Nasanay a Mangsaksi a Naan-anay

“Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.”​—ARAMID 1:8.

1, 2. Ania ti naibilin ken ni Pedro, ken siasino ti nangibilin iti dayta?

“NI Jesus a taga Nazaret . . . imbilinna a mangasabakami kadagiti tattao ken mangipaay iti naan-anay a pangsaksi nga isu daytoy ti Maysa nga inkeddeng ti Dios nga agbalin nga ukom dagiti sibibiag ken dagiti natay.” (Aramid 10:38, 42) Babaen dagita a sasao, inlawlawag ni apostol Pedro iti sangapamiliaan ni Cornelio nga isu ket nabilin nga agebanghelio.

² Kaano nga imbilin dayta ni Jesus? Mabalin a pampanunoten ni Pedro ti kinuna ni napagungar a Jesus sakbay unay a nagpalangit. Iti dayta a gundaway, kinuna ni Jesus kadagiti matalek nga adalanna: “Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Ngem sumagmamano a panawen sakbay pay dayta, ammo ni Pedro a kas maysa nga adalan, masapul nga isaritana kadagiti sabsabali ti pammatina ken ni Jesus.

Tallo a Tawen a Panagsanay

3. Ania a milagro ti inaramid ni Jesus, ken ania ti inyawisna kada Pedro ken Andres?

³ Sumagmamano a bulan kalpasan ti bautismona idi 29 K.P., nangasaba ni Jesus iti Baybay ti Galilea a pagdakdaklisan da Pedro ken ti kabsatna a ni Andres. Nagpatpatnag nga awan ti nakalapda. Kaskasdi, kinuna ni Jesus kadakuada: “Ipanmo iti adalem, ket iwayatyo dagiti iketyo tapno makakalap.” Idi inaramidda ti imbilin ni Jesus, “nakasakawda iti adu unay nga ikan. Iti kinapudnona, nangrugi a napispisang dagiti iketda.” Nagbuteng ni Pedro idi naimatanganna dayta a milagro, ngem inandingay ni Jesus, a kunkunana: “Isardengmo ti agbuteng. Manipud ita agkalapkan iti tattao a sibibiag.”​—Lucas 5:4-10.

4. (a) Kasano nga insagana ni Jesus dagiti adalanna a mangasaba? (b) Ania ti nagdumaan ti ministerio ni Jesus ken ti ministerio dagiti adalanna?

⁴ Saan a nagtaktak da Pedro ken Andres, agraman da Santiago ken Juan nga annak ni Zebedeo. Imbatida dagiti barangayda ket simmurotda ken ni Jesus. Iti agarup tallo a tawen, kimmuyogda ken ni Jesus a nangasaba ket sinanayna ida nga agebanghelio. (Mateo 10:7; Marcos 1:16, 18, 20, 38; Lucas 4:43; 10:9) Kalpasan dayta, kinuna kadakuada ni Jesus idi Nisan 14, 33 K.P.: “Ti mangwatwat iti pammati kaniak, aramidento met dayta dagiti trabaho nga aramidek; ket aramidennanto dagiti trabaho a dakdakkel ngem dagitoy.” (Juan 14:12) Naan-anay a mangsaksi dagiti adalan ni Jesus kas iti inaramidna, ngem dakdakkel nga amang ti trabahuenda. Di nagbayag, nabigbigda nga amin nga agbalin nga adalan ket nasken a mangsaksi “iti amin a nasion,” agingga “iti panungpalan ti sistema ti bambanag.”​—Mateo 28:19, 20.

5. Kadagiti ania a pamay-an a makasursurotayo manipud iti panangsanay ni Jesus kadagiti pasurotna?

⁵ Agbibiagtayo iti “panungpalan ti sistema ti bambanag.” (Mateo 24:3) Saan a kas kadagiti nagkauna nga adalan, ditay mabalin ti kumuyog ken ni Jesus ket paliiwen ti panangasabana. Kaskasdi, makasursurotayo iti impaayna a panangsanay babaen ti panangadaltayo iti Biblia no kasano ti panangasabana ken no ania dagiti instruksionna kadagiti pasurotna. (Lucas 10:1-11) Kanayonanna, salaysayen daytoy nga artikulo ti maysa a napateg a banag nga impakita ni Jesus kadagiti adalanna​—ti umiso a panangmatmat iti trabaho a panangasaba.

Pannakaseknan Kadagiti Tattao

6, 7. Ania a galad ni Jesus ti namagbalin nga epektibo ti ministeriona, ken kasanotay a matulad ni Jesus iti dayta a banag?

