Agtalekkayo ken Jehova a Tungpalenna ti Panggepna

“Dagiti nalinteg tagikuaendanto ti daga, ket agtaengdanto kenkuana nga agnanayon.”​—SALMO 37:29.

1. Ania ti panggep ni Jehova maipaay kadagiti tattao ken iti daytoy a daga?

IDI pinarsua ni Jehova dagiti immuna a nagannak kadatayo, da Adan ken Eva, inaramidna ida a perpekto. Ken pinarsuana ida tapno agbiagda nga agnanayon ditoy daga​—no la ketdi tungpalenda dagiti lintegna. (Genesis 1:26, 27; 2:17) Mainayon pay, insaad ti Dios ida iti paraiso. (Genesis 2:8, 9) Kinuna ni Jehova kadakuada: “Agbungakayo ken agadukayo ket punnuenyo ti daga ken iturayanyo.” (Genesis 1:28) No kasta, agsaknapto dagiti kaputotanda iti intero a daga, ket agbalinto daytoy a planeta a paraiso a napno kadagiti perpekto, naragsak a tattao. Anian a nagsayaat ti kasasaad ti natauan a pamilia idi damo! “Nakita ti Dios amin nga inaramidna ket, adtoy! nasayaatda unay.”​—Genesis 1:31.

2. Aniada a salsaludsod ti patauden ti kasasaad ti panagbiag ti tao?

² Nupay kasta, ti kasasaad ti tao iti rinibribu a tawenen ket maisupadi iti orihinal a panggep ti Dios. Saan a perpekto ken naragsak ti sangatauan. Nariribuk dagiti kasasaad iti lubong, ket kas naipadto, kumarkaroda iti tiempotayo. (2 Timoteo 3:1-5, 13) Kasanotay ngarud a masigurado a matungpalto ti panggep ti Dios maipaay kadagiti tattao iti saanen a mabayag? Agpaut pay kadi dagiti nariribuk a kasasaad?

Ania ti Makagapu a Rimmigat ti Kasasaad?

3. Apay a di pinagpatingga nga insigida ni Jehova ti yaalsa ti sangatauan?

³ Ammo dagidiay addaan umiso a pannakaammo iti naipaltiing a Sao ti Dios no apay nga impalubos ni Jehova dagitoy dakes a kasasaad ditoy daga. Ammoda met no anianto ti aramidenna kadagitoy. Manipud iti salaysay ti Biblia, naammuanda nga inabuso dagiti immuna a nagannak kadatayo ti wayawayada nga agpili, maysa a nakaskasdaaw a sagut nga inted ti Dios kadagiti tattao. (Idiligyo ti 1 Pedro 2:16.) Sibibiddut nga inkeddengda ti agbiag a naisina iti Dios. (Genesis, kapitulo 2 ken 3) Namataud ti yaalsada kadagiti nagpateg a saludsod, kas iti: Adda aya kalintegan ti Soberano ti Uniberso a mangituray kadagiti tattao? Ti aya turayna ti kasayaatan kadakuada? Agballigi aya ti turay ti tao nga awan ti panangiwanwan ti Dios? Ti kasayaatan a pamay-an tapno masungbatan dagitoy a saludsod isu ti panangipalubos kadagiti tattao nga agturay iti adu a siglo. Dagiti resulta ipakitada nga awan duadua no agballigi met laeng dagiti tattao a naisina iti Nangaramid kadakuada.

4, 5. (a) Ania ti nagbanagan ti panangilaksid ti tao iti turay ti Dios? (b) Ania ti awan duadua a pinaneknekan ti ilalabas ti tiempo?

⁴ Idi tinallikudan da Adan ken Eva ti Dios, dinan pinagtalinaed ida a perpekto. Gapu ta inkedkednan ti suportana, kimmapuyda. Nagbanag daytoy iti kinaimperpekto, panaglakay, ken kamaudiananna ipapatay. Babaen dagiti linteg ti tinnawidan, impasa dagiti immuna a nagannak kadatayo dagitoy makadangran nga epekto kadagiti amin a kaputotanda, a pakairamanantayo. (Roma 5:12) Ket ania met ngay ti resulta ti panagturay ti tao iti rinibribu a tawen? Bin-ig a pagdaksan, kas sipupudno a kunaen ti Eclesiastes 8:9: “Ti tao inturayanna ti tao iti pagdaksanna.”

