Itultuloyyo ti Agserbi nga Abagan-abaga

“Itdekto kadagiti ili ti panagbalbaliw nga agturong iti nasin-aw a pagsasao, tapno isuda amin umawagda iti nagan ni Jehova, tapno agserbida kenkuana iti abagan-abaga.”​—SOFONIAS 3:9.

1. Ania ti madama a kaitungpalan ti Sofonias 3:9?

AGARUP 6,000 ita ti lenguahe iti intero a lubong. Malaksid kadagita, adda pay ti nadumaduma a dialekto, wenno lokal a pagsasao. Ngem nupay nakaad-adu ti lenguahe ti tao, adda nakaskasdaaw nga inaramid ti Dios. Inaramidna a posible a masursuro ken mausar dagiti tattao iti amin a lugar ti kakaisuna a nasin-aw a pagsasao. Pannakatungpal dayta ti kari a naited babaen ken propeta Sofonias: “[Siak, ni Jehova a Dios] itdekto kadagiti ili ti panagbalbaliw nga agturong iti nasin-aw a pagsasao [iti literal, “nadalus a bibig”], tapno isuda amin umawagda iti nagan ni Jehova, tapno agserbida kenkuana iti abagan-abaga.”​—Sofonias 3:9.

2. Ania ti “nasin-aw a pagsasao,” ken ania ti pinagbalinna a posible?

² Ti “nasin-aw a pagsasao” isu ti kinapudno a naggapu iti Dios a masarakan iti Saona, ti Biblia. Kangrunaanna, kinapudno dayta maipapan iti Pagarian ti Dios, a mangsantipikar iti nagan ni Jehova, mangalangon iti kinasoberanona, ken mangyeg kadagiti bendision iti sangatauan. (Mateo 6:9, 10) Kas ti kakaisuna a pagsasao ditoy daga a nadalus iti naespirituan nga anag, ti nasin-aw a pagsasao ket us-usaren ti amin a tattao manipud iti amin a nasion ken rasa. Tulonganna ida nga agserbi ken ni Jehova nga “abagan-abaga.” Iti kasta, agserbida kenkuana a sangsangkamaysa, wenno “sangsangkatunos.”​—Philippine Bible Society Edition.

Awan Lugar ti Panangidumduma

3. Apay a posible a makapagserbitayo ken ni Jehova a sangsangkamaysa?

³ Kas Kristiano, agyamantayo ta agtutunostayo iti laksid ti panagduduma ti lenguahe. Nupay ikaskasabatayo ti naimbag a damag ti Pagarian iti adu a pagsasao, agkaykaysatayo nga agserserbi iti Dios. (Salmo 133:1) Posible dayta gapu ta uray sadino ti pagnanaedantayo ditoy daga, us-usarentayo ti maymaysa a nasin-aw a pagsasao a pakaidayawan ni Jehova.

4. Apay a masapul nga awan ti panangidumduma iti ili ti Dios?

⁴ Masapul nga awan ti panangidumduma iti ili ti Dios. Imbatad dayta ni apostol Pedro idi nangasaba iti pagtaengan ti Gentil nga opisial ti armada a ni Cornelio idi 36 K.P. ken natignay a mangikuna: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Yantangay pudno dayta, awan ti lugar ti panangidumduma, panaglalasinlasin, wenno paboritismo iti uneg ti kongregasion Kristiano.