⁶ Apay nga epektibo ti panangsaksi ni Jesus? Ti maysa a makagapu ket ti nasged nga interes ken pannakaseknanna kadagiti tattao. Ti salmista impadtona a ni Jesus “maasianto iti daydiay nanumo ken iti daydiay napanglaw.” (Salmo 72:13) Awan duadua a tinungpalna dayta a padto. Kuna ti Biblia maipapan iti maysa nga okasion: “Idi makitana dagiti bunggoy simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” (Mateo 9:36) Uray dagiti napeklan a managbasol nariknada ti pannakaseknanna isu nga immadanida kenkuana.​—Mateo 9:9-13; Lucas 7:36-38; 19:1-10.

⁷ Agbalintayo nga epektibo no ipakitatayo met ti kasta a pannakaseknan kadagiti tattao. Sakbay a mangasabakayo, apay a diyo utoben iti apagbiit no apay a kasapulan unay dagiti tattao ti impormasion nga idanonyo kadakuada? Panunotenyo no ania dagiti mabalin a parikutda a ti laeng Pagarian ti makasolbar. Determinadokayo koma nga agbalin a positibo iti isuamin yantangay diyo ammo no siasino ti mangipangag iti mensahe. Nalabit a ti sumaruno a makasaritayo ikarkararagna nga adda koma makasaritana a kas kadakayo tapno tumulong kenkuana!

Tinignay ti Ayat

8. Kas ken Jesus, ania ti mangtigtignay kadagiti pasurotna a mangikasaba iti naimbag a damag?

⁸ Ti naimbag a damag nga indeklara ni Jesus ket mainaig iti pannakaibanag ti pagayatan ni Jehova, ti pannakasantipikar ti naganna, ken ti pannakaalangon ti kinasoberanona​—dagiti kapatgan nga isyu a nakaipasanguan ti sangatauan. (Mateo 6:9, 10) Gapu ta ay-ayatenna ni Amana, nagtalinaed a natarnaw ni Jesus ken naan-anay nga impakaammona ti Pagarian, a mangrisut kadagita nga isyu. (Juan 14:31) Gapu ta dayta met laeng ti mangtigtignay kadagiti pasurot ni Jesus ita, siaanep a makipasetda iti ministerio. Kinuna ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna,” agraman ti bilin nga ikasaba ti naimbag a damag ken mangaramid kadagiti adalan.​—1 Juan 5:3; Mateo 28:19, 20.

9, 10. Malaksid iti panagayat iti Dios, ania pay nga ayat ti mangtignay kadatayo a mangipaay iti naan-anay a panangsaksi?

⁹ Kinuna ni Jesus kadagiti pasurotna: “No ayatendak, tungpalenyonto dagiti bilinko. Ti addaan kadagiti bilinko ket tungpalenna ida, isu dayta ti agayat kaniak.” (Juan 14:15, 21) Gapuna, ti panagayat ken ni Jesus ti rumbeng a mangtignay kadatayo a mangsaksi iti kinapudno ken mangtungpal kadagiti dadduma pay nga imbilin ni Jesus. Iti maysa kadagiti panagparangna kalpasan ti panagungarna, ni Jesus indagadagna ken ni Pedro: “Pakanem dagiti karnerok. . . . Ipastoram dagiti babassit a karnerok. . . . Pakanem dagiti babassit a karnerok.” Ania koma ti mangtignay ken ni Pedro a mangitungpal iti dayta? Imparipirip ni Jesus ti sungbat idi inulit-ulitna nga inimtuod ken Pedro: “Ay-ayatennak kadi? . . . Ay-ayatennak kadi? . . . Adda kadi panagayatmo kaniak?” Wen, ti panagayat ni Pedro ken ni Jesus ti mangtignay kenkuana a mangipaay iti naan-anay a panangsaksi, mangbirok kadagiti ‘babassit a karnero’ ni Jesus, sa agserbi kas naespirituan a pastorda.​—Juan 21:15-17.

¹⁰ No kadatayo ita, saantay a kas ken Pedro a personal a nakalangenna ni Jesus. Kaskasdi, adda nauneg a pannakaawattayo iti inaramid ni Jesus maipaay kadatayo. Natignay dagiti pusotayo gapu iti dakkel nga ayatna a nakaigapuan ti ‘ipapatayna maipaay iti tunggal tao.’ (Hebreo 2:9; Juan 15:13) Mariknatayo ti narikna ni Pedro idi insuratna: “Ti ayat nga adda iti Kristo pilitennakami (wenno, gutugotennakami) . . . Isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana.” (2 Corinto 5:14, 15) Maipakitatayo nga ipatpategtayo ti panagayat ni Jesus kadatayo ken ay-ayatentay met isuna babaen ti sireregget a panangitungpaltayo iti bilin a naan-anay a mangsaksi. (1 Juan 2:3-5) Ditay pulos kayat a tagilag-anen ti panangasaba, a kasla matmatantayo a kadawyan laeng ti pateg ti daton ni Jesus.​—Hebreo 10:29.

