Kasanotay a Subadan ni Jehova?
NO ADDA asinoman a mangala ti pudpudno, naayat a panaginteres kadatayo, nalabit mangaramid ti maysa a banag a pagsayaatantayo, kasanot’ panagriknatayo? Masansan a ti kinamanangaasi ken kinamanagparabur ti mamagtignay, saan kadi? Ania, ngarud ita, ti rikriknatayo iti Diostayo, a ni Jehova, kadagiti agnanayon a naayat a kinamanangaasina kadatayo?
Nakalaklaka, gaput’ panaggangganattayo kadagiti inaldaw-aldaw a pakarigatan ti biag, a laglag-anen laeng dagiti kinaimbag ni Jehova, a no maminsan agtigtignaytayo a kasla saantay a pudpudno a siiyaman. Ngarud, nasayaat no, agsardeng ken panunotentayo ti saludsod ti salmista: “Ania ti itdekto ken Jehova a subad dagiti paraburna kaniak?” (Salmo 116:12) Kadagiti ania a pamay-an a makasubadtayo?
Dagiti Gunggona Manipud ken Jehova
No awan ti sagut ni Jehova a Saona nga isu ti Biblia, anian ti pannakaiyaw-awantay koma! Dagiti maingel a lallaki ken babbai kadagiti naglabas a siglo ti nangipusta ti bibiagda tapno makaikut ken mabasada daytoy a libro, ket maawatantayon no apay. Dagiti tattao ti Dios kankanayon a siyayamanda iti naipaltiing a Kasuratan, ta pagaammoda a dayta ti makagunggona “a pakasursuruan, pakatinggaran, pakababalawan, ken pakaadalan iti kinalinteg.”—2 Timoteo 3:16.
Ammotayo, nupay kasta, a tapno “masursuruan a naimbag iti isuamin nga aramid a nasayaat,” kasapulantayo ti ad-adda pay ngem basta pannakaammo iti Biblia. (2 Timoteo 3:17) Babaen iti pannakabalin ti nasantuan nga espiritu ti Dios a maiyeg ti gunggona iti biagtayo, ket daytoy a kinapudno ti maiyeg iti atensiontayo babaen kadagiti makaallukoy a sasao ni Jehova babaen ken Isaias a mammadtona: “Ket ita ni Soberano nga Apo Jehova imbaonnak, ken ti espirituna. Kastoy ti kuna ni Jehova, ti Mannubbotmo, ti Santo ti Israel: ‘Siak ni Jehova a Diosmo, Daydiay mangisuro kenka a maipaay iti gunggonam, a mangiturong kenka iti dalan a papanam koma. O no dinengngegmo koma dagiti bilbilinko! Iti kasta ti talnam kas koma iti maysa a karayan, ken ti kinalintegmo kasla koma daldalluyon ti baybay.’” (Isaias 48:16-18) Babaen iti nasantuan nga espirituna, a katulongan ti Saona, iturturongnatayo ni Jehova iti makagunggona kadatayo, ket ti bungana isu ti talna ken kinalinteg.
Mainayon pay, ti aktibo a puersa ni Jehova ti agtigtignay a siepektibo a pakagunggonaantayo gapu ta naipasdeken ti maysa a sangal, maysa a naindagaan nga organisasion, nga isut’ pagan-andaran ti nasantuan nga espiritu. Idiay 1 Corinto kapitulo 12, inyasping ni Pablo ti kongregasion Kristiano iti maysa a bagi ket kunana idiay bersikulo 7: “Ngem maited iti tunggal maysa ti pannakaiparangarang ti espiritu a maipaay a paglaingan.” Sana intuloy nga impakita no kasanotay a magunggonaan manipud panagbalin a paset ti naindagaan nga organisasion ti Dios.
Kalpasan ti agarup lima a tawen a panangisuratna kadagidiay a sasao, insuratna ti suratna iti kongregasion idiay Efeso a pinadakkelna dagiti gunggona iti pannakaikonekta iti dayta a naindagaan nga urnos. Nupay ti kinunana ket immuna a nagaplikar kadagiti napulotan a Kristiano, saan aya nga uray met dagidiay adda iti “dakkel a bunggoy” itatta ti ‘napalinteg maipaay iti ministerial a trabaho,’ nga agbalinda a ‘lallaki a natataengan’ iti naespirituan, natibker iti pammati, a ‘di agub-ubinganen,’ ken ‘buyogen ni ayat ket rumang-ayda koma kadagiti isuamin ken Kristo, isu nga ulo’? (Apocalipsis 7:9; Efeso 4:12-16) Addaantay amin ti naimbag a panggapuan nga agyaman.
