Mapunnokay Koma ti Rag-o
“Ket dagiti adalan nagtultuloyda a napno ti rag-o ken iti nasantuan nga espiritu.”—Aramid 13:52.
1. (a) Ti rag-o ket ania a kita a bunga? (b) Agpaay iti ania a naragsak a sagana ti pakaipadayagan ti Dios?
RAG-O! Daytoy a Nakristianuan a kualidad nailista a maikadua laeng iti ayat iti panangsalaysay ni Pablo kadagiti bunga ti espiritu. (Galacia 5:22-25) Ket aniat’ umaw-awag iti dayta a rag-o? Isu daytat’ naimbag a damag nga inyanunsio ti anghel ti Dios kadagiti napakumbaba a papastor nasurok a 1,900 a tawtawen ti napalabasen: “Adtoy! Yegankayo ti naimbag a damag ti dakkel a ragsak a maipaayto kadagiti amin a tattao, ta ita nga aldaw naiyanak kadakayo idiay siudad ni David, ti maysa a Manangisalakan, isu ti Kristo nga Apo.” Kalpasanna nagparang ti buyot dagiti anghel ket timmiponda iti anghel iti sirarag-o a panangidayaw iti Dios ken kunkunada: “Dayaw iti Dios idiay kangatuan, ken talna iti rabaw ti daga kadagiti tattao a naimbag a nakem.”—Lucas 2:10-14.
2, 3. (a) Apay a maiyanatup a ti Dios ibaonna ti inauna nga Anakna nga agbalin a Mannubbot ti Sangatauan? (b) Iti ania a dadduma pay a pamay-an a sinerbian ni Jesus ti pangpanggep ti Dios bayat nga adda ditoy daga?
2 Ti naimbag a nakem ni Jehova kadagiti tattao naiyebkas iti panangtednat’ pannakaisalakan babaen ken Kristo nga Apo. Daytoy inauna nga Anak ti Dios isut’ personipikasion ti pudno a kinasirib ken nailadawan kas agkunkuna ken Amana idi panagparsua: “Idin addaak iti sibayna a kas mamangulo nga agobra, ket napnoak ti rag-o nga inaldaw, a siraragsakak a kanayon iti sangona; siraragsakak iti nabunga a dagana, ket pagrag-oak ti pannakiadda kadagiti annak dagiti tao.”—Proverbio 8:30, 31, Rotherham.
3 Maiyanatup, ngarud, a ni Jehova ibaonna ti Anakna, a naaddaan kasta a ragsak kadagiti annak ti tao, nga agbalin a Mannubbot ti sangatauan. Ket kasano a mangyeg dayag iti Dios daytoy? Daytat’ mangilukat iti dalan iti panangtungpalna ti grande a panggepna a panangpunno ti daga kadagiti nalinteg ken managayat-talna a tattao. (Genesis 1:28) Mainayon pay, bayat ti kaaddana ditoy daga, daytoy nga Anak, a ni Jesus, ipakitana iti sidong ti kasasaeman a pannakasuot a mabalinan ti perpekto a tao ti sisusungdo nga agtulnog ken Jehova kas Soberano nga Apo, iti kasta alangonenna a naan-anay ti nainkalintegan a kinaturay ni Amana iti sangaparsuaanna. (Hebreo 4:15; 5:8, 9) Ti natarnaw a kurso ni Jesus nangibati met ti modelo para kadagiti isuamin a pudno a Kristiano tapno surotenda a siinget dagiti addangna.—1 Pedro 2:21.