⁵ Awan duadua nga ipakita ti ilalabas ti tiempo a di kabaelan dagiti tattao nga iturong ti biagda a sibaballigi a naisina iti Namarsuada. Kinuna ti napaltiingan a mannurat ti Biblia a ni Jeremias: “O Jehova, ammok a ti dalan ti tao saan nga agtaud kenkuana met laeng. Saan nga agtaud iti tao a magna ti panangiturong kadagiti addangna.”​—Jeremias 10:23; Deuteronomio 32:4, 5; Eclesiastes 7:29.

Saan a Nagbalbaliw ti Panggep ti Dios

6, 7. (a) Iti panaglabas ti rinibribu a tawen ti historia, nagbalbaliwen aya ti panggep ni Jehova? (b) Ania ti nairaman iti panggep ni Jehova?

⁶ Iti ilalabas ti rinibribu a tawen ti pakasaritaan ti tao​—a napno iti kinadakes ken panagsagaba​—nagbalbaliwen aya ti panggep ti Dios? Kunaen ti Saona: “Kastoy ti kuna ni Jehova, ti Namarsua kadagiti langlangit, Isu ti pudno a Dios, ti Nangbukel iti daga ken Nangaramid iti dayta, Daydiay sititibker a nangipasdek iti dayta, a saanna a pinarsua nga awan serserbina, no di ket binukelna tapno pagnaedan.” (Isaias 45:18) Isu a binukel ti Dios ti daga tapno pagtaengan dagiti tattao, ket isu dayta pay laeng ti panggepna.

⁷ Saan laeng a pinarsua ni Jehova ti daga tapno pagnaedan no di pay ket pinanggepna nga agbalin a paraiso a tagiragsaken dagiti perpekto, naragsak a tattao. Dayta ti gapuna nga impadto ti Biblia nga addanto “maysa a baro a daga,” maysa a baro a kagimongan ti tao, a ‘pagtaenganto ti kinalinteg.’ (2 Pedro 3:13) Ket idiay Apocalipsis 21:4, kunaen kadatayo ti Sao ti Dios nga iti baro a lubongna, “punasennanto ti amin a lua kadagiti mata [ti sangatauan], ket awanton ni patay, awanto metten ti panagleddaang wenno panagsangit wenno ut-ot.” Isut’ gapuna a nadakamat ni Jesus dayta um-umay a baro a lubong ditoy daga kas “Paraiso.”​—Lucas 23:43.

8. Apay a masiguradotayo a tungpalento ni Jehova ti panggepna?

⁸ Tangay ni Jehova ti mannakabalin-amin ken ti masirib-iti-amin a Namarsua iti uniberso, awan ti makakeltay iti panggepna. “Insapata ni Jehova dagiti buybuyot, a kunana: ‘Pudno unay a kas iti panangpanunotko, kastanto ti maaramid; ken kas iti pinanggepko, kastanto ti matungpal.’” (Isaias 14:24) Gapuna, no kuna ti Dios nga aramidennanto daytoy daga a paraiso a pagnaedan dagiti perpekto a tattao, kastanto ti mapasamak. Kinuna ni Jesus: “Naragsak dagiti naalumamay ti kaririknada, yantangay tawidendanto ti daga.” (Mateo 5:5; idiligyo ti Salmo 37:29.) Makapagtalek ken makapagtignaytayo a maitunos iti dayta a kari. Kinapudnona, mabalintay nga ipusta ti biagtayo maipuon iti dayta.

Nagtalekda ken Jehova

9. Ania ti inaramid ni Abraham a mangipakita iti panagtalekna ken Jehova?

⁹ Adu a managbuteng-Dios a tattao iti historia ti nangipusta iti biagda maipuon iti panggep ti Dios iti daga agsipud ta kapkapnekanda a tungpalenna dayta. Nupay mabalin a limitado ti pannakaammoda, nagtalekda iti Dios ken impangrunada iti biagda ti panangaramid ti pagayatanna. Kas pangarigan, adda dita ni Abraham, a nagbiag agarup 2,000 a tawen sakbay nga immay ni Jesus ditoy daga​—nabayag sakbay a nangrugi a maisurat ti Biblia. Nagtalek a tungpalen ni Jehova dagiti karina. Mabalin a nasursuro ni Abraham ti maipapan iti Namarsua manipud iti matalek nga inapona a ni Sem, a sinuruan ni Noe. Isu nga idi imbaga ti Dios ken Abraham a panawanna ti narang-ay nga Ur dagiti Caldeos ket mapan iti ganggannaet ken napeggad a daga ti Canaan, ammo ti patriarka a mapagtalkanna ni Jehova, isut’ gapuna a napan. (Hebreo 11:8) Idi agangay, kinuna ni Jehova kenkuana: “Mangaramidakto iti dakkel a nasion nga agtaud kenka.”​—Genesis 12:2.

