Itultuloyyo nga Annuroten ti Bambanag a Naadalyo

“Ti bambanag a naadalyo kasta met nga inawat ken nangngeg ken nakitayo mainaig kaniak, annurotenyo dagitoy; ket ti Dios ti talna addanto kadakayo.”​—FILIPOS 4:9.

1, 2. No iti kaaduan, adda kadi epekto ti Biblia iti biag dagiti tattao nga agkuna a relihiosoda? Ilawlawagyo.

“PUMIGPIGSA ti Relihion, Ngem Agrakrakaya ti Moralidad.” Daytoy a paulo iti pablaak nga Emerging Trends ginupgopna ti resulta ti maysa a surbey iti intero a pagilian ti Estados Unidos. Agparang a napaliiw dayta a pagilian ti iyaadu dagiti makimismisa ken ibagada a dakkel ti impluensia ti relihion iti biagda. Ngem kuna ti report: “Iti laksid dagitoy a nakaskasdaaw a bilang, adu nga Americano ti agduadua no adda epekto ti relihion iti biag dagiti indibidual ken iti kagimongan.”

² Saan la a maymaysa a pagilian ti addaan iti kasta a kasasaad. Iti intero a lubong, awan ti pudpudno nga epekto ti Kasuratan iti biag ti adu a tattao nga agkuna a relihiosoda ken bigbigenda ti Biblia. (2 Timoteo 3:5) “Nangato pay laeng ti panagraemtayo iti Biblia,” kinuna ti pangulo ti maysa a grupo dagiti managsirarak, “ngem no maipapan iti aktual a panangbusbos iti tiempo a mangbasa, mangadal ken mangyaplikar iti dayta​—paset laengen dayta ti napalabas.”

3. (a) Kasano nga apektaran ti Biblia dagiti nagbalin a pudno a Kristiano? (b) Kasano nga iyaplikar dagiti pasurot ni Jesus ti balakad ni Pablo a masarakan iti Filipos 4:9?

³ Ngem naiduma ti kasasaad dagiti pudno a Kristiano. Ti panangyaplikar iti balakad ti Sao ti Dios binalbaliwanna ti panagpampanunot ken konduktada. Ken nalaka a madlaw dagiti tattao ti baro a personalidad nga iparparangarangda. (Colosas 3:5-10) Kadagiti pasurot ni Jesus, ti Biblia ket saan a maysa a libro nga awan usarna a mataptapokan lattan iti estante. Iti kasumbangirna, kinuna ni apostol Pablo kadagiti Kristiano idiay Filipos: “Ti bambanag a naadalyo kasta met nga inawat ken nangngeg ken nakitayo mainaig kaniak, annurotenyo dagitoy; ket ti Dios ti talna addanto kadakayo.” (Filipos 4:9) Saan laeng a patien dagiti Kristiano ti kinapudno a masarakan iti Sao ti Dios. Agtignayda sigun iti ad-adalenda, nga itultuloyda nga iyaplikar ti balakad ti Biblia​—iti pamilia, pagtrabahuan, kongregasion, ken amin a benneg ti panagbiag.

4. Apay a karit ti panangannurot kadagiti linteg ti Dios?

⁴ Saan a nalaka nga annuroten dagiti linteg ken pagalagadan ti Dios. Agbibiagtayo iti lubong nga adda iti sidong ti pannakabalin ni Satanas a Diablo, ti inawagan ti Biblia a “dios daytoy a sistema ti bambanag.” (2 Corinto 4:4; 1 Juan 5:19) No kasta, nasken a nasiputtayo iti aniaman a manglapped iti panangsalimetmet iti kinatarnawtayo ken ni Jehova a Dios. Kasano a makapagtalinaedtayo a natarnaw?

