PANNAKAIPARANGARANG
Pannakaipanayag, wenno makita a pammaneknek, pannakaiparang ti autoridad wenno pannakabalin. Ti Griego a termino nga e·pi·phaʹnei·a, a naipatarus a “pannakaiparangarang,” ket naaramat iti Kasuratan kas tumukoy iti al-aldaw a kaadda ni Jesu-Kristo ditoy daga ken nangnangruna maipapan iti nadumaduma a pasamak bayat ti kaaddana kas agturturayen nga ari.
Ti Anak ti Dios Naiparangarang iti Lasag. Ti sasao iti 2 Timoteo 1:9-11 ket insurat ni apostol Pablo maipapan iti “pannakaiparangarang [iti lasag] ti Manangisalakantayo, ni Kristo Jesus.” Naibaon ti Anak ti Dios manipud langit agpaay iti pannakaalangon ti kinasoberano ni Jehova. Agresulta met daytoy iti ‘pannakaikkat ti ipapatay’ a nagtaud ken Adan ken pannakaited ti namnama a biag ken di panagrupsa idiay langit agpaay iti sumagmamano a tattao. Kas paset ti in-inut a pannakaipalgak ti “sagrado a palimed daytoy nadiosan a debosion,” “naiparangarang [ni Jesus] iti lasag.” (1Ti 3:16) Daytoy a panangibaon ti Dios iti Anakna ket inawagan met ni Pablo kas ‘panangiparangarang’ ti Dios iti di kaikarian a kinamanangngaasina a “mangyeg iti pannakaisalakan iti amin a kita ti tattao . . . , nga isursuronatayo a tallikudan ti di kinanadiosan ken nailubongan a tartarigagay ken agbiag a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag, bayat nga urayentayo ti naragsak a namnama ken nadayag a pannakaiparangarang ti naindaklan a Dios ken ti Manangisalakantayo, ni Kristo Jesus.” (Tit 2:11-13) Inton maiparangarangen ti dayag ni Kristo, maiparangarang met ti dayag ti Dios a nangibaon kenkuana.
Maiparangarang ni Kristo iti Nailangitan a Dayag. Bayat ti kaadda ni Kristo, iturongna ti atensionna iti naespirituan a kakabsatna a matmaturog ken patay. Isuda dagidiay dakdakamaten ni Pablo, a pakairamananna a mismo, a ‘nagayat iti pannakaiparangarang’ ni Kristo ken umawat iti ‘korona ti kinalinteg kas maysa a gunggona.’ (2Ti 4:8) Inton ‘bumaba ti Apo manipud langit buyogen ti agbilbilin nga awag, buyogen ti timek ti maysa nga arkanghel ken buyogen ti trumpeta ti Dios,’ dagiti natay a naikaykaysa ken Kristo bumangonda nga umuna, ket awaten ida ni Kristo iti taengna. Iti kastoy a pamay-an, ti dayagna maiparangarang kadakuada buyogen iti kasta unay a pannakabalin. Kalpasan dayta, iparangarangna ti kaaddana kadagiti kakabsatna nga adda pay laeng ditoy daga, ket alaenna ida iti taengna apaman a matayda.—1Te 4:15, 16; Jn 14:3; Apo 14:13.
Kas Ari ken Ukom. Idi adda ni Kristo iti sanguanan ni Poncio Pilato, kinunana a ti Pagarianna saan a paset daytoy a lubong, nupay saanna nga inlibak nga isu maysa nga ari. (Jn 18:36, 37) Saanna idi nga imparangarang ti bagina kas mannakabalin nga agturay, agsipud ta saan pay a dimteng ti tiempo a panangalana iti autoridadna iti Pagarian. Nupay kasta, dumtengto ti tiempo a silalawag a mabigbig ti “pannakaiparangarang ni Apotayo a Jesu-Kristo,” inton aramatenna ti autoridadna kas “naragsak ken maymaysa a Mannakabalin nga Agturay” ken “Ari dagidiay agturay kas ar-ari ken Apo dagidiay agturay kas ap-appo.”—1Ti 6:13-16; Da 2:44; 7:13, 14.
Maipapan iti dumteng a Pagarian ken pannakaiparangarang ni Kristo, kinuna ni Pablo ken Timoteo: “Sipapasnek a bilinenka iti imatang ti Dios ken ni Kristo Jesus, a naikeddeng a mangukom kadagiti sibibiag ken kadagiti natay, ken babaen iti pannakaiparangarangna ken iti pagarianna, ikasabam ti sao.” (2Ti 4:1, 2) Tuktukoyen ngarud ti apostol ti tiempo inton ti nadayag a saad ni Kristo idiay langit ket silalawag a maiparangarang, inton ipakatna dagiti panangukom ti Dios ditoy daga.
Inton dadaelenna ti “tao ti kinakillo.” Idi nagsurat ni Pablo kadagiti Kristiano idiay Tesalonica “maipapan iti kaadda ni Apotayo a Jesu-Kristo,” indagadagna kadakuada a saanda koma a magunggon manipud kinasimbengda wenno madanagan iti aniaman a mensahe “a kasla ti aldaw ni Jehova dimtengen.” Ti simboliko a “tao ti kinakillo,” a sinigsiglon a bumusbusor iti Dios ken ni Kristo, ket mapukawton “babaen ti pannakaiparangarang ti kaaddana.” Daytoy a “nakillo” bigbigenna ti kaadda ni Kristo ngem saan a gapu iti pammati, kas panangbigbig dagiti Kristiano a nangayat iti pannakaiparangarangna, no di ket gapu iti pannakabalin ni Jesus a maiparangarang inton talipuposenna dagidiay kameng daytoy a ragup a “tao.”—2Te 2:1-8; kitaenyo ti TAO TI KINAKILLO.
Pannakaiparangarang ti Espiritu ken ti Kinapudno. Kalpasan a naiparukpok ti nasantuan nga espiritu kadagiti adalan ni Kristo, ti di makita a panagtignayna kadagitoy nga adalan ket ‘naiparangarang’ babaen kadagiti makita a pammaneknek. Ti sumagmamano kadagitoy ket: pannakabael nga agsao kadagiti ganggannaet a pagsasao, sagsagut ti panangpaimbag, ken panangilasin iti naipaltiing a sasao. (1Co 12:7-10) Dinakamat met ni apostol Pablo ti “panangiparangarang iti kinapudno” iti sabsabali babaen iti naimbag a kababalin ken panangasaba dagiti Kristiano.—2Co 4:2.