Biag nga Agnanayon Ditoy Daga—Namnama a Naggapu iti Dios
“Ti sangaparsuaan naipasakup iti kinabarengbareng . . . maibatay iti namnama.”—ROMA 8:20.
1, 2. (a) Apay a napateg kadatayo ti namnama a biag nga agnanayon ditoy daga? (b) Apay nga adu a tattao ti agduadua no posible met laeng ti biag nga agnanayon ditoy daga?
NALABIT a malagipmo ti rag-o a nariknam idi damo a naammuam nga iti asidegen a masanguanan, saanton a lumakay ken matay dagiti tattao no di ket agbiagdanto nga agnanayon ditoy daga. (Juan 17:3; Apoc. 21:3, 4) Mabalin a nagagaranka a nangiranud iti dayta a Nainkasuratan a namnama. Kinapudnona, ti namnama a biag nga agnanayon ket napateg a paset ti naimbag a damag nga ikaskasabatayo. Apektaranna ti panangmatmattayo iti biag.
2 Kadagiti kaaduan a relihion ti Kakristianuan, linaksidda dayta a namnama. Nupay isursuro ti Biblia a matay ti kararua, kaaduan a relihion ti mangisursuro iti di nainkasuratan a doktrina nga addaan ti tao iti imortal a kararua nga agtultuloy nga agbiag iti lubong dagiti espiritu. (Ezeq. 18:20) Gapuna, adu a tattao ti agduadua no posible met laeng ti biag nga agnanayon ditoy daga. No kasta, maisaludsodtayo: Talaga kadi nga isursuro ti Biblia dayta a namnama? No wen, kaano a damo nga impalgak dayta ti Dios kadagiti tattao?
“Naipasakup iti Kinabarengbareng . . .Maibatay iti Namnama”
3. Kasano a naibatad ti panggep ti Dios manipud pay rugi ti pakasaritaan ti tao?
3 Nabatad ti panggep ni Jehova agpaay iti sangatauan idi rugi ti pakasaritaan ti tao. Nalawag nga impasimudaag ti Dios nga agbiag nga agnanayon ni Adan no isu ket agtulnog. (Gen. 2:9, 17; 3:22) Awan duadua a naammuan dagiti nagkauna a kaputotan ni Adan no kasano a napukaw ti tao ti kinaperpekto, a pinatalgedan dagiti makita nga ebidensia. Nabangenan ti pagserkan ti minuyongan ti Eden, ken lumakay ken matay dagiti tattao. (Gen. 3:23, 24) Iti panaglabas ti panawen, immababa ti biag ti tao. Nagbiag ni Adan iti 930 a tawen. Ni Sem a nakalasat iti Layus ket nagbiag laeng iti 600 a tawen, ken ni Arpaksad nga anakna nagbiag iti 438 a tawen. Ti ama ni Abraham a ni Tera ket nagbiag iti 205 a tawen. Nagbiag ni Abraham iti 175 a tawen, ni Isaac nga anakna iti 180 a tawen, ken ni Jacob iti 147 a tawen. (Gen. 5:5; 11:10-13, 32; 25:7; 35:28; 47:28) Adu ti nakabigbig iti kaipapanan dayta nga iyaababa ti biag—napukaw ti namnama a biag nga agnanayon! Adda kadi pamatianda a maisubli dayta a namnama?
4. Ania ti rason a makapagtalek dagiti nagkauna a nasungdo a tattao nga isubli ti Dios dagiti bendision a napukaw ni Adan?
4 Kuna ti Sao ti Dios: “Ti sangaparsuaan [a tattao ket] naipasakup iti kinabarengbareng . . . maibatay iti namnama.” (Roma 8:20) Ania a namnama? Ti mismo a kaunaan a padto ti Biblia ipatuldona ti maysa a ‘bin-i’ a ‘mangdunor iti ulo ti serpiente.’ (Basaen ti Genesis 3:1-5, 15.) Kadagiti matalek a tattao, ti naikari a Bin-i ket pammatalged nga itungpal ti Dios ti panggepna agpaay iti sangatauan. Nangted dayta iti rason kadagiti lallaki a kas kada Abel ken Noe nga agtalekda nga isubli ti Dios dagiti bendision a napukaw ni Adan. Ammo dagitoy a lallaki a ti ‘panangdunor iti mukod ti bin-i’ ket ramanenna ti panangibukbok iti dara.—Gen. 4:4; 8:20; Heb. 11:4.
