Ti Ili a Magmagna Kadagiti Addang ni Jesus

“Saankami aya a sangsangkatimpuyog iti espiritu? Ken iti maymaysa a pannagna?”​—2 CORINTO 12:18.

1. Apay masansan saan a narigat a mailasin ti maysa kadagiti Saksi ni Jehova?

“KAS a maysa a grupo, nasingpetda, responsableda, ken nalalaingda iti eskuelaan. Saan a maikuna daytoy kadagiti dadduma a grupo.” Kastat’ kuna ti prinsipal ti maysa nga eskuelaan ti elementaria idiay Estados Unidos. Asinot’ sarsaritaenna? Ti annak dagiti Saksi ni Jehova nga agad-adal iti eskuelaanna. Pudno unay, adu ti nakakitan no kasano a dagiti Saksi ni Jehova, agraman dagiti annakda, masansan a kaaspingda ti sabali a Saksi iti sumagmamano a pamay-an. Kadagiti tawtawen ad-adda nga agbalin a nalawag a naisangsangayan ti panagkaykaysada maipapan iti pammati ken kababalinda. Gapuna saan a narigat a mailasin dagiti Saksi.

2. Aniat’ gagangay a kualidad ti immuna a kongregasion Kristiano, ket aniat’ makuna ni Pablo maipapan iti daytoy?

² Ti panagkaykaysa dagiti Saksi ni Jehova ket maysa a naisangsangayan unay a banag iti daytoy nasinasina a lubong. Ngem saan a narigat a maawatan no laglagipentayo a pagregreggetanda amin ti magna kadagiti addang ni Jesus. (1 Pedro 2:21) Ti kasta a panagkaykaysa ket isu met ti kababalin dagiti Kristiano idi umuna a siglo. Naminsan, impatigmaan ni Pablo iti kongregasion idiay Corinto: “Dawatek ngarud kadakayo, kakabsat, a gapu iti nagan ni Apotayo a Jesu-Kristo a sawenyo amin koma ti maymaysa a banag, ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa a panunot ken maymaysa a panagrikna.” (1 Corinto 1:10) Ni Pablo ket nangted met iti naipaltiing a balakad no kasanot’ panangtaming kadagiti tattao a madi a mangsalimetmet iti Nakristianuan a panagkaykaysa.​—Kitaenyo ti Roma 16:17; 2 Tesalonica 3:6.

3, 4. Kasanot’ panangisalaysay ni Pablo iti pannakikaykaysana ken ni Tito, ket aniat’ nakaibatayan daytoy a panagkaykaysa?

³ Idi agarup tawen 55 K.P., imbaon ni Pablo ni Tito idiay Corinto tapno tumulong nga agurnong ti tulong a maipaay kadagiti agkasapulan a kakabsat idiay Judea ken mabalin a tapno kitaen no kasano ti panagrikna ti kongregasion iti balakad ni Pablo. Idi nagsurat manen kadagiti taga Corinto, ni Pablo dinakamatna ti nabiit pay nga isasarungkar ni Tito ket insaludsodna: “Sinikapannakayo aya iti aniaman ni Tito? Saankami aya a sangsangkatimpuyog iti espiritu ken iti maymaysa a pannagna?” (2 Corinto 12:18) Aniat’ kayat a sawen ni Pablo iti pannagnada a “sangsangkatimpuyog iti espiritu” ken “iti maymaysa a pannagna”?

⁴ Iyeb-ebkasna ti panagkaykaysa nga adda kenkuana ken ni Tito. Ni Tito ti sagpaminsan kadua ni Pablo iti panagdaldaliasatna, ket awan duadua adu ti naadalna manipud ken Pablo manipud iti daytoy a pamay-an. Ngem ti panagkaykaysa nga adda kadagiti dua ket naibatay iti banag a napigpigsa ngem dayta. Daytat’ naibatay iti nasayaat a relasionda ken ni Jehova ken iti kinapudno nga agpadpadada a sumursurot kadagiti addang ni Kristo. Tinulad ni Tito ni Pablo kas ti panangtulad ni Pablo ken ni Kristo. (Lucas 6:40; 1 Corinto 11:1) Gapuna iti espiritu ni Jesus ken kadagiti addangna ti pagpagnaanda.

5. Aniat’ manamnama kadagiti tattao itatta a mangtulad ken ni Pablo ken Tito bayat a nagnada a “sangsangkatimpuyog iti espiritu” ken “iti maymaysa nga addang”?

