Biag nga Agnanayon Ditoy Daga—Nakristianuan a Namnama?
“[Ti Dios] punasennanto ti amin a lua kadagiti matada, ket awanton ni patay.”—APOC. 21:4.
1, 2. Kasanotayo nga ammo nga adu a Judio idi umuna a siglo ti mangnamnama nga agbiagda nga agnanayon ditoy daga?
MAYSA a nabaknang ken prominente nga agtutubo ti immasideg ken Jesus sa nagparintumeng ket kinunana: “Naimbag a Mannursuro, ania ti masapul nga aramidek tapno agtawidak iti agnanayon a biag?” (Mar. 10:17) Interesado ti agtutubo a manggun-od iti biag nga agnanayon—ngem sadino? Kas nausigtayon iti umuna nga artikulo, intukon ti Dios kadagiti Judio ti namnama a panagungar ken ti biag nga agnanayon ditoy daga, sumagmamano a siglo sakbayna. Dayta a namnama ti ammo ti adu a Judio idi umuna a siglo.
2 Agparang a ti panagungar ditoy daga ti pampanunoten ti gayyem ni Jesus a ni Marta idi kinunana maipapan iti natay a kabsatna: “Ammok a bumangonto inton panagungar iti kamaudianan nga aldaw.” (Juan 11:24) Pudno, saan a patien idi dagiti Saduceo nga adda panagungar. (Mar. 12:18) Ngem ti libro ni George Foot Moore a Judaism in the First Centuries of the Christian Era, kunana: “Dagiti sursurat . . . idi maikadua wenno umuna a siglo sakbay ti panawentayo pasingkedanda ti pammati nga addanto tiempo nga agungar ditoy daga dagiti natay.” Ti nabaknang nga agtutubo nga immasideg ken Jesus kayatna a magun-odan ti agnanayon a biag ditoy daga.
3. Ania a salsaludsod ti mausig iti daytoy nga artikulo?
3 Adu ita a relihion ken eskolar ti Biblia ti agkuna a saan a Nakristianuan a pannursuro ti namnama a biag nga agnanayon ditoy daga. Kaaduan ti mangnamnama nga agbiagda iti lubong dagiti espiritu kalpasan ti ipapatayda. Gapuna, no dagiti agbasbasa iti Kristiano a Griego a Kasuratan masalawda ti ebkas nga “agnanayon a biag,” adu ti mamati a dayta ket tumukoy iti biag idiay langit. Umiso kadi dayta? Ania ti kayat a sawen ni Jesus idi dinakamatna ti biag nga agnanayon? Ania ti patpatien dagiti adalanna? Isursuro kadi ti Kristiano a Griego a Kasuratan ti namnama a biag nga agnanayon ditoy daga?
Biag nga Agnanayon “iti Pannakaparsua Manen”
4. Ania ti mapasamak bayat ti “pannakaparsua manen”?
4 Isuro ti Biblia a mapagungarto dagiti napulotan a Kristiano tapno iturayanda ti daga manipud langit. (Luc. 12:32; Apoc. 5:9, 10; 14:1-3) Ngem idi dinakamat ni Jesus ti agnanayon a biag, saan a kanayon a dayta a grupo ti pampanunotenna. Usigenyo ti kinunana kadagiti adalanna kalpasan a pimmanaw a sileleddaang ti nabaknang nga agtutubo gapu ta dina kabaelan a tallikudan ti amin a sanikuana ket agbalin a pasurot ni Kristo. (Basaen ti Mateo 19:28, 29.) Kinuna ni Jesus kadagiti apostolna a karamandanto kadagiti makipagari ken mangukom kadagiti “sangapulo ket dua a tribu ti Israel,” kayatna a sawen, dagiti tattao ditoy daga a saan a makipagturay idiay langit. (1 Cor. 6:2) Dinakamatna met a magunggonaanto ti “tunggal maysa” a sumurot kenkuana. Dagita nga indibidual ‘tawidendanto met ti agnanayon a biag.’ Mapasamak amin dagitoy bayat ti “pannakaparsua manen.”