5. Apay a di umiso a mangpataud iti panaglalasin iti uneg ti kongregasion?

⁵ No maipapan iti itatabunona iti Kingdom Hall, maysa nga estudiante ti kolehio ti nagkuna: “Gagangay a dagiti simbaan awisenda dagiti kameng ti maysa a puli wenno etniko a grupo. . . . Dagiti Saksi ni Jehova agkakatugawda amin ken awan ti panaglalasinlasin.” Ngem nangpataud iti panagsisina ti dadduma a kameng ti kongregasion iti nagkauna a Corinto. Gapu ta nangpataudda iti susik, laplapdanda ti panagandar ti nasantuan nga espiritu ti Dios, ta daytoy ti mangitantandudo iti panagkaykaysa ken talna. (Galacia 5:22) No datayo ti mangisungsungsong iti panaglalasin iti uneg ti kongregasion, laplapdantayo ti panangiturong ti espiritu. No kasta, laglagipentayo ti sasao ni apostol Pablo kadagiti taga Corinto: “Bagbagaankayo, kakabsat, babaen ti nagan ni Apotayo a Jesu-Kristo a rebbeng nga agsaokayo amin a sangsangkatunos, ket awan koma dagiti panaglalasin kadakayo, no di ket naan-anay nga agkaykaysakayo koma iti isu met laeng a panunot ken iti isu met laeng a wagas ti panagpampanunot.” (1 Corinto 1:10) Impaganetget met ni Pablo ti panagkaykaysa iti suratna kadagiti taga Efeso.​—Efeso 4:1-6, 16.

6, 7. Ania ti imbalakad ni Santiago maipapan iti paboritismo, ken kasano a pudno ti sasaona?

⁶ Kanayon a makalikaguman kadagiti Kristiano ti di panangidumduma. (Roma 2:11) Gapu ta dadduma iti kongregasion idi umuna a siglo ket mangipakpakita iti paboritismo kadagiti nabaknang nga indibidual, nagsurat ni adalan a Santiago: “Kakabsatko, salsalimetmetanyo aya ti pammati ni Apotayo a Jesu-Kristo, ti dayagtayo, buyogen ti ar-aramid ti paboritismo? Ta, no ti maysa a tao nga addaan kadagiti balitok a singsing iti ramramayna ken nangayed ti pagan-anayna sumrek iti taripnongyo, ngem ti maysa a napanglaw a tao a narugit ti pagan-anayna sumrek met, kaskasdi kumitakayo buyogen ti panangpabor iti daydiay sikakawes iti nangayed a pagan-anay ket kunaenyo: ‘Agtugawka ditoy nasayaat a lugar,’ ket kunaenyo iti daydiay napanglaw: ‘Agtalinaedka a sitatakder,’ wenno: ‘Agtugawka sadiay iti babaen ti pagbatayan ti sakak,’ iti nagtetengngaanyo addaankayo kadagiti panamaglalasin gapu iti saad iti panagbiag ket nagbalinkayo nga uk-ukom a mangipapaay kadagiti nadangkes a pangngeddeng, saan aya a kasta?”​—Santiago 2:1-4.

⁷ No dumar-ay iti Nakristianuan a taripnong dagiti napanglaw a narugit ti pagan-anayda ken dagiti nabaknang a di manamati a nagsingsing iti balitok ken nangayed ti pagan-anayda, espesial ti pannakatrato dagiti nabaknang. Naited kadakuada ti tugaw iti “nasayaat a lugar,” idinto ta naibaga kadagiti napanglaw nga agtakder wenno aglupisakda. Ngem awan panangidumduma nga inted ti Dios ti pangsubbot a daton ni Jesus agpadpada kadagiti nabaknang ken napanglaw. (Job 34:19; 2 Corinto 5:14) Isu a no kayattayo nga ay-ayuen ni Jehova ken agserbi kenkuana nga abagan-abaga, masapul a ditay mangipakita iti paboritismo wenno ‘pagrukbaban dagiti personalidad maigapu iti bukod a pagimbagan.’​—Judas 4, 16.

Liklikan ti Agtanabutob

8. Ania ti napasamak gapu iti panagtanabutob dagiti Israelita?

⁸ Tapno mataginayon ti panagkaykaysatayo ken agtultuloy a matagiragsaktayo ti anamong ti Dios, nasken nga ipangagtayo ti balakad ni Pablo: “Itultuloyyo nga aramiden ti amin a bambanag nga awan panagtantanabutob.” (Filipos 2:14, 15) Dagiti awanan iti pammati nga Israelita a nawayawayaan manipud panangadipen ti Egipto nagtanabutobda maibusor kada Moises ken Aaron, ken uray ken ni Jehova a Dios. Gapu iti dayta, malaksid kada matalek a Josue ken Caleb ken dagiti Levita, amin a lallaki nga agtawen iti 20 ken agpangato dida nakastrek iti Naikari a Daga no di ket natayda kabayatan ti 40 a tawen a panagalla-alla ti Israel iti let-ang. (Numeros 14:2, 3, 26-30; 1 Corinto 10:10) Anian a supapak ti panagtanabutobda!