4. Ti panagibtur ni Jesus nagbunga iti ania a dakkel a rag-o, ken kasanot’ panangparegta daytoy kadatayo?
4 Ngarud nasarakan ni Jesus ti aglaplapusanan a rag-o iti panangaramid iti pagayatan ni Amana, ket ur-urayenna ti dakdakkel pay a rag-o, kas impamatmat ni apostol Pablo idiay Hebreo 12:1, 2: “Ket tarayentayo koma a siaanus ti tarayen a naikabil iti sanguanantayo, a kitkitaentayo ni Jesus a Kangrunaan nga Ahente ken Manangtungpal ti pammatitayo. Isu a gapu iti rag-o a naikabil iti sanguananna, inibturanna ti kayo a pagtutuokan, nga inwaksina ti bain, ket nagtugaw iti makanawan ti trono ti Dios.” Ania a rag-o daytoy? Isut’ rag-o nga adda ken Jesus, saan laeng nga iti panangsantipikarna iti nagan ni Amana ken panangsubbot iti sangatauan manipud ken patay no di ket kasta met iti panagturayna kas Ari ken Nangato a Padi bayat nga isublina dagiti natulnog a tattao iti biag nga awan inggana iti paraiso a daga.—Mateo 6:9; 20:28; Hebreo 7:23-26.
5. Asino dagiti “kakabsat” ni Jesus, ken iti ania a naisalsalumina a rag-o ti pakiramananda?
5 Wen, kanayon a masarakan ti Anak ti Dios ti rag-o iti panagserbi iti sangatauan. Ken rag-ona a kanayon ti panagserbi a kadua ni Amana iti panangpili ti grupo dagiti manangsalimetmet-kinatarnawna a tattao nga aw-awaganna a “kakabsatna” ket inton matayda mapagungardanto idiay langit. Dagitoy ti sumrek iti naisalsalumina a rag-o a kadua ni Jesus. Naikuna nga isuda ti “naragsak ken santo,” ken “isudanto dagiti papadi ti Dios ken ni Kristo, ket makipagaridanto kenkuana bayat ti sangaribo a tawen.”—Hebreo 2:11; Apocalipsis 14:1, 4; 20:6.
6. (a) Ania a naragsak nga imbitasion ti iyawat ti Ari kadagiti “sabsabali a karkarnero”? (b) Ania dagiti pribilehio a tagtagiragsaken ti adu kadagitoy a karnero itatta?
6 Mainayon pay, maysa a dakkel nga umariwekwek dagiti “sabsabali a karnero,” nga ilasin ti agturturayen nga Ari iti makanawanna nga addaan pannakaanamong, awatendat’ awisna: “Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.” (Juan 10:16; Mateo 25:34) Anian a nagragsak a pribilehio! Kadagitoy nga agtawid iti naindagaan a paset ti Pagarian, adu itan dagiti umaw-awat ti responsable a trabaho a kadua dagiti napulotan, kas impadto ni Jehova: “Ket dagiti ganggannaet agtakderdanto ket ipastorandanto dagiti pangenyo, ket dagiti sangsangaili agbalindanto a mannalonyo ken agaywan iti inubasanyo. Ngem dakayo managanankayto a papadi ni Jehova; dagiti tattao naganendakayto a ministros ti Diostayo.” Amin dagitoy danggayanda ti mammadto ti Dios nga agkuna: “Siak agragsakakto unay ken ni Jehova. Ti kararuak agrag-onto iti Diosko. Ta isu kinawesannak kadagiti pagan-anay ti pannakaisalakan.”—Isaias 61:5, 6, 10.
7. Apay a daytoy nga “aldaw” ket naisangsangayan unay nanipud 1914?
7 Agbibiagtay itan iti naisangsangayan unay nga aldaw. Nanipud 1914 isun ti aldaw ti panagturay ni Kristo kas nailangitan nga Ari, a naisalaysay idiay Salmo 118:24, 25: “Daytoy ti aldaw nga inaramid ni Jehova; pagragsakanmi ken pagrag-oanminto. Mangisalakanka ita, dawatenmi kenka, O Jehova! O Jehova, dawatenmi kenka, itdem koma ti panagballigi, pangngaasim!” Daytanto ti aldaw a makagteng iti kangitingitanna inton ni Jehova duprakenna ti Binababilonia a relihion ken pagkaykaysaennan ti nobia ni Kristo a 144,000 a kakabsatna a kadua ti nailangitan nga Arida. Amin nga ili ti Dios “agragsakda ken agrag-oda” iti daytoy. Agrag-odanto met bayat a ti Mesianiko nga Arida makidangadang inton Armagedon a mangisalakan iti nasungdo a nasionna nga agturong iti nalinteg a baro a lubong. (Apocalipsis 19:1-7, 11-16) Ipaayto aya ni Jehova ti balligi bayat a ti ilina iwaragawagda daytoy naragsak a namnama? Ti sumaganad a report ti mangilawlawag.
