LEKSION 19
Dagiti Kadi Saksi ni Jehova ket Pudno a Kristiano?
Kas Saksi ni Jehova, mamatikami a pudnokami a Kristiano. Apay? Kitaem ti nakaibatayan dagiti patpatienmi, ti naidumduma a naganmi, ken ti ayatmi iti maysa ken maysa.
1. Nakaibatayan dagiti patpatien dagiti Saksi ni Jehova?
Kinuna ni Jesus: “Ti sao [ti Dios] ket kinapudno.” (Juan 17:17) Kas ken Jesus, kanayon nga ibatay dagiti Saksi ni Jehova dagiti patpatienda iti Sao ti Dios. Kitaem ti pakasaritaan dagiti Saksi ni Jehova. Iti maudi a paset ti 1800’s, maysa a grupo dagiti estudiante ti Biblia ti nangadal a naimbag iti Biblia. Imbatayda dagiti patpatienda iti ibagbaga ti Biblia, uray naiduma dagita iti doktrina ti dadduma a relihion. Kalpasanna, imbagada iti sabsabali dagiti kinapudno iti Biblia a naadalda.a
2. Apay a maawagankami a Saksi ni Jehova?
Aw-awagan ni Jehova dagiti agdaydayaw kenkuana kas Saksina ta ibagbagada ti kinapudno maipapan kenkuana. (Hebreo 11:4–12:1) Kas pagarigan, idi un-unana, imbaga ti Dios kadagiti agdaydayaw kenkuana: “Dakayo dagiti saksik.” (Basaen ti Isaias 43:10.) Naawagan ni Jesus kas “ti Matalek a Saksi.” (Apocalipsis 1:5) Isu a manipud idi 1931, inusarmin ti nagan a Saksi ni Jehova. Ipagpannakkelmi dayta a nagan.
3. Kasano a tultuladen dagiti Saksi ni Jehova ti ayat ni Jesus?
Kasta unay ti panagayat ni Jesus kadagiti adalanna ken imbilangna ida a kapamiliana. (Basaen ti Marcos 3:35.) Kasta met laeng dagiti Saksi ni Jehova iti intero a lubong. Agkaykaysada ken kaslada maysa a pamilia. Isu nga aw-awaganmi ti maysa ken maysa a kabsat. (Filemon 1, 2) Sursurotenmi met daytoy a bilin: “Ayatenyo ti amin a kakabsatyo.” (1 Pedro 2:17) Ipakpakita dagiti Saksi ni Jehova daytoy nga ayat iti adu a pamay-an kas iti panangtulongmi kadagiti kapammatianmi iti intero a lubong no agkasapulanda.
AMMUEM TI AD-ADU PAY
Adalem ti ad-adu pay maipapan iti pakasaritaan dagiti Saksi ni Jehova, ken kitaem ti dadduma pay nga ebidensia a dakami ket pudno a Kristiano.
Ibatbatay dagiti pudno a Kristiano dagiti patpatienda iti Biblia, ken ipakpakaammoda dagita iti sabsabali
4. Naibatay iti Biblia dagiti patpatienmi
Impakpakauna ni Jehova a nalawlawagto ti pannakaawattayo iti Biblia. Basaen ti Daniel 12:4 ken footnote, sa pagsaritaan daytoy a saludsod:
Ania ti “umadunto” kadagiti agdaydayaw iti Dios no itultuloyda nga adalen ti Biblia?
Kitaem no kasano nga inadal ti maysa a grupo dagiti estudiante ti Biblia, a pakairamanan ni Charles Russell, ti Sao ti Dios. I-play ti VIDEO, sa pagsaritaan ti sumaruno a saludsod.
Iti video, kasano nga inadal ni Charles Russell ken dagiti padana nga Estudiante ti Biblia ti Sao ti Dios?
Ammom kadi?
Adda dagiti gundaway a mabalbaliwan ti dadduma a patpatienmi. Apay? No kasano nga in-inut a makitam ti detalye ti maysa a napintas a hardin bayat a sumingsingising ti init, in-inut met a palpalawagen ti Dios ti pannakaawattayo kadagiti kinapudno iti Biblia. (Basaen ti Proverbio 4:18.) Nupay saan nga agbalbaliw ti Biblia, balbaliwanmi dagiti patpatienmi bayat a lumawlawag ti pannakaawatmi iti Biblia.
