Ti Biblia​—Naisalsalumina a Libro

Naawagan a kaaduan-kopia a nailako iti intero a lubong, ket maikanatad a kasta. Ti Biblia mabasbasa ken maipatpateg nga ad-adda ngem ti uray ania a sabali a libro. Iti agdama, mapattapatta nga uppat a bilion a kopia ti naiwarasen (kompleto wenno pasetna laeng) iti nasurok a 2,000 a lenguahe.

Ad-adda pay a makapainteres ngem ti pannakaiwaras ti Biblia, nupay kasta, isu ti panangakona a nadiosan ti gubuayanna. “Amin a Kasuratan impaltiing ti Dios,” insurat ni Kristiano nga apostol Pablo. (2 Timoteo 3:16) Ania ti kaipapanan daytoy? Ti sasao nga “impaltiing ti Dios” (Griego, the·oʹpneu·stos) literal a kaipapananna “inangsan ti Dios.” Ti nainaig a Griego a sao, a pneuʹma, kaipapananna ti “espiritu.” No kasta, akuenna a ti nasantuan nga espiritu ti Dios tinignayna ti tattao a mannurat, nga inangsanna ida, no ar-arigen, tapno ti resultana pudpudno a maawagan Sao ti Dios, saan ket nga iti tao. Wen, adu a mangad-adal iti Biblia ti nasdaaw iti sapasap a panagtutunosna, ti kinaapaghustona no iti siensia, ti kinapudno ken kinaprangka dagiti mannurat, ket kangrunaanna, dagiti natungpal a padtona​—amin dagita kinombinsirda dagiti minilion a nasaririt a managbasa a daytoy a libro naggapu iti gubuayan a nangatngato ngem ti tao.a

Ngem kasano ti kasinged ti panangiwanwan ti Dios iti pannakaisurat ti Biblia? Adda dagiti agkuna nga indiktarna ti Biblia a sao por sao. Kuna ti dadduma nga impaltiingna laeng dagiti kapanunotan a masarakan iti Biblia, saan ket a ti sasaona. Kinapudnona, nupay kasta, ti pammaltiing saan a malimitaran iti maymaysa a metodo, ta ti Dios nagsao “kadagiti ammatayo iti adu a pamay-an babaen kadagiti mammadto.” (Hebreo 1:1; idiligyo ti 1 Corinto 12:6.) Iti sumaruno nga artikulo, sukimatentayo dagiti wagas a panagsao ti Dios iti agarup 40 a tattao a nangisurat iti Biblia.

[Footnote]