Ti Pammati Mapaalisna dagiti Bambantay!
DAGITI tattao agsegseggada. Ti ama kaip-ipanna pay laeng ti kissiw nga anakna kadagiti tattao a maipagarup makabael a makaagas kenkuana. Sisesegga, ur-urayenda ti pannakaagasna. Ngem awan ti napasamak! Napaay, pimmanaw ti ama.
Iti dayta a kanito uppat a sabsabali a lallaki ti nagparang ket maysa kadakuada isu ti panguloda, ni Jesus ti Nasaret. Agtartaray a nagturong kenkuana, nagpakpakaasi ti ama: “Kaasiam toy anakko a lalaki, ta bulanbulanen ket agsagaba unay, ta masansan a matnag iti apuy ken iti danum; ket inyegko kadagiti adalam, ngem dida nabalinan nga inagasan.”
“Isu iyegyo kaniak ditoy,” kuna ni Jesus. Ti resulta? “Ket ni Jesus inungtanna ti sairo, ket rimmuar kenkuana; ket ti baro naagasan nanipud idi nga oras.” Wen, maysa manen a milagro! Ngem apay a napaay dagiti adalanna?
Inlawlawag ni Jesus no apay, a kunkunana: “Gapu iti bassit a pammatiyo.” Kalpasanna intuloyna: “No adda koma pammatiyo a kas iti bukel ti mostaza, kunaenyonto itoy a bantay, ‘Umaliska manipud ditoy agingga idiay a disso,’ ket umalisto, ket awanto ti di mabalin kadakayo.”—Mateo 17:14-20.
Manipud iti daytoy pudpudno a kapadasan, kaawatan a ti pammati ket napigsa. Ngem ania a talaga ti pammati? Dayta aya ti maibangon ken mapabileg? Pudno aya a dayta mapaalisna dagiti bambantay?
Ania ti Pammati?
Insalaysay ni apostol Pablo ti pammati kas “ti natalged a panangpadpadaan iti bambanag nga in-inanamaen, ti nabatad a panangipakita [wenno, ti makakumbinsir nga ebidensia] kadagiti kinaagpayso nupay di pay nakita.” (Hebreo 11:1) Iti sabali a pannao, ti pammati isu ti makakumbinsir nga ebidensia wenno pammaneknek iti maysa a banag a di pay nakita. Daytat’ di naibatay iti sasao laeng no di ket iti natibker a pundasion. Gapuna, ti pammati ti naiduma iti kredulidad wenno basta panamati laeng. Maysa a diksionario dinipinarna ti kredulidad a kas “panamati wenno sisasagana a panamati, nangnang[runa] iti bassit laeng wenno di sigurado a pammaneknek.” Maisupadi iti dayta, ti tao nga addaan pudno a pammati ti addaan natibker a pammaneknek iti patpatienna. Gapuna, maibagana kadakayo no apay nga isu ti kumbinsido a ti maysa a banag ket mapagtengto. Ti ama a nadakamat iti pangrugian ti addaan pammaneknek a nakakumbinsir kenkuana a mabalin a maagasan ni Jesus ti anakna. Ania a pammaneknek? Bueno, ni Jesus ti agar-aramiden kadagiti milagro iti nasuroken a dua a tawen, ket ti kinatan-okna ti nagsaknap iti kaaduan a paset ti Palestina.—Lucas 7:17; Juan 10:25.