5. Ania ti kaipapanan ti “pannakaparsua manen”?
5 Ania ti tuktukoyen ni Jesus a “pannakaparsua manen”? Dayta nga ebkas ket naipatarus kas “baro a lubong” iti Ti Baro a Naimbag a Damag Biblia. Naipatarus dayta kas “baro a pannakaparsua” iti Ti Biblia, Philippine Bible Society, ken “ti pannakapabaro ti amin a bambanag” iti The Holy Bible—New International Version. Gapu ta saan nga inlawlawag ni Jesus dayta nga ebkas, nabatad a tuktukoyenna ti namnama a sinigsiglon a pagaammo dagiti Judio. Masapul a mapabaro dagiti kasasaad ditoy daga tapno maisubli ti dati a kasasaad iti minuyongan ti Eden sakbay a nagbasol da Adan ken Eva. Inton mapasamak ti pannakaparsua manen, matungpal ti inkari ti Dios a ‘panangparsuana iti baro a langlangit ken baro a daga.’—Isa. 65:17.
6. Iti ilustrasion maipapan iti karnero ken kalding, ania ti maadaltayo maipapan iti namnama a biag nga agnanayon?
6 Dinakamat manen ni Jesus ti biag nga agnanayon iti palawagna maipapan iti panungpalan ti sistema dagiti bambanag. (Mat. 24:1-3) “Inton ti Anak ti tao dumteng iti dayagna, ket amin dagiti anghel maikuyogda kenkuana,” kinunana, “iti kasta agtugawto iti nadayag a tronona. Ket amin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding.” Addanto dagidiay maukom nga ‘agturong iti agnanayon a pannakagessat, ngem dagiti nalinteg iti agnanayon a biag.’ “Dagiti nalinteg” nga umawat iti agnanayon a biag ket dagidiay sisusungdo a nangsuporta kadagiti napulotan iti espiritu a ‘kakabsat’ ni Kristo. (Mat. 25:31-34, 40, 41, 45, 46) Yantangay dagiti napulotan ti mapili nga agturay iti nailangitan a Pagarian, “dagiti nalinteg” ditoy daga ti iturayanto dayta a Pagarian. Impadto ti Biblia: “[Ti Ari a pinili ni Jehova] maaddaanto kadagiti masaksakupan manipud iti baybay agingga iti baybay ken manipud iti Karayan agingga kadagiti ungto ti daga.” (Sal. 72:8) Dagitoy a masakupan matagiragsakdanto ti agnanayon a biag ditoy daga.
Ania ti Ipakita ti Ebanghelio ni Juan?
7, 8. Ania a dua a nagduma a namnama ti dinakamat ni Jesus kenni Nicodemo?
7 Kas nailanad iti Ebanghelio da Mateo, Marcos, ken Lucas, inusar ni Jesus ti ebkas nga “agnanayon a biag” kadagiti immuna a nadakamat a situasion. Iti Ebanghelio ni Juan, inusar ni Jesus dayta nga ebkas iti agarup 17 a daras. Usigentayo ti dadduma a nagparanganna tapno maammuantayo no ania ti kinuna ni Jesus maipapan iti agnanayon a biag ditoy daga.
8 Sigun ken Juan, damo a dinakamat ni Jesus ti agnanayon a biag ken Nicodemo a maysa a Fariseo: “Malaksid no ti asinoman mayanak manen, saanna a mabalin a kitaen ti pagarian ti Dios.” Dagidiay sumrek iti Pagarian idiay langit masapul a ‘mayanakda manen.’ (Juan 3:3-5) Ngem saan laeng a dayta ti imbaga ni Jesus. Dinakamatna met ti namnama a silulukat iti sangatauan. (Basaen ti Juan 3:16.) Tuktukoyen ni Jesus ti namnama a biag nga agnanayon idiay langit agpaay kadagiti napulotan a pasurotna ken biag nga agnanayon ditoy daga agpaay kadagiti sabsabali.