10, 11. Apay a situtulok ni Abraham a mangidaton iti bugbugtong nga anakna a ni Isaac?

¹⁰ Ania ti napasamak kalpasan ti panangputot ni Abraham ken Isaac? Impasimudaag ni Jehova ken Abraham a ni Isaac ti pagtaudanto dagiti kaputotanna a mangbukel iti dakkel a nasion. (Genesis 21:12) No kasta, kasla konkontraen ni Jehova ti imbagana idi nga imbilinna ken Abraham, kas panangsubok iti pammatina, nga idatonna ti anakna a ni Isaac. (Genesis 22:2) Kaskasdi, buyogen naan-anay a panagtalek ken Jehova, nagtungpal ni Abraham, nga aktual nga innalana ti imukona tapno patayenna ni Isaac. Iti kamaudiananna, nangibaon ti Dios iti maysa nga anghel a nangigawid ken Abraham.​—Genesis 22:9-14.

¹¹ Apay a kasta unay ti kinatulnog ni Abraham? Ilawlawag ti Hebreo 11:17-19: “Babaen iti pammati, idi isu nasubok, ni Abraham kaslanan indaton ni Isaac, ket ti tao a siraragsak nga immawat kadagiti kari ginandatna nga idaton ti bugbugtong nga anakna, nupay naikuna kenkuana: ‘Ti maawaganto iti “bin-im” ket babaento ken Isaac.’ Ngem pinanunotna nga isu kabaelan ti Dios a pagungaren uray pay manipud kadagiti natay; ket manipud sadiay isu inawatna met iti mangiladawan a pamay-an.” Kasta met, kunaen ti Roma 4:20, 21: “Gapu iti kari ti Dios di nagpangpangadua [ni Abraham] iti kinakurang ti pammati, . . . a naan-anay a nakumbinsir a no ania ti inkari [ti Dios] kabaelanna met nga aramiden.”

12. Kasano a nagunggonaan ni Abraham gapu iti pammatina?

¹² Nagunggonaan ni Abraham gapu iti pammatina saan laeng a babaen ti pannakaispal ni Isaac ken babaen ti panangpataudna iti “dakkel a nasion” no di ket iti sabali pay a pamay-an. Kinuna ti Dios ken Abraham: “Babaen ti bin-im mabendisionanto dagiti amin a nasion iti daga gapu ta impangagmo ti timekko.” (Genesis 22:18) Kasano? Agtaudto iti kapuonan ni Abraham ti Ari ti nailangitan a Pagarian ti Dios. Dadaelento a naan-anay dayta a pagarian daytoy dakes a lubong nga adda iti babaen ni Satanas. (Daniel 2:44; Roma 16:20; Apocalipsis 19:11-21) Kalpasanna, iti nadalusan a daga iti sidong ti turay ti Pagarian, agsaknapto ti Paraiso iti intero a daga, ket tagiragsakento dagiti tattao manipud iti “amin a nasion” a mangar-aramid iti pagayatan ti Dios ti perpekto a salun-at ken biag nga agnanayon. (1 Juan 2:15-17) Ken nupay limitado laeng ti pannakaammo ni Abraham maipapan iti Pagarian, nagtalek iti Dios ken pinaspasungadanna ti pannakaipasdek dayta [a Pagarian].​—Hebreo 11:10.

13, 14. Apay a nagtalek ni Job iti Dios?

¹³ Sumagmamano a gasut a tawen kalpasanna, adda dita ni Job, a nagbiag iti nagbaetan ti maika-17 ken maika-16 a siglo K.K.P. idiay Arabia itan. Nagbiag met [ni Job] sakbay a nangrugi a maisurat ti Biblia. Ni Job ket “awan pakapilawanna ken nalinteg, ken managbuteng iti Dios ken liniklikanna ti dakes.” (Job 1:1) Idi sinaplit ni Satanas ni Job iti nakaar-ariek, naut-ot a sakit, “saan a nangisawang [dayta a matalek a lalaki] iti uray maysa a dakes a balikas” iti laksid ti panagsagabana. (Job 2:10, The New English Bible) Nagtalek ni Job iti Dios. Ket nupay dina ammo ti makagapu no apay nga agsagsagaba iti kasta unay, impustana ti biagna maipuon iti Dios ken kadagiti karina.