Salimetmetan “ti Pagtuladan iti Makapasalun-at a Sasao”

5. Ania ti ipamatmat ti kinuna ni Jesus: “Agtultuloy a surotennak”?

⁵ Ti maysa nga aspeto ti panangannurot iti naadaltayo kalikagumanna ti panangitandudo iti pudno a panagdayaw, iti laksid ti ibubusor dagiti di manamati. Ti panagibtur kalikagumanna ti panagregget. “No ti asinoman kayatna ti sumurot kaniak,” kinuna ni Jesus, “paglikudanna koma ti bagina ket bagkatenna ti kayona a pagtutuokan ket agtultuloy a surotennak.” (Mateo 16:24) Saan a kinuna ni Jesus a sumurottayo kenkuana iti makalawas, makabulan, wenno makatawen laeng. Imbes ketdi, kinunana: “Agtultuloy a surotennak.” Dagita a sasaona ipamatmatda a ti panagbalintayo nga adalan ket saan nga agpaut iti sumagmamano laeng a tiempo iti biagtayo wenno maysa a debosion a bumaaw inton agangay. Ti nasungdo a panangitandudo iti pudno a panagdayaw kaipapananna a simamatalek nga agibturtayo iti kurso a pinilitayo, aniaman ti mapasamak. Kasanotayo a maaramidan dayta?

6. Ania a pagtuladan a makapasalun-at a sasao ti insuro ni Pablo kadagiti Kristiano idi umuna a siglo?

⁶ Indagadag ni Pablo iti katrabahuanna a ni Timoteo: “Itultuloymo a salimetmetan ti pagtuladan iti makapasalun-at a sasao a nangngegmo kaniak agraman ti pammati ken ayat a mainaig ken Kristo Jesus.” (2 Timoteo 1:13) Ania ti kayat a sawen ni Pablo? Ti Griego a sao a naipatarus ditoy a “pagtuladan” literal a tukoyenna ti drawing ti maysa nga artesano. Nupay saan unay a detalyado, nalawag ti pannakailanad dayta a drawing tapno agminar ti intero a ladawan iti asinoman a mangkita. Umasping iti dayta, ti pagtuladan a kinapudno nga insuro ni Pablo ken ni Timoteo ken kadagiti sabsabali ket saan a nairanta a mangted iti espesipiko a sungbat iti amin a posible a saludsod. Kaskasdi, dagita a sursuro ket mangipaay iti umdas a giya​—maysa a balabala no ar-arigen​—tapno dagiti napudno ti panagpuspusoda a tattao maawatanda no ania ti kalikaguman ni Jehova kadakuada. Siempre, tapno maay-ayo ti Dios, masapul a salimetmetanda dayta a pagtuladan a kinapudno babaen ti panangannurotda iti naadalda.

7. Kasano a masalimetmetan dagiti Kristiano ti pagtuladan a makapasalun-at a sasao?

⁷ Idi umuna a siglo, dagiti tattao a kas ken Himeneo, Alejandro, ken Fileto intandudoda dagiti kapanunotan a maikaniwas iti “pagtuladan iti makapasalun-at a sasao.” ((1 Timoteo 1:18-20; 2 Timoteo 2:16, 17) Kasano a dagiti nagkauna a Kristiano naliklikanda ti nagpaiwawa kadagiti apostata? Inadalda a naimbag dagiti naipaltiing a surat ken inyaplikarda dagita iti biagda. Dagidiay nangtulad iti ulidan ni Pablo ken dagiti dadduma a matalek a tattao nabaelanda nga inlasin ken inwaksi ti aniaman a banag a maikaniwas iti pagtuladan a kinapudno a naisuro kadakuada. (Filipos 3:17; Hebreo 5:14) Imbes nga agbalin a kas maysa nga ‘addaan iti sakit iti isip gapu kadagiti panagus-usisa ken panagdedebate maipapan iti sasao,’ intultuloyda a rimmang-ay iti umiso a dalan ti nadiosan a debosion. (1 Timoteo 6:3-6) Maaramidtayo met dayta no itultuloytayo nga annuroten dagiti kinapudno a naadaltayo. Anian a makapabileg iti pammati a makita dagiti minilion nga agserserbi ken Jehova iti intero a daga a sititibker a mangsalsalimetmet iti pagtuladan a kinapudno ti Biblia a naisuro kadakuada.​—1 Tesalonica 1:2-5.