Nailasin a kadua ti kongregasion Kristiano isu ti matalek ken naannad nga adipen, a ti trabahona, a panangpakan kadatayo iti naespirituan, ket maysa pay a pammaneknek a ni Jehova ti manggunggona kadatayo. (Mateo 24:45, 46) Itan addatay ditoyen iti naipadto a panawen a kaadda ti Apo. Ar-aramiden kadi ti “adipen” ti trabahona? Agpapan pay kinaladingit dagitoy “maudi nga al-aldaw,” napnotay aya ti inanama? Addaantay aya ti maikari a panggep iti biag? (2 Timoteo 3:1-5; Roma 5:5; 1 Timoteo 4:10) Wen! Ket ti namnamatayo ti saan a pagpangpangaduaan no di ket maysa a sigurado a rikna a naibangon iti pammati, a dayta met ti naipasdek iti natibker nga ebidensia.—Hebreo 11:1.
Nalawag, ngarud, a ni Jehova, ti Naindaklan a Mananggunggonatayo, ti nangted adu unay kadatayo a rebbeng a pagyamanan. Ti nainkalintegan a saludsod isut’ sumaganad:
Aniat’ Isubadko ken ni Jehova?
Umuna, masapul a bigbigentayo a ni Jehova awan aniaman a kasapulanna kadatayo. Isu daydiay nagkuna, “Ti pirak kukuak, ti balitok kukuak,” kasta met “dagiti arban iti tapaw dagiti rinibo a turturod.” (Haggeo 2:8; Salmo 50:10; Job 41:11) Kaipapanan daytoy a nikaanoman ditay mabalin a “gatangen” ti pabor ni Jehova; kaskasdi maparparegtatayo a mangaramid kadagiti boluntario a panagdaton kenkuana. (Idiligyo ti 1 Cronicas 29:14.) Ngem, adda met dagiti sumagmamano a kondision, ti pannakapalubostayo a mangidaton ti sagsagut ken ni Jehova.
“Ania ti itugotkonto iti saklang ni Jehova? Ket ania ti pagruknoyak iti saklang ti nangato a Dios? Umayak koma aya iti sanguananna agraman datdaton a mapuoran ken ur-urbon a baka nga agtawen iti maysa? Maay-ayonto aya ni Jehova kadagiti rinibo a karkarnero a lallaki, wenno iti sangapulo ribo a karkarayan a lana? Itedkonto aya ti inaunak nga anak gapu iti salungasingko, ti bunga ti bagik gapu iti basol ti kararuak? Imparangna kenka, O naindagaan a tao, daydiay naimbag. Ket ania aya ti iparebbeng ni Jehova kenka, no di laeng ti agaramid a sililinteg ken iti kinamanangngaasi ken pannagna a sipapakumbaba iti Diosmo?”—Mikias 6:6-8.
Naadaltayo manipud iti daytoy a dagiti pagannurotan ni Jehova ket kanayon a nainkalintegan, kanayon a maragpatda. Mainayon pay, intudo ni Jesus dagiti pagannurotan a ti pannakirelasiontayo agpadpada ken Jehova ken iti padatayo a tao ti masapul nga umiso tapno makaay-ayo ti datdatontayo. (Mateo 5:23, 24) Gapu ta inwayatnan ti umiso a pagibatayan, makitatay itan nga amintayo addantay amin ti maited ken Jehova, kas panangapresiar iti kinaimbagna kadatayo.
Kasanotay a Mausar ti Adda Kadatayo?
Kasapulanna ti tiempo, pigsa, ken bassit met a kuarta, ngem anian a pribilehio ti panangirepresentar ken ni Jehova iti pangasabaan! Daytoy a daton ti panagdayaw ket banag a maitedtayo amin ken Jehova. Kastoy ti panagrikna ti maysa a payunir a panglakayen, nga addaan tallo a babassit nga annak maipapan iti dayta:
“Ti pannakiraman iti pribilehio ti amin-tiempo a serbisio ti maikari iti aniaman a personal a panagsakripisio—ken ad-adda pay—agsipud ta isu daytat’ kaepektibuan a pamay-an a pammadayaw iti nailangitan nga Amatayo. Kasta met, tinulongannak iti kalalainganna a pamay-an a pagyamanan ti di kaikarian a kinamanangaasina a personal kaniak.”
