Panangapresiar Kadagiti “Sagut a Tattao”

“Maaddaankayo iti panagraem kadagidiay agtartrabaho a sipipinget iti tengngayo ken . . . ipaayanyo ida iti panangipateg iti ayat nga ad-adda pay a nalablabes ngem iti gagangay gapu iti aramidda.”​—1 TESALONICA 5:12, 13.

1. Sigun iti Aramid 20:35, ania ti maaramidan ti panangted? Iyilustraryo.

“AD-ADU ti kinaragsak iti panangted ngem iti panangawat.” (Aramid 20:35) Malagipyo kadi daydi naudi a gundaway a napasaranyo ti kinapudno dagita a sasao ni Jesus? Nalabit adda inregaloyo iti tao a patpatgenyo unay. Piniliyo a naimbag dayta a regalo, ta kayatyo nga ipateg dayta ti ay-ayatenyo. Anian a ragsakyo a makakita iti maay-ayatan a langa ti patpatgenyo! No nabuyogan iti umiso a motibo, ti panangted ket ebkas ti ayat, ket ti panangyebkas iti ayat mangyeg iti ragsak kadatayo.

2, 3. (a) Apay a maikuna nga awanen ti naragragsak pay ngem ni Jehova, ket kasano a mangparagsak iti pusona dagiti naipaay a “sagut a tattao”? (b) Ania ti ditay kayat nga aramiden iti sagut a naggapu iti Dios?

² No kasta, adda kadi pay naragragsak ngem ni Jehova, ti Mangmangted iti “tunggal naimbag a sagut”? (Santiago 1:17; 1 Timoteo 1:11) Ayat ti mangtigtignay kenkuana a mangted iti tunggal sagut. (1 Juan 4:8) Pudno unay dayta no maipapan iti sagut nga impaay ti Dios iti kongregasion babaen ken Kristo​—dagiti “sagut a tattao.” (Efeso 4:8) Dagiti panglakayen a naipaay a mangaywan iti arban ket ebkas ti nauneg a panagayat ti Dios kadagiti tattaona. Napili a naimbag dagitoy a lallaki​—masapul a maragpatda dagiti Nainkasuratan a kualipikasion. (1 Timoteo 3:1-7; Tito 1:5-9) Ammoda a masapul a “tratuen[da] a sidudungngo ti arban,” iti kasta adda panggapuan dagiti karnero nga agyaman kadagiti kasta a naayat a papastor. (Aramid 20:29; Salmo 100:3) No makita ni Jehova nga addaan dagiti karnerona iti puso a napno iti kasta a panagyaman, sigurado a maragsakan ti mismo a pusona!​—Proverbio 27:11.

³ Awan duadua a ditay kayat a bumassit ti pateg ti sagut a naggapu iti Dios; ditay met kayat a laeng-laengen dagiti sagutna. No kasta, adda tumaud a dua a saludsod: Kasano koma a matmatan dagiti panglakayen ti akemda iti kongregasion? Ken kasano a maipakita dagiti dadduma pay a kameng ti arban nga apresiarenda dagiti “sagut a tattao”?

‘Katrabahuandakami’

4, 5. (a) Ania ti nangyarigan ni Pablo iti kongregasion, ket apay a maitutop daytoy nga ilustrasion? (b) Ania ti ipakita ti ilustrasion ni Pablo maipapan iti rumbeng a panangmatmat ken panangtratotayo iti maysa ken maysa?

⁴ Inikkan ni Jehova dagiti “sagut a tattao” iti autoridad iti uneg ti kongregasion. Siempre, di kayat dagiti panglakayen nga usaren ti autoridadda iti di umiso a pamay-an, ngem ammoda a naglaka a maaramidda dayta kas imperpekto a tattao. Kasano ngarud ti rumbeng a panangmatmatda iti bagbagida no mainaig iti arban? Usigenyo ti ilustrasion nga inaramat ni apostol Pablo. Kalpasan ti panangilawlawagna no apay a naipaay dagiti “sagut a tattao,” insurat ni Pablo: “Babaen ti ayat dumakkeltayo koma iti isuamin a bambanag kenkuana nga isu ti ulo, ni Kristo. Manipud kenkuana amin ti bagi, gapu iti natunos a pannakasangal ken pannakaaramid nga agtitinnulong babaen ti tunggal nagsuopan a mangipaay iti kasapulan, maitunos iti panagtignay ti tunggal sinaggaysa a kameng iti maitutop a rukod, agaramid a maipaay iti idadakkel ti bagi a maipaay iti pannakapabilegna a mismo iti ayat.” (Efeso 4:15, 16) No kasta, inyarig ni Pablo ti kongregasion, a pakairamanan dagiti panglakayen ken dadduma pay a miembro, iti bagi ti tao. Apay a maitutop daytoy nga ilustrasion?