Agtultuloy a Naipamaysa Kadagiti Napateg a Bambanag

11, 12. Apay nga immay ni Jesus ditoy lubong, ken kasano nga impakitana a dayta ti kapatgan kenkuana?

¹¹ Idi adda ni Jesus iti saklang ni Poncio Pilato, kinunana: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Saan nga impalubos ni Jesus nga adda aniaman a manglapped iti panangsaksina iti kinapudno. Dayta ti pagayatan ti Dios kenkuana.

¹² Ni Satanas sinubokna ni Jesus iti dayta a banag. Di nagbayag kalpasan ti bautismo ni Jesus, kinuna ni Satanas a mapagbalinna ni Jesus a maysa a natan-ok a tao iti lubong, nga itedna kenkuana “dagiti amin a pagarian ti lubong ken ti dayagda.” (Mateo 4:8, 9) Idi agangay, kayat dagiti Judio a pagbalinenda nga ari ni Jesus. (Juan 6:15) Mabalin a panunoten ti dadduma nga adda dagiti pagimbaganna no inawat ni Jesus dagita a tukon yantangay kas maysa nga ari ditoy daga, adu ti maaramidan ni Jesus agpaay iti sangatauan. Ngem saan a kasta ti panagpampanunot ni Jesus. Ti kapatgan kenkuana ket ti panangsaksi iti kinapudno.

13, 14. (a) Saan a nasinga ni Jesus kadagiti ania? (b) Nupay nakurapay ni Jesus iti material, ania ti nagapuananna?

¹³ Saan met a nagpasinga ni Jesus iti pananggun-od iti kinabaknang. Gapuna, saan a nasaliwanwan ti panagbiagna. Awan pay ketdi ti bukodna a pagtaengan. Naminsan kinunana: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.” (Mateo 8:20) Idi natay ni Jesus, ti laeng nairekord nga adda balorna nga ik-ikutanna ket ti kawesna a nagbibinnunotan dagiti Romano a soldado. (Juan 19:23, 24) No kasta, makuna kadi nga awan mamaay ti biag ni Jesus? Saan!

¹⁴ Dakdakkel nga amang ti nagapuanan ni Jesus ngem iti asinoman a kabaknangan a pilantropo. Kinuna ni Pablo: “Ammoyo ti di kaikarian a kinamanangngaasi ni Apotayo a Jesu-Kristo, a nupay isu nabaknang pimmanglaw maigapu kadakayo, tapno bumaknangkayo koma babaen ti kinakurapayna.” (2 Corinto 8:9; Filipos 2:5-8) Nupay nakurapay iti material, linuktan ni Jesus ti gundaway tapno dagiti napakumbaba nga indibidual matagiragsakda ti biag nga agnanayon iti kinaperpekto. Anian a yamantayo kenkuana! Ken anian a ragsaktayo iti nasagrapna a gunggona gapu ta impamaysana ti biagna iti panagaramid iti pagayatan ti Dios!​—Salmo 40:8; Aramid 2:32, 33, 36.

15. Ania ti napatpateg ngem iti kinabaknang?

¹⁵ Dagiti Kristiano ita a mangikagkagumaan a mangtulad ken ni Jesus dida met agpasinga iti pananggun-od iti kinabaknang. (1 Timoteo 6:9, 10) Ammoda a ti kinabaknang panam-ayenna ti biag, ngem ammoda a saan nga agpannuray iti dayta ti agnanayon a pagimbaganda. No matay ti maysa a Kristiano, awan ti maitulong kenkuana ti material a kinabaknangna, no kasano a ti kawes ni Jesus ket saan a nakatulong kenkuana idi natay. (Eclesiastes 2:10, 11, 17-19; 7:12) No matay ti maysa a Kristiano, ti relasionna ken ni Jehova ken Jesu-Kristo ti kakaisuna a napateg nga ik-ikutanna.​—Mateo 6:19-21; Lucas 16:9.