Innayon ni baketna: “Pudno a maysa a pribilehio a tulongan ni lakayko nga agpayunir. Daytat’ tumultulong ti intero a pamilia a maaddaan ti dakdakkel a pannakiraman iti ministerio, ken ti pannakakita ti naayat nga ima ni Jehova a mangipapaay kadakami iti naespirituan ken namaterialan a pamay-an ti mangtignay kadakami nga ad-adda pay a mangidaydayaw kenkuana.”
Ti Watch Tower Society ket nagiwarwarasen ti Biblia ken kadagiti literatura ti Biblia iti boluntario a pamay-an iti nasurok a sangagasut a tawenen ken nangimalmaldit kadagitoy kadagiti bukodna a prensa nanipud pay 1920. Ti panawen ken pigsa dagiti boluntario nga agtartrabaho idiay Bethel a mangar-aramid kadagiti amin a publikasion nga adda kadatayo itatta, agraman dagidiay iwarwaras dagiti agibumbunannag ti kongregasion ken dagiti payunir, ti nagbalin, iti kaiyariganna, a kanayonan a donasion iti nagpateg a trabaho a panangaskasaba.—Mateo 24:14.
Kasta met, dagiti Kristiano kadagiti nasaysayaat ti kasasaad ti panagbiagda a pagpagilian maragsakanda a makaammo a dagiti naayat a sagsagutda a kuarta, a maipatpatulod iti sanga nga opisina ti Watch Tower Society iti pagilianda, ti makatultulong kadagiti adu kadagiti kakabsatda iti dadduma a paset ti lubong a mangbusbos ti amin a tiempoda iti panangasaba ken panagaramid ti adalan. Dagiti misionero manipud ti Watchtower Bible School of Gilead, dagiti manangaywan ti sirkito ken distrito, ken dagiti espesial payunir ket matultulonganda amin a mangitultuloy ti amin-tiempo a serbisioda babaen kadagitoy boluntario a kontribusion.
Nalabit imposible ti pannakapagserbiyo idiay Bethel wenno kas miembro ti International Volunteer Construction Worker Program. Ngem mabalin nga addaankay pundo a makasuportar kadagidiay makiramraman iti daytoy a trabaho ngem agkurang iti “surplus” a pundo tapno makapagtultuloyda iti dayta. Ti makatulong a panagpapada ngarud ti mabalin a maaramid, kas nadeskribir idiay 2 Corinto 8:14. Dagiti sursurat a naipakuyog kadagita a donasion ti nangiraman iti sumaganad manipud maysa a bumaketen a kabsat a nagsurat:
“Agyamyamanak unay kadagiti amin a bendision nga ipapaay ni Jehova kaniak, ket ikarkararagko a kankanayon dagiti proyekto ti panagbangbangon ken ti organisasion.”
Sabali pay a kabsat a babai ti nagkuna: “Adadda a kaykayatko a daytoy bassit a kantidad ti makaaramid ti bassit a pagimbagan a nateokratikuan ngem ti agtalinaed idiay banko a di agbayag marpuogen!”
Maysa a kabsat a lalaki ti nangiyebkas ti bagina kadagitoy a sasao: “Ti panangbalbalakad ni Jehova kadatayo a mangusar ti sansanikuatayo a mangidaydayaw kenkuana ket maysa a pamay-an ti pudpudno a salaknib manipud naagum a komersio, ti ‘maikatlo a seksion’ ti dakes a sistema ti bambanag ni Satanas. Palubosandak a mangala iti daytoy a gundaway a mangiyebkas ti ragsakko a mangitultulong ti bassit iti panangpadaras iti panagrang-ay nga ipapaay ni Jehova kadatayo, ket isut’ pagyamanak iti panamagbalinna a posible a mangusar kaniak.”
Sagsagut Manipud Natataengan ken Agtutubo
Makaparegta met a mabasa ti matalek a determinasion dagiti natataenganen a, nupay mangnamnamada a makalasat a sibibiag agingga iti panungpalan daytoy a sistema, sigsiguraduenda, a babaen ti panangaramidda kadagiti maiyanatop a testamento, ti trabaho ti Pagarian ti magunggonaan inkaso ti ipapatayda. Ti sumagmamano a panangiyebkas a naaw-awaten manipud kadagiti nagaramid, a mangkomkomento iti nagsayaat a kababalin dagita a nagaramid ti testamento, ramanenna ti:
“Maysa a naasi a tao iti isuamin, iti intero a panagbiagna. . . inay-ayatna ni Jehova ken ti sangaparsuaanna.”