⁵ Adu a nagduduma a paset ti mangbukel iti bagi ti tao ngem maymaysa laeng ti ulona. Nupay kasta, awan iti bagi​—piskel man, wenno nerbio, wenno urat​—ti awan serbina. Napateg ti tunggal paset ken adda maitulongna iti salun-at ken pintas ti intero a bagi. Umasping iti dayta, adu a nagduduma a miembro ti mangbukel iti kongregasion, ngem tunggal miembro​—ubing man wenno nataengan, napigsa wenno nakapsut​—adda maitulongna iti naespirituan a salun-at ken pintas ti kongregasion. (1 Corinto 12:14-26) Di koma panunoten ti asinoman nga isu ket awan kaes-eskanna. Iti sabali a bangir, awan koma ti mangibilang iti bagina a natantan-ok, ta amintayo​—papastor man wenno dagiti karnero​—ket paset ti bagi, ngem adda maymaysa nga ulo, ni Kristo. No kasta, makaay-ayo ti panangiladawan ni Pablo iti ayat, pannakaseknan, ken panagraem a rumbeng nga ipakitatayo iti maysa ken maysa. Ti panangbigbig iti daytoy tulonganna dagiti panglakayen a maaddaan iti napakumbaba, natimbeng a panangmatmat iti akemda iti kongregasion.

6. Nupay adda autoridadna kas apostol, kasano nga impakita ni Pablo ti kinapakumbaba?

⁶ Saan a padpadasen dagitoy a “sagut a tattao” nga iturayan ti biag wenno ti pammati dagiti padada a managdaydayaw. Nupay adda autoridad ni Pablo a kas apostol, sipapakumbaba a kinunana kadagiti taga Corinto: “Saan a gapu ta dakami dagiti agturay iti pammatiyo, no di ket katrabahuandakami a maipaay iti rag-oyo, ta sitatakderkayo babaen ti pammatiyo.” (2 Corinto 1:24) Di kayat ni Pablo nga iturayan ti pammati ken ti panagbiag dagiti kakabsatna. Kinapudnona, awan makitana a rason nga aramidenna dayta, ta agtalek a datidan a matalek a lallaki ken babbai nga adda iti organisasion ni Jehova gapu ta kayatda nga aramiden ti umiso. Gapuna, maipapan iti bagina ken iti kaduana nga agdaldaliasat a ni Timoteo, no an-anagen, kastoy ti ibagbaga ni Pablo: ‘Pagrebbenganmi ti makipagtrabaho kadakayo nga agserbi a sirarag-o iti Dios.’ (2 Corinto 1:1) Anian a kinapakumbaba!

7. Ania ti bigbigen dagiti napakumbaba a panglakayen maipapan iti akemda iti kongregasion, ket maipapan iti ania nga agtalekda kadagiti katrabahuanda?

⁷ Kasta met laeng ti ar-aramiden dagiti “sagut a tattao” ita. ‘Makipagtartrabahoda nga agpaay iti pagragsakantayo.’ Bigbigen dagiti napakumbaba a panglakayen a saan nga isuda ti mangikeddeng no kasano ti kaadu ti maaramidan dagiti sabsabali iti panagserbida iti Dios. Ammoda a nupay mabalinda a paregtaen dagiti sabsabali a mangpalawa wenno mangparang-ay iti ministerioda, nasken nga agubbog iti natallugod a puso ti panagserbi iti Dios. (Idiligyo ti 2 Corinto 9:7.) Agtalekda a no naragsak dagiti katrabahuanda, aramidenda ti amin a kabaelanda. No kasta, naimpusuan a tarigagayanda a tulongan dagiti kakabsatda nga ‘agserbi a sirarag-o ken Jehova.’​—Salmo 100:2.

Panangtulong Kadagiti Amin nga Agserbi a Sirarag-o

8. Ania ti sumagmamano a pamay-an a dagiti panglakayen matulonganda dagiti kakabsatda nga agserbi a sirarag-o ken Jehova?