Ti pammati ti naisalaysay met kas “ti titulo-a-kasuratan dagiti bambanag a ninamnama.” Ti tao a gumatang iti maysa a sanikua iti adayo ket ig-iggamanna ti titulo-a-kasuratan ti addaan ti makakumbinsir nga ebidensia a talaga nga adda dayta a sanikua ket daytat’ pudno a kukuana, nupay dina pay nakitkita dayta. Kasta met, ti tao nga addaan pammati makaiparuar kadagiti makita wenno maiggaman nga ebidensia iti adda a patpatienna. Kas pangarigan, no ngay isut’ addaan pammati a ni Jehova iyegnanto ti pudpudno a talna iti daytoy a daga babaen ti Pagarianna. No kasta adda iti ima ti indibidual ti pammaneknek a ti Dios adda ken addaan pannakabalin, ti tarigagay, ken kinasirib a kasapulan a mangiyeg iti talna ket impasdeknan ti Pagarian nga agpaay iti dayta a panggep. Ti kasta nga ebidensia ti masapul nga addaan nawadwad a kinapigsana a mangkumbinsir saan laeng a ti tao nga addaan pammati no di ket kasta pay met kadagiti dadduma a ‘mangimtuodto kenkuana ti gapu iti inanama nga adda kenkuana’ a maipaay iti talna.—1 Pedro 3:15.
Ti Pammati Mapaalisna dagiti Bambantay!
Nupay kasta, mabalin a maisaludsod ti maysa, ‘Ti kadi kayat a sawen ni Jesus a dayta a pammati literal a mapaalisna dagiti bambantay?’ Mabalin nga inraman a kasta ni Jesus, ngem masansan isut’ agus-usar kadagiti ilustrasion. (Mateo 13:34) Nalabit ti adda iti panunotna ket dagiti lapped agbalinda a kas bambantay iti manamati. Kinapudnona, ti sao a “bantay” ti masansan a maus-usar a kaipapananna ti dakkel a kantidad, kas ti “maysa a bantay nga ut-utang.” A ti pudno a pammati mapaalisna wenno maikkatna dagiti kakasla bambantay a lapped ti napatalgedanen kadagiti adu a moderno-aldaw a kapadasan.
Kas pangarigan, dikay kadi umanamong a ti pannakaparalisado manipud tengnged nga agpababa ket maysa kadagita a bantay? Kaskasdi, maysa a quadriplegic nga agindeg idiay Vancouver, B.C., Canada, saanna laeng a naadal ti agipinta, babaen iti brutsa wenno iti maysa a palette nga ig-iggamanna babaen iti ngiwatna, no di ket masuportaranna pay ti bagina babaen ti panangilakona kadagitoy a naipintana a ladladawan. Mainayon pay, ti pammatina ti nangtignay kenkuana a mangisasao kadagiti dadduma maipapan iti maad-adalna iti Biblia, nga ar-aramiden dayta no situtugaw iti wheelchair wenno babaen ti panagsursuratna. Imakiniliana ti sursuratna babaen ti panangtuggel kadagiti teklado ti makinilia babaen ti maysa a kayo a tengtenglen ti ngiwatna. Tumabtabuno met a kanayon iti Nakristianuan a panaggigimong ket mangmangted ti palawag iti Teokratiko nga Eskuelaan ti Panagministro nga idadaulo dagiti Saksi ni Jehova. Ti ulidan iti pammatina, a buyogen ti kinagaget ken determinasion, ket maysa a gubuayan ti pammaregta kadagiti adda iti aglawlawna.
Ti pammati iti Sao ti Dios ken iti karkarina ti nangtulong pay met kadagiti dadduma. Kas pangarigan, natulongan dayta dagiti adu a nangparmek kadagiti di nakristianuan nga ug-ugali ken kababalin, kas kadagiti di umiso nga ar-aramid iti negosio, ti panagtakaw, panagsigarilio, panagsugal, panagbarbartek, espiritismo, seksual nga imoralidad, ken dagiti ar-aramid ti ulbod a relihion. Ti kangrunaan a banag kadagita amin a kapadasan isu ti pannakagun-od iti makakumbinsir nga ebidensia a ni Jehova a Dios ket adda, a ti Biblia isu ti naisurat a Saona, ket dagiti karkarina a naibinsabinsa iti Kasuratan mapagtalkanda ken matungpalda. Ti kasta a pammati mabalinna a mapaalis dagiti bambantay.