SION
Ti sigud a salindeg dagiti Jebuseo nga idi agangay naawagan iti “Siudad ni David.” (1Ar 8:1; 1Cr 11:5) Kalpasan a naala ni David ti Bantay Sion, impasdekna sadiay ti naarian a pagtaenganna. (2Sm 5:6, 7, 9; kitaenyo ti DAVID, SIUDAD NI.) Ti panagturay ni David manipud Sion kas daydiay pinulotan ti Dios ti tuktukoyen ti sasao ni Jehova: “Siak, mismo a siak, insaadko ti arik iti rabaw ti Sion, ti nasantuan a bantayko.” (Sal 2:6) Ti Bantay Sion ket ad-adda pay a nagbalin a nasantuan ken Jehova idi inyakar sadiay ni David ti sagrado a Lakasa. (2Sm 6:17) Idi agangay, nairaman a naawagan iti “Sion” ti disso nga ayan ti templo iti Bantay Moria (a nakayakaran ti Lakasa bayat ti panagturay ni Solomon) ket iti kinapudnona, daytoy a termino ti nayawag iti intero a siudad ti Jerusalem. (Idiligyo ti Isa 1:8; 8:18; kitaenyo ti BANTAY TI GIMONG.) Yantangay ti Lakasa ket nainaig iti kaadda ni Jehova (Ex 25:22; Le 16:2) ken gapu ta ti Sion ket simbolo dagiti nailangitan a banag, natukoy ti Sion kas disso a pagnanaedan ti Dios (Sal 9:11; 74:2; 76:2; 78:68; 132:13, 14; 135:21) ken disso a paggapuan ti tulong, bendision, ken pannakaisalakan.—Sal 14:7; 20:2; 50:2; 53:6; 134:3.
Impalubos ni Jehova a dagiti Babilonio paglangalangenda ti Sion, wenno Jerusalem gapu ta saan a nagmatalek dayta kenkuana. (Un 2:1, 4, 6, 8, 10, 13) Idi agangay, kas kaitungpalan ti padto, insubli ni Jehova idiay Sion wenno Jerusalem ti natda kadagiti agbabbabawi nga ilina. (Isa 35:10; 51:3; 52:1-8; Jer 50:4, 5, 28; 51:10, 24, 35) Daytoy ti makagapu nga adda pay laeng dayta idi simmakay ni Jesu-Kristo iti maysa nga urbon ti asno a simrek idiay Jerusalem tapno idatagna ti bagina iti Sion kas ari, iti kasta tinungpalna ti padto ni Zacarias. (Zac 9:9; Mt 21:5; Jn 12:15) Sumagmamano laeng a natda ti nangipangag, idinto ta dagiti relihioso a panguluen linaksidda ni Jesus kas ari ket inkagumaanda pay ketdi a papatayen. Mangipasimudaag daytoy iti didigra a dumteng iti naindagaan a Jerusalem, wenno Sion, ken ti panangilaksid ti Dios iti dayta.—Mt 21:33-46.
Yantangay ti naindagaan a Jerusalem saanna a binigbig ni Jesus, saan a mabalin nga isaad sadiay ni Jehova ti Anakna kas “maysa a napadas a bato, ti napateg a pasuli ti sigurado a pamuon.” (Isa 28:16; Ro 9:32, 33; 1Pe 2:6) Imbes ketdi, sigurado nga isaadna iti Sion, kas ti naibaga kadagiti Hebreo a Kristiano: “Ngem immasidegkayo iti maysa a Bantay Sion ken iti maysa a siudad ti sibibiag a Dios, ti nailangitan a Jerusalem, ken linaklaksa nga anghel, iti pangkaaduan a gimong, ken iti kongregasion dagiti inauna a naipasalistan iti langlangit, ken iti Dios nga Ukom dagiti isuamin, ken kadagiti naespirituan a biag dagiti nalinteg a napagbalin a naan-anay, ken ni Jesus a manangibabaet iti maysa a baro a tulag.” (Heb 12:22-24) Nabatad nga iti nailangitan a Bantay Sion a sitatakder ti Kordero, ni Kristo Jesus, a kaduana ti 144,000 a nagatang manipud iti daga.—Apo 14:1-3; kitaenyo ti BARO A JERUSALEM; JERUSALEM.