⁸ Dakayo a panglakayen, kasanoyo a matulongan dagiti kakabsatyo nga agserbi a sirarag-o? Maparegtayo ida babaen ti ulidanyo. (1 Pedro 5:3) Maiparangarang koma ti regta ken rag-oyo iti ministerio, ket mabalin a maparegta dagiti sabsabali a mangtulad iti ulidanyo. Komendaranyo dagiti sabsabali gapu iti amin-kararua a panagreggetda. (Efeso 4:29) Ti nabara ken naimpusuan a komendasion ipariknana kadagiti sabsabali nga adda serbi ken pategda. Paregtaenna dagiti karnero a mangaramid iti amin a kabaelanda nga agserbi iti Dios. Dikay ida pagdidiligen. (Galacia 6:4) Makapaupay dagiti kasta a panamagdidilig imbes a gutugotenna dagiti sabsabali a rumang-ay. Maysa pay, saan nga agpapada dagiti karnero ni Jehova​—nagduduma ti kasasaad ken abilidadda. Kas ken Pablo, iyebkasyo ti panagtalekyo kadagiti kakabsatyo. Ti ayat “patienna ti isuamin a bambanag,” isu a patientay koma a dagiti kakabsattayo ay-ayatenda ti Dios ken kayatda a paragsaken. (1 Corinto 13:7) No ‘ipakitayo ti pammadayaw kadagiti sabsabali,’ mairuaryo ti kasayaatan nga adda kadakuada. (Roma 12:10) Namnamaenyo a no maparegta ken mabang-aran dagiti karnero, aramiden ti kaaduan kadakuada ti amin a kabaelanda nga agserbi iti Dios, ket iti kasta naragsakda nga agserbi.​—Mateo 11:28-30.

9. Ania a panangmatmat kadagiti padana a panglakayen ti tumulong iti tunggal panglakayen nga agserbi a sirarag-o?

⁹ Ti sipapakumbaba a panangmatmatyo iti bagiyo kas ‘katrabahuan’ tulongannakayo nga agserbi a sirarag-o ken mangapresiar kadagiti naisangsangayan a saguday dagiti padayo a panglakayen. Addaan ti tunggal panglakayen iti bukodna a saguday ken abilidad a mausarna nga agpaay iti pagimbagan ti kongregasion. (1 Pedro 4:10) Mabalin a nalaing ti maysa a mangisuro. Nalabit nalaing nga agorganisar ti sabali. Ket mabalin a nalaka unay a maasitgan ti maysa gapu iti kinabara ken kinamannakipagriknana. Kinapudnona, awan ti panglakayen nga adda kenkuana amin a saguday. Natantan-ok aya ti maysa a panglakayen ngem iti sabali no adda naisangsangayan a sagudayna, kas koma no nalaing a mangisuro? Saan a pulos! (1 Corinto 4:7) Iti sabali a bangir, saan koma a pagsakitan ti nakemyo ti saguday nga ik-ikutan ti sabali. Saanyo met koma a panunoten a nakapuykayo no ti maysa a panglakayen ket komendaran dagiti sabsabali gapu iti abilidadna. Laglagipenyo, addaankayo a mismo kadagiti saguday a makita ni Jehova kadakayo. Ket matulongannakayo a mangpatanor kadagita a saguday ken mangusar nga agpaay iti pagimbagan dagiti kakabsatyo.​—Filipos 4:13.

‘Agtulnog ken Agpasakupkayo’

10. Apay a rumbeng laeng nga iyebkastayo ti apresasion kadagiti “sagut a tattao”?

¹⁰ No makaawattayo iti regalo, rumbeng laeng nga agyamantayo. “Ipakitayo a managyamankayo,” kuna ti Colosas 3:15. Dagiti ngay “sagut a tattao,” dagiti napapateg a sagut nga impaay ni Jehova kadatayo? Siempre, ni Jehova ti kangrunaan a pagyamanantayo, ta isu ti naparabur a Mangmangted iti Sagut. Ngem dagiti ngay “sagut a tattao” a mismo? Kasanotay a maipakita nga apresiarentay ida?

11. (a) Kasanotay a maipakita nga apresiarentayo dagiti “sagut a tattao”? (b) Ania ti kayat a sawen ti sasao nga “agtulnogkayo” ken “agpasakupkayo”?