⁵ Ngarud, saanen a karkarna, a dagiti Kristiano iti daytoy maika-20 a siglo, a magmagna “iti isu met laeng nga espiritu” ken “kadagiti isu met laeng nga addang” kas kada Pablo ken ni Tito, tagtagiragsakenda ti awan pakaipadisanna a panagkaykaysa. Kinapudnona, ti pannakawarawara dagiti agkunkuna a Kristiano ti mangilatak laeng kadakuada kas dagiti palsipikado a Kristiano, a di magmagna kadagiti addang ti Pangulo a kunada a sursurotenda. (Lucas 11:17) Daytoy nakadkadlaw a panagduma dagiti pudno ken dagiti agkunkuna a Kristiano ti maiyilustrar iti nagduduma a pamay-an. Salaysayentay laeng dagiti uppat.

Ti Kinasanto ti Dara

6, 7. (a) Ania nga umiso a panangmatmat iti dara ti nairaman iti pannagna kadagiti addang ni Jesus? (b) Aniat’ nakaidumaan dagiti Saksi ni Jehova ken dagiti sabsabali a tattao ita a di umawat iti pannakaiyalison ti dara?

⁶ Agarup idi tawen 49 K.P., ti bagi a manarawidwid iti kongregasion idi umuna a siglo ti nangipatulod ti surat a nangsungbat iti saludsod a: Rebbeng aya a tungpalen dagiti Kristiano a di Judio ti Linteg ni Moises? Ti surat ti nangikuna iti daytoy: “Ta maipagarup a naimbag iti nasantuan nga espiritu ken kadakami ti di mangipabaklay kadakayo iti dakdakkel nga awit ngem kadagitoy a banag a masapul, isu nga adaywanyo dagiti banag a naidaton kadagiti saan a pudno a dios ken ti dara ken ti bambanag a nabekkel ken ti pannakikamalala.” (Aramid 15:28, 29) Kitaenyo ta nairaman kadagiti “banag a masapul” isu ti iyaadayu manipud iti dara. Iti pannagna kadagiti addang ni Jesus kaipapananna ti di panangipauneg ti dara iti bagi babaen iti ngiwat wenno iti dadduma pay a pamay-an.

⁷ Daytoy a prinsipio ti aglablabes ti pannakasalungasingna iti Kakristianuan babaen iti ugali a panangiyalison iti dara. Pudno, kadagiti nabiit pay a tawtawen, sumagmamano nga indibidual ti makaammon kadagiti peggad ti panangiyalison ti dara iti salun-at ket madida nga umawat iti dayta nga agpaay iti medikal a rason. Pudno daytoy nangnangruna agsipud ta adu dagiti nakaptan ti AIDS manipud kadagiti dara a naiyalison. Ngem asino dagiti mangitantandudo ti kinasagrado ti dara gaput’ panagraemda iti linteg ti Dios, ket ar-aramidenda dayta kas maysa a grupo? No adda ti pasiente nga agkitakit a maaddaan ti pannakaiyalison, aniat’ automatiko a panangipato kenkuana ti doktor? Saan kadi a masansan kunaen ti doktor: ‘Mabalin a maysaka kadagiti Saksi ni Jehova’?

8. Kasano a nabendisionan ti maysa a Saksi idiay Italia gaput’ determinasionna a mangsalimetmet ti linteg iti Dios iti daytoy a banag?

⁸ Ni Antonietta ti aggigian idiay Italia. Agarup walo a tawen ti napalabasen isut’ masakit unay, ket nakababbaba ti blood countna ta dagiti doktor ipapilitda a kasapulan ti pannakaiyalison tapno masalbar ti biagna. Isu ti nagmadi ket isut’ binusor agpadpada dagiti doktor ken dagiti kakabagianna. Uray pay dagiti dua a babassit nga annakna a lallaki ti nagpakpakaasi: “Mama, no talaga nga inayatnakami, awatem ti dara.” Ngem ni Antonietta ti determinado nga agtalinaed a matalek, ket makaparagsak ta isut’ di natay. Kaskasdi, ti kasasaadna ket serioso unay a kuna ti doktor: “Dikam mailawlawag no apay nga isut’ sibibiag pay laeng.” Ngem apaman a ti di masuppiat a kita ti panangagas ti narugian, napartak ti irarang-ayna ta kuna ti sabali pay a doktor: “Diak mamati iti dayta​—dika koma nabalinan ti immimbag iti kasta a kabiit unay a tiempo, uray pay no binombaandaka iti dara iti agmalmalem.” Iti agdama, isut’ maysa a regular payunir ket dagiti dua nga annakna a lallaki, nga itan 12 ken 14, ket nagsayaat ti irarangayda iti kinapudno. Situtured a sinalimetmetan ni Antonietta dayta ‘masapul a banag,’ ti kinasagrado ti dara. Amin dagiti Saksi ni Jehova ti mansalsalimetmet iti kasta met laeng a panangmatmat bayat a magmagnada kadagiti addang ni Jesus.