9. Ania ti napasaran ni Miriam gapu iti panagtanabutobna?

⁹ Ipakita dayta no ania ti mabalin a mapasamak iti intero a nasion nga agtanabutob. Komusta met dagiti managtanabutob nga indibidual? Bueno, intanabutob dagiti kabsat ni Moises a da Miriam ken Aaron: “Babaen laeng aya ken Moises a nagsao ni Jehova? Saan aya a babaen met kadata nga isu nagsao?” Intuloy ti salaysay: “Ket agim-imdeng idi ni Jehova.” (Numeros 12:1, 2) Ania ti nagbanaganna? Ti Dios imbabainna ni Miriam, nga agparang a nangisungsong iti dayta a panagreklamo. Kasano? Nagkukutel ken napilitan nga agtalinaed iti ruar ti pakarso iti pito nga aldaw agingga a nadalusan.​—Numeros 12:9-15.

10, 11. Ania ti mabalin a pagbanagan ti di mamedmedan a panagtanabutob? Iyilustraryo.

¹⁰ Ti panagtanabutob ket saan a basta panagreklamo maipapan iti maysa a kamali. Pakaseknan unay dagiti managtanabutob ti rikna wenno saadda, nga iturongda ti atension iti bagida imbes nga iti Dios. No saan a mamedmedan, mangpataud dayta iti susik kadagiti agkakapammatian ken manglapped iti panagreggetda nga agserbi ken ni Jehova nga abagan-abaga. Kanayon ngamin nga agreklamo dagiti managtanabutob, nga awan duadua a mangnamnamada iti simpatia ti dadduma.

¹¹ Kas pagarigan, mabalin nga adda mangkritikar iti pamay-an ti panglakayen a nangiparang iti pasetna wenno iti panangtamingna kadagiti annongenna. No denggentayo ti agrekreklamo, mabalin a mangrugi nga agpanunottayo a kas kenkuana. Mabalin nga awan problematayo idi kadagiti ar-aramiden ti panglakayen. Ngem idi naimula iti panunottayo ti bukel ti di pannakakontento, mangrugin a masikorantayo kadagiti ar-aramidenna. Inton agangay, awanen ti aramiden ti panglakayen nga umiso iti panangmatmattayo, ket mabalin a mangrugitayo metten nga agreklamo maibusor kenkuana. Awan lugarna ti kasta a kababalin iti uneg ti kongregasion ti ili ni Jehova.

12. Ania ti mabalin nga epekto ti panagtanabutob iti relasiontayo iti Dios?

¹² Ti panagtanabutob kadagiti lallaki a mangipaspastor iti arban ti Dios mabalin nga agturong iti panangumsi. Ti kasta a panagtanabutob wenno mangpardaya a panangilunod kadakuada mabalin a perdienna ti relasiontayo ken ni Jehova. (Exodo 22:28) Dagiti di agbabawi a mananglais didanto tawiden ti Pagarian ti Dios. (1 Corinto 5:11; 6:10) Nagsurat ni adalan a Judas maipapan kadagiti managtanabutob a ‘saan a mangikankano iti kinaapo ken agsasaoda a sibabassawang kadagidiay nadayag,’ wenno responsable a lallaki iti kongregasion. (Judas 8) Awan ti anamong ti Dios kadagidi a managtanabutob, isu a nainsiriban a liklikantayo ti dakes nga aramidda.

