Sursuruenyo ti Aguray!

“Agpannurayakto iti Dios ti pakaisalakanak; ti Diosko denggennakto.”​—MIKIAS 7:7.

1, 2. (a) Kasano a nagdaksan dagiti Israelita ti di umiso a kababalinda idiay let-ang? (b) Ania ti mabalin a mapasamak iti maysa a Kristiano a di mangpatanor iti umiso a kababalin?

ADU a banag iti biag ti mabalin a matmatan iti positibo wenno negatibo a wagas, depende iti kababalintayo. Idi adda dagiti Israelita iti let-ang, namilagruan a naipaayanda iti manna. Inwarasda koma ti panagkitada iti let-ang ket nagyamanda koma unay ken Jehova gapu iti panangtaraonna kadakuada. Panangipakita koma dayta iti positibo a kababalin. Imbes ketdi, inil-iliwda ti nagduduma a kita ti taraon sadi Egipto ken inreklamoda a naumadan iti manna. Anian a nagdakes a kababalin!​—Numeros 11:4-6.

² Umasping iti dayta, agpannuray iti kababalin ti maysa a Kristiano ita no matmatanna a nasayaat wenno dakes dagiti bambanag. No di umiso ti kababalinna, nalaka a mapukaw ti rag-o ti maysa a Kristiano, ket serioso dayta agsipud ta, kas kinuna ni Nehemias: “Ti rag-o ni Jehova isu ti pigsa[tayo].” (Nehemias 8:10) Ti positibo, naragsak a kababalin tulongannatayo nga agtalinaed a napigsa ken taginayonenna ti talna ken panagkaykaysa iti kongregasion.​—Roma 15:13; Filipos 1:25.

3. Kasano a nakatulong ken Jeremias ti umiso a kababalin kadagiti nariribuk a tiempo?

³ Nupay agbibiag idi ni Jeremias iti narikut a tiempo, imparangarangna ti positibo a kababalin. Uray idi naimatanganna ti nakaam-amak a pannakarbek ti Jerusalem idi 607 K.K.P., positibo ti panangmatmatna. Saan a lipaten ni Jehova ti Israel, ket makalasat ti nasion. Insurat ni Jeremias iti libro nga Un-unnoy: “Isu ti kinamanangngaasi ni Jehova a saantay a maibus, ta dagiti kaasina saan nga aggibus. Mapabaroda a binigat; dakkel ti kinamatalekmo.” (Un-unnoy 3:22, 23) Iti intero a historia, dagiti adipen ti Dios a naipasango kadagiti narigat unay a kasasaad inkagumaanda a sinalimetmetan ti positibo, naragsak pay ketdi, a kababalin.​—2 Corinto 7:4; 1 Tesalonica 1:6; Santiago 1:2.

4. Ania a kababalin ti tinaginayon ni Jesus, ket kasano a nakatulong dayta kenkuana?

⁴ Innem a gasut a tawen kalpasan ni Jeremias, nakapagibtur ni Jesus gapu iti positibo a kababalinna. Mabasatayo: “Gapu iti rag-o a naikabil iti sanguanan [ni Jesus] inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Hebreo 12:2) Aniaman nga ibubusor wenno pannakaidadanes a nakaipasanguan ni Jesus​—uray ti panagrigatna iti kayo a pagtutuokan​—pinampanunotna ti “rag-o a naikabil iti sanguananna.” Dayta a rag-o isu ti pribilehiona a mangalangon iti kinasoberano ni Jehova ken mangsantipikar iti naganna ken kasta met ti panangiburaynanto iti aglaplapusanan a bendision iti natulnog a sangatauan iti masanguanan.

Sursuruenyo ti Aguray

5. Ania ti maysa a gagangay a situasion a ti panaguray matulongannatayo a maaddaan iti umiso a panangmatmat kadagiti bambanag?