Saan a Paupay iti Ibubusor

16. Kasano a sinango ni Jesus ti ibubusor?

¹⁶ Nagtultuloy a sinaksian ni Jesus ti kinapudno iti laksid ti ibubusor. Saan a naupay uray ammona nga agpatingga ti ministeriona ditoy daga babaen ti sakripisio nga ipapatayna. Kinuna ni Pablo maipapan ken ni Jesus: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Hebreo 12:2) Imutektekanyo ta ‘inumsi ni Jesus ti bain.’ Saan a napateg ken ni Jesus no ania ti panangmatmat kenkuana dagiti kabusor. Naipamaysa ti atensionna iti panangaramid iti pagayatan ti Dios.

17. Ania ti maadaltayo iti panagibtur ni Jesus?

¹⁷ Iti panangyaplikarna iti leksion mainaig iti panagibtur ni Jesus, imparegta ni Pablo kadagiti Kristiano: “Utobenyo a sisisinged daydiay nakapagibtur iti kasta a mangbusor a panagsao dagiti managbasol maibusor kadagiti bukodda a pagimbagan, tapno saankay koma a mabannog ken agkapuy kadagiti kararuayo.” (Hebreo 12:3) Pudno, makapaksuy ti inaldaw a pannakaipasango iti ibubusor wenno pannakaumsi. Makabannog ti agtultuloy a panagkedked kadagiti ituktukon ti lubong, a nalabit pakadismayaan dagiti kakabagian a mangidagdagadag iti panangragpat iti sekular a balligi. Ngem kas ken Jesus, agpannuraytayo iti tulong ni Jehova bayat a determinadotayo a mangipangpangruna iti Pagarian iti biagtayo.​—Mateo 6:33; Roma 15:13; 1 Corinto 2:4.

18. Ania ti masursurotayo kadagiti sinao ni Jesus ken ni Pedro?

¹⁸ Impakita ni Jesus a dina kayat ti pasinga idi dinakamatna kadagiti adalanna ti maipapan iti umad-adani nga ipapatayna. Kinuna ni Pedro a ‘kaasian’ koma ni Jesus ti bagina ket sigurado a saanto a ‘mapasamak kenkuana dayta a pagtungpalan.’ Saan a kayat a denggen ni Jesus ti aniaman a mangpakapuy iti determinasionna a mangaramid iti pagayatan ni Jehova. Tinallikudanna ni Pedro ket kinunana: “Inka iti likudak, Satanas! Maysaka a pakaitibkolak, agsipud ta pampanunotem, saan a ti pampanunot ti Dios, no di ket ti pampanunot ti tattao.” (Mateo 16:21-23) Kanayon koma a kasta ti determinasiontayo a mangiwaksi kadagiti natauan a kapanunotan ket kanayon nga agpaiwanwantayo kadagiti kapanunotan ti Dios.

Dagiti Agnanayon a Gunggona

19. Nupay nagaramid kadagiti milagro, ania ti kapatgan a paset ti ministerio ni Jesus?

¹⁹ Adu a milagro ti inaramid ni Jesus a mangipakita nga isu ti Mesias. Pinagungarna pay dagiti natay. Naay-ayo dagiti tattao kadagita a milagro, ngem saan nga immay ni Jesus ditoy daga tapno laeng agserbi kas pilantropo. Immay tapno saksianna ti kinapudno. Ammona a temporario dagiti impaayna a pisikal a pagimbagan. Natay met laeng uray dagiti pinagungarna. Babaen laeng ti panangsaksina iti kinapudno a matulonganna dagiti dadduma a gumun-od iti biag nga agnanayon.​—Lucas 18:28-30.

20, 21. Kasano a makapagtalinaed a natimbeng dagiti pudno a Kristiano no maipapan kadagiti naimbag nga aramid?

²⁰ Iti kaaldawantayo, adda dagidiay mangikagkagumaan a mangtulad kadagiti naimbag nga aramid ni Jesus babaen ti panangibangonda kadagiti ospital wenno panangipaay iti dadduma pay a serbisio kadagiti napanglaw iti lubong. Adda met dagidiay personal nga aggasto iti dakkel tapno maibanagda dayta, ket makomendaran ti kinapasnekda; ngem temporario laeng ti aniaman a maipaayda a bang-ar. Ti laeng Pagarian ti makaipaay iti permanente a pannakabang-ar. Gapuna, kas iti inaramid idi ni Jesus, naipamaysa dagiti Saksi ni Jehova iti panangsaksi iti kinapudno maipapan iti Pagarian.

²¹ Siempre, mangaramid iti kinaimbag dagiti pudno a Kristiano. Insurat ni Pablo: “Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti amin, ngem nangnangruna kadagidiay nainaig kadatayo iti pammati.” (Galacia 6:10) Iti panawen ti rigat wenno no adda agkasapulan, saantay nga agpangadua a ‘mangaramid iti naimbag’ kadagiti kaarrubatayo wenno kadagiti Kristiano a kakabsattayo. Kaskasdi, agtultuloy a naipamaysatayo iti panangsaksi iti kinapudno.