Dagiti Naimbag a Moral

9. Ania a sabali a ‘masapul a banag’ ti nairaman iti panangsurot kadagiti addang ni Jesus, ket aniat’ mapasamak kadagidiay mapaay a mangsalimetmet iti daytoy?

⁹ Ti sabali pay a ‘masapul a banag’ nga impaganetget dayta a surat manipud iti bagi a manarawidwid idi umuna a siglo isu ti “adaywanyo . . . ti pannakikamalala.” Iti umuna a suratna kadagiti taga Corinto, pinadakkel ni Pablo daytoy, a kunkunana: “Dagiti mannakiabig, uray dagiti agrukbab kadagiti ladladawan, uray dagiti makikamkamalala, uray dagiti lallaki a maipaay kadagiti di natural a panggep, wenno lallaki a makidenna ti padada a lalaki . . . saandanto a tawiden ti pagarian ti Dios.” (1 Corinto 6:9, 10) Dagiti Kristiano tultulonganda dagiti tattao a tarigagayanda ti agserbi ken ni Jehova a parmeken kadagiti bagbagida dagiti narugit nga ar-aramid. Uray dagiti kameng ti kongregasion a nasiluan kadakuada ti matultulongan a mangdalus iti bagbagida no agbalbaliwda ken agbabawida. (Santiago 5:13-15) Ngem no asinoman a Kristiano matnag kadagita nga ar-aramid a narugit ken madida nga agbabawi, ti nalawag a pagalagadan ti Biblia agaplikar. Nasantuan ti pannakapaltiing ni Pablo a nangikuna: “Dikay makikadkadua iti uray siasino a managanan kabsat no isu mannakikamalala. . . . Ikkatenyo ngarud daydiay tao a dakes iti tengngayo.”​—1 Corinto 5:11, 13.

10, 11. (a) Asinot’ makinresponsabilidad iti nababa a moral a pagalagadan iti Kakristianuan, ken apay? (b) Kasano a ti kapadasan ti maysa a lalaki idiay Filipinas idemostrana a, kas maysa a grupo, salsalimetmetan dagiti Saksi ni Jehova ti nangato a pagalagadan ti moral?

¹⁰ Agpapan pay daytoy nalawag a sursuro, ti Kakristianuan ket natatek iti imoralidad. Dagiti klerigo a ginamporanda dagiti nadiosan a pagalagadan ti mapabasol iti daytoy a situasion, kas met laeng dagidiay mangisasao laeng kadagiti pagalagadan ti Biblia ngem saanda met nga ipatpatungpal a situtured dagita kadagiti kongregasionda. Nupay kasta, iti daytoy, dagiti Saksi ni Jehova kas maysa nga ili magmagnada kadagiti addang ni Jesus.

¹¹ Usigenyo ni Jose, a taga Filipinas. Idi agtawen ti 17 agdindinamagen kas maysa a manangriribuk ken sugador. Isut’ masansan a nabartek, agbibiag iti imoral a panagbiag, ken masansan maibalbalud gapu iti panagtakaw. Kalpasanna isut’ nasarakan dagiti Saksi ni Jehova. “Ti panagadal ti Biblia ti nangbalbaliw nga interamente iti panagbiagko,” kunana. “Saanakon nga igin-inum ken agsigarilio, ken naadalkon a medmedan ti panagpungtotko. Addaanakon ti nadalus a konsiensia, addaanen ti maymaysa laeng nga asawa. Nagun-odak met ti panagraem dagiti kaarrubak, a dati nga umaw-awag kaniak ‘Jose, ti manangriribuk’ ken ‘Jose, ti Saksi ni Jehova.’ Ti anakko ken ti kaanakak a lalaki ket ministerial nga ad-adipenda metten iti kongregasion idiay agdama a pagserserbiakon kas maysa a panglakayen ken maysa a regular payunir.” Ni Jose ken minilmilion kadagiti dadduma pay a Kristiano a saksi ni Jehova ket magmagnada kadagiti addang ni Jesus kas nadalus iti moral a Kristiano.