⁵ No tuladentayo ti panagpampanunot ni Jesus, saan a mapukaw kadatayo ti rag-o ni Jehova uray no saan a kanayon a mapasamak dagiti bambanag iti wagas ken panawen a namnamaentayo. Kinuna ni propeta Mikias: “No maipapan kaniak, kumitaakto ken Jehova; agpannurayakto iti Dios ti pakaisalakanak.” (Mikias 7:7; Un-unnoy 3:21) Maipakitatayo met a kabaelantayo ti aguray. Kasano? Iti adu a pamay-an. Kas pagarigan, mabalin nga ipagaruptayo a nagbiddut ti maysa a kabsat nga addaan autoridad ket nasken a mailinteg a dagus. No ammotayo ti aguray, mabalin a kastoy ti panunotentayo, ‘Talaga kadi a nagbiddut, wenno pagarupko laeng? No nagbiddut, saan ngata nga ipalpalubos ni Jehova a mapasamak dagita agsipud ta ammona nga agbalbaliwto dayta a kabsat ket saanen a kasapulan ti nainget nga addang tapno mailinteg?’

6. Kasano a ti panaguray matulonganna ti maysa a mangikagkagumaan a mangparmek iti personal a problema?

⁶ Mabalin a nasken ti panaguray no mariribukantayo gapu iti personal a problema wenno pagkapuyan nga ikagkagumaantayo a parmeken. Ipapantayon a nagpatulongtay ken Jehova, ngem saan a narisut ti problema. Ania ngay ti aramidentayo? Masapul nga itultuloytayo nga aramiden ti amin a kabaelantayo a mangsolbar iti dayta a problema ket agtalektayo iti kinuna ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.” (Lucas 11:9) Itultuloyyo ti agkararag, ket mangnamnamakayo ken Jehova. Iti maitutop a tiempo ken iti bukodna a wagas, sungbatanto ni Jehova dagiti kararagyo.​—1 Tesalonica 5:17.

7. Kasano a ti panaguray makatulong iti panangmatmattayo iti lumawlawag a pannakaawat iti Biblia?

⁷ Bayat a matungtungpal dagiti padto ti Biblia, lumawlawag ti pannakaawattayo kadagiti Kasuratan. Ngem no dadduma, mabalin nga ipagaruptayo a naladaw ti pannakailawlawag ti maysa a banag. No saan a mapasamak dayta iti tiempo a kayattayo, situtuloktay kadi nga aguray? Laglagipenyo, inranta ni Jehova nga in-inut ken iti las-ud ti agarup 4,000 a tawen ti panangipalgakna iti “sagrado a palimed ti Kristo.” (Efeso 3:3-6) No kasta, rumbeng kadi a matektekantayo? Pagduaduaantay kadi a nadutokan ti “matalek ken masirib nga adipen” a mangipaay iti ili ni Jehova iti “taraonda iti umiso a tiempo?” (Mateo 24:45) Apay a paidamantay ti bagitayo iti nadiosan a rag-o gapu ta adda dagiti banag a ditay maawatan a naan-anay? Laglagipenyo, ni Jehova ti mangikeddeng no kaano ken no kasanona nga ipalgak ‘dagiti palimedna.’​—Amos 3:7.

8. Kasano a pagimbagan dagiti adu ti kinaanus ni Jehova?

⁸ Mabalin a maupay dagiti dadduma agsipud ta ipagarupda a kalpasan ti adu a tawen a matalek a panagserbida, didanto maimatangan “ti dakkel ken nakakigkigtot nga aldaw ni Jehova.” (Joel 2:30, 31) Kaskasdi, maliwliwada no ti positibo nga aspeto ti panunotenda. Imbalakad ni Pedro: “Ibilangyo ti kinaanus ni Apotayo a kas pannakaisalakan.” (2 Pedro 3:15) Gapu iti kinaanus ni Jehova, minilion pay a nalinteg panagpuspusoda a tattao ti nakaammo iti kinapudno. Saan kadi a makaparagsak dayta? Maysa pay, no napapaut ti panaganus ni Jehova, ad-adu ti panawentayo a ‘mangitrabaho iti pannakaisalakantayo buyogen ti buteng ken panagpigerger.’​—Filipos 2:12; 2 Pedro 3:11, 12.