Suroten ti Ulidan ni Jesus

22. Apay a dagiti Kristiano kasabaanda dagiti kaarrubada?

²² Insurat ni Pablo: “Pudno unay, asiak pay no diak indeklara ti naimbag a damag!” (1 Corinto 9:16) Saanna a tinagilag-an ti panangikasaba iti naimbag a damag yantangay kaipapanan dayta ti biagna ken ti biag dagiti agdengdengngeg kenkuana. (1 Timoteo 4:16) Kasta met laeng ti panangmatmattayo iti ministeriotayo. Kayattay a tulongan dagiti kaarrubatayo. Kayattay nga ipakita ti panagayattayo ken ni Jehova. Kayattay a paneknekan ti panagayattayo ken ni Jesus ken ti panangipategtayo iti nasged nga ayatna kadatayo. Gapuna, ikasabatayo ti naimbag a damag ket agbiagtayo “saanen nga agpaay iti tartarigagay dagiti tattao, no di ket agpaay iti pagayatan ti Dios.”​—1 Pedro 4:1, 2.

23, 24. (a) Ania ti masursurotayo iti milagro mainaig iti ikan? (b) Siasino ita ti mangipapaay iti naan-anay a panangsaksi?

²³ Kas ken Jesus, saantay a pasinga uray no uyawen wenno sipupungtot a laksiden dagiti sabsabali ti mensahetayo. Makasursurotayo iti milagro nga inaramid ni Jesus idi inawisna da Pedro ken Andres a sumurot kenkuana. Ammotayo a no agtulnogtayo ken ni Jesus ket piguratibo nga iwayattayo dagiti ikettayo uray kadagiti kasla awan ikanna a dandanum, mabalin nga addanto makalaptayo. Adu a Kristiano ti nakakalap iti adu nga ikan kalpasan ti mano a tawen a panagkalapda kadagiti dandanum a kasla awanan kadagiti ikan. Dadduma ti immakar kadagiti nabunga a lugar ket adu ti nakalapda sadiay. Aniaman ti aramidentayo, saantay a mauma a mangiwayat kadagiti ikettayo. Ammotayo a saan pay nga imbaga ni Jesus a nalpasen ti trabaho a panangasaba iti aniaman a paset ti daga.​—Mateo 24:14.

²⁴ Nasurok ita nga innem a milion a Saksi ni Jehova ti okupado iti nasurok a 230 a pagilian. Iti Pebrero 1, 2005 nga isyu Ti Pagwanawanan, mailanadto ti tinawen a sangalubongan a report ti nagapuananda kabayatan ti 2004 a tawen serbisio. Dayta a report ti mangipakita iti nabaknang a panangbendision ni Jehova iti trabaho a panangasaba. Kadagiti nabatbati a tiempo daytoy sistema ti bambanag, sapay koma ta itultuloytayo nga ipapuso ti makagutugot a sasao ni Pablo: “Ikasabam ti sao, naganetgetka koma iti dayta.” (2 Timoteo 4:2) Itultuloytayo koma ti mangipaay iti naan-anay a panangsaksi agingga nga ibaga ni Jehova a nalpasen ti trabaho.

Mangrugi iti daytoy a tawen, ti Makatawen a Report ti Serbisio dagiti Saksi ni Jehova ket saanen nga agparang iti Enero 1 nga isyu Ti Pagwanawanan. Maipablaakto dayta iti tunggal isyu ti Pebrero 1.

Masungbatanyo Kadi?

• Kasanotayo a makasursuro iti panangsanay ni Jesus kadagiti adalanna?

• Ania ti panangmatmat ni Jesus kadagiti tattao a kinasabaanna?

• Ania ti mangtigtignay kadatayo a naan-anay a mangsaksi?

• Kadagiti ania a pamay-an a maitultuloytayo a maipamaysa ti panangitungpal iti pagayatan ti Dios, kas inaramid ni Jesus?

[Ladawan iti panid 15]

Epektibo ti ministeriotayo no ipakitatayo ti pannakaseknan kadagiti tattao a kas iti impakita ni Jesus

[Ladawan iti panid 16, 17]

Immay ni Jesus ditoy daga kangrunaanna tapno saksianna ti kinapudno

[Dagiti Ladawan iti panid 17]

Naipamaysa dagiti Saksi ni Jehova iti naan-anay a panangsaksi