Ilaksid Dagiti “Ulbod a Sarsarita”

8. (a) Kasano nga ikagkagumaan ni Satanas a dadaelen ti pammatitayo ita? (b) Ania a ballaag ni Pablo ti masarakan iti 2 Timoteo 4:3, 4?

⁸ Kayat a dadaelen ni Satanas ti kinatarnawtayo babaen ti panangimulana iti panagduadua kadagiti naisuro kadatayo. Kas idi umuna a siglo, dagiti apostata ken dadduma a tattao ita ikagkagumaanda a dadaelen ti pammati dagiti inosente. (Galacia 2:4; 5:7, 8) No dadduma, usarenda ti media a mangiwaras kadagiti ballikug nga impormasion wenno agdadata a kinaulbod maipapan iti aramid ken motibo ti ili ni Jehova. Namallaag ni Pablo nga adda dagidiay mapagbaw-ing manipud kinapudno. “Addanto las-ud ti tiempo,” insuratna, “a saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda; ket iyadayodanto dagiti lapayagda iti kinapudno, idinto ta maisiasidanto nga agturong iti ulbod a sarsarita.”​—2 Timoteo 4:3, 4.

9. Ania ti nalabit pampanunoten ni Pablo idi dinakamatna ti “ulbod a sarsarita”?

⁹ Imbes a salimetmetanda ti pagtuladan a makapasalun-at a sasao, dadduma ti naguyugoy kadagiti “ulbod a sarsarita.” Ania dagitoy nga ulbod a sarsarita? Nalabit pampanunoten ni Pablo dagiti sariugma, kas kadagiti masarakan iti apokripal a libro a Tobit.a Dagiti ulbod a sarsarita nalabit iramanda met dagiti nasobraan a damag ken espekulasion. Sa “maitunos kadagiti bukodda a tarigagay,” dadduma ti sisisikap nga inallilaw dagidiay mangitantandudo iti nalukay a panangannurot kadagiti pagalagadan ti Dios wenno manangkritikar kadagidiay mangidadaulo iti kongregasion. (3 Juan 9, 10; Judas 4) Aniaman dagiti bangen a nairaman, agparang a kaykayat ti dadduma dagiti kinaulbod imbes a dagiti kinapudno iti Sao ti Dios. Di nagbayag, insardengdan nga annuroten dagiti bambanag a naadalda, a nagbanag iti bukodda a naespirituan a pagdaksan.​—2 Pedro 3:15, 16.

10. Ania ti sumagmamano nga ulbod a sarsarita iti agdama a panawen, ken kasano nga intampok ni Juan ti kinapateg ti panagannad?

¹⁰ Maliklikantayo ti maallilaw kadagiti ulbod a sarsarita ita no usigen ken pilientayo dagiti dengdenggen ken basbasaentayo. Kas pagarigan, masansan nga itandudo ti media ti imoralidad. Adu a tattao ti mangiparegta iti agnosticismo wenno naan-anay nga ateismo. Umsien dagiti kritiko ti kuna ti Biblia nga impaltiing ti Dios ti Kasuratan. Ken dagiti agdama nga apostata ikagkagumaanda ti mangimula kadagiti bin-i ti panagduadua tapno pakapuyenda ti pammati dagiti Kristiano. No maipapan iti umarngi a peggad nga inyeg dagiti ulbod a mammadto idi umuna a siglo, imballaag ni apostol Juan: “Dungdungnguen, saanyo a patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios, agsipud ta adu nga ulbod a mammadto ti nakastrek ditoy lubong.” (1 Juan 4:1) Isu a nasken nga agannadtayo.