13. Apay a maibilang nga umiso ti dadduma a reklamo?

¹³ Pudno, saan nga amin a reklamo ket kagura ti Dios. Dina inyaleng-aleng ti “ikkis ti panagreklamo” maibusor iti Sodoma ken Gomorra ket dinadaelna dagidi a dakes a siudad. (Genesis 18:20, 21; 19:24, 25) Idiay Jerusalem, kalpasan unay ti Pentecostes 33 K.P., “timmaud ti panagtanabutob iti biang dagiti Judio a Griego ti pagsasaoda maibusor kadagiti Judio a Hebreo ti pagsasaoda, agsipud ta maliwliwayan idi dagiti baloda iti inaldaw a panagiwaras.” Kas resultana, kinorehir “ti sangapulo ket dua” dayta a napasamak babaen ti panangdutokda iti “pito a napaneknekan a lallaki” a mangimaton iti “nasken nga aramid” a panagiwaras iti taraon. (Aramid 6:1-6) Dagiti agdama a panglakayen ‘dida koma sullatan ti lapayagda’ kadagiti nainkalintegan a reklamo. (Proverbio 21:13) Imbes a kritikarenda dagiti pada nga agdaydayaw, agbalin koma a makaparegta ken makapabileg dagiti panglakayen.​—1 Corinto 8:1.

14. Tapno maliklikantayo ti agtanabutob, ania a galad ti nangnangruna a kasapulan?

¹⁴ Masapul a liklikantayo amin ti panagtanabutob, agsipud ta makadadael iti naespirituan ti panagbalin a reklamador. Riribukenna ti panagkaykaysatayo. Imbes ketdi, kanayon koma a palubosantayo ti nasantuan nga espiritu a mangpataud iti ayat kadatayo. (Galacia 5:22) Ti panangannurot iti ‘naarian a linteg ti ayat’ tulongannatayo nga agserbi ken ni Jehova nga abagan-abaga.​—Santiago 2:8; 1 Corinto 13:4-8; 1 Pedro 4:8.

Panagannad Maibusor iti Pammardaya

15. Pagdumaenyo ti tsismis ken pammardaya.

¹⁵ Gapu ta mabalin nga agturong iti makadangran a tsismis ti panagtanabutob, masapul nga annadantayo ti isawangtayo. Ti tsismis ket awan kaes-eskanna a panagsasarita maipapan iti sabali a tattao ken iti personal a biagda. Ngem ti pammardaya ket inuulbod a damag a nairanta a mangperdi iti reputasion ti sabali a tao. Mangpasakit ken saan a nadiosan ti kasta a panagsasarita. Gapuna, kinuna ti Dios kadagiti Israelita: “Dika aglikmulikmut kadagiti kailiam maigapu iti panangpardaya.”​—Levitico 19:16.

16. Ania ti kuna ni Pablo maipapan iti sumagmamano a nalaing nga agtsismis, ken ania koma ti epektona kadatayo ti balakadna?

¹⁶ Gapu ta mabalin nga agturong iti pammardaya ti awan kaes-eskanna a panagsasarita, situtured a tinubngar ni Pablo ti sumagmamano a nalaing nga agtsismis. Kalpasan a dinakamatna dagiti balo a maikari a tulongan ti kongregasion, tinukoyna ti dadduma a balo a nakasursuro nga agbalin a “di makumikom, nga umalla-allatiwda iti balbalay; wen, saan laeng a di makumikom, no di ket manangidanondanon ken mannakibiangda pay iti ar-aramid ti sabsabali a tattao, a sarsaritaenda ti bambanag a saanda a rebbeng.” (1 Timoteo 5:11-15) No madlaw ti Kristiano a babai a pagkapuyanna ti kita ti saritaan a mabalin nga agturong iti panangpardaya, nasken nga ipangagna ti balakad ni Pablo nga agbalin a ‘serioso, saan a manangpardaya.’ (1 Timoteo 3:11) Siempre, masapul met a liklikan dagiti Kristiano a lallaki ti agtsismis tapno dida makadangran.​—Proverbio 10:19.

Isardengyo ti Mangukom!

17, 18. (a) Ania ti kinuna ni Jesus maipapan iti panangukom kadagiti kakabsattayo? (b) Kasanotayo nga iyaplikar ti kinuna ni Jesus maipapan iti panangukom?