¹¹ Maipakitatayo nga apresiarentayo dagiti “sagut a tattao” babaen ti panangipangag a dagus kadagiti balakad ken desision a naibatay iti Biblia. Balakadannatayo ti Biblia: “Agtulnogkayo koma kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo a kasla isudanto dagidiay mangaramid iti pannakikuenta; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy makadangranto kadakayo.” (Hebreo 13:17) Imutektekanyo ta saan laeng a masapul nga ‘agtulnogtayo’ no di pay ket ‘agpasakuptayo’ kadagidiay mangidadaulo. Ti Griego a sao para iti “agpasakupkayo” literal a kaipapananna ‘tumulokkayo.’ Maipapan iti sasao nga “agtulnogkayo” ken “agpasakupkayo,” kastoy ti kuna ti eskolar ti Biblia a ni R.C.H.Lenski: “Agtulnog ti maysa no umanamong iti naibilin nga aramidenda, a patienna nga umiso ken makagunggona dayta; tumulok ti maysa . . . no adda naiduma a kapanunotanna.” No maawatan ken umanamongtayo iti pangngeddeng dagidiay mangidadaulo, mabalin a nalaka ti agtulnog. Ngem kasanon no ditay maawatan ti makagapu iti partikular a desision?

12. Apay a rumbeng nga agpasakuptayo, wenno tumulok, uray no ditay maawatan a naan-anay ti makagapu iti partikular a desision?

¹² Ditoy a nalabit nasken nga agpasakup, wenno tumuloktayo. Apay? Ti maysa a makagapu, nasken nga agtalektayo a ti laeng pagimbagantayo ti pampanunoten dagitoy a lallaki a kualipikado iti naespirituan. Total, pagaammoda a sungsungbatanda ken Jehova dagiti karnero a naipaaywan kadakuada. (Santiago 3:1) Maysa pay, laglagipentay koma a nalabit adda dagiti kompidensial a banag a ditay ammo a nangibatayanda a nangaramid iti desision a pinagpanunotanda a naimbag.​—Proverbio 18:13.

13. Ania ti makatulong kadatayo nga agpasakup no maipapan kadagiti hudisial a desision dagiti panglakayen?

¹³ Ti ngay panagpasakup no maipapan kadagiti hudisial a desision? Pudno, mabalin a saan a nalaka daytoy, nangruna no inkeddengda a mailaksid ti maysa nga ay-ayatentayo​—maysa a kabagian wenno nadekket a gayyem. Uray iti daytoy a banag, kasayaatan a tumuloktayo iti pangngeddeng dagiti “sagut a tattao.” Addada iti posision a mangtingiting a naimbag kadagiti bambanag ngem kadatayo, ken mabalin nga ad-adu ti ammoda maipapan iti kasasaad. Masansan a maladingitan dagitoy a kakabsat kadagiti kasta a desision; nadagsen a responsabilidad ti ‘mangukom a gapu ken Jehova.’ (2 Cronicas 19:6) Ikagumaanda nga ipakita ti asi, ta sipapanunotda a ti Dios ‘sisasagana a mamakawan.’ (Salmo 86:5) Ngem masapul a pagtalinaedenda met a nadalus ti kongregasion, ket ibilbilin ti Biblia nga ilaksidda dagiti nakabasol a di agbabawi. (1 Corinto 5:11-13) Iti adu a kasasaad, ti nakabasol a mismo awatenna ti desision. Mabalin a dayta a disiplina ti kasapulanna tapno mangrikna. No datayo a patpatgenna ket managpasakup no maipapan iti desision, mabalin a matulongantayo dayta a tao a magunggonaan iti disiplina.​—Hebreo 12:11.

‘Ipaayanyo Ida iti Panangipateg nga Ad-adda pay a Nalablabes Ngem iti Gagangay’

14, 15. (a) Sigun iti 1 Tesalonica 5:12, 13, apay a maikari dagiti panglakayen nga ipakitaantayo iti konsiderasion? (b) Apay a maikuna a dagiti panglakayen ‘sipipinget nga agtartrabahoda iti tengngatayo’?