9. No limitado ti maaramidtayo iti panagserbi ken Jehova, kasano a ti panaguray tulongannatayo a mangibtur iti kasasaad?

⁹ No ammotayo ti aguray, saantay a maupay no dumteng ti ibubusor, sakit, kinalakay, wenno dadduma pay a parikut a manglapped kadatayo a mangaramid kadagiti banag a mainaig iti Pagarian. Namnamaen ni Jehova nga agserbitayo kenkuana a naimpusuan. (Roma 12:1) Nupay kasta, ti Anak ti Dios, a ‘mangngaasi kadagiti napanglaw ken makasapul,’ dina namnamaen ti ditay kabaelan nga aramiden; kasta met ni Jehova. (Salmo 72:13) Gapuna, aramidentay ti kabaelantayo, a siaanus nga aguraytayo agingga nga agbalbaliw dagiti kasasaad​—iti daytoy man a sistema ti bambanag wenno iti daydiay umayto. Laglagipenyo: “Saan a nakillo ti Dios tapno lipatenna ti aramidyo ken ti ayat nga impakitayo iti naganna, iti panagserbiyo kadagiti sasanto ken agtultuloykayo nga agserserbi.”​—Hebreo 6:10.

10. Ania a dakes a kababalin ti maliklikan ti maysa nga ammona ti aguray? Ilawlawagyo.

¹⁰ Maliklikantay met ti kinakuspag no ammotayo ti aguray. Nagapostata ti dadduma gapu ta dida kayat ti aguray. Mabalin nga impagarupda nga adda nasken a maaramid a panagbalbaliw, iti man pannakaawat iti Biblia wenno kadagiti organisasional a banag. Ngem saanda a pinanunot a ti espiritu ni Jehova ti mangtignay iti matalek ken masirib nga adipen a mangaramid kadagiti panagbalbaliw iti tiempo nga inkeddeng ni Jehova, saan nga iti panawen nga ipagaruptayo a nasken daytoy. Ket aniaman a panagbalbaliw masapul a maitunos iti pagayatan ni Jehova, saan a kadagiti personal a kapanunotantayo. Gapu iti kinakuspag, nakullaapan ti panunot dagiti apostata ket naitibkolda. Ngem no tinuladda ti panagpampanunot ni Kristo, nataginayonda koma ti rag-oda ket nakapagtalinaedda iti ili ni Jehova.​—Filipos 2:5-8.

11. Kasano a mausartayo a nainsiriban ti panawen ti panaguray, kas panangtulad iti ulidan dagiti siasino?

¹¹ Siempre, ti panaguray dina kaipapanan ti panagbalin a nasadut wenno di aktibo. Adu ti aramidentayo. Kas pagarigan, nasken a naaneptayo nga agadal a personal iti Biblia ket iti kasta ipakpakitatayo ti nasged a panaginteres kadagiti naespirituan a banag a kas iti impakita dagiti matalek a propeta ken uray dagiti anghel. Maipapan iti kasta a panaginteres, kinuna ni Pedro: “Maipapan itoy met laeng a pannakaisalakan sigaganetget a nagsukimat ken siaannad a nagsirarak dagiti mammadto . . . Kadagitoy met laeng a bambanag tartarigagayan dagiti anghel ti umimatang.” (1 Pedro 1:10-12) Saan laeng a ti personal a panagadal ti kasapulan no di pay ket ti regular a pannakigimong ken panagkararag. (Santiago 4:8) Dagidiay sipapanunot iti naespirituan a kasapulanda babaen ti regular a pannangan iti naespirituan a taraon ken pannakitimpuyog kadagiti padada a Kristiano ipakpakitada a tultuladenda ti panagpampanunot ni Kristo.​—Mateo 5:3.

Patanorenyo ti Realistiko a Panangmatmat

12. (a) Ania a panagwaywayas ti tinarigagayan da Adan ken Eva? (b) Ania ti nagbanagan ti panangtulad ti sangatauan kada Adan ken Eva?

