Diyo Pagsinaen ti Pinagtipon ti Dios

“Saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao.”​—MATEO 19:6.

1, 2. Apay a Nainkasuratan ken realistiko a namnamaen a dagiti naasawaan ket maipasango kadagiti parikut?

DAREPDEPENYO nga agrubrubbuatkayo nga agbiahe iti adayo a lugar babaen ti luganyo. Addanto ngata parikut a masalawyo? Saan a realistiko a panunoten nga awan! Kas pagarigan, mabalin a saan a nasayaat ti paniempo, isu a masapul nga in-inayadenyo ti agpataray. Mabalin met nga agpalia ti makina ti luganyo ket diyo kabaelan a tarimaanen, isu a masapul nga agpaigidkayo tapno agpatulong. Agbabawikay kadi a nagbiahe ket ibatiyo lattan ti luganyo gapu ta naipasangokayo kadagiti kasta a kasasaad? Saan. No nawatiwat ti biaheyo, namnamaenyo nga adda dagiti tumaud a parikut isu a nainsiriban a mangpanunotkayo kadagiti pamay-an a mangrisut kadagita.

² Kasta met iti panagasawa. Saan a maliklikan a tumaud dagiti parikut, ket saan a realistiko no namnamaen dagiti agngayngayangay a makiasawa a bin-ig a ragsak ti biag ti naasawaan. Iti 1 Corinto 7:28, prangka nga ibaga ti Biblia a dagiti assawa a lallaki ken babbai agpasardanto iti “rigat iti lasagda.” Apay ngay? Agpada ngamin nga imperpekto ti asawa a lalaki ken babai. Malaksid iti dayta, agbibiagtayo ‘kadagiti napeggad a tiempo a narigat a pakilangenan.’ (2 Timoteo 3:1; Roma 3:23) Gapuna, maipasango latta kadagiti parikut uray ti agkatunosan ken naespirituan ti panagpampanunotda nga agassawa.

3. (a) Ania ti panangmatmat ti adu a tattao iti lubong maipapan iti panagasawa? (b) Apay nga ikagumaan dagiti Kristiano a taginayonen ti panagasawada?

³ Iti moderno a lubong, ti panagsina ti dagus a panunoten dagiti dadduma nga agassawa no agparikut ti relasionda. Iti adu a pagilian, saan a maliklikan ti panagadu dagiti agdibdiborsio. Nupay kasta, dagiti pudno a Kristiano risutenda ti parikut imbes nga itarayanda. Apay? Gapu ta matmatanda ti panagasawa kas sagrado a sagut manipud ken ni Jehova. Kinuna ni Jesus maipapan kadagiti agassawa: “Ti pinagsinnangol ti Dios saan koma a pagsinaen ti tao.” (Mateo 19:6) Pudno, saan a kanayon a nalaka nga annuroten dayta a pagalagadan. Kas pagarigan, dagiti kakabagian ken sabali a tattao​—agraman dagiti mamalbalakad iti panagasawa​—a saan a mangbigbigbig kadagiti prinsipio ti Biblia masansan nga iparegtada kadagiti agassawa nga agsina wenno agdiborsioda maibatay kadagiti saan a nainkasuratan a rason.a Ngem ammo dagiti Kristiano a nasaysayaat nga amang no tarimaanen ken taginayonenda ti relasionda kas agassawa imbes a sidadarasudos a pagpatinggaen dayta. Wen, napateg nga iti damo pay laeng, risutentayo dagiti bambanag maitunos iti pamay-an ni Jehova​—saan nga iti pamay-an dagiti tattao.​—Proverbio 14:12.

Panangdaer Kadagiti Parikut

4, 5. (a) Ania dagiti parikut iti panagasawa a masapul a marisut? (b) Apay nga epektibo dagiti prinsipio ti Sao ti Dios uray kadagiti parikut mainaig iti panagasawa?

⁴ Saan a mailibak nga adda dagiti panawen a masapul nga agtugaw ti agassawa tapno risutenda dagiti parikutda. Kaaduanna, nainaig dayta kadagiti babassit a parikut. Ngem adda dagiti pagassawaan a maipasango kadagiti nadagdagsen a parikut a mamagpeggad iti pundasion ti relasionda. No dadduma, nalabit a kasapulam ti agpatulong kadagiti aduan iti kapadasan a naasawaan a Kristiano a panglakayen. Nupay kasta, dina kayat a sawen a napaay ti relasionyo nga agassawa. Ipakpakitana laeng a napateg ti panangannurot a naimbag kadagiti prinsipio ti Biblia no risuten dagiti parikut.

⁵ Kas Namarsua kadagiti tattao ken Namunganay iti urnos ti panagasawa, ni Jehova ti kangrunaan a makaammo no ania ti kasapulan dagiti agassawa tapno agballigi ti relasionda. Ti saludsod ket, Ipangagtayo kadi ti balakad ti Saona ken tungpalentayo dayta? Sigurado a magunggonaantayo no aramidentayo dayta. Kinuna ni Jehova kadagiti nagkauna nga adipenna: “O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.” (Isaias 48:18) Naballigi ti pagassawaan a mangyap-aplikar kadagiti pagalagadan ti Biblia. Usigentayo nga umuna ti balakad ti Biblia kadagiti assawa a lallaki.