“Kanayon, a dagiti intereses ti Pagarianna ti umuna a pakaseknanna.”
“Naragpatnan ti nailangitan a gunggonana kalpasan ti 70 a tawen a matalek a serbisio. . . tartarigagayanna a kanayon nga iyadelantar ti kinapudno babaen iti sansanikuana.”
Makangkangngegtayo met manipud kadagiti agtutubo, a sipipinget a mangusar kadagiti material a bambanagda iti trabaho ni Jehova. Maysa a surat a naawat idiay opisina ti Sosiedad sadi Britania ti naggaput’ maysa nga ages-eskuela pay laeng nga agibumbunannag. Insalaysay ti balasitang nga isut’ nangabak ti first prize iti salip ti panagsurat. Impatulodna ti intero a premiona a kuarta. Dagiti publikasion ti Sosiedad ti gubuayan ti insuratna a salaysay maipapan iti “Nakristianuan a Panagkari,” gapuna patienna a ti kuarta ti nainkalintegan a kukua ni Jehova.
Kalpasan ti panangsaludsodna no aniat’ isubadna ken Jehova, ti mannurat ti Salmo 116 ti nangitultuloy idiay bersikulo 13 ken 14 a nagkuna: “Alaekto ti kopa ti pannakaisalakan, ken awagakto ti nagan ni Jehova. Bayadakto dagiti karkarik ken Jehova, wen, iti sanguanan ti amin nga ilina.” Ti panangapresiar iti nagsudi a sagut ti pannakaisalakan manipud ken Jehova babaen iti Anakna, matignatayo, kas met laeng ti salmista, nga umawag Kenkuana ken mangsalimetmet ti karkaritayo Kenkuana.
Nagdakkel ti pananggunggona ni Jehova kadatayo, ket aniaman a maaramidantayo kas pannupapak ti nagbassitan no idildilig. Ngarud, anian a maiyanatup, a kas ebkas ti panagyaman, aramidentay ti amin a kabaelantayo, iti tunggal pamay-an! “Isagutkonto kenka ti daton a pagyaman, ket umawagakto iti nagan ni Jehova.”—Salmo 116:17.
[Kahon iti panid 26]
NO KASANOT’ PANANGTULONG TI DADDUMA ITI TRABAHO TI PAGARIAN
◻ SAGSAGUT: Dagiti boluntario a donasion a kuarta ti mabalin a maipatulod a direkta iti Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad. Ti sanikua kas ti daga wenno balay, agraman alahas wenno dadduma pay a napapateg, ti mabalin a maidonar. Ti ababa a surat nga agkunkuna a dayta ket direkta a donasion ti rebbeng a maipakuyog kadagitoy a kontribusion.
◻ URNOS TI KONDISIONAL A DONASION: Mabalin a maited ti kuarta iti Watch Tower Society a maitalek kadakuada, nga adda probision a no kasapulanen a personal, daytat’ maisubli iti nangisagut.
◻ INSURANCE: Mabalin a mainagan ti Watch Tower Society kas beneficiary iti life-insurance policy wenno iti plano ti panagretiro wenno panagpension. Masapul a mapakaammuan ti Sosiedad kadagiti kasta nga urnos.
◻ TRUSTS: Dagiti savings accounts iti banko ti mabalin a maitalek para iti Sosiedad. No maaramidan daytoy, pangngaasiyo ta pakaammuanyo ti Sosiedad. Dagiti stocks, bonds, ken sansanikua ti mabalin met a maidonar iti sidong ti urnos tapno magunggonaan ti nangisagut bayat ti panagbiagna pay. Daytoy a metodo ti mangikkat kadagiti gastos ken panagpangpangadua ti panangpaneknek ti testamento, bayat nga ipaspasigurona met a ti Sosiedad awatenna ti sanikua inkaso ti ipapatay.
◻ DAGITI TESTAMENTO: Ti sanikua wenno kuarta ti mabalin a maipatawid iti Watch Tower Society babaen iti legal pannakaaramidna a testamento. Maipatulod ti maysa a kopia iti Sosiedad. Maipaay iti kanayonan nga impormasion ken pammatigmaan iti kakasta a banag, agsuratkayo iti Opisina ti Tesorero, Watch Tower Bible and Tract Society of Pennsylvania, 25 Columbia Heights, Brooklyn, New York 11201, wenno iti lokal a sanga nga opisina ti Sosiedad.