ken dadakkelmo?” Laglagipem, kas dedikado ken bautisado a Kristiano, agtakderkanto a bukodmo iti sanguanan ni Jehova. Ti panagserbim kenkuana ket saan nga agpannuray iti sabsabali— saan nga agdepende uray kadagiti nagannakmo. Ti ipakpakitam a nasantuan a panagbibiag ken ar-aramid ti nadiosan a debosion ti mangpaneknek a kombinsidoka a naammuamon ti kinapudno ken rumangrang-ayka tapno agpabautisar.
TI PANAGYAMANMO
16, 17. (a) Ania koma ti mangtignay iti maysa nga agbalin a Kristiano? (b) Apay a pagyamanantayo ti subbot? Iyilustrarmo.
16 Maysa a lalaki a nalaing iti Mosaiko a Linteg ti nagsaludsod ken Jesus: “Ania ti kadakkelan a bilin?” Insungbat ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mat. 22:35-37) Dinakamat ni Jesus iti sungbatna a ti koma motibo ti maysa nga agpabautisar tapno agbalin a Kristiano ket ti naimpusuan a panagayatna ken Jehova. Maysa kadagiti kasayaatan a pamay-an tapno umuneg ti panagayatmo ken Jehova ket ti panangutob iti kapatgan a sagutna—ti daton a subbot ti Anakna. (Basaen ti 2 Corinto 5:14, 15; 1 Juan 4:9, 19.) Ti panangutob iti subbot ken ti pategna kenka ti mangtignay kenka a mangipakita iti panagyamanmo iti dayta.
17 Ti panangipategmo iti subbot ket mabalin a mailadawan iti kastoy a pamay-an: Panunotem nga adda nangalaw kenka iti pannakalmes. Agawidka kadi lattan tapno agsukat, ket malipatamon ti inaramidna para kenka? Siempre saan! Sigurado a mariknam a nakautangka iti tao a nangalaw kenka. Kinapudnona, utangmo ti biagmo kenkuana! Ad-adu pay ti utangtayo ken Jehova a Dios ken ni Jesu-Kristo. No awan ti subbot, arigna nalmestayo amin iti basol ken ipapatay. Ngem gapu iti daytoy nagdakkel nga ebkas ti ayat, addaantayo itan iti awan kaaspingna a namnama nga agbiag nga agnanayon iti Paraiso ditoy daga!
18, 19. (a) Apay a saanka koma a maamak a mangipaay iti bagim ken Jehova? (b) Apay nga agbalin a nasaysayaat ti biagmo no agserbika ken Jehova?
18 Ap-apresiarem kadi ti inaramiden ni Jehova kenka? Umiso ngarud nga idedikarmo ti biagmo ken Jehova ken agpabautisarka. Laglagipem a ti dedikasion ket maysa a napasnek a kari ken Jehova nga aramidem ti pagayatanna iti agnanayon, aniaman ti mapasamak. Maamakka kadi a mangaramid iti dayta? Saan! Laglagipem a kayat ni Jehova ti kasayaatan para kenka, ken isu ti “mananggunggona kadagidiay sipapasnek a mangsapsapul kenkuana.” (Heb. 11:6) Ti panangidedikarmo iti bagim ken Jehova ken panagpabautisarmo saanna a pagbalinen a narigat ti biagmo. Imbes ketdi, nasaysayaat ti biagmo no agserbika ken Jehova. Kuna ti maysa a kabsat a lalaki nga agtawen iti 24 a nagbautisar sakbay a nagbalin a tin-edyer: “Naun-uneg koma pay ti pannakaawatko no natataenganak idi indedikarko ti biagko ken Jehova, ngem gapu iti dayta a desisionko, nasalaknibanak iti nailubongan nga ar-aramid.”
19 Talaga a naiduma ni Jehova ken ni Satanas, nga inaagum laeng ti kayatna para kenka! Saannaka a maipaayan ni Satanas iti agpaut a gunggona. Ken kasano koma a makaipaay? Awan a pulos ti naimbag a damag a pampanunoten ni Satanas, awan ti naraniag a namnama a maipaayna. Kasano a maipaayannaka iti banag nga awan kenkuana? Awan ti aniaman a maipaay ni Satanas no di ti nakalkaldaang a masakbayan, kas iti agur-uray kenkuana a masakbayan!—Apoc. 20:10.
20. Ania ti mabalin nga aramiden ti maysa nga agtutubo tapno rumang-ay agingga nga agdedikar ken agpabautisar? (Kitaen met ti kahon a “Dagiti Makatulong Tapno Rumang-ayka iti Naespirituan.”)
20 Nalawag a ti panangidedikar iti biagmo ken Jehova ti umiso nga aramidem. Nakasaganaka kadin a mangaramid iti dayta? No kasta, saanka koma ngarud nga agkedked. Ngem no masapul nga agsaganaka pay, usarem dagiti singasing iti daytoy nga artikulo tapno agtultuloyka a rumang-ay. Insurat ni Pablo kadagiti taga-Filipos: “Aniaman ti nagtengantayon a panagrang-ay, agtultuloytayo koma a magna a siuurnos iti daytoy met laeng a rutina.” (Fil. 3:16) No surotem dayta a balakad, inton agangay, kayatmonton nga idedikar ti biagmo ken Jehova ken agpabautisar.