¹² Idi pinarsua ti Dios ti umuna a pagassawaan, isu ti addaan kalintegan a mangipasdek kadagiti pagalagadan no ania ti umiso ken di umiso. (Genesis 2:16, 17) Di kayat da Adan ken Eva ti agpaidalan iti Dios, ket nagbanag daytoy iti lubong a makitkitatayo iti agdama. Kinuna ni apostol Pablo: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti isuamin a tattao agsipud ta nagbasolda amin.” (Roma 5:12) Kalpasan ti innem a ribu a tawen ti pakasaritaan ti tao manipud idi panawen ni Adan, napaneknekan a pudno ti kinuna ni Jeremias: “O Jehova, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” (Jeremias 10:23) Saan a kinanegatibo ti panangbigbig a pudno ti sasao ni Jeremias. Realistiko dayta. Dayta ti pakaigapuan dagiti naglabas a siglo a ti “tao addaan pannakabalin iti sabali a maipaay iti pagdaksanna” agsipud ta inlaksid dagiti tattao ti turay ti Dios.​—Eclesiastes 8:9.

13. Ania ti realistiko a panangmatmat dagiti Saksi ni Jehova iti kabaelan nga aramiden dagiti tattao?

¹³ Gapu iti kasasaad ti sangatauan, ammo dagiti Saksi ni Jehova a limitado ti maaramidan dagiti tattao iti agdama a sistema ti bambanag. Makatulong ti positibo a kababalin a mangtaginayon iti rag-otayo, ngem saan a dayta ti solusion ti amin a banag. Idi rugrugi ti dekada 1950, nangipablaak ti maysa a klero nga Americano iti best-seller a libro a napauluan The Power of Positive Thinking. Insingasing ti libro a marisut ti kaaduan a problema no positibo ti pannakatamingda. Talaga a nasayaat ti positibo a panagpampanunot. Ngem ipakita ti kapadasan a ti pannakaammo, abilidad, material a sanikua, ken adu a dadduma pay a banag kednganda ti maaramidantayo kas indibidual. Ket iti sangalubongan, adu unay dagiti parikut a di kabaelan a solbaren dagiti tattao​—kasano man kapositibo ti panagpampanunotda!

14. Negatibo kadi ti panagpampanunot dagiti Saksi ni Jehova? Ilawlawagyo.

¹⁴ Gapu iti realistiko a panangmatmatda kadagita a banag, no dadduma maipagarup a negatibo ti panagpampanunot dagiti Saksi ni Jehova. Iti kasupadina, magagaranda a makisarita kadagiti tattao maipapan iti Daydiay kakaisuna a makabael a mangpasayaat a naan-anay iti kasasaad ti sangatauan. Iti daytoy a banag, tultuladenda met ti panagpampanunot ni Kristo. (Roma 15:2) Ken okupadoda a tumultulong kadagiti tattao a maaddaan iti nasayaat a relasion iti Dios. Ammoda nga agpaayto daytoy a pagimbaganda.​—Mateo 28:19, 20; 1 Timoteo 4:16.

15. Kasano a pagimbagan dagiti indibidual ti trabaho dagiti Saksi ni Jehova?

¹⁵ Saan nga iyaleng-aleng dagiti Saksi ni Jehova dagiti parikut ti kagimongan nga adda iti aglawlawda​—nangruna dagiti narugit a di nainkasuratan nga aramid. Sakbay nga agbalin a maysa kadagiti Saksi ni Jehova ti interesado a tao, masapul nga agbalbaliw, a masansan a parmekenna dagiti nakaigameranna a bisio a di makaay-ayo iti Dios. (1 Corinto 6:9-11) Gapuna, natulongan dagiti Saksi ni Jehova dagiti natulok a tattao a mangparmek iti panagbarbartek, panagdroga, imoralidad, ken panagsugal. Dagiti kasta a nagbalbaliw a tattao nasursuroda nga ipaay ti kasapulan dagiti pamiliada iti natakneng ken nadalus a wagas. (1 Timoteo 5:8) No matulongan dagiti indibidual ken pamilia iti kastoy a wagas, bumassit dagiti problema iti komunidad​—makissayan ti durogista, kaso ti kinaranggas iti pamilia, ken dadduma pay. Babaen ti panagbalinda a natulnog nga umili ken panangtulongda kadagiti sabsabali a mangpasayaat iti biagda, palpalag-anen dagiti Saksi ni Jehova ti trabaho dagiti ahensia a mangtamtaming kadagiti parikut ti kagimongan.