5. Ania ti mangipakita a mamati ni Abraham iti panagungar?
5 Usigentayo ni Abraham. Idi isu ket nasubok, “kaslanan indaton ni Isaac, . . . ti bugbugtong nga anakna.” (Heb. 11:17) Apay a sidadaan a mangaramid iti dayta? (Basaen ti Hebreo 11:19.) Mamati ngamin iti panagungar! Adda natalged a nakaibatayan dayta a pammatina. Saan kadi nga insubli ni Jehova ti abilidad ni Abraham nga agpaadu ken pinagbalinna a posible a maaddaanda ken Sara iti anak iti laksid ti kinalakay ken kinabaketda? (Gen. 18:10-14; 21:1-3; Roma 4:19-21) Malaksid iti dayta, inkari a mismo ni Jehova kenkuana: “Babaento ken Isaac ti maawaganto a bin-im.” (Gen. 21:12) Gapuna, adda naimbag a rason ni Abraham a mangnamnama a ti Dios pagungarenna ni Isaac.
6, 7. (a) Ania a tulag ti inaramid ni Jehova ken ni Abraham? (b) Kasano a ti kari ni Jehova kenni Abraham ket nangted iti namnama iti sangatauan?
6 Gapu iti mapagwadan a pammati ni Abraham, nakitulag kenkuana ni Jehova mainaig iti kaputotanna, wenno ‘bin-ina.’ (Basaen ti Genesis 22:18.) Ti kangrunaan a paset dayta a ‘bin-i’ ket napaneknekan a ni Jesu-Kristo. (Gal. 3:16) Imbaga ni Jehova kenni Abraham a ti ‘bin-ina’ ket umadu a “kas kadagiti bituen ti langlangit ken kas kadagiti binukel ti darat nga adda iti aplaya”—ti bilang a di ammo ni Abraham. (Gen. 22:17) Nupay kasta, naipalgak dayta a bilang idi agangay. Ni Jesu-Kristo ken ti 144,000, a makipagturayto kenkuana iti Pagarianna, ti mangbukel iti dayta a ‘bin-i.’ (Gal. 3:29; Apoc. 7:4; 14:1) Babaen ti Mesianiko a Pagarian, “amin a nasion iti daga bendisionandanto ti bagbagida.”
7 Mabalin a saan a maawatan ni Abraham ti naan-anay a kaipapanan ti tulagda ken Jehova. Kaskasdi, “inur-urayna ti siudad nga addaan kadagiti pudpudno a pamuon,” kuna ti Biblia. (Heb. 11:10) Dayta a siudad ket ti Pagarian ti Dios. Masapul a mapagungar ni Abraham tapno masagrapna dagiti bendision nga iburay ti Pagarian kas iti biag nga agnanayon ditoy daga. Masagrap met dayta dagidiay makalasat iti Armagedon wenno dagidiay mapagungar.—Apoc. 7:9, 14; 20:12-14.
“Ti Espiritu Nangyeg ti Pannakaparigat Kaniak”
8, 9. Apay a ti libro a Job ket saan laeng a maipapan kadagiti pakasuotan ti maysa a tao?
8 Iti nagbaetan ti panagbiag ti apoko ti tumeng ni Abraham a ni Jose ken ni propeta Moises, nagbiag ti maysa a lalaki nga agnagan iti Job. Ti libro ti Biblia a Job, a nalabit insurat ni Moises, inlawlawagna no apay nga impalubos ni Jehova nga agsagaba ni Job ken no ania ti nagbanagan dayta. Ngem ti libro a Job ket saan laeng a maipapan kadagiti pakasuotan ti maysa a tao; naipamaysa dayta kadagiti isyu a mangapektar iti sangatauan. Mangipaay ti libro iti naun-uneg a pannakaawat maipapan iti nalinteg a panangituray ni Jehova, ken ipalgakna no kasano a ti kinatarnaw ken ti namnama ti amin nga adipen ti Dios ditoy daga ket nairaman iti isyu a napataud idiay Eden. Nupay saan a naawatan ni Job dayta nga isyu, dina impalubos a maiparikna kenkuana dagiti tallo a gagayyemna a dina nasalimetmetan ti kinatarnawna. (Job 27:5) Daytoy koma ti mangpabileg iti pammatitayo ken tumulong a mangbigbig a mabalintayo a salimetmetan ti kinatarnawtayo ken itandudo ti kinasoberano ni Jehova.
9 Kalpasan ti panagbitla dagiti tallo a sinsinan a manangliwliwa ken Job, “ni Eliu nga anak ni Baraquel a Buzita simmungbat.” Ania ti nangtignay kenkuana nga agsao? “Napnoak iti sasao,” kinunana. “Ti espiritu nangyeg ti pannakaparigat kaniak iti tianko.” (Job 32:5, 6, 18) Nupay dagiti naipaltiing a sinao ni Eliu ket natungpal idi naisubli ti sigud a kasasaad ni Job, adda met kaipapananda kadagiti sabsabali. Mangted dayta iti namnama kadagiti amin a mangsalimetmet iti kinatarnawda.
