KAPITULO 37

Masapul Kadi nga Agpabautisarak?

Markaam dagiti sumaganad iti umiso wenno di umiso:

Ti bautismo ket maikalikagum kadagiti Kristiano.

□ Umiso

□ Di Umiso

Ti kangrunaan a panggep ti bautismo ket tapno saanka a matnag iti basol.

□ Umiso

□ Di Umiso

Ti bautismo pagbalinenna a posible ti pannakaisalakanmo.

□ Umiso

□ Di Umiso

No saanka a bautisado, awan ti sungsungbatam iti Dios aniaman ti aramidem.

□ Umiso

□ Di Umiso

No agpabautisaren dagiti gagayyemmo, kayatna a sawen a nakasaganaka metten nga agpabautisar.

□ Umiso

□ Di Umiso

NO AN-ANNUROTEMON dagiti pagalagadan ti Dios, patpatanoremon ti relasionmo kenkuana, ken isarsaritamon ti maipapan iti pammatim, natural laeng a pampanunotem metten ti maipapan iti bautismo. Ngem kasano a maammuam no nakasaganakan nga agpabautisar? Tapno masungbatan dayta a saludsod, usigentayo dagiti nadakamat nga umiso-wenno-di umiso a sasao.

● Ti bautismo ket maikalikagum kadagiti Kristiano.

Umiso. Imbilin ni Jesus a masapul a mabautisaran dagiti adalanna. (Mateo 28:19, 20) Kinapudnona, ni Jesus a mismo ket nagpabautisar. Tapno masurotmo ni Kristo, masapul a mabautisaranka no kabaelamon ti mangaramid iti kasta a desision ken talaga a kayatmo ti agpabautisar.

● Ti kangrunaan a panggep ti bautismo ket tapno saanka a matnag iti basol.

Di Umiso. Ti bautismo ipaduyakyakna iti publiko a nagdedikarkan ken Jehova. Ti dedikasion ket saan a basta katulagan a manglapped kenka nga agaramid iti bambanag a sililimed a tartarigagayam. Imbes ketdi, idedikarmo ti biagmo ken Jehova gapu ta kayatmo nga annuroten dagiti pagalagadanna.

● Ti bautismo pagbalinenna a posible ti pannakaisalakanmo.

Umiso. Kuna ti Biblia a ti bautismo ket nagpateg nga addang iti pannakaisalakan. (1 Pedro 3:21) Nupay kasta, saanna a kayat a sawen a kasla insurance daytoy a gatangem kas proteksionmo no adda didigra. Agpabautisarka gapu ta ay-ayatem ni Jehova ken kayatmo ti agserbi kenkuana nga agnanayon buyogen ti intero a pusom.​—Marcos 12:29, 30.

● No saanka a bautisado, awan ti sungsungbatam iti Dios aniaman ti aramidem.

Di Umiso. Kuna ti Santiago 4:17: “No ti maysa ammona ti agaramid iti umiso ket kaskasdi a saanna nga aramiden dayta, basol dayta kenkuana”​— bautisado man wenno saan. No ngarud ammomon ti umiso ken adda nakemmon a mangusig a naimbag iti kabibiagmo, nalabit itan ti tiempo a makisaritaka iti dadakkelmo wenno iti maysa a nataengan a Kristiano. Iti kasta, maammuam no ania dagiti aramidem tapno makakualipikarka para iti bautismo.

● No agpabautisaren dagiti gagayyemmo, kayatna a sawen a nakasaganaka metten nga agpabautisar.

Di Umiso. Ti desisionmo nga agpabautisar ket masapul nga agubbog iti pusom. (Salmo 110:3) Sakanto laeng agpabautisar no naan-anayen a maawatam ti kaipapanan ti panagbalin a maysa kadagiti Saksi ni Jehova ken no nakasaganakan a mangibaklay iti dayta a responsabilidad.​—Eclesiastes 5:4, 5.

Ti Addang a Mamagbalbaliw iti Biagmo

Ti panagpabautisar ket maysa nga addang a mangiturong iti adu a bendision. Ngem kakuykuyog dayta ti serioso a responsabilidad nga agbiagka a maitunos iti dedikasionmo ken Jehova.

Nakasaganaka kadin a mangidedikar iti biagmo? No wen ti sungbatmo, adda naimbag a rason nga agragsakka. Agur-uray kenka ti kasasayaatan a pribilehio​—ti pribilehio nga agserbi ken Jehova iti amin a pusom ken agbiag iti wagas a mangipakita a pudno a dedikadoka kenkuana.​—Mateo 22:36, 37.

KANGRUNAAN A TEKSTO

“Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason.”​—Roma 12:1.

BALAKAD

Agpatulongka kadagiti dadakkelmo a sumapul iti kabsat iti kongregasionyo a makatulong kenka a rumang-ay iti naespirituan.​—Aramid 16:1-3.

AMMOM KADI . . . ?

Ti panagpabautisar ket paset ti “marka” a pakailasinan dagiti maisalakan.​—Ezequiel 9:4-6.

DAGITI ARAMIDEK!

Tapno rumang-ay ken makakualipikarak iti bautismo, paunegek ti pannakaawatko kadagiti sumaganad a sursuro ti Biblia: ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Apay a serioso nga addang ti panagpabautisar?

● Apay a mabalin a nasapa unay nga agpabautisar ti maysa nga agtutubo?