5. Agbibiagkami maitunos iti naganmi
Apay a pinilimi nga usaren ti nagan a Saksi ni Jehova? I-play ti VIDEO, sa pagsaritaan ti sumaruno a saludsod.
Apay a husto laeng a maawagankami kas Saksi ni Jehova?
Apay a nangpili ni Jehova kadagiti tattao nga agbalin a saksina? Tapno paneknekanda nga isu ti pudno a Dios, ta adu a kinaulbod ti naipabasol kenkuana. Kitaem ti dua kadagita a kinaulbod.
Isursuro ti dadduma a relihion kadagiti miembroda a kayat ti Dios nga agusarda iti imahen iti panagdaydayawda. Basaen ti Levitico 26:1, sa pagsaritaan dagitoy a saludsod:
Sigun iti teksto, ania ti agpayso? Ania ti marikrikna ni Jehova iti panagdayaw iti idolo?
Isursuro ti dadduma a lider ti relihion a ni Jesus ti Dios. Basaen ti Juan 20:17, sa pagsaritaan dagitoy a saludsod:
Sigun iti teksto, ania ti agpayso? Agpada kadi ti Dios ken ni Jesus?
Ania ti mariknam ita ta naammuam a nangibaon ni Jehova kadagiti Saksina a mangikasaba iti kinapudno maipapan kenkuana ken iti Anakna?
6. Ay-ayatenmi ti maysa ken maysa
Ibagbaga ti Biblia a dagiti Kristiano ket kas iti nadumaduma a paset ti bagi ti tao. Basaen ti 1 Corinto 12:25, 26, sa pagsaritaan dagitoy a saludsod:
Ania koma ti aramiden dagiti pudno a Kristiano no marigrigatan dagiti kapammatianda?
Ania ti naobserbaram maipapan iti ayat nga ipakpakita dagiti Saksi ni Jehova?
No adda dagiti marigrigatan a Saksi ni Jehova iti maysa a lugar, tumulong a dagus dagiti kapammatianda iti intero a lubong. Tapno makitam ti maysa a pagarigan, i-play ti VIDEO. Kalpasanna, pagsaritaan ti sumaruno a saludsod.
Kasano a ti panagtitinnulong dagiti Saksi ni Jehova ipakitana nga ay-ayatenda ti maysa ken maysa?
Ipakpakita dagiti pudno a Kristiano ti ayat kadagiti agkasapulan
KUNA TI DADDUMA: “Kabarbaro laeng a relihion ti Saksi ni Jehova.”
Kaano pay nga inawagan ni Jehova dagiti agdaydayaw kenkuana kas saksina?
SUMARIO
Pudno a Kristiano dagiti Saksi ni Jehova. Maymaysakami a pamilia nga agdaydayaw ken Jehova iti intero a lubong. Ibatbataymi dagiti patpatienmi iti Biblia ken ipakpakaammomi ti kinapudno maipapan ken Jehova.
Rebiu
Apay a pinilimi nga usaren ti nagan a Saksi ni Jehova?
Kasano ti panangtratomi iti maysa ken maysa?
Panagkunam, pudno kadi a Kristiano dagiti Saksi ni Jehova?
AGDISKOBREKA PAY
Ammuem ti ad-adu pay maipapan iti pakasaritaanmi.
Dagiti Saksi ni Jehova—Nabiag a Pammati, Paset 1: Nakaruar iti Kasipngetan (1:00:53)
Kitaem ti maysa a pagarigan no kasano nga impakita dagiti Saksi ni Jehova a kinaulbod dagiti pannursuro a patpatien ti dadduma.
Ammuem dagiti sungbat kadagiti mabalin a maisalsaludsodmo maipapan kadagiti Saksi ni Jehova.
“Masansan a Maisalsaludsod Maipapan Kadagiti Saksi ni Jehova” (web page)
Kagurgura ni Stephen dagiti sabali ti pulina isu a nakaaramid kadagiti krimen. Kitaem no ania ti nakitana kadagiti Saksi ni Jehova a nangbalbaliw iti biagna.
“Dimmakes Pay ti Dakesen a Biagko” (Ti Pagwanawanan, Hulio 1, 2015)
a Manipud idi 1879, ipabpablaaken dagiti Saksi ni Jehova ti magasin a Pagwanawanan a mangilawlawag iti ibagbaga ti Biblia.