10. Ania ti mangipakita a ti mensahe ni Jehova kadagiti indibidual ket addaan no dadduma iti dakdakkel a kaitungpalan iti sangatauan?
10 No dadduma, mangted ni Jehova iti mensahe iti maysa nga indibidual nga addaan met iti dakdakkel a kaitungpalan iti sangatauan. Nabatad daytoy iti padto ni Daniel mainaig iti tagtagainep ti ari ti Babilonia a ni Nabucodonosor maipapan iti pannakapukan ti dakkel a kayo. (Dan. 4:10-27) Nupay adda kaitungpalanna dayta ken Nabucodonosor, adda pay dakdakkel a kaitungpalanna. Ipamatmatna a ti panangituray ti Dios iti daga babaen ti maysa a pagarian nga agtaud ken Ari David ket agminar manen kalpasan ti 2,520 a tawen a nangrugi idi 607 K.K.P.a Ti turay ti Dios iti intero a lubong ket naitampok manen idi naitrono ni Jesu-Kristo kas nailangitan nga Ari idi 1914. Panunotenyo no kasano a ti turay ti Pagarian ibanagna iti mabiiten ti namnama ti natulnog a sangatauan!
“Ispalenna Koma Manipud Iyuulog iti Abut!”
11. Ania ti ipasimudaag dagiti sasao ni Eliu maipapan iti Dios?
11 Kas sungbatna ken Job, dinakamat ni Eliu ti maipapan iti “mensahero . . . pannakangiwat, maysa manipud sangaribu, tapno ibaga iti tao ti kinalintegna.” Kasano no daytoy a mensahero ket ‘agpakaasi iti Dios tapno isu pagragsakanna koma’? Kuna ni Eliu: “Iti kasta [ti Dios] paraburanna ken kunaenna, ‘Ispalenna koma manipud iyuulog iti abut! Nakasarakak iti subbot! Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.’” (Job 33:23-26) Ipasimudaag dagita a sasao a sidadaan ti Dios a mangawat iti “subbot” wenno pangabbong iti basol dagiti agbabbabawi a tattao.—Job 33:24.
12. Ania a namnama agpaay iti sangatauan ti dinakamat ni Eliu?
12 Kas kadagiti propeta a dida naan-anay a natarusan ti amin nga insuratda, nalabit a saan met a naawatan ni Eliu ti naan-anay a kaipapanan ti subbot. (Dan. 12:8; 1 Ped. 1:10-12) Kaskasdi, dagiti sasao ni Eliu ipasimudaagda ti namnama nga awatento ti Dios ti maysa a subbot ken wayawayaanna ti tao manipud iti panaglakay ken ipapatay. Karaman kadagiti dinakamat ni Eliu ti nagsayaat a namnama a biag nga agnanayon. Ipakita pay ti libro a Job nga addanto panagungar.—Job 14:14, 15.
13. Ania ti kaipapananna kadagiti Kristiano ti sasao ni Eliu?
13 Agingga ita, dagiti sasao ni Eliu ket addaan iti kaipapanan kadagiti minilion a Kristiano a mangnamnama a makalasat iti pannakadadael daytoy agdama a sistema ti bambanag. Dagiti nataengan a makalasat agsublidanto iti kinasalibukagda. (Apoc. 7:9, 10, 14-17) Kanayonanna, agtultuloy a makaay-ayo kadagiti matalek a tattao ti namnama a makitada dagiti mapagungar nga agsubli iti kinasalibukagda. Siempre, ti imortal a biag idiay langit nga agpaay kadagiti napulotan a Kristiano ken ti biag nga agnanayon ditoy daga nga agpaay iti “sabsabali a karnero” ni Jesus ket agpannuray iti panangipakitada iti pammati iti pangsubbot a daton ni Kristo.—Juan 10:16; Roma 6:23.
Maikkatton ni Patay
14. Ania ti mangipakita nga adda dakdakkel a kasapulan ngem iti Mosaiko a Linteg tapno maaddaan dagiti Israelita iti namnama a biag nga agnanayon?
14 Nagbalin a maysa a nasion ti kaputotan ni Abraham idi nakitulagda iti Dios. Idi intedna kadakuada ti Linteg, kinuna ni Jehova: “Masapul a salimetmetanyo dagiti paglintegak ken dagiti hudisial a pangngeddengko, a no aramidento ti maysa a tao, agbiagto met babaen kadakuada.” (Lev. 18:5) Ngem gapu ta saanda a naannurot dagiti perpekto a pagalagadan ti Linteg, nailunod dagiti Israelita babaen ti Linteg ket kasapulanda ti pannakawayawaya manipud iti dayta a pannakailunod.—Gal. 3:13.