16. Apay a saan a makiramraman dagiti Saksi ni Jehova kadagiti sekular a repormasion?

¹⁶ No kasta, nabaliwan kadi dagiti Saksi ni Jehova ti moral a kasasaad iti lubong? Bueno, iti napalabas a dekada, kurang la bassit a 3,800,000 ti bilang idi dagiti aktibo a Saksi, ngem ita dimmanonen iti dandani 6,000,000. Immaduda iti agarup 2,200,000, nga adu kadakuada ti nangisardeng kadagiti dakes nga aramid idi nagbalindan a Kristiano. Adu a biag ti simmayaat! Ngem nagbassit daytoy a bilang no idilig iti iyaadu ti populasion ti lubong iti dayta met la a panawen​—875,000,000! Pagrag-oan dagiti Saksi ni Jehova ti tumulong kadagiti natulnog a tattao, nupay ammoda a manmano iti sangatauan ti magna iti dalan nga agturong iti biag. (Mateo 7:13, 14) Bayat nga ur-urayen dagiti Saksi dagiti nasayaat a panagbalbaliw ditoy lubong a ti Dios laeng ti makaibanag, dida makiramraman kadagiti sekular a repormasion, a masansan a nasayaat ti panggep dagitoy iti damo ngem agtungpalda iti pannakapaay ken uray pay kinaranggas.​—2 Pedro 3:13.

17. Kasano a tinulongan ni Jesus dagiti sabsabali, ngem ania ti dina inaramid?

¹⁷ Iti kastoy a takderda, ipakpakita dagiti Saksi ni Jehova nga agtalekda ken Jehova, a kas iti inaramid ni Jesus idi adda ditoy daga. Idi umuna a siglo, simimilagro a nangpaimbag ni Jesus. (Lucas 6:17-19) Pinagungarna pay dagiti natay. (Lucas 7:11-15; 8:49-56) Ngem saanna nga inikkat ti panagsakit wenno pinarmek ti kabusor a ni patay. Ammona a saan pay a daydi ti tiempo nga inkeddeng ti Dios tapno aramidenna ti kasta. Yantangay naisangsangayan dagiti abilidadna kas perpekto a tao, adu ti mabalin koma nga inaramid ni Jesus tapno masolbar dagiti serioso a parikut iti politika ken kagimongan. Agparang nga adda dagiti kasadaran ni Jesus nga agtarigagay iti panagturayna tapno risutenna dagiti parikut, ngem nagkedked ni Jesus. Mabasatayo: “Idi a dagiti tattao nakitada dagiti pagilasinan nga inaramidna, rinugianda a kunaen: ‘Sigurado nga isu daytoy ti mammadto nga umay iti lubong.’ Gapuna ni Jesus, idi naammuanna nga umayda koman ket kemmegenda tapno pagbalinenda nga ari, napan manen nga agmaymaysa idiay bantay.”​—Juan 6:14, 15.

18. (a) Kasano nga impakita ni Jesus a kanayon nga ammona ti aguray? (b) Kasano a nagbaliw ti aktibidad ni Jesus manipud idi 1914?

¹⁸ Saan a nakinamin ni Jesus iti politika wenno basta timmulong laeng iti kagimongan agsipud ta ammona a saan pay a daydi ti tiempona nga agturay kas ari ken mangpaimbag kadagiti amin a masakit. Uray idi napanen idiay langit kas imortal nga espiritu a biag, situtulok a naguray iti panawen nga inkeddeng ni Jehova sakbay a nagtignay. (Salmo 110:1; Aramid 2:34, 35) Nupay kasta, manipud idi naisaad nga Ari ti Pagarian ti Dios idi 1914, rimmuaren a “mangparmek ken tapno an-anayenna ti panagballigina.” (Apocalipsis 6:2; 12:10) Anian a ragsaktayo nga agpasakup iti turayna, idinto ta dagiti sabsabali nga agkunkuna a Kristiano dida kayat nga ammuen dagiti sursuro ti Biblia maipapan iti Pagarian!