11. Ania ti maysa a pamay-an a masubok ken maammuan no an-annurotentayo met laeng ti pammati?

¹¹ No maipapan iti dayta, insurat ni Pablo: “Itultuloyyo a suboken no addakayo iti pammati.” (2 Corinto 13:5) Indagadag kadatayo ti apostol nga itultuloytayo a suboken ti bagitayo tapno maammuantay no an-annurotentayo met laeng dagiti Nakristianuan a sursuro. No agannayastayo a dumngeg kadagiti rebelioso, masapul a sikakararag a sukimatentayo ti bagitayo. (Salmo 139:23, 24) Agannayastayo kadi a mangsiput iti pagkurangan dagiti adipen ni Jehova? No wen, apay? Nasaktantayo kadi iti insawang wenno inaramid ti maysa? No wen, umiso kadi ti panangmatmattayo kadagiti bambanag? Temporario ti aniaman a rigat a sangsanguentayo iti daytoy a sistema ti bambanag. (2 Corinto 4:17) Uray no mapasarantayo ti sumagmamano a pakasuotan iti kongregasion, apay koma nga isardengtayo ti agserbi iti Dios? No adda ditay nagustuan, saan aya a nasaysayaat nga amang no ikagumaantayo a risuten dayta a banag, sa kalpasanna ipabiang ken ni Jehova?​—Salmo 4:4; Proverbio 3:5, 6; Efeso 4:26.

12. Ania ti nasayaat nga inyulidan kadatayo dagiti taga Berea?

¹² Imbes a mangkritikar, nasken a taginayonentayo ti umiso a naespirituan a panangmatmat kadagiti impormasion a maad-adaltayo babaen ti personal a panagadal ken kadagiti gimong ti kongregasion. (1 Corinto 2:14, 15) Ken imbes a pagduaduaan ti Sao ti Dios, anian nga ad-adda a nainsiriban a tuladen ti kababalin dagiti taga Berea idi umuna a siglo a nangsukimat a naimbag iti Kasuratan! (Aramid 17:10, 11) Agtignaytayo koma ngarud maitunos iti maad-adaltayo, nga ilaksidtayo dagiti ulbod a sarsarita ket kumpettayo iti kinapudno.

13. Kasano a mabalin a di inggagara a mangiwarastayo kadagiti ulbod a sarsarita?

¹³ Adda sabali pay a kita ti ulbod a sarsarita a masapul a pagannadantayo. Adu a nasobraan nga estoria ti agraraira, masansan a babaen ti E-mail. Nainsiriban no agannadtayo kadagita nga estoria, nangnangruna no ditay ammo ti namunganayan ti impormasion. Uray no mararaem a Kristiano ti nangipatulod iti maysa a kapadasan wenno estoria, nalabit saanna a personal nga ammo dagiti impormasion. Dayta ti makagapu a napateg nga agannad no uliten wenno ipatulod dagiti saan a nakompirma a salaysay. Sigurado a ditay kayat nga uliten “ti saan a nadiosan a sarsarita,” wenno “ulbod a sarsarita a maisalungasing iti nasantuan.” (1 Timoteo 4:7; New International Version) Yantangay maiparbeng nga agsaotayo iti pudno iti maysa ken maysa, nainsiriban a liklikantayo ti aniaman a mangituggod kadatayo a mangiwaras kadagiti kinaulbod uray di inggagara.​—Efeso 4:25.

Dagiti Gunggona ti Panangannurot iti Kinapudno

14. Ania dagiti gunggona ti panangannurot kadagiti bambanag a maad-adaltayo iti Sao ti Dios?

¹⁴ Mangyeg iti adu a gunggona ti panangannurot iti maad-adaltayo kadagiti Nakristianuan a gimong ken personal a panagadal iti Biblia. Kas pagarigan, makitatayto a suminged ti relasiontayo kadagiti kapammatian. (Galacia 6:10) Ad-adda a sumayaat ti disposisiontayo no iyaplikartayo dagiti prinsipio ti Biblia. (Salmo 19:8) Maysa pay, ‘maarkosan ti sursuro ti Dios’ no annurotentayo ti naadaltayo ken ad-adda a maatrakar ti sabsabali iti pudno a panagdayaw.​—Tito 2:6-10.