¹⁷ Uray no ditay mangpardaya iti asinoman, pagreggetantayo koma ti agbalin a di manangukom. Kinondenar ni Jesus ti kasta a kababalin idi kinunana: “Isardengyo ti mangukom tapno saankayo a maukom; ta iti panangukom a panguk-ukomyo, maukomkayto; ket ti rukod a pangrukrukodyo, pangrukoddanto kadakayo. Apay, ngarud, a matmatam ti garami iti mata ni kabsatmo, ngem saanmo nga imutektekan ti pasanggir iti bukodmo a mata? Wenno kasano a maikunam ken kabsatmo, ‘Palubosannak a mangikkat iti garami iti matam’; idinto ta, adtoy! maysa a pasanggir ti adda iti bukodmo a mata? Managinsisingpet! Umuna nga ikkatem ti pasanggir iti bukodmo a mata, ket kalpasanna makitamto a silalawag no kasano nga ikkaten ti garami iti mata ni kabsatmo.”​—Mateo 7:1-5.

¹⁸ Ditay koma padasen nga ikkaten ti “garami” iti mata ti kabsattayo no nakullaapan iti piguratibo a “pasanggir” ti mismo nga abilidadtayo nga agaramid iti umiso a pangngeddeng. Kinapudnona, no talaga nga apresiarentayo ti kinamanangngaasi ti Dios, saantayo nga agduyos a mangukom kadagiti kakabsattayo iti pammati. Kasanotayo a matmatan ida a kas iti panangmatmat kadakuada ti nailangitan nga Amatayo? Di pagsiddaawan a pinakdaarannatayo ni Jesus nga ‘isardengtayo ti mangukom tapno saantayo a maukom’! Ti napudno a panangsukimat iti bukodtayo a pagkapuyan tulongannatayo a di mangaramid kadagiti panangukom nga ibilang ti Dios a di nainkalintegan.

Narasi Ngem Nadayaw

19. Ania ti rumbeng a panangmatmattayo kadagiti padatayo a manamati?

¹⁹ No determinadotayo nga agserbi iti Dios nga abagan-abaga a kadua dagiti kapammatiantayo, saantayo laeng a liklikan ti agbalin a manangukom. Umun-unatayo a mangipakita iti pammadayaw kadakuada. (Roma 12:10) Kinapudnona, ipangpangrunatayo ti pagimbaganda, saan a ti pagimbagantayo, ken sirarag-o a mangaramidtayo kadagiti nanumo a trabaho para kadakuada. (Juan 13:12-17; 1 Corinto 10:24) Kasanotayo a mataginayon ti kasta a naimbag a kababalin? Babaen ti kanayon a pananglaglagiptayo a napateg ken ni Jehova ti tunggal manamati, ken kasapulantayo ti maysa ken maysa, no kasano a ti tunggal kameng ti bagi ti tao ket agpannuray iti maysa ken maysa.​—1 Corinto 12:14-27.

20, 21. Ania ti kaipapanan kadatayo ti sasao iti 2 Timoteo 2:20, 21?

²⁰ Nalawag, dagiti Kristiano ket narasi a damili a basehas a nakaitalkan iti nadayag a gameng a ministerio. (2 Corinto 4:7) Tapno maibanagtayo daytoy a sagrado nga aktibidad agpaay iti pakaidayawan ni Jehova, masapul a taginayonentayo ti nadayaw a takder iti imatangna ken iti Anakna. Babaen laeng ti panagtalinaedtayo a nasin-aw iti moral ken naespirituan a makapagtalinaedtayo a nadayaw a basehas nga us-usaren ti Dios. No maipapan iti daytoy a banag, insurat ni Pablo: “Iti maysa a dakkel a balay adda basbasehas a saan laeng a balitok ken pirak no di ket kayo ken damili met, ket ti sumagmamano agpaayda iti nadayaw a panggep ngem ti dadduma agpaayda iti panggep nga agkurang iti dayaw. Ngarud, no ti asinoman agtalinaed a nadalus manipud kadagidiay naud-udi a nadakamat, isu maysanto a basehas nga agpaay iti nadayaw a panggep, nasantipikar, adu ti usarna iti makinkukua kenkuana, naisagana a maipaay iti tunggal naimbag nga aramid.”​—2 Timoteo 2:20, 21.