Sangalubongan a Panagsaknap
8. (a) Kasano a ti rag-o buyogen iti nasantuan nga espiritu naipakita iti report nga adda iti panid 18 ingganat’ 21 iti daytoy a magasin? (b) Aniat’ sumagmamano kadagiti tampok iti report?
8 Dagiti moderno-aldaw a Saksi ni Jehova “aduanda ti namnama gapu iti pannakabalin ti nasantuan nga espiritu.” (Roma 15:13) Naisarming daytoy iti tsart kadagiti panid 18 ingganat’ 21 itoy a magasin, a sadiay naidetalye ti sangalubongan a report ti serbisio ti Pagarian para iti 1990. Anian ragsaktayo a makakita iti baro a peak a 4,017,213 nga aktibo a ministros iti tay-ak! Daytoy tandaanna ti irarang-ay a 77 porsiento bayat ti napalabas a sangapulo tawen, bayat a ti panangurnong kadagiti karnero pumarpartak kadagiti 212 a dagdaga iti intero a lubong. Kalpasan ti 15 a tawen, ti bilang dagiti nabautisaran naabotna ti kangatuan pay laeng a bilang—301,518! Addada sumagmamano a naisangsangayan a nangato a bilang ti nabautisaran kadagiti adu a kumbension, nangnangruna daydiay tinabunuan dagiti Saksi manipud Akindaya nga Europa. Nairaman kadagitoy isu dagiti adu nga agtutubo, a mangpaulbod iti kuna dagiti sosialistiko a ti relihion matay a kadua dagiti lallakay ken babbaketen.
9. (a) Ti nasapa a panangsanay kadagiti nagannak mangipapaaydat’ ania a naragsak a bunga? (b) Ania a lokal ken dadduma a kapadasan ti mangpaneknek iti daytoy?
9 Umariwekwek kadagiti agtutubo ti sumungsungbat iti ayab ti Salmo 32:11: “Siyayamankayo ken Jehova ken agragsakkayo, dakayo a sililinteg; ket umsiagkay iti rag-o, dakayo a nasingpet iti puso.” Agparang nga adu a nagannak ti mangiyap-aplikar ti balakad a mangsanay kadagiti annakda “manipud kinamaladagada.” (2 Timoteo 3:15) Maus-usar a naimbag dagiti pagbasaan ken cassette tapes a maipapaay kadagidiay adda pay kinaganusda. Inton sumreken iti eskuelaan dagitoy nga agtutubo, iti mabiit mangmangteddanton ti nasayaat a pammaneknek, kas pangarigan ti walo ti tawenna a Haponesa nga ubing a babai a nagkuna: “Kalpasan bakasion ti kalgaw, inaasitgak ti maestrak ket sinaludsodak: ‘Binisitam kadi ti tanem ni tatangmo bayat ti bakasion?’ Insungbatna: ‘Wen, ni tatangko nakaan-anus, ket bisbisitaek a tinawen ti tanemna.’ Kunak met: ‘No agadalka ti Biblia ket surotem dagiti pannursuro ti Dios, makitamto ti nadungngo a tatangmo iti naindagaan a paraiso.’ Kalpasanna intedko Ti Librok dagiti Estoria ti Biblia. Itatta basbasaen ti maestrami ti maysa a kapitulo daytoy a libro iti intero a klase no oras ti pangngaldaw kada lawas.”
10. Ania a naimbag a panggep ti sinerbian ti libro a Saludsod nga Iyimtuod ti Agtutubo, ket ania ti sumagmamano a pangarigan?