15. (a) Kasano a situtured a nangasaba idiay eskuelaan ti maysa nga agtutubo? (b) Ania ti naadalyo iti dayta a kapadasan?

¹⁵ Kadagiti Saksi ni Jehova, adu nga agtutubo ti mangan-annurot iti naadalda kadagiti Nakristianuan a publikasion ken personal a panagadal iti Biblia agraman ti regular a pannakigimong iti kongregasion. Ti nasayaat a konduktada ket nabileg a pammaneknek kadagiti maestra ken kaeskuelaanda. (1 Pedro 2:12) Usigenyo ni Leslie, 13 ti tawenna a balasitang iti Estados Unidos. Admitirenna a dati a marigatan a mangisarita iti pammatina kadagiti kaeskuelaanna, ngem nagbalbaliw dayta iti maysa nga aldaw. “Pagsasaritaan ti klase no kasano a lakuandaka dagiti tattao kadagiti bambanag. Maysa a balasitang ti nagitayag iti imana ket nadakamatna dagiti Saksi ni Jehova.” Kas maysa a Saksi, ania ti inaramid ni Leslie? “Indepensak ti pammatik,” kunana, “a siguradok a namagsiddaaw iti tunggal maysa, yantangay kadawyanna a naulimekak iti eskuelaan.” Ania ti resulta ti kinatured ni Leslie? “Napaimaak iti broshur ken tract dayta nga estudiante, ta adda dadduma pay a saludsodna,” kuna ni Leslie. Anian a ragsak ni Jehova no dagiti agtutubo a mangan-annurot iti naadalda ket situtured a mangasabada idiay eskuelaan!​—Proverbio 27:11; Hebreo 6:10.

16. Kasano a nagunggonaan ti maysa nga agtutubo a Saksi iti Teokratiko nga Eskuelaan ti Panagministro?

¹⁶ Ti maysa pay a pagarigan isu ni Elizabeth. Nangrugi idi pito ti tawenna agingga a nagleppas iti elementaria, inawis daytoy a balasitang dagiti maestrana iti Kingdom Hall kada adda pasetna iti Teokratiko nga Eskuelaan ti Panagministro. No saan a makatabuno ti maysa a maestra, agbati ni Elizabeth kalpasan ti klase ket iparangna ti pasetna iti dayta a maestra. Iti maudi a tawenna iti haiskul, nagsurat ni Elizabeth iti sangapulo a panid a report maipapan kadagiti gunggona nga impaay ti Teokratiko nga Eskuelaan ti Panagministro ket imparangna dayta iti uppat a maestrana. Naawis met a mangiparang iti maysa a pagtuladan a demostrasion iti Teokratiko nga Eskuelaan ti Panagministro, ket pinilina ti suheto nga “Apay nga Ipalpalubos ti Dios ti Kinadakes?” Nagunggonaan ni Elizabeth manipud iti programa ti panangisuro nga ar-aramiden dagiti Saksi ni Jehova iti Teokratiko nga Eskuelaan ti Panagministro. Isu ket maysa laeng kadagiti nagadu nga agtutubo a Kristiano a mangar-aramid iti pakaidayawan ni Jehova babaen ti panangannurotda kadagiti naadalda iti Saona.

17, 18. (a) Ania ti balakad ti Biblia maipapan iti kinamapagpiaran? (b) Ania ti epektona iti maysa a lalaki ti kinamapagpiaran ti maysa a Saksi ni Jehova?