²¹ ‘Saan a nadayaw a basehas’ dagiti indibidual a di agbibiag maitunos kadagiti kalikaguman ti Dios. Ngem no annurotentayo ti nadiosan a panagbiag, agbalintayo a ‘basehas nga agpaay iti nadayaw a panggep, nasantipikar, wenno nailasin, agpaay iti panagserbi ken ni Jehova ken naisagana a maipaay iti tunggal naimbag nga aramid.’ Isu a maisaludsodtayo iti bagitayo: ‘Nadayawak kadi a “basehas”? Nasayaatak kadi nga impluensia kadagiti kapammatian? Kas kameng ti kongregasion, makipagtartrabahoak kadi nga abagan-abaga kadagiti pada nga agdaydayaw?’

Itultuloyyo ti Agserbi nga Abagan-abaga

22. Ania ti pakayaspingan ti kongregasion Kristiano?

²² Mayasping ti kongregasion Kristiano iti urnos ti pamilia. Adda ayat, panagtitinnulong, ken makaay-ayo a kasasaad no agserserbi ken ni Jehova ti amin a kameng ti pamilia. Mabalin a ti maysa a pamilia ket buklen ti sumagmamano a kameng nga addaan iti nadumaduma a personalidad, ngem adda nadayaw a lugar ti tunggal maysa. Kasta met laeng iti kongregasion. Nupay agduduma ken imperpektotayo amin, ti Dios inyadaninatayo kenkuana babaen ken Kristo. (Juan 6:44; 14:6) Ay-ayatennatayo ni Jehova ken ni Jesus, ket kas nagkaykaysa a pamilia, talaga a kasapulan nga ayatentayo ti maysa ken maysa.​—1 Juan 4:7-11.

23. Ania ti rumbeng a laglagipen ken determinado nga aramidentayo?

²³ Maiparbeng a namnamaentayo met nga adda kinasungdo iti uneg ti arig pamilia a kongregasion Kristiano. Insurat ni apostol Pablo: “Tarigagayak nga iti tunggal lugar agtultuloy koma nga agkararag dagiti lallaki, nga itag-ayda ti nasungdo nga im-ima, naisina iti pungtot ken debdebate.” (1 Timoteo 2:8) Gapuna, innaig ni Pablo ti kinasungdo iti publiko a panagkararag “iti tunggal lugar” a pagtataripnongan dagiti Kristiano. Dagiti laeng nasungdo a lallaki ti mangidaulo iti kongregasion iti publiko a panagkararag. Siempre, namnamaen ti Dios a nasungdotayo amin kenkuana ken iti maysa ken maysa. (Eclesiastes 12:13, 14) Determinadotayo koma ngarud nga agtrabaho a sangsangkatunos, kas kadagiti kameng ti bagi ti tao. Sangsangkamaysa koma nga agserbitayo kas paset ti pamilia nga agdaydayaw ken ni Jehova. Kangrunaan iti amin, laglagipentayo a kasapulantayo ti tunggal maysa ken matagiragsaktayo ti anamong ken bendision ti Dios no agtultuloytayo nga agserbi ken ni Jehova nga abagan-abaga.

Ania ti Sungbatyo?

• Apay a ti ili ni Jehova makapagserbida kenkuana nga abagan-abaga?

• Apay a liklikan dagiti Kristiano ti panangidumduma?

• Ania ti makunayo a pagdaksan ti panagtanabutob?

• Apay a nasken a padayawantayo dagiti pada a manamati?

[Ladawan iti panid 15]

Nakita ni Pedro a ‘saan a mangidumduma ti Dios’

[Ladawan iti panid 16]

Ammoyo kadi no apay a ti Dios imbabainna ni Miriam?

[Ladawan iti panid 18]

Dagiti nasungdo a Kristiano naragsakda nga agserbi ken ni Jehova nga abagan-abaga