10 Dagiti agtutubo a tin-edyers us-usarenda a naimbag ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, agpadpada iti pribado a panagadal ken panangaskasaba kadagiti dadduma nga agtutubo. Uray met dagiti nagannak apresiarenda daytoy a libro. Maysa a sister idiay Switzerland, a nagpasalista kas auxiliary payunir, naikeddengna a sarungkaran dagiti nagannak dagiti kakaeskuelaan ti anakna. Daytoy ti nanglukat ti nagsasayaat a pannakipatpatang kadagiti adu a nagannak, ket 20 a libro (kaaduanna ti Saludsod nga Iyimtuod ti Agtutubo) ken 27 a magasin ti naipaima kadakuada. Idi maysa nga ages-eskuela a babai idiay Trinidad ti nakaipaima itoy a libro iti maestrana idiay eskuelaan, daytat’ pinasunotan ni nanangna, a nakaiwaras ti 25 a kopia kadagiti agop-opisina a 36. Intultuloyna dayta iti sumaganad a bulan nga inikkannat’ espesial nga atension dagiti nagannak nga am-ammona a personal, a nakaiwaras ti 92 pay a libro ken nakairugi kadagiti baro a panangyadal ti Biblia. Idiay Korea maysa a mannursuro iti intermedia ti nangusar iti libro a Saludsod nga Iyimtuod ti Agtutubo iti panangted kadagiti ababa a sermon kadagiti topiko a kas ti “Kasanok a Parang-ayen dagiti Markak?” ken “Kasanok a Pakibagayan ti Mannursuro Kaniak” sana intukon ti libro. Kalpasan nga inawat dagiti estudiante ti 39 a libro, dadduma a nagannak ti nagreklamo. Ngem ti prinsipal sinukimatna ti maysa a kopia, ket kinunana a daytat’ “nakasaysayaat,” ket nagorder ti maysa para iti mismo a balasangna.
Ti Kasasayaatan nga Edukasion
11, 12. Aniadat’ sumagmamano a pammaneknek iti kinapudno a dagiti publikasion ti Watch Tower Society mangipapaayda iti kasayaatan nga edukasion?
11 Ti edukasional a pateg dagiti magasintayo ap-apresiaren met dagiti adu, kas pangarigan ti maysa nga eskuelaan ti E.U. a nagpedido ti 1,200 a kopia ti Hulio 22, 1990 nga Agriingkayo! (a mangibutbutaktak ti adiksion ti crack) tapno usarenda iti klaseda. Mainayon pay, ti mapagulidanan a kababalin idiay eskuelaan dagiti annak dagiti Saksi ni Jehova agtultuloy a mangipapaay ti nasayaat a pakasarsaritaan. Iti nakaar-ariwawa a klase idiay Thailand, inayaban ti maestra ni 11-años a Racha iti sanguanan ti klase ket kinomendaranna ti kababalinna, a kunkunana: “Apay a diyo pagbalinen nga isut’ ulidanyo? Nagaget iti panagadalna ken nakasingsingpet.” Sana intuloy: “Ay, siguro kasapulan nga agbalinkay pay nga umuna a Saksi ni Jehova kas ken Racha tapno rumang-ay ti kababalinyo.”—Idiligyo ti Proverbio 1:8; 23:22, 23.
12 Maysa nga agtutubo a sister idiay Dominican Republic ti nagsurat: “Idi uppat laeng ti tawenko, ngangnganiakon nga agturpos manipud maysa a narelihiusuan nga eskuelaan (para kinder), a sadiay naadalko ti agbasa ken agsurat. Kas regalo, inikkak ti madre nga isut’ maestrak ti libro a Mabalinyo ti Agbiag nga Agnanayon iti Paraiso a Daga nga addaan mensahe nga: ‘Agyamyamanak ta insuronak nga agbasa ken agsurat. Sapay la koma ta matarusam met toy pammatik ken maaddaankanto met ti namnamak nga agbiag nga agnanayon iti daytoy a daga inton mapagbalinen a paraiso.’ Gapu iti daytoy napagtalawak iti eskuelaan. Walo a tawen kalpasanna nagkitakami manen iti daytoy a maestra. Ita insalaysayna kaniak, nga agpapan pay dakkel nga ibubusor manipud iti padi, nabasana ti libro. Isut’ immakar iti kabisera, a sadiay nabalinanna ti nagadal ti Biblia a kadua ti maysa a Saksi. Isut’ mababautisaranen iti ‘Nadalus a Pagsasao’ a Kumbension Distrito a kagiddanko.” Kas naipadto, ti kinasirib agtaud met iti “ngiwat dagiti maladaga”!—Mateo 21:16; Salmo 8:1, 2.