Neutralidad

12. Ania a kababalin dagiti pudno a Kristiano ti intampok ni Jesus iti kararagna a nailanad iti Juan kapitulo 17?

¹² Iti atiddog a kararag ni Jesus iti maudi a rabiina a kadua dagiti ad-adalanna, nadakamatna ti sabali pay a pamay-an a dagiti pasurotna ‘magnada iti addangna.’ Iti pannakisaona kadagiti adalanna, kinunana: “Saanda a paset ti lubong a kas kaniak saanak a paset ti lubong.” (Juan 17:16) Kaipapanan daytoy a dagiti Kristiano neutralda. Imbes a makiramanda iti politika wenno susik a nasional, ibagbagada kadagiti dadduma maipapan iti Pagarian ti Dios, ti kakaisuna a solusion kadagiti parikut daytoy a lubong.​—Mateo 6:9, 10; Juan 18:36.

13, 14. (a) Kasanot’ pannakaiduma ti Kakristianuan manipud kadagiti Saksi ni Jehova maipapan iti neutralidad? (b) Kasano a ti panangsalimetmet iti napolitikaan a neutralidad iti biang ti maysa a Saksi idiay Japan nagbanag iti pannakagunggona ti intero a panagkakabsat?

¹³ Daytoy a prinsipio ti neutralidad ket nalipatanen ti kaaduan a kameng ti Kakristianuan, a kadakuada dagiti nasional a namunganayan ti masansan a napatpateg kadakuada ngem kadagiti narelihiusuan a nakaikamenganda. Ti kolumnista dagiti agkakawing a pagiwarnakan a ni Mike Royko intudona a dagiti “Kristiano” nikaanoman saanda a “delikado unay maipapan iti pannakigubat kadagiti sabsabali a Kristiano,” innayonna: “No addaanda koma ti delikadesa, kaaduan koma kadagiti nadara unay a gubgubat idiay Europa ket di koma napaspasamak.” A dagiti Saksi ni Jehova salsalimetmetanda ti istrikto a Nakristianuan a neutralidad kadagiti panawen ti gubat ket maysan a pagaammo unay a kinapudno. Ngem kas kadagiti sumursurot ti addang ni Jesus, neutralda met kadagiti sosial ken napolitikaan a pagsasalisalan. Gapuna, awan dagiti mangriribuk iti nakaskasdaaw a sangalubongan a panagkaykaysada.​—1 Pedro 2:17.

¹⁴ No maminsan ti neutralidadda ti mangiyeg iti di ninamnama a resulta. Idiay distrito Tsugaru iti makin-amianan a Japan, kas pangarigan, dagiti eleksion ket nabara unay. Ngem ni Toshio, katulongan a manedyer iti Departamento a Pinansial iti lokal nga opisina ti gobierno, ti madi a makiraman gapu iti konsiensiana iti kampania ti reeleksion ti mayor. Nagbunga daytoy ti pannakaipababa ti saadna idiay Departamento dagiti Imburnal. Makatawen kamaudiananna, nupay kasta, naaresto ti mayor ket napilitan a naglusulos gapu kadagiti narugit nga ar-aramid. Maysa a baro a mayor ti napili. Idi nangngegna ti pannakaipababa ni Toshio, isut’ insublina iti nangato nga administratibo a saad, ket daytoy ti nangiyeg kadagiti bendision kadagiti Kristiano a kakabsat ni Toshio. Kasano? Inlawlawag ni Toshio a nakarigrigat ti panangala kadagiti permiso nga agusar kadagiti gymnasium a maipaay iti panagtataripnong malaksid kadagiti atletiko nga ar-aramid. Ngem iti agdama a saadna, “nabalinannak nga inusar ni Jehova”​—iti panangadaw kadagiti mismo a sasao ni Toshio​—“a manggun-od ti panagusar kadagita a gymnasium nga agpaay iti tallo a kumbension distrito ken uppat nga asamblea sirkito.” Nagpatingga a kunana: “La ketdi no agtalinaedtayo a matalek, mangilukat ni Jehova kadagiti di mapampanunot a pamay-an a panangusar kadatayo.”