9. Ania a namnama ti tinukoy ni Jesus iti Samaritana?
9 Kalpasan ti pannakisaritana ken Nicodemo idiay Jerusalem, nagpaamianan ni Jesus agturong idiay Galilea. Iti dalanna, nakasaritana ti maysa a babai iti bubon ni Jacob iti asideg ti siudad ti Sicar idiay Samaria. Kinunana iti babai: “Siasinoman nga uminum manipud iti danum nga itedkonto kenkuana saanton a pulos mawaw, ngem ti danum nga itedkonto kenkuana agbalinto kenkuana nga ubbog ti danum nga agburburayok a mangipaay iti agnanayon a biag.” (Juan 4:5, 6, 14) Daytoy a danum isimbolona dagiti probision ti Dios a mangisubli iti agnanayon a biag kadagiti amin a tattao, agraman kadagidiay agbiag ditoy daga. Iti libro nga Apocalipsis, nailadawan a mismo ti Dios nga agkunkuna: “Iti asinoman a mawaw mangtedakto nga awan bayadna manipud iti ubbog ti danum ti biag.” (Apoc. 21:5, 6; 22:17) Gapuna, ti biag nga agnanayon a tinukoy ni Jesus iti Samaritana ket saan laeng nga agpaay kadagiti napulotan nga agtawid iti Pagarian no di ket agpaay met kadagiti manamati nga addaan iti naindagaan a namnama.
10. Kalpasan a pinaimbagna ti maysa a lalaki iti ban-aw ti Bethzatha, ania ti imbaga ni Jesus kadagiti relihioso a bumusbusor maipapan iti agnanayon a biag?
10 Iti sumaganad a tawen, napan manen ni Jesus idiay Jerusalem. Pinaimbagna ti masakit a lalaki iti ban-aw ti Bethzatha. Kadagidiay Judio a nangbabalaw iti inaramid ni Jesus, kinunana kadakuada a “ti Anak saanna a kabalinan nga aramiden ti maysa a banag iti bukodna a nakem, no di laeng ti makitana nga ar-aramiden ti Ama.” Kalpasan nga imbagana kadakuada a ti Ama ‘impabiangna iti Anak ti isuamin a panangukom,’ kinuna ni Jesus: “Ti dumngeg iti saok ken mamati iti daydiay nangibaon kaniak addaan iti agnanayon a biag.” Kinuna pay ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto [ti timek ti Anak ti tao] ket rummuarda, dagidiay nagaramid iti naimbag a bambanag iti panagungar iti biag, dagidiay nangyugali iti nakadakdakes a bambanag iti panagungar iti pannakaukom.” (Juan 5:1-9, 19, 22, 24-29) Ibagbaga ni Jesus kadagiti manangidadanes a Judio nga isu ti dinutokan ti Dios a mangibanag iti namnama dagiti Judio a biag nga agnanayon iti daga ket aramidenna dayta babaen ti panangpagungarna kadagiti natay.
11. Kasanotayo nga ammo a ti biag nga agnanayon ditoy daga ket karaman iti dinakamat ni Jesus iti Juan 6:48-51?
11 Idiay Galilea, nangrugi a sumurot ken Jesus ti rinibu a tattao nga agkidkiddaw iti tinapay a simimilagro nga impaay ni Jesus. Dinakamat kadakuada ni Jesus ti sabali pay a kita ti tinapay—“ti tinapay ti biag.” (Basaen ti Juan 6:40, 48-51.) “Ti tinapay nga itedko isu ti lasagko,” kinunana. Inted ni Jesus ti biagna saan laeng nga agpaay kadagidiay makipagturay kenkuana iti nailangitan a Pagarian no di ket “maigapu iti biag ti lubong,” ti masubbot a sangatauan. “Ti asinoman [a] mangan iti daytoy a tinapay,” kayatna a sawen, dagidiay mangipakita iti pammati iti bileg ti pangsubbot a daton ni Jesus, maaddaanto iti namnama nga agnanayon a biag. Kinapudnona, ti ebkas nga “agnanayon a biag” ramanenna ti nabayagen a namnama dagiti Judio a panagbiag nga agnanayon ditoy daga bayat ti panagturay ti Mesias.
