LEKSION 36
Agbalin a Napudno iti Amin a Banag
Kayattayo amin ti napudno a gagayyem. Kayat met ni Jehova a napudno dagiti gagayyemna. Ngem saan a nalaka dayta ta agbibiagtayo iti lubong nga adu ti saan a napudno. Ania ti pagsayaatan ti panagbalin a napudno iti amin a banag?
1. Ania ti kapatgan a rason nga agbalintayo a napudno?
No napudnotayo iti dadduma, ipakpakitatayo nga ay-ayaten ken resrespetuentayo ni Jehova. Panunotem: Ammo ni Jehova ti amin a pampanunoten ken ar-aramidentayo. (Hebreo 4:13) Ammona no ikagkagumaantayo ti agbalin a napudno, ket maragsakan iti dayta. Kuna ti Saona: “Kagura ni Jehova ti nasikap a tao, ngem nasinged a gayyemna ti nalinteg.”—Proverbio 3:32.
2. Kasanotayo a maipakita a napudnotayo iti inaldaw a panagbiagtayo?
Kayat ni Jehova nga ‘agsaotayo iti pudno iti padatayo a tao.’ (Zacarias 8:16, 17) Ania ti kayat a sawen dayta? Saantayo nga agulbod wenno agibaga iti saan a husto nga impormasion no makisarsaritatayo kadagiti kapamiliatayo, katrabahuan, kakabsat, wenno kadagiti opisial ti gobierno. Dagiti napudno a tattao ket saan nga agtakaw wenno agkusit. (Basaen ti Proverbio 24:28 ken Efeso 4:28.) Baybayadanda met ti amin a buisda. (Roma 13:5-7) Dagitoy ti dadduma a pamay-an a maipakitatayo nga ‘agbibiagtayo a mapagtalkan iti amin a banag.’—Hebreo 13:18.
3. Ania ti pagsayaatan ti panagbalin a napudno?
No am-ammodatayo kas napudno a tao, pagtalkandatayo. Makatulongtayo tapno kampante ti rikna dagiti kakabsat iti kongregasion, a kas iti maysa a pamilia. Maaddaantayo iti nadalus a konsiensia. No napudnotayo, ‘maarkosantayo ti pannursuro ti Dios, a Manangisalakan kadatayo,’ ken maallukoytayo ti dadduma nga agserbi ken Jehova.—Tito 2:10.
AMMUEM TI AD-ADU PAY
Kitaem no ania ti epektona kenka, kasta met ken Jehova no napudnoka. Ken ammuem no kasanoka nga agbalin a napudno iti agduduma a situasion ti biagmo.
4. Maragsakan ni Jehova no napudnotayo
Basaen ti Salmo 44:21 ken Malakias 3:16, sa pagsaritaan dagitoy a saludsod:
Para kenka, apay a kamali a panunoten a mailemmengtayo ti kinapudno?
Panagkunam, ania ti marikna ni Jehova no ibagatayo ti pudno, uray narigat nga aramiden?
No ibaga ti ubing ti pudno, maragsakan dagiti nagannakna. No ibagatayo ti pudno, maparagsaktayo ni Jehova
5. Agbalin a napudno iti amin a tiempo
Patien ti adu a saan a kanayon a posible ti agbalin a napudno. Ngem kitaem no apay a masapul nga agbalintayo a napudno iti amin a tiempo. I-play ti VIDEO.
Basaen ti Hebreo 13:18, sa pagsaritaan no kasanotayo nga agbalin a napudno iti . . .
pamiliatayo.
trabaho wenno eskuelaan.
iti dadduma pay a situasion.
6. Pagsayaatantayo no napudnotayo
Iti damo, mabalin a mangted iti problema ti panagbalin a napudno. Ngem makitamto a ti panagbalin a napudno ti kasayaatan nga aramiden. Basaen ti Salmo 34:12-16, sa pagsaritaan daytoy a saludsod:
Kasano a sumayaat ti biagmo no napudnoka?
No napudno ti agassawa iti maysa ken maysa, lumagda ti relasionda
No napudno dagiti empleado, agtalek kadakuada ti boss-da
No napudno dagiti umili, nasayaat ti reputasionda kadagiti opisial ti gobierno
KUNA TI DADDUMA: “Okey lang ti agulbod no babassit lang.”
Apay a patiem a kagura ni Jehova ti amin a kinaulbod?
SUMARIO
Kayat ni Jehova nga agbalin a napudno dagiti gagayyemna iti amin nga ibaga ken aramidenda.
Rebiu
Ania dagiti pamay-an a maipakitatayo a napudnotayo?
Apay a kamali a panunoten a mailemmengtayo ti kinapudno?
Apay a kayatmo ti agbalin a napudno iti amin a tiempo?
AGDISKOBREKA PAY
Kasano a maisuro dagiti nagannak dagiti annakda nga agbalin a napudno?
Ania dagiti pagsayaatanna no tungpalentayo dagiti karitayo?
Kitaem no masapul latta nga agbayadtayo iti buis uray no saan a nasayaat ti pakaus-usaran dagita.
“Buis—Masapul Kadi a Bayadam?” (Ti Pagwanawanan, Septiembre 1, 2011)
Ania ti nakatulong iti maysa a lalaki a dati a saan a napudno tapno makapagbalbaliw?
“Naadalko a Naasi ken Manangpakawan ni Apo Jehova” (Ti Pagwanawanan, Mayo 1, 2015)