Agannad iti Inaanito a Panangaramat iti Biblia

“TI SAO ti Dios nabiag ken adda bilegna.” (Heb. 4:12) Dayta ti kinuna ni apostol Pablo idi intampokna ti bileg ti sao ti Dios a mangdanon iti puso ken mangbalbaliw iti biag.

Ngem ti kinapudno nga adda bileg ti mensahe ti Biblia ket nagbalin a makariro idi nangrugi ti naipadto nga apostasia kalpasan ti ipapatay dagiti apostol. (2 Ped. 2:1-3) Idi agangay, ibagbagan dagiti panguluen ti relihion nga adda misterioso a pannakabalin ti Sao ti Dios. Nagsurat ni Propesor Harry Y. Gamble maipapan iti “inaanito a pannakausar dagiti Nakristianuan a sursurat.” Imbagana nga idi maikatlo a siglo, insingasing ti Ama ti Simbaan a ni Origen a “makagunggona uray ti pannakangngeg laeng iti mismo a pannakaibalikas ti sagrado a sasao: no adda pannakabalin ti sasao iti mahika dagiti pagano, anian nga ad-adda pay a nabilbileg ti pudpudno a sasao ti Dios iti kasuratan.” Ni John Chrysostom a nagbiag iti maudi a paset ti maikapat a siglo insuratna a “ti diablo dina maitured ti umasideg iti balay nga addaan iti Ebanghelio.” Kunana pay nga adda dagidiay mangikuentas kadagiti teksto ti Ebanghelio kas an-anibda. Innayon pay ni Propesor Gamble a ti Katoliko a teologo a ni Augustine “insingasingna a, no adda agsakit ti ulona, nasayaat a mangikabil iti kopia ti Ebanghelio ni Juan iti sirok ti punganna”! Dayta ti makagapu a naaramat dagiti teksto ti Biblia kas anting-anting. Ibilangmo kadi ti Biblia kas an-anib, wenno mangted iti suerte, a mangsalaknib kenka iti dakes nga espiritu?

Ti gagangayen a di umiso a pannakausar ti Biblia isu ti makunkuna a bibliomancy. Ania dayta? Isu ti panangukag ken panangbasa iti teksto nga umuna a makita iti maysa a libro, kaaduanna a ti Biblia, ta patien dagiti tattao a dayta ti mangibaga iti rumbeng nga aramidenda. Kas pagarigan, kuna ni Propesor Gamble nga idi nakangngeg ni Augustine iti timek ti maysa nga ubing iti kaarrubana a balay nga agkunkuna: “Alaem sa basaem, alaem sa basaem,” impapanna a bilin dayta ti Dios nga ukradenna ti Biblia ket basaenna ti umuna a teksto a makitana.

Nakadamdamagka kadin kadagiti tattao a nagkararag ti Dios no maipasangoda iti narigat a kasasaad sa ukradenda ti aniaman a paset ti Bibliada, ta patienda a makatulong iti problemada ti umuna a bersikulo a makitada? Nupay mabalin a nasayaat ti intensionda, saan a kasta ti umiso a pamay-an a panagpaiwanwan dagiti Kristiano iti Kasuratan.

Impasigurado ni Jesus kadagiti adalanna nga ibaonnanto kadakuada ti “katulongan, ti nasantuan nga espiritu.” Intuloyna: “Isuronto dayta kadakayo ti amin a bambanag ket ipalagipna kadakayo ti amin a bambanag nga imbagak kadakayo.” (Juan 14:26) Maisupadi dayta iti bibliomancy a saan a kasapulan nga adda ammom iti Biblia.

Adu a tattao ti mamati iti bibliomancy ken iti dadduma pay nga umasping nga inaanito a panangaramat iti Biblia. Ngem ti Sao ti Dios kondenarenna ti panagsapul iti partaan. (Lev. 19:26; Deut. 18:9-12; Ara. 19:19) Nupay ti “sao ti Dios nabiag ken adda bilegna,” kaskasdi a masapul nga umiso ti panangusartayo iti dayta. Ti umiso a pannakaammo iti Biblia, saan a ti inaanito a panangaramat iti dayta, ti mangpasayaat iti biag dagiti tattao. Gapu iti pananggun-odda iti kasta a pannakaammo, natulonganda a maaddaan iti nasayaat a moralidad, tinallikudanda ti makadadael nga estilo ti panagbiagda, simmayaat ti relasion ti pamiliada, ken naaddaanda iti personal a relasion iti Autor ti Biblia.