13. Kasanot’ isusungbat dagiti adu nga agtutubo iti balakad ni Salomon, ken kasano a naisarming daytoy iti sangalubongan a report?
13 Nangted ni Salomon ti makaparegta a balakad: “Agrag-oka, O agtutubo a lalaki, iti kina-agtutubom, ket paragsakennaka koma ta pusom kadagiti aldaw ti kina-agtutubom, ket magnaka kadagiti daldalan ta pusom.” (Eclesiastes 11:9) Makaay-ayo a makita nga itatta adu kadagiti annak dagiti Saksi ni Jehova ti mangiyap-aplikar kadagitoy a sasao, nga us-usaren dagiti tawtawen ti kinatin-edyerda tapno agsagana a maipaay iti biag ti amin-tiempo a serbisio ken Jehova ket sumrek iti daytoy kagrandean kadagiti amin a karera apaman a makaturposda manipud eskuelaan. Ti ranggo dagiti payunir agtultuloy a rumangrang-ay a sipapartak, nga adda 821,108 a nagreport bayat ti tawen. Agraman dagiti 11,092 a kakabsat a lallaki ken babbai nga agserserbi iti Bethel, daytat’ mangirepresentar ti 21 porsiento iti dagup dagiti agibumbunannag.
14. Ania a tulong ti ar-aramiden dagiti kakabsattayo a babbai, ken ania a komendasion ti maikari kadakuada?
14 Makapainteres a kadagiti adu a daga, kas ti Estados Unidos, agarup 75 porsiento kadagiti amin a payunir nga agibumbunannag ket babbai, a mangpampaneknek kadagiti sasao ti Salmo 68:11: “Ni Jehova itdenna ti sao; dagiti babbai a mangiwarnak kadagiti naimbag a damag dakkelda a buyot.” Rebbeng a makomendaran dagiti kakabsattayo a babbai ta ar-aramidenda ti kadakkelan a paset ti trabaho iti tay-ak. Ti nasigo a panangisursuroda kadagiti panangyadal ti Biblia kadagiti pagtaengan iturturongda ti adu iti kinapudno, ket dagiti kasadon a kakabsat a babbai a sisusungdo a mangsupsuportar kadagiti lallakayda kadagiti adu nga annongen ti kongregasion sibabarada met a mapadayawan.—Proverbio 31:10-12; Efeso 5:21-25, 33.
Rumangrangpaya ti Edukasion ti Biblia
15. (a) Kasano a sumagmamano a pagilian a nailista iti sangalubongan a report naglalaingda iti trabaho a panangyadal ti Biblia iti pagtaengan? (b) Ania dagiti kapadasan a mabalinyo nga isalaysay, a mangipakpakita no kasano kabunga ti pagbanagan dagiti panangyadal ti Biblia?