¹⁴ Ammo ni Job nga uray pay no matay, kabaelan ti Dios nga isubli ti biagna babaen ti panagungar. Impasimudaagna daytoy a namnama idi kinunana ken Jehova a Dios: “O sapay koma ta ilemmengnak idiay Sheol [ti tanem], . . . tapno tudingam kaniak ti maysa a nadutokan a panawen ket lagipennak! No matay ti tao, agbiagto aya manen? . . . Umawagkanto, ket sungbatankanto.” (Job 14:13-15) Nupay agrigrigat, nagkammatalek ni Job iti kinasoberano ni Jehova, a kunana: “Agingga iti matayak diakto ikkaten kaniak ti kinatarnawko!”​—Job 27:5.

15. Kasano nga inyebkas ni David ti panagtalekna iti panggep ni Jehova?

¹⁵ Agarup innem a siglo kalpasan ni Job ken agarup sangaribu a tawen sakbay nga immay ni Jesus ditoy daga, inyebkas ni David ti panagtalekna iti baro a lubong. Kinunana kadagiti salmo: “Dagidiay agpannuray ken Jehova tagikuaendanto ti daga. Ta bassit pay a darikmat, ket ti nadangkes maawanton . . . Ngem dagiti naemma tagikuaendanto ti daga, ken maay-ayatandanto iti kinaruay ti talna. Dagiti nalinteg tagikuaendanto ti daga, ket agtaengdanto kenkuana nga agnanayon.” Gapu iti di maisin a namnamana, indagadag ni David: “Agtalekka ken Jehova . . . Pagay-ayatam met ni Jehova, ket isu itdennanto kenka dagiti tarigagay ta pusom.”​—Salmo 37:3, 4, 9-11, 29.

16. Ania ti ninamnama ti ‘dakkel nga ulep dagiti saksi’?

¹⁶ Iti panaglabas dagiti siglo, addaan dagiti matalek a lallaki ken babbai ti kastoy met laeng a namnama iti biag nga awan inggana ditoy daga. Kinapudnona, buklenda ti ‘dakkel nga ulep dagiti saksi’ a literal a nangipusta iti biagda maipuon kadagiti kari ni Jehova. Adu kadagiti nagkauna a saksi ni Jehova ti naparparigat ken napapatay gapu iti pammatida, “tapno maragpatda ti nasaysayaat a panagungar.” Kasano a kasta? Idiay baro a lubong, gunggonaanto ti Dios ida iti nasaysayaat a panagungar ken iti gundaway nga agbiag nga agnanayon.​—Juan 5:28, 29; Hebreo 11:35; 12:1.

Dagiti Kristiano a Saksi Agtalekda iti Dios

17. Kasano katibker ti panagtalek dagiti umuna-siglo a Kristiano ken Jehova?

¹⁷ Idi umuna a siglo K.P., impalgak ni Jehova iti kongregasion Kristiano a nabiit pay a naipasdek ti ad-adu pay a detalye maipapan iti Pagarian ken ti panagturayna iti daga. Kas pangarigan, pinaltiingan ti espirituna ni apostol Juan a mangisurat a ti bilang dagiti kakadua ni Jesu-Kristo iti Pagarian ti langit ket 144,000. Dagitoy ket matalek nga ad-adipen ti Dios a ‘nagatang manipud iti sangatauan.’ (Apocalipsis 7:4; 14:1-4) Makipagturaydanto ken Kristo idiay langit “kas ar-ari” iti daga. (Apocalipsis 20:4-6) Natibker ti panagtalek dagiti umuna-siglo a Kristiano ken Jehova a tungpalenna ti panggepna iti nailangitan a Pagarian ken iti naindagaan a sakupna ta situtulokda a matay gapu iti pammatida. Adu kadakuada ti kastat’ inaramidna.

18. Kasano a tultuladen dagiti Saksi ni Jehova ita dagiti katupagda idi un-unana a panawen?

¹⁸ Itatta, agarup lima a milion a Saksi ni Jehova ti addaan iti kasta met laeng a panagtalek iti Dios kas kadagiti katupagda a nagbiag kadagiti napalabas a siglo. Ipuspusta met dagitoy agdama-aldaw a Saksi ti biagda maipuon kadagiti kari ti Dios. Indedikarda ti biagda kenkuana ken addaanda iti kompleto a Biblia a mangpatibker iti pammatida. (2 Timoteo 3:14-17) Tultuladen dagitoy moderno-aldaw a Saksi ni Jehova dagiti pasurot ni Jesus idi umuna a siglo a nangikuna nga “agtulnog[da] iti Dios kas agturay imbes a kadagiti tattao.” (Aramid 5:29) Iti daytoy a siglo, adu kadagitoy a Kristiano a Saksi ti siuulpit a naidadanes. Napapatay pay ketdi dagiti dadduma gapu iti pammatida. Natay dagiti dadduma iti sakit, aksidente, wenno kinalakay. Nupay kasta, kas kadagiti matalek a saksi iti napalabas, nagtalekda iti Dios agsipud ta ammoda nga isublinanto ti biagda iti baro a lubongna babaen ti pannakapagungarda.​—Juan 5:28, 29; Aramid 24:15; Apocalipsis 20:12, 13.