¹⁴ Maipaneknektayo met nga apresiarentayo dagiti “sagut a tattao” babaen ti panangipakita iti konsiderasion kadakuada. Iti suratna iti kongregasion idiay Tesalonica, binagbagaan ni Pablo dagiti miembro daytoy: “Maaddaankayo iti panagraem kadagidiay agtartrabaho a sipipinget iti tengngayo ken mangidadaulo kadakayo iti Apo ken mangbagbaga kadakayo; ket ipaayanyo ida iti panangipateg iti ayat nga ad-adda pay a nalablabes ngem iti gagangay gapu iti aramidda.” (1 Tesalonica 5:12, 13) “Agtartrabaho a sipipinget”​—saan kadi a maitutop dayta a mangdeskribir kadagiti nagaget a panglakayen nga awanan panagimbubukodan a mangipapaay iti bagbagida maipuon kadatayo? Usigenyo, iti apagbiit, ti nadagsen a rebbengen a bakbaklayen dagitoy a maipatpateg a kakabsat.

¹⁵ Adu kadakuada ti addaan pamilia ket nasken a manggedda tapno maipaayda dagiti kasapulan ti pamiliada. (1 Timoteo 5:8) No adda annak ti panglakayen, kasapulan dagitoy nga ubbing ti panawen ken atension manipud iti amada. Mabalin a nasken a tulonganna ida kadagiti leksionda iti eskuelaan, ken iwayaanna a makadua ida iti makagunggona a panaglinglingay. (Eclesiastes 3:1,4) Kangrunaan iti amin, asikasuenna dagiti naespirituan a kasapulan ti pamiliana, a regular a mangikonkondukta iti sangapamiliaan a panagadal iti Biblia, makipagtrabaho kadakuada iti tay-ak ti ministerio, ken ikuyogna ida kadagiti Nakristianuan a gimong. (Deuteronomio 6:4-7; Efeso 6:4) Ditay koma liplipatan a malaksid pay kadagitoy a rebbengen a gagangay iti adu kadatayo, addada kanayonan nga annongen dagiti panglakayen: agisagana kadagiti paset iti gimong, sumarungkar kadagiti karnero, panangasikaso iti naespirituan a pagimbagan ti kongregasion ken no kasapulan, mangtaming kadagiti hudisial a kaso. Addaan dagiti dadduma iti kanayonan a rebbengen a mainaig kadagiti asamblea sirkito, kombension distrito, panagbangon iti Kingdom Hall, ken kadagiti Hospital Liaison Committee. Pudno a ‘sipipinget nga agtartrabaho’ dagitoy a kakabsat!

16. Dakamatenyo dagiti pamay-an a maipakitatayo ti konsiderasion kadagiti panglakayen.

¹⁶ Kasanotay a maipakita ti konsiderasion kadakuada? Kuna ti maysa a proverbio ti Biblia: “Ti maysa a sao iti maitutop a tiempo, anian a nagsayaat!” (Proverbio 15:23; 25:11) No kasta, maipakitatayo kadakuada a saantay a tagtagibassiten ti napinget a panagtrabahoda babaen ti naimpusuan a sasao ti panangapresiar ken panangparegta kadakuada. Maysa pay, nainkalintegan koma ti namnamaentayo kadakuada. Iti sabali a bangir, siwawayatay koma nga umasideg kadakuada a dumawat iti tulong. Mabalin nga adda dagiti tiempo a ti ‘pusotayo matuokan a siuut-ot’ ket kasapulantayo ti Nainkasuratan a pammaregta, panangiwanwan, wenno balakad dagidiay ‘kualipikado a mangisuro’ iti Sao ti Dios. (Salmo 55:4; 1 Timoteo 3:2) Ngem, nasken a laglagipentayo a limitado ti panawen a maipaay kadatayo ti maysa a panglakayen, ta dina mabalin a baybay-an ti kasapulan ti mismo a pamiliana wenno dagiti dadduma pay iti kongregasion. Tangay addaantayo iti “pannakipagmaymaysa ti rikna” kadagitoy a nagaget a kakabsat, ditay kayat ti agkalikagum kadakuada iti di nainkalintegan. (1 Pedro 3:8) Imbes ketdi, apresiarentay koma ti aniaman a panawen ken atension a kabaelanda nga ipaay kadatayo.​—Filipos 4:5.

17, 18. Aniada a panagsakripisio ti ar-aramiden dagiti adu a babbai a ti assawada ket papanglakayen, ken kasanotay a maipakita a ditay tagtagibassiten dagitoy a matalek a kakabsat a babbai?