Iti Pagtaengan

15. Kasanot’ panangibati ni Jesus iti modelo nga agpaay kadagiti paspasurotna maipapan iti relasion ti pamilia?

¹⁵ Ti sabali pay a paset a dagiti Kristiano ‘sursurotenda ti addang ni Jesus, ket idiay pagtaengan. Ti Biblia impasdekna ti ulidan ni Jesus kas modelo nga agpaay kadagiti relasion iti pagtaengan idi a kinunana: “Agtulnogkayo iti maysa ken maysa kadakayo babaen iti panagbuteng ken Kristo. Dagiti assawa a babbai agtulnogda koma kadagiti assawada a kas iti Apo, ta ti asawa a lalaki isu ti ulo ti babai kas met ni Kristo isu ti ulo ti kongregasion . . . Kinapudnona, kas ti kongregasion agtulnog ken Kristo, kasta met a dagiti assawa a babbai agtulnogda koma kadagiti assawada iti isuamin. Assawa a lallaki, ayatenyo dagiti assawayo, a kas met ti panagayat ni Kristo iti kongregasion ket inyawatna ti bagina gapu kenkuana.”​—Efeso 5:21-25.

16, 17. (a) Aniat’ nagdakes a kasasaad nga adda iti Kakristianuan maipapan kadagiti relasion iti uneg ti pagtaengan? (b) Kasano laeng a maparang-ay ti relasion iti uneg ti pagtaengan, kas ipamatmat ti kapadasan ti maysa a pagasawaan idiay Brazil?

¹⁶ Ti Kakristianuan itatta iti kaaduan a pasetna dida ikankano daytoy a balakad ket gapu itoy napunno kadagiti nawarawara a pamilia. Gagangayen dagiti nasinasina a pagtaengan, ket masansan a dagiti susik ti naganak ken anak ket nakaro unay. “Ti pamilia ket masinasinan,” kuna ti maysa a propesor iti sikolohia sumagmamano a tawen ti napalabasen. Dagiti sikologo ti ubbing, dagiti manangbalakad iti panagasawa, ken dagiti sikiatrista ket limitado laeng ti panagballigida a mangsalimetmet iti panagkaykaysa ti agpegpeggad a pamilia. Ngem dagiti Saksi ni Jehova padpadasenda a sipipinget nga iyaplikar dagiti prinsipio ti Biblia ket agdindinamagda a maipaay iti nasaysayaat ngem ti gagangay a relasion ti pamilia.

¹⁷ Ni Aldemar, kas pangarigan, ket maysa a teniente iti polisia militar ti Brazil ket addaan kadagiti parikut ti pamilia. Isut’ pinanawan ni baketna ket kayatna ti maaddaan ti legal a pannakaisina. Isut’ pinanawan ni baketna ket kayatna ti maaddaan ti legal a pannakaisina. Isut’ pinanawan ni baketna ket kayatna ti maaddaan ti legal a pannakaisina. Isut’ nangrugi nga aginum ti napalalo unay ken pinadpadasna pay ti agbekkel. Kamaudiananna, dagiti kakabagianna, nga isuda dagiti Saksi ni Jehova, ti nakisao kenkuana maipapan iti Biblia. Nagustuanna ti nangngeganna ket nangrugi a makipagadal. Gapu ta tarigagayanna nga itunos ti panagbiagna iti takder ti neutralidad nga isu ti pagdindinamagan dagiti Saksi ni Jehova, inkalikagumna ti pannakaikkatna manipud iti militaria. Rinisot ni Aldemar ken ti asawana dagiti dida pagkinnaawatan iti panagasawada babaen ti panangiyaplikar kadagiti prinsipio ti Biblia a maad-adal ni Aldemar. Itan, sursurotendan addang ni Jesus, nga agserserbidan a dua ken Jehova kas regular payunir.

Natulnog Gapu iti Ayat

18. (a) Apay a dagiti Saksi ni Jehova ti mabembendisionan iti naespirituan itatta? (b) Kasano ti pannakatungtungpal itan ti Isaias 2:2-4?

¹⁸ Nalawag a dagiti Saksi ni Jehova ket sangsangkamaysada iti pannagna iti espiritu ken kadagiti addang ni Kristo Jesus. Kas indibidual ken kas maysa a grupo, isuda ti mabembendisionan iti naespirituan iti panangar-aramidda iti dayta. (Salmo 133:1-3) Dagiti nakabatbatad nga ebidensia ti nadiosan a bendision kadakuada ti nangtignay kadagiti umariwekwek a nasingpet panagpuspusona a tattao nga agtignay a maitunos iti padto idiay Isaias 2:2-4. Iti laeng napalabas a lima a tawen, 987,828 ti nangala kadagiti nasken nga addang iti dedikasion ket impresentarda ti bagbagida a maipaay iti bautismo iti danum. Siaayat, awan inkeddeng ni Jehova a limitasion iti bilang dagiti tattao a makaaramid iti daytoy sakbay a bumtak “ti dakkel a rigat”!​—Apocalipsis 7:9-14.