● Ania ti mabalin a makagapu a di nainsiriban a bumdeng ti maysa nga agtutubo nga agdedikar ken agpabautisar?

[Blurb iti panid 306]

“Ti panangpampanunotko a bautisadoakon ket nakatulong kaniak a nangaramid kadagiti nainsiriban a desision ken nangliklik kadagiti aramid a nalabit nangisagmak koma kaniak.”​—Holly

[Kahon/Ladawan iti panid 307]

Dagiti Masansan a Maisaludsod Maipapan iti Bautismo

Ania ti isimbolo ti bautismo? Ti pannakaitaneb ken irurukuas iti danum kaipapananna a nataykan iti dati nga agimbubukod a kabibiagmo ket napagungarka tapno aramidem ti pagayatan ni Jehova.

Ania ti kaipapanan ti panangidedikar iti biagmo ken Jehova? Kaipapananna a tallikudamon ti bagim ket ikarim nga ipangpangrunam ti panagaramid iti pagayatan ti Dios. (Mateo 16:24) Maiparbeng nga umadanika ken Jehova babaen ti kararag tapno pormal nga idedikarmo ti biagmo kenkuana sakbay nga agpabautisarka.

Ania koma ti ar-aramidem iti biagmo sakbay ti panagpabautisarmo? Agbibiagka koman a maitunos iti Sao ti Dios ken isarsaritamon iti sabsabali ti maipapan iti pammatim. Patpatanorem koman ti pannakigayyemmo iti Dios babaen ti kararag ken panagadal iti Saona. Agserserbika koman ken Jehova gapu ta dayta ti kayatmo nga aramiden​—saan ket a gapu ta pilpilitendaka dagiti sabsabali.

Adda kadi masnup nga edad a masapul nga agpabautisarka? Saan a ti edad ti kangrunaan nga ikabilangan. Mabalinmon ti agpabautisar uray no naganus pay laeng ti tawenmo no la ket ta natangkenanen ti isipmo ken maawatamon ti kaipapanan ti dedikasion.

No ngay kayatmon ti agpabautisar ngem kuna dagiti dadakkelmo nga agurayka pay biit? Mabalin a kayatda nga agmataenganka pay iti naespirituan. Tagipatgem ti balakadda ken usarem dayta a gundaway a mangpauneg iti relasionmo ken Jehova.​—1 Samuel 2:26.

[Kahon/Ladawan iti panid 308, 309]

Worksheet

Pampanunotem Kadin ti Agpabautisar?

Kitaem ti panagrang-aymo babaen ti panangusigmo kadagiti sumaganad a saludsod ken sasao. Basaem nga umuna dagiti naisitar a teksto sakbay nga isuratmo ti sungbatmo.

Kadagiti ania a wagas nga ipakpakitam iti agdama ti panagtalekmo ken Jehova?​—Salmo 71:5. ․․․․․

Kasanom a maiparparangarang a nasanay ti pannakaawatmo a mangilasin iti umiso ken di umiso?​—Hebreo 5:14. ․․․․․

Kasano kasansan nga agkarkararagka? ․․․․․

Kasano kaespesipiko dagiti kararagmo, ken ania ti ipasimudaagda no maipapan iti panagayatmo ken Jehova?​—Salmo 17:6. ․․․․․

Ilistam dagiti kalatmo a mainaig kadagiti kararagmo. ․․․․․

Kasano karegular ti personal a panagadalmo iti Biblia?​—Josue 1:8. ․․․․․

Ania dagiti karaman iti personal a panagadalmo? ․․․․․

Ilistam dagiti kalatmo a mainaig iti personal a panagadalmo. ․․․․․

Epektiboka kadi iti ministerio? (Kas pagarigan: Mailawlawagmo kadin kadagiti sabsabali dagiti pamunganayan a sursuro ti Biblia? Subsub- lianam kadi dagiti interesado? Ikagkagumaam kadi ti maaddaan iti iyadalan iti Biblia?)

□ Wen □ Saan

Mangasabaka kadi uray no saan a mangasaba dagiti dadakkelmo?​—Aramid 5:42.

□ Wen □ Saan

Ilistam dagiti kalatmo a mainaig iti ministerio.​—2 Timoteo 2:15. ․․․․․

Ti kadi pannakigimongmo ket regular wenno sagpaminsan laeng?​—Hebreo 10:25. ․․․․․

Kadagiti ania a wagas a makipaspasetka kadagiti gimong? ․․․․․

Makigimongka kadi uray no awan dagiti dadakkelmo (no palubosandaka)?

□ Wen □ Saan

Maikunam kadi a talaga a pagragsakam ti panagaramid iti pagayatan ti Dios?​—Salmo 40:8.

□ Wen □ Saan

Adda kadi dagiti espesipiko a pasamak a naparmekmo ti panangpilit wenno panangimpluensia kenka dagiti kapatadam?​—Roma 12:2. ․․․․․

Kasanom a mapagtalinaed a nasged ti ayatmo ken Jehova?​—Judas 20, 21. ․․․․․

Agserbika kadi ken Jehova uray no sumardeng nga agserbi dagi- ti gagayyem ken dadakkelmo?​—Mateo 10:36, 37.

□ Wen □ Saan

[Ladawan iti panid 310]

Kas iti panagasawa, ti bautismo ket maysa nga addang a mamagbalbaliw iti biag​—a di rumbeng a tagtagilag-anen