19, 20. Ania ti mabigbigtayo maipapan iti padto ti Biblia para iti panawentayo?

¹⁹ Ammo dagiti Saksi ni Jehova a ti pannakaiyegda manipud iti amin a nasion iti sangalubongan a panagkakabsat ket nabayagen a naipadto iti Biblia. (Isaias 2:2-4; Apocalipsis 7:4, 9-17) Ket iti panangiwanwan ni Jehova, mangaskasabada iti intero a lubong tapno urnongenda dagiti dadduma pay a nasingpet-panagpuspusona a tattao iti anamong ken pannalaknibna. (Proverbio 18:10; Mateo 24:14; Roma 10:13) Insaad amin dagitoy ti naan-anay a panagtalekda ken Jehova, nga ammoda nga iti saanen a mabayag yegnanton ti nakaskasdaaw a baro a lubongna.​—Idiligyo ti 1 Corinto 15:58; Hebreo 6:10.

²⁰ Ipakita dagiti padto ti Biblia nga addan ti lubong ni Satanas iti maudi nga al-aldawna iti agarup 80 a tawen itan, sipud daydi nagpateg a tawen 1914. Asidegen a manungpal daytoy a lubong. (Roma 16:20; 2 Corinto 4:4; 2 Timoteo 3:1-5) Gapuna, natibker ti pakinakem ken determinado dagiti Saksi ni Jehova gapu ta iti saanen a mabayag naan-anayton nga iturayan ti Pagarian ti Dios ti intero a daga. Babaen ti panamagpatinggana iti daytoy agdama a dakes a lubong ken panangiyegna iti nalinteg a baro a lubongna, pukawento a naan-anay ti Dios ti dakes a kasasaad ditoy daga a mapaspasamak iti nakaad-adun a siglo.​—Proverbio 2:21, 22.

21. Apay a makapagrag-otayo nupay nariribuk dagiti kasasaad ita?

²¹ Kalpasanna, iti agnanayon, ipakitanto ti Dios ti dakkel a panangipategna kadatayo babaen ti panangiburayna kadagiti bendision nga ad-adu nga amang ngem ti rigat a sinagsagabatayo iti napalabas. Nakaad-adunto a naimbag a banag ti mapasamak kadatayo iti baro a lubong ta mapunasto iti lagiptayo dagiti rigat a linak-amtayo iti napalabas. Anian a makaliwliwa a maammuan nga ‘ukradento [ni Jehova] ti imana ket pennekenna ti tarigagay ti isuamin a sibibiag.’​—Salmo 145:16; Isaias 65:17, 18.

22. Apay a rumbeng nga agtalektayo ken Jehova?

²² Idiay baro a lubong, makitanto ti matalek a sangatauan ti kaitungpalan ti Roma 8:21: “Ti sangaparsuaan a mismo mawayawayaanto met manipud iti pannakaadipen iti panagrupsa ket maaddaan iti nadayag a wayawaya dagiti annak ti Dios.” Makitadanto ti pannakatungpal ti kararag nga insuro ni Jesus kadagiti pasurotna: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mateo 6:10) Agtalekkayo ngarud a naan-anay ken Jehova agsipud ta ti di mapaay a karina ket: “Dagiti nalinteg tagikuaendanto ti daga, ket agtaengdanto kenkuana nga agnanayon.”​—Salmo 37:29.

Kasanoyo a Sungbatan?

◻ Ania ti panggep ni Jehova maipaay kadagiti tattao ken iti daytoy a daga?

◻ Apay nga impalubos ti Dios dagiti dakes a kasasaad ditoy daga?

◻ Kasano nga impakita dagiti matalek a tattao idi ugma ti panagtalekda ken Jehova?

◻ Apay nga agtalek dagiti adipen ti Dios ita ken Jehova?

[Ladawan iti panid 16]

Pinarsua ti Dios dagiti tattao tapno tagiragsakenda ti biag nga agnanayon iti paraiso a daga

[Ladawan iti panid 18]

Nagtalek ni Abraham iti kabaelan ni Jehova a mangpagungar kadagiti natay