19. (a) Ania dagiti makitkita a gunggona a resulta ti panagserbi ken ni Jehova, ken kasano komat’ pannakamatmatda? (b) Aniat’ kangrunaan a rason ti intay panagtulnog iti bilbilin ni Jehova?

¹⁹ Kas ti ipakita dagiti kapadasan nga adda iti ngato, dagiti naespirituan a bendision a tagtagiragsaken ti ili ti Dios ti masansan a mapakpakuyogan kadagiti makitkita a gunggona. Kas pangarigan, gapu iti iyaadayuda iti panagsigarilio, babaen ti panagbiagda iti moral a panagbiag, ken babaen ti panagraem iti kinasanto ti dara, mabalin a maliklikanda ti pannakatnagda kas biktima dagiti dadduma a saksakit. Wenno gapu iti panagbiagda a maitunos iti kinapudno, mabalin a magunggonaanda kadagiti ekonomiko, sosial, wenno gunggona iti uneg ti pagtaengan. Aniaman kadagita makitkita a gunggona ti mamatmatan a kas bendision a naggapu ken ni Jehova, ken paneknekanda ti kinapraktikal dagiti linlinteg ni Jehova. Ngem ti posibilidad a pannakagun-od kadagita a praktikal a bentaha ket saan nga isut’ mismo a kangrunaan a rason ti panagtulnogda kadagiti linlinteg ti Dios. Dagiti pudno a Kristiano agtulnogda ken ni Jehova gapu ta isu ti inayatda, gapu ta isut’ naikari iti panagdayawda, ken gapu ta ti panagaramid iti pagayatanna ti kakaisuna nga umiso a banag. (1 Juan 5:2, 3; Apocalipsis 4:11) Ni Satanas ti mangibagbaga a dagiti tattao agserserbida laeng iti Dios a maipaay kadagiti inaagum a gunggona.​—Kitaenyo ti Job 1:9-11; 2:4, 5.

20. Kasano a dagiti Saksi ni Jehova itatta magmagnada a sangsangkatimpuyog iti espiritu kas kadagiti tallo a matalek a Hebreo a Saksi idi ugma?

²⁰ Dagiti moderno a saksi ni Jehova ket magmagnada iti isu met laeng nga espiritu kas kadagiti tallo a matalek nga agtutubo a saksi a Hebreo idi kaaldawan ni Daniel. Idi agpegpeggad iti pannakaipalladawda iti sumsumged a hurno, kinuna dagitoy: “No kasta, ti Diosmi isu a pagserserbianmi mabalinnakami nga isalakan. Iti hurno a sumsumged ken dumardarang ket ita imam, O ari ilapsutnakamto. Ket no saan [kayatna a sawen, no palubosanna a mataykami], maipakaammo koma kenka, O ari, a dayta diosmo dikamto pagserbian, ken kasta met dikamto pagdaydayawan ti ladawan a balitok nga impatakdermo.” (Daniel 3:17, 18) Agpapan pay aniaman kadagiti madagdagus a makita a gunggona wenno pagtungpalanna, itultuloyto dagiti Saksi ni Jehova ti sumurot a sisisinged kadagiti addang ni Jesus, a pagaammoda a ti biag nga agnanayon idiay baro a lubong ti Dios ti naipasiguro! Kas nagkaykaysa nga ili, agtultuloydanto a magna “iti isu met laeng nga espiritu” ken “iti isu met laeng nga addang,” aniaman ti mapasamak!

Mailawlawagyo Aya:

◻ No apay a dagiti Saksi ni Jehova sangsangkamaysada?

◻ No kadagiti ania a banag ti nakaidumaan dagiti Saksi ni Jehova kadagiti makunkuna laeng a Kristiano?

◻ No aniat’ kangrunaan a rason no apay agserserbi dagiti pudno a Kristiano ken ni Jehova?

◻ No kasanot’ panangmatmat ti ili ti Dios kadagiti gunggona nga ibunga ti panagtulnog ken ni Jehova?

[Ladawan iti panid 16]

No madi nga umawat ti pasiente iti pannakaiyalison iti dara, masansan maipatpato nga isut’ maysa kadagiti Saksi ni Jehova

[Ladawan iti panid 18]

Adu kadagiti agkunkuna a Kristianoda awan delikadesada maipapan iti pannakigubat iti maysa​—nga addaan pammendision dagiti kleroda