“Ti Sao ti Dios . . . Adda Bilegna”
1 “Ti sao ti Dios nabiag ken adda bilegna,” insurat ni apostol Pablo. (Heb. 4:12) Ania ti kayatna a sawen iti dayta? Ti sao wenno mensahe ti Dios a masarakan iti Biblia ket mabalin a napigsa a mangimpluensia kadagiti tattao. Ti sirib a linaon ti Biblia ket nabileg a mangpasayaat iti kabibiag ti maysa a tao. Ti ipaayna a liwliwa ken namnama iyadanina dagiti tattao ken Jehova a Dios, ti Nangted kadatayo iti biag. Ti mensahena tignayenna dagiti nasingpet ti panagpuspusona a tattao a magna iti dalan nga agturong iti biag nga agnanayon. Nupay kasta, tapno makitada dagitoy a kinapudno, masapul nga usarentay ti Biblia no kasabaantay ti sabsabali.
2 Mangbasa iti Teksto iti Tunggal Gundaway: Agparang nga adu kadagiti agibumbunannag ti manmano nga agusar iti Biblia no mangasabada. Kastakay met kadi? Gapu ta kasla awan tiempo ti adu a tattao a makisarita iti mabayag, nalabit nayugaliyon ti agitukon lattan iti literatura wenno basta ibagayo ti punto ti teksto. Paregtaenmi ti amin nga agibumbunannag nga ikagumaananda ti mangibasa iti uray maysa laeng a bersikulo iti Biblia no ikasabada ti naimbag a damag, tapno makita dagiti tattao a ti mensahetayo ket talaga a naggapu iti Sao ti Dios.
3 Mararaem latta ti Biblia, nupay sumagmamano laeng a tattao ti nangyugali a mangbasa iti dayta. Uray dagiti okupado a tattao, masansan a mangiwayada iti sumagmamano a minuto tapno denggenda ti mensahe a direkta a maibasa manipud iti Sao ti Dios. No sibabara a maibasa ti maitutop a teksto sa mailawlawag biit, ti bileg ti sao ni Jehova mabalin a tukayenna ti rikna ti agdengdengngeg. Ngem kasano a ti panglukat a komentom maikonektarmo iti panangbasa iti maysa a bersikulo iti Biblia?
4 Padasenyo Daytoy Bayat ti Panagmagasin: Epektibo ti panagusar ti agdaldaliasat a manangaywan iti Kasuratan no makiramraman iti aldaw ti panagmagasin. Mangibulsa iti bassit a Biblia. Kalpasan a maiparangna dagiti magasin ken apagbiit a maitampokna ti maysa nga artikulo, luktanna a dagus ti Biblia sana basaen ti maysa a teksto a nainaig iti artikulo. Maaramidan daytoy babaen ti simple a panangdamag, “Ania ti makunayo iti daytoy makaited namnama a kari?” sa mangibasa iti napili a teksto.
5 Pagbalinenyo a kalat ti mangiranud iti maysa wenno dua a bersikulo iti Biblia iti kada dumdumngeg. Ti manggutugot a bilegna mabalin a luktanna ti gundaway para iti ad-adu a tattao nga umadani iti Dios.—Juan 6:44.