12. Ania a namnama ti tuktukoyen ni Jesus idi imbagana kadagiti bumusbusor nga ‘ipaayanna iti agnanayon a biag dagiti karnerona’?
12 Idi agangay, iti Piesta ti Dedikasion idiay Jerusalem, kinuna ni Jesus kadagiti bumusbusor kenkuana: “Saankayo a mamati, agsipud ta saankayo a paset ti karnerok. Imdengan dagiti karnerok ti timekko, ket am-ammok ida, ket surotendak. Ket ipaayak ida iti agnanayon a biag.” (Juan 10:26-28) Ti kadi laeng biag idiay langit ti tuktukoyen ni Jesus, wenno pampanunotenna met ti agnanayon a biag iti paraiso a daga? Nabiit pay a liniwliwa ni Jesus dagiti pasurotna babaen kadagitoy a sasao: “Dikay agbuteng, bassit nga ipastoran, agsipud ta inanamongan ni Amayo ti panangited kadakayo ti pagarian.” (Luc. 12:32) Ngem iti dayta met laeng a Piesta ti Dedikasion, kinuna ni Jesus: “Addaanak iti sabsabali a karnero, nga awan iti daytoy a pagyaponan; masapul met nga iyegko dagidiay.” (Juan 10:16) Gapuna, idi kasarsarita ni Jesus dagiti bumusbusor kenkuana, dinakamatna nga agpadpada ti namnama a nailangitan a biag agpaay iti “bassit nga ipastoran” ken ti namnama nga agnanayon a biag ditoy daga agpaay iti minilion a “sabsabali a karnero.”
Pagaammon a Namnama
13. Ania ti kayat a sawen ni Jesus idi kinunana: “Makikaduakanto kaniak idiay Paraiso”?
13 Bayat ti panagsagabana iti kayo a pagtutuokan, nangted ni Jesus iti di mabalusingsing a pammatalged mainaig iti namnama ti sangatauan. Kinuna kenkuana ti managdakdakes a nailansa iti abayna: “Jesus, laglagipennak inton makagtengka iti pagariam.” Inkari kenkuana ni Jesus: “Pudno ibagak kenka ita nga aldaw, Makikaduakanto kaniak idiay Paraiso.” (Luc. 23:42, 43) Gapu ta agparang a maysa a Judio dayta a lalaki, ammona ti maipapan iti Paraiso ken iti namnama a biag nga agnanayon ditoy daga iti masanguanan.
14. (a) Ania ti mangipakita a saan a dagus a naawatan dagiti apostol ti nailangitan a namnama? (b) Kaano a naawatan dagiti pasurot ni Jesus ti maipapan iti nailangitan a namnama?
14 Ngem masapul nga ilawlawag idi ni Jesus ti maipapan iti nailangitan a namnama. Idi imbagana kadagiti adalanna nga isu ket mapan idiay langit tapno mangisagana iti lugar agpaay kadakuada, saanda a naawatan ti kayatna a sawen. (Basaen ti Juan 14:2-5.) “Adu pay a banag ti sawek kadakayo,” kinunana kadakuada idi agangay, “ngem saanyo a kabaelan nga awiten ida iti agdama. Nupay kasta, inton dumteng dayta, ti espiritu ti kinapudno, idalannakayto iti isuamin a kinapudno.” (Juan 16:12, 13) Kalpasan laeng ti Pentecostes 33 K.P., idi napulotanda iti espiritu ti Dios tapno agbalin nga ar-ari iti masanguanan, a naawatan dagiti pasurot ni Jesus a ti pagturayanda ket idiay langit. (1 Cor. 15:49; Col. 1:5; 1 Ped. 1:3, 4) Ti namnama a pannakipagturay idiay langit ket maysa a palgaak, ken nagbalin dayta a tema dagiti naipaltiing a surat iti Kristiano a Griego a Kasuratan. Ngem patalgedan kadi dagitoy a surat ti namnama ti sangatauan a biag nga agnanayon ditoy daga?