15. Ania a bendision iti masanguanan ti naipaltiing nga isurat ni David?
15 Kalpasan ni Moises, pinaltiingan ni Jehova ti dadduma pay a mannurat iti Biblia tapno ilanadda ti namnama a biag nga agnanayon. (Sal. 21:4; 37:29) Kas pagarigan, ingngudo ni David ti maysa a salmo maipapan iti panagkaykaysa dagiti pudno nga agdaydayaw iti Sion babaen kadagitoy a sasao: “Sadiay imbilin ni Jehova a maadda ti bendision, ti mismo a biag agingga iti tiempo a di nakedngan.”—Sal. 133:3.
16. Babaen ken Isaias, ania ti inkari ni Jehova maipapan iti masanguanan agpaay iti “intero a daga”?
16 Ni Jehova pinaltiinganna ni Isaias a mangipadto iti biag nga agnanayon ditoy daga. (Basaen ti Isaias 25:7, 8.) Kas iti “pamalkut” a manglapped iti panaganges, ti basol ken ipapatay ket arigna a maysa nga ules a nangpadagsen iti sangatauan. Ipanamnama ni Jehova iti ilina nga alimonen, wenno ikkatennanto ti basol ken ipapatay “iti intero a daga.”
17. Ania ti naimpadtuan nga akem ti Mesias a nangted iti gundaway tapno magun-od ti agnanayon a biag?
17 Usigentayo met ti bilin a sagudayen ti Mosaiko a Linteg maipapan iti kalding maipaay ken Azazel. Maminsan iti kada tawen bayat ti Aldaw ti Panangabbong, ti nangato a padi ‘ipatayna ti dua nga imana iti ulo ti sibibiag a kalding ket ipudnona iti rabaw dayta dagiti amin a biddut ti annak ti Israel, ket masapul nga ikabilna ida iti rabaw ti ulo ti kalding ket masapul nga awiten ti kalding dagiti amin a biddutda nga ipan iti maysa a daga a desierto.’ (Lev. 16:7-10, 21, 22) Impadto ni Isaias ti iyaay ti Mesias, a mangitungpal iti umasping nga akem ken mangikkat kadagiti ‘sakit,’ ‘ut-ot,’ ken “ti mismo a basol ti adu a tattao,” iti kasta, nangted dayta iti gundaway tapno magun-od ti agnanayon a biag.—Basaen ti Isaias 53:4-6, 12.
18, 19. Ania a namnama ti naitampok iti Isaias 26:19 ken Daniel 12:13?
18 Babaen ken Isaias, kinuna ni Jehova iti ilina nga Israel: “Dagidiay minataymo agbiagdanto. Ti bangkay a kukuak—bumangondanto. Agriingkayo ken agdir-ikayo a sirarag-o, dakayo nga agtataeng iti tapok! Ta ti linnaawyo kas iti linnaaw dagiti malba, ket ti met laeng daga bay-annanto a dumteng iti pannakayanak uray dagidiay inutil ken patay.” (Isa. 26:19) Nalawag nga isuro ti Hebreo a Kasuratan ti namnama a panagungar ken biag nga agnanayon ditoy daga. Kas pagarigan, idi dandani 100 ti tawen ni Daniel, impanamnama kenkuana ni Jehova: “Aginanakanto, ngem tumakderkanto maipaay iti bingaymo iti panungpalan dagiti aldaw.”—Dan. 12:13.
19 Gapu iti namnama a panagungar, ni Marta naikunana ken Jesus maipapan iti natay a kabsatna: “Ammok a bumangonto inton panagungar iti kamaudianan nga aldaw.” (Juan 11:24) Dagiti kadi pannursuro ni Jesus ken dagiti naipaltiing a sursurat dagiti adalanna binaliwanda dayta a namnama? Ti kadi biag nga agnanayon ditoy daga ti agtultuloy a namnama nga ituktukon ni Jehova iti sangatauan? Usigentayo ti sungbat dagitoy a saludsod iti sumaganad nga artikulo.
[Footnote]
a Kitaenyo ti kapitulo 6 ti libro nga Ipangagyo ti Padto ni Daniel!
Mailawlawagyo Kadi?
• Ania ti nakaibatayan ti namnama ti sangaparsuaan a “naipasakup iti kinabarengbareng”?
• Ania ti mangipakita a mamati ni Abraham iti panagungar?
• Iti sasao ni Eliu kenni Job, ania a namnama ti dinakamatna agpaay iti sangatauan?
• Kasano nga impaganetget ti Hebreo a Kasuratan ti namnama a panagungar ken ti agnanayon a biag ditoy daga?
[Ladawan iti panid 5]
Dagiti sasao ni Eliu kenni Job mangtedda iti namnama a mawayawayaanto ti tao manipud iti panaglakay ken ipapatay
[Ladawan iti panid 6]
Naipanamnama ken Daniel nga isu ket ‘tumakderto maipaay iti bingayna iti panungpalan dagiti aldaw’