¹⁷ Dagiti ngay assawa dagiti panglakayen? Saan kadi a rebbengna met nga ipakitaantay ida iti konsiderasion? Total, saanda nga ipapaidam ti assawada iti kongregasion. Masansan a kalikaguman daytoy ti panagsakripisio iti biangda. No dadduma, masapul nga usaren dagiti panglakayen ti orasda iti rabii a mangasikaso kadagiti bambanag iti kongregasion idinto ta mabalinda koma nga usaren dayta iti pamiliada. Iti adu a kongregasion, situtulok dagiti matalek a Kristiano a babbai a mangaramid kadagiti kasta a panagsakripisio tapno maasikaso ti assawada dagiti karnero ni Jehova.​—Idiligyo ti 2 Corinto 12:15.

¹⁸ Kasanotay a maipakita a ditay tagtagibassiten dagitoy a matalek a Kristiano a kakabsat a babbai? Nalawag a babaen ti saan a panangkalikagum iti di nainkalintegan iti assawada. Ngem ditay met koma liplipatan ti bileg ti simple a sasao ti panangapresiar. Kuna ti Proverbio 16:24: “Dagiti nakaay-ayo a sasao arigda la rara, nasam-itda iti kararua, ket salun-at kadagiti tultulang.” Usigenyo ti maysa a kapadasan. Kalpasan ti Nakristianuan a gimong, adda agassawa nga immasideg iti maysa a panglakayen ket indawatda ti makisarita kenkuana maipapan iti agtutubo nga anakda a lalaki. Bayat a makisarsarita ti panglakayen iti agassawa, siaanus a naguray ni baketna. Kalpasanna, ti ina inasitganna ti asawa ti panglakayen ket kinunana: “Pagyamanan iti panawen nga impaay ni lakaymo a tumulong iti pamiliak.” Natukay ti puso dayta nga asawa ti panglakayen kadagita a simple ken makaay-ayo a sasao ti panangapresiar.

19. (a) Ania a panggep ti simamatalek a tungtungpalen dagiti panglakayen kas grupo? (b) Ania koma ti determinado nga aramidentay amin?

¹⁹ Dagiti panglakayen a naipaay a mangaywan kadagiti karnero ket maibilang kadagiti ‘naimbag a sagut’ ni Jehova. (Santiago 1:17) Saan a perpekto dagitoy a lallaki; kas kadatayo amin, agkamalida met. (1 Ar-ari 8:46) Ngem, kas grupo, dagiti panglakayen kadagiti kongregasion iti intero a lubong simamatalek nga ar-aramidenda ti impaannong ni Jehova kadakuada​—nga isu ti panangatur, panangpabileg, panamagkaykaysa, ken panangsalaknib iti arban. Sapay koma ta determinado nga itultuloy ti tunggal panglakayen nga aywanan a sidudungngo dagiti karnero ni Jehova, iti kasta maipaneknekna nga isu ket maysa a sagut, wenno bendision, kadagiti kakabsatna. Ket sapay koma ta determinadotay amin a mangipakita iti apresasion kadagiti “sagut a tattao” babaen ti panagtulnog ken panagpasakup kadakuada ken babaen ti panangipakita iti konsiderasion kadakuada gapu iti napinget a panagtrabahoda. Anian a yamantayo ta siaayat a nangipaay ni Jehova kadagiti lallaki a, no an-anagen, kunada kadagiti karnerona: ‘Pagrebbenganmi ti tumulong kadakayo nga agserbi a sirarag-o iti Dios’!

Kasanoyo a Sungbatan?

◻ Apay a maitutop a mayarig ti kongregasion iti bagi?

◻ Kasano a matulongan dagiti panglakayen dagiti kakabsatda nga agserbi a sirarag-o ken Jehova?

◻ Apay a saantay laeng koma nga agtulnog no di pay ket agpasakup kadagidiay mangidadaulo?

◻ Kadagiti ania a pamay-an a maipakitatayo ti konsiderasion kadagiti panglakayen?

[Ladawan iti panid 16]

Dakayo a panglakayen, komendaranyo dagiti sabsabali gapu iti amin-kararua a panagreggetda

[Ladawan iti panid 17]

Babaen ti kinaregtada iti ministerio, matulongan dagiti panglakayen dagiti kameng ti pamiliada ken dagiti sabsabali nga agserbi a sirarag-o

[Dagiti Ladawan iti panid 18]

Ipatpategtayo dagiti nagaget a panglakayentayo!