15 Ti trabaho a panangisuro ti Biblia ket rumangrangpaya, a dagiti panagadal maidadauloda iti sangalubongan iti promedio a 3,624,091 kada bulan. Ti kinapudno ti Biblia balbaliwanna met dagiti personalidad, kas ipakita ti report manipud New Zealand. Idi karrugi ti Enero 1987, maysa a lalaki ti naidistierro idiay New Zealand manipud Australia kalpasan panagserbina ti 25-bulan a pannakaibalud gaput’ panagtakaw ken panagpalsipika. Adikto kadagiti droga ken nagilaklako met kadagitoy iti nasurok a 17 a tawtawen. Iti sumaganad a tawen nangrugi a makipagadal ti Biblia ni baketna a kadua dagiti Saksi ni Jehova, ket bayat a dumakkel iti pannakaammo ni baketna, nakitana ti dakkel a panagbalbaliw iti kababalinna. Isut’ nagbalin a nasaysayaat nga asawa ken ina. Babaen ti panangpilpilit ni baketna, isut’ timmabuno ti asamblea sirkito idi Hunio 1989. Ita immawaten ti panagadal ti Biblia iti pagtaenganda, ket nangrugi metten a makita ti dadakkel a panagbalbaliw iti langana ken estilo ti panagbiagna. Amin dagiti pito a miembro ti pamilia nangrugidan a makigimgimong. Isut’ nabautisaran idi Enero 1990 kas maysan a mangan-annurot ti ekselente a balakad ni Pablo iti Efeso 4:17-24.
16. (a) Kasano a ti 1990 a report ti Memorial gubuayan ti rag-o? (b) Ania a kinaganat ti mapalpaliiw, ken ania a panagregget ti rebbengtay nga aramiden tapno makatulong?
16 Ti naisangsangayan unay a paset ti report iti tawen isut’ kangatuan pay laeng a bilang ti timmabuno a 9,950,058 iti panangrambak ti Memorial, a naangay idi Martes, Abril 10, 1990. Nasurok a 70 kadagiti 212 a pagilian ti nangireport kadagiti timmabuno a nasursurok ngem mamitlo a beses ti kangatuan a bilang ti agibumbunannagda! Kas pangarigan, agpapan pay dagiti panangiparit, pito a pagilian sadi Africa nga addaan pakadagupan ti peak ti agibumbunannagda a 62,712, inrepordat’ timmabuno iti Memorial a 204,356. Ti 1,914 nga agibumbunannag iti pinarigat ti gubat a Liberia nagragsakanda a maaddaan ti 7,811 iti Memorial. Ti Haiti nga addaan 6,427 a peak ti agibumbunannag, inreportna ti 36,551. Ti 886 nga agibumbunannag dagiti naiwarwaras nga isla ti Micronesia naaddaandat’ 3,958. Ti 1,298 nga agibumbunannag ti Sri Lanka inreportdat’ 4,521, ket ti Zambia, nga addaan 73,729 nga agibumbunannag, naaddan ti 326,991 a timmabuno iti Memorial, a maysa iti tunggal 25 a ratio ti populasion ti Zambia. Ti sangalubongan a report ipanayagna manen nga adda pay minilmilion a napasnek a tattao nga agur-uray a maurnong iti pagtaraknan. Ngem saan nga umdas ti kinapasnek. Mabalintay aya a paaduen ken parang-ayen ti kualidad ti trabahotayo a panangyadal ti Biblia iti pagtaengan, a tulongan ti ad-adu pay kadagiti timmabuno iti Memorial tapno pabilgen ti pammatida? Kayattayo nga agbalinda nga aktibo a kakadua, a mangidaydayaw ken Jehova. Kaipapapan dayta ti biagda!—Salmo 148:12, 13; Juan 17:3; 1 Juan 2:15-17.
Ti Pannakapunno ti Rag-o
17. Ania dagiti pangarigan idi umuna a siglo a tumulong a mangpabileg iti determinasiontayo a mangpetpet a naimbag iti rag-otayo?
