Malagipyo Kadi?

Nagustuanyo kadi a binasa dagiti kallabes a ruar Ti Pagwanawanan? Kitaentayo no masungbatanyo dagiti sumaganad a saludsod:

• Kasano nga agbalintayo a nasigo iti “nasin-aw a pagsasao,” ti kinapudno maipapan iti Dios ken kadagiti panggepna? (Sof. 3:9)

Kas iti panagsursuro iti maysa a lenguahe, agbalintayo a nasigo iti “nasin-aw a pagsasao” no agimdeng a naimbag, tuladen dagidiay nalaing iti dayta a pagsasao, kabesaduen ti nagnagan dagiti libro ti Biblia ken dadduma a bersikulona, repasuen dagiti bambanag a naadaltayo, agbasa a napigsa, usigen ti gramatika wenno pagtuladan ti kinapudno, agregget a rumang-ay, mangituding kadagiti masnup nga oras ti panagadal, ken sanayentayo a ‘sawen’ ti nasin-aw a pagsasao.​—8/15, panid 21-25.

• Ania dagiti sumagmamano a bambanag a nairaman iti panangam-ammo iti Dios?

“Jehova ti naganna,” ken kayatna a maammuantayo a dayta ti naganna. (Ex. 15:3) Isu “ti Dios ti ayat ken ti talna.” (2 Cor. 13:11) Isu ti “Dios ti pannakaammo” ken ‘ti pannakaisalakan.’ (1 Sam. 2:3; Sal. 25:5) Umadani ti Dios kadagidiay makaam-ammo kenkuana.​—9/1, panid 4-7.

• Ania ti kayat a sawen ti “tinallo a tali” no iti panagasawa?

Ti “tinallo a tali” ket piguratibo nga ebkas. (Ecl. 4:12) No iyaplikar dayta iti panagasawa, ti umuna a dua a linabag tuktukoyenna ti asawa a lalaki ken asawa a babai a naisinggalut iti kangrunaan a linabag, ti Dios. Ti pannakikaykaysada iti Dios ipaayanna ti agassawa iti naespirituan a bileg a mangsaranget kadagiti parikut ket masagrapda ti kinaragsak ti panagasawada.​—9/15, panid 16.

• Ania ti “panangipatay kadagiti ima” a tuktukoyen ti Hebreo 6:2?

Imbes a panangdutok dayta kadagiti Kristiano a panglakayen, nalabit a tuktukoyenna ti panangipatay kadagiti ima a mangyallatiw kadagiti namilagruan a sagut ti espiritu. (Ara. 8:14-17; 19:6)​—9/15, panid 32.

• Bigbigen ti naimbag nga ama a kasapulan ti annakna dagiti ania?

Dadduma kadagiti kasapulanda ket (1) ayat, (2) nasayaat nga ulidan,(3) naragsak a panaglalangen,(4) pannakaisuro kadagiti nadiosan a prinsipio,(5) disiplina,(6) pannalaknib.​—10/1, panid 18-21

• Kasano a maipakita dagiti mangidadaulo a padpadayawanda ti sabsabali?

Ti maysa a pamay-an a maaramid daytoy ti panglakayen ket no dina pulos kiddawen iti sabsabali nga aramidenda dagiti bambanag a dina kayat a mismo nga aramiden. Maipakitana pay ti pammadayaw babaen ti panangibagana no apay a kidkiddawen wenno ipapaaramidna ti maysa a banag.​—10/15, panid 22.

• Ania ti sumagmamano a tulbek tapno masalimetmetanyo ti karinkariyo kas agassawa?

Ti dua ket: (1) Ipangpangrunayo ti relasionyo kas agassawa. (2) Liklikanyo ti amin a kita ti panangliput. Natibker man wenno adda parikut ti relasionyo nga agassawa, kasapulan a maammuan ti asawam a determinadoka a mamagbalin a naballigi ti panagasawayo; makatulong dagitoy dua a tulbek.​—11/1, panid 18-21.

• Ania ti masursuro ti Kristiano a panglakayen iti panagusar ti Israelita a pastor iti sarukod nga adda kawitna?

Agusar idi ti pastor iti sarukod nga adda kawitna tapno maiturongna ti arban. No agapon wenno rummuar dagiti karnero iti kulonganda, masapul a ‘lumasatda iti sirok ti baston’ tapno mabilangna ida. (Lev. 27:32) Ti Kristiano a pastor nasken met nga am-ammo ken aywananna ti arban ti Dios a naitalek kenkuana.​—11/15, panid 9.

• Kasano a maipakita ti maysa nga ina nga ipatpategna ti kinadalus?

Makontaminaran ti taraon iti nadumaduma a pamay-an, isu nga agbuggo sakbay nga agisagana ken agiggem iti taraon ken taginayonenna dayta a nakaluban. Pagtalinaedenna a nadalus ti balay tapno saan a pagaponan dagiti utot, marabutit, ken insekto. Ti dadduma pay a pamay-an ket ti panangtaginayon a nadalus iti pagan-anay ken regular a panagbuggo ken panagdigus. Dagitoy a pamay-an ket maitunos iti Biblia.​—12/1, panid 9-11.