Panaguray​—Mangpaay Wenno Mangparagsak?

19. Kaano a ti panaguray “pagsakitenna ti puso,” ket kaano a mangyeg dayta iti rag-o?

¹⁹ Ammo ni Solomon a makapaupay ti panaguray. Insuratna: “Ti inanama a maitantantan pagsakitenna ti puso.” (Proverbio 13:12) Pudno unay, no di nainkalintegan ti namnamaen ti maysa a tao, mabalin nga agsakit ti nakemna no di matungpal dayta. Nupay kasta, ti panaguray kadagiti naragsak a pasamak​—nalabit maysa a kasar, panaganak, wenno pannakakita manen kadagiti tattao nga ay-ayatentayo​—lapunosennatayo iti rag-o a mangsegsegga sakbay ti aldaw ti pannakatungpalda. Rumayray dayta a rag-o no nainsiriban nga usarentayo ti tiempo ti panaguray, a saganaantayo ti mapasamak.

20. (a) Ania dagiti nakaskasdaaw a pasamak a sitatalek a namnamaentayo a makita? (b) Kasanotay a magun-od ti rag-o bayat nga ur-urayentayo ti pannakatungpal dagiti panggep ni Jehova?

²⁰ No agtalektayo a naan-anay a matungpalto dagiti namnamaentayo​—uray no ditay ammo no kaano a matungpal dagitoy​—saan nga ‘agsakit ti pusotayo’ nga agur-uray. Ammo dagiti matalek nga agdaydayaw iti Dios nga asidegen ti Sangaribu a Tawen a Panagturay ni Kristo. Agtalekda a makitadanto ti pannakapukaw ni patay ken ti panagpatingga ti sakit. Sigagagar ken sirarag-o nga ur-urayenda ti panawen inton abrasaenda dagiti binilion a tattao a mapagungar, agraman dagiti pimmusay a patpatgenda. (Apocalipsis 20:1-3, 6; 21:3, 4) Kadagitoy a tiempo a nadadael ti aglawlaw, pagragsakanda ti sierto a namnamada a makakita iti pannakaipasdek ti Paraiso ditoy daga. (Isaias 35:1, 2, 7) Anian a nainsiriban ngarud nga usarentay a siaannad ti panawen ti panaguray, “a kankanayon nga aduan[tayo] ti aramiden iti trabaho ti Apo”! (1 Corinto 15:58) Itultuloyyo ti mangan iti naespirituan a taraon. Ad-adda a pasingedenyo ti relasionyo ken Jehova. Birokenyo dagiti tattao a naimpusuan nga agtarigagay nga agserbi ken Jehova. Paregtaenyo dagiti kapammatianyo. Aprobetsarenyo a naan-anay ti aniaman a tiempo nga ipalubos pay ni Jehova. Iti kasta, ti panangnamnamayo ken Jehova dinanto pulos ‘pagsakiten ti pusoyo.’ Punnuennakay ketdi iti rag-o!

Mailawlawagyo Kadi?

• Kasano nga impakita ni Jesus nga ammona ti aguray?

• Kadagiti ania a kasasaad a nasken nga aguray dagiti Kristiano?

• Apay a situtulok dagiti Saksi ni Jehova a mangnamnama ken Jehova?

• Kasano a mangyeg rag-o ti panangnamnama ken Jehova?

[Dagiti Ladawan iti panid 12]

Nagibtur ni Jesus gapu iti rag-o nga agur-uray kenkuana

[Ladawan iti panid 13]

Uray kalpasan ti adu a tawen a panagserbi, mataginayontay ti rag-otayo

[Dagiti Ladawan iti panid 15]

Minilion ti simmayaat ti biagda idi nagbalinda a Saksi ni Jehova