17 Aniaman dagiti pakasuotan a maipasango kadatayo, determinadotay koma a mangpetpet a siirut ti rag-otayo. Nalabit saantay nga aglak-am iti kas ti karigat ti napasaran ni Esteban, kaskasdi ti ulidanna pabilgennatayo. Idi naidarum, nataginayonna ti naragsak a kasasaadna. Dagiti kabusorna “nakitada daydi rupana a kasla rupa ti maysa nga anghel.” Ti Dios nagtakder iti sibayna bayat ti narigat a linak-amna. Isut’ nangted pammaneknek a situtured, a “sipupunno ti nasantuan nga espiritu” agingga iti ipapatayna kas martir. Idi nagturong da Pablo ken Bernabe kadagiti nasnasion iti panangaskasabada, dagitoy met “nagragsakda ket indaydayawda ti sao ni Jehova.” Rimsua manen ti pannakaidadanes. Ngem daytat’ di nangkigtot kadagidiay namati. “Dagidi adalan napnoda idi iti rag-o ken iti nasantuan nga espiritu.” (Aramid 6:15; 7:55; 13:48-52) Aniaman ti aramiden dagiti kabusortayo kadatayo, aniaman dagiti inaldaw-aldaw a suottayo iti panagbiag, ditay koma pulos palubosan a lumamiis ti rag-otayo iti nasantuan nga espiritu. Imbalakad ni Pablo: “Naragsak iti pananginanama. Managitured iti rigat. Managtalinaed iti panagkararag.”—Roma 12:12.
18. (a) Ania ti Baro a Jerusalem, ken apay rebbeng a makipagrag-o ti ili ti Dios kenkuana? (b) Kasano a ti “baro a langlangit ken ti baro a daga” bendisionanna ti sangatauan?
18 Anian a nakaskasdaaw dayta a namnama! Kadagiti isuamin iti ilina, kuna ni Jehova: “Adtoy mamarsuaak kadagiti baro a langlangit ken maysa a baro a daga; ket dagiti immun-una a bambanag didanto malagipen, didanto mapanunoten. Ngem agragsakkayo ken agrag-okayo iti agnanayon iti daydiay a parsuaek.” Ni Kristo nga Apo agraman ti “Baro a Jerusalem” (nga isu itan ti kabisera a siudad ti nailangitan nga organisasion ti Dios, ti “Jerusalem sadi ngato”) ken ti baro a lubong a sosiedad ditoy daga mangyegdanto ti aglaplapusanan a rag-o iti sangatauan. (Galacia 4:26) Ti panagungar dagiti natnatayen a tattao, ti pannakaisubli dagiti isuamin a natulnog iti biag nga agnanayon iti sidong ti natauan a kinaperpekto, ti kinaagnanayon iti nausar, nasaranta a panagbiag iti paraiso a daga—anian a nagngayed a namnama ken pakaigapuan panagrag-o daytoy! Yantangay ni Jehova a mismo maaddaan ‘ti rag-o iti Jerusalem ken pagragsakanna ti ilina,’ gapuna iruar ti mammadtona ti kanayonan a panangawis iti ili ti Dios: “Makipagrag-okayo iti Jerusalem ken agragsakkayo iti maipaay kenkuana dakayo amin nga agayat kenkuana. Makipagragsakkayo ti dakkel kenkuana.” (Isaias 65:17-19; 66:10; Apocalipsis 14:1; 20:12, 13; 21:2-4) Sapay koma ta mapunnotayo ti rag-o ken nasantuan nga espiritu bayat nga ipangpangagtayo ti patigmaan ni apostol Pablo: “Agragsakkayo iti Apo iti kankanayon. Ibagak manen, Agrag-okayo!”—Filipos 4:4.
Pananggupgop ti Rag-otayo:
◻ Ania a modelo ti naragsak a panagibtur ti imbati ni Jesus kadatayo?
◻ Ti dua a dedikado a grupo addaandat’ ania a rasrason a pagrag-oan?
◻ Kasano a dagiti agtutubo ken natataengan itatta agragragsakda iti kinapudno?
◻ No repasuen ti 1990 a report, ania a sungbat ti maipapaay itan iti kararag nga, “O Jehova, dawatenmi kenka, itdem koma ti panagballigi, pangngaasim”?
◻ Kaano ken kasano a maragpatto ti naan-anay a rag-o?
[Tsart iti panid 18-21]
1990 TAWEN SERBISIO A SANGALUBONGAN A REPORT DAGITI SAKSI NI JEHOVA
(Kitaem ti bound volume)
[Ladawan iti panid 16]
Ti anghel ni Jehova inyanunsionat’ pannakaiyanak ti Kristo nga Apo kas “naimbag a damag ti dakkel a ragsak”