¹⁷ Balakadan ti Biblia dagiti Kristiano nga agbalinda a mapagpiaran iti amin a banag. (Hebreo 13:18) Madadael ti relasiontayo iti sabsabali ken kangrunaanna ken ni Jehova no saantayo a mapagpiaran. (Proverbio 12:22) Ti kinamapagtalkantayo ket pammaneknek nga an-annurotentayo dagiti naadaltayo, ken dayta ti nangituggod iti adu a tattao a maaddaan iti dakdakkel a panagraem kadagiti Saksi ni Jehova.

¹⁸ Usigenyo ti kapadasan ti maysa a militar nga agnagan Phillip. Napukawna ti maysa a blanko, napirmaan a tseke ket dina ammo daytoy agingga a naisubli kenkuana babaen ti surat. Maysa a Saksi ni Jehova ti nakasarak iti tseke, ket nairagpin iti dayta ti maysa a surat nga agkuna nga insublina dayta gapu iti narelihiosuan a pammatina. Nasdaaw ni Phillip. “Mabalinda koma nga innala ti (U.S.) $9,000 a kuartak!” kinunana. Nadismaya naminsan idi natakaw ti kallugongna iti uneg ti simbaan. Agparang nga innala ti maysa nga am-ammona ti kallugongna, idinto ta insubli ti maysa nga estranghero ti tseke nga aggatad iti rinibu a doliar! Pudno a pakaidayawan ni Jehova a Dios ti kinamapagpiaran dagiti Kristiano!

Itultuloyyo nga Annuroten Dagiti Naadalyo

19, 20. Ania ti magunggonatayo no agtignaytayo a maitunos kadagiti maad-adaltayo iti Kasuratan?

¹⁹ Adu a gunggona ti apiten dagidiay mangan-annurot kadagiti naadalda iti Sao ti Dios. Insurat ni adalan a Santiago: “Ti mangsukimat iti perpekto a linteg a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a manglipat a managdengngeg, no di ket maysa a managaramid iti trabaho, naragsakto iti panangaramidna iti dayta.” (Santiago 1:25) Wen, no agtignaytayo maitunos kadagiti naadaltayo iti Kasuratan, maaddaantayo iti pudpudno a ragsak ken ad-adda a madaerantayo dagiti pakarigatan ti biag. Kangrunaan iti amin, magun-odtayo ti bendision ni Jehova ken ti namnama a biag nga agnanayon!​—Proverbio 10:22; 1 Timoteo 6:6.

²⁰ Ikagumaanyo ngarud nga itultuloy nga agadal iti Sao ti Dios. Regular a makitimpuyogkayo kadagiti agdaydayaw ken ni Jehova, ken umimdengkayo kadagiti material a maiparang kadagiti Nakristianuan a gimong. Iyaplikaryo dagiti naadalyo, itultuloyyo nga annuroten dagita, ket “ti Dios ti talna addanto kadakayo.”​—Filipos 4:9.

[Footnote]

Malagipyo Pay?

• Ania ti “pagtuladan iti makapasalun-at a sasao,” ken kasano a masalimetmetantayo dayta?

• Ania dagiti “ulbod a sarsarita” a masapul a liklikantayo?

• Ania ti magunggona dagidiay mangan-annurot kadagiti maad-adalda iti Sao ti Dios?

[Ladawan iti panid 17]

Kasano a dagiti nagkauna a Kristiano naliklikanda ti nagpaiwawa kadagiti apostata?

[Dagiti Ladawan iti panid 18]

Dagiti bin-i ti panagduadua ket mabalin nga imula ti media, Internet, ken dagiti agdama nga apostata

[Ladawan iti panid 19]

Saan a nainsiriban nga iwaras dagiti saan a nakompirma a damag

[Dagiti Ladawan iti panid 20]

Iti pagtrabahuan, eskuelaan, ken sadinoman, iyaplikar dagiti Saksi ni Jehova ti mabasada iti Sao ti Dios