Ania ti Kuna Dagiti Naipaltiing a Surat?
15, 16. Kasano a ti naipaltiing a surat kadagiti Hebreo ken dagiti sasao ni Pedro ipatuldoda ti namnama a biag nga agnanayon ditoy daga?
15 Iti surat ni apostol Pablo kadagiti Hebreo, tinukoyna dagiti padana a manamati kas “nasantuan a kakabsat, [a] makiramraman iti nailangitan a pannakaayab.” Nupay kasta, kinunana met a ti Dios intalekna ken Jesus “ti mapagnaedan a daga nga umay.” (Heb. 2:3, 5; 3:1) Iti Kristiano a Griego a Kasuratan, ti orihinal a sao para iti “mapagnaedan a daga” kanayon a tukoyenna ti daga a pagnanaedan dagiti tattao. Gapuna, “ti mapagnaedan a daga nga umay” tuktukoyenna ti masanguanan a sistema ti bambanag ditoy daga nga iturayan ni Jesu-Kristo. Iti kasta, ibanagto ni Jesus ti kari ti Dios: “Dagiti nalinteg tagikuaendanto ti daga, ket agtaengdanto nga agnanayon iti dayta.”—Sal. 37:29.
16 Napaltiingan ni apostol Pedro a mangisurat maipapan iti masakbayan ti sangatauan. Insuratna: “Ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.” (2 Ped. 3:7) Ania ti mangsukat kadagiti agdama a natauan a gobierno ken ti nadangkes a kagimongan ti tao? (Basaen ti 2 Pedro 3:13.) Sukatanto dayta ti “baro a langlangit”—ti Mesianiko a Pagarian ti Dios—ken ti “baro a daga”—ti nalinteg a kagimongan dagiti tattao a pudno nga agdaydayaw iti Dios.
17. Kasano a nailadawan ti namnama ti sangatauan iti Apocalipsis 21:1-4?
17 Ti maudi a libro ti Biblia gutugotenna ti pusotayo babaen iti sirmata maipapan iti pannakaisubli ti sangatauan iti kinaperpekto. (Basaen ti Apocalipsis 21:1-4.) Dayta ti namnama ti manamati a sangatauan sipud pay idi napukaw ti tao ti kinaperpektona iti minuyongan ti Eden. Ti nalinteg a tattao agbiagdanto nga agnanayon iti Paraiso a daga ket didanto lumakay wenno bumaketen. Daytoy a namnama ket naan-anay a naibatay agpadpada iti Hebreo a Kasuratan ken iti Kristiano a Griego a Kasuratan, ken agtultuloy a mangpabileg kadagiti matalek nga adipen ni Jehova agingga ita.—Apoc. 22:1, 2.
Mailawlawagyo Kadi?
• Ania ti kayat a sawen ni Jesus kadagiti sasao nga “iti pannakaparsua manen”?
• Ania ti insarita ni Jesus kenni Nicodemo?
• Ania ti inkari ni Jesus iti managdakdakes a nailansa iti abayna?
• Kasano a ti surat kadagiti Hebreo ken ti sasao ni Pedro patalgedanda ti namnama a biag nga agnanayon ditoy daga?
[Ladawan iti panid 8]
Dagiti marakarnero a tattao agbiagdanto nga agnanayon ditoy daga
[Dagiti Ladawan iti panid 10]
Insarita ni Jesus ti maipapan iti agnanayon a biag