“Itultuloyyo nga Ayaten Dagiti Assawayo”

6. Ania ti balakad ti Kasuratan kadagiti assawa a lallaki?

⁶ Ti surat ni apostol Pablo kadagiti taga-Efeso ket naglaon kadagiti nalawag a pagalagadan para kadagiti assawa a lallaki. Insurat ni Pablo: “Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta. Iti kastoy a pamay-an rebbeng a dagiti lallaki ayatenda dagiti assawada a kas kadagiti bukodda a bagi. Ti agayat iti asawana a babai ay-ayatenna ti bagina, ta awan pay a pulos ti tao a nanggura iti bukodna a lasag; no di ket taraonan ken ipatpategna dayta, a kas met ti panangipateg ti Kristo iti kongregasion. Uray pay kasta, ayaten koma ti tinunggal maysa kadakayo ti asawana a babai a kas ti panagayatna iti bagina.”​—Efeso 5:25, 28, 29, 33.

7. (a) Ania ti rumbeng a mangringbaw iti pundasion ti Kristiano a pagassawaan? (b) Kasano nga itultuloy nga ayaten dagiti lallaki ti assawada?

⁷ Saan a dinakamat ni Pablo ti tunggal parikut a mabalin a tumaud iti nagbaetan ti agassawa. Imbes ketdi, dinakamatna no ania ti talaga a solusion dagita a parikut babaen ti panangipatuldona iti galad a rumbeng a mangringbaw iti pundasion ti tunggal Kristiano a pagassawaan​—ti ayat. Kinapudnona, innem a daras a nadakamat ti ayat iti kaad-adaw a teksto. Imutektekanyo met ta kinuna ni Pablo kadagiti assawa a lallaki: “Itultuloyyo nga ayaten dagiti assawayo.” Awan duadua a nabigbig ni Pablo nga adayo a nalaklaka ti agrayo iti umuna a gundaway ngem iti mangtaginayon iti ayat. Nangnangruna kadagitoy ‘maudi nga al-aldaw,’ nga adu ti ‘agayat iti bagbagida’ ken “saan a sidadaan iti aniaman a tulagan.” (2 Timoteo 3:1-3) Adu a pagassawaan ti madaddadael ita gapu kadagiti kasta a negatibo a kababalin, ngem ti maysa a naayat nga asawa a lalaki dina ipalubos a dagiti managimbubukodan a kababalin daytoy a lubong ti mangimpluensia iti panagpampanunot ken panagtigtignayna.​—Roma 12:2.

Kasanoyo a Maipaayan Dagiti Assawayo?

8, 9. Kadagiti ania a pamay-an a maipaayan ti Kristiano a lalaki ti asawana?

⁸ No maysaka a Kristiano nga asawa a lalaki, kasano a maliklikam dagiti managimbubukodan a pagannayasan ket maipakitam ti pudpudno a panagayat iti asawam? Iti sasaona kadagiti taga-Efeso a nadakamat itay, tinukoy ni Pablo ti dua a banag a masapul nga aramidem​—ipaaymo dagiti kasapulan ti asawam, ken ipategmo a kas iti panangipategmo iti bagim. Kasano a maipaayam ti asawam? Ti maysa a pamay-an ket babaen ti material​—nga ipaaymo dagiti pisikal a kasapulan ni baketmo. Insurat ni Pablo ken ni Timoteo: “Pudno unay no ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.”​—1 Timoteo 5:8.

⁹ Nupay kasta, saanna laeng a kalikaguman ti basta panangipaay iti taraon, kawes, ken pagtaengan. Apay? Gapu ta mabalin a maipapaay ti asawa a lalaki dagiti material a kasapulan ni baketna ngem dina met mapennek dagiti emosional ken naespirituan a kasapulanna. Napateg ti panangpennek kadagitoy a kasapulan. Pudno, adu a Kristiano a lallaki ti okupado a mangay-aywan kadagiti bambanag mainaig iti kongregasion. Nupay kasta, dagiti nadagsen nga annongen iti kongregasion ket saan a rason tapno liwayanna ti inted ti Dios nga obligasionna kas ulo ti pamilia. (1 Timoteo 3:5, 12) Mainaig iti dayta, kinuna daytoy a magasin sumagmamano a tawenen ti napalabas: “Maitunos kadagiti kalikagum ti Biblia, makuna nga ‘iti pagtaengan a rumbeng a mangrugi ti panagipastor.’ No liwayan ti panglakayen ti pamiliana, mabalin a mapukawna ti pribilehiona kas panglakayen.”b Nalawag a masapul nga ipaaymo ti pisikal, emosional, ken kangrunaanna, ti naespirituan a kasapulan ti asawam.

Ania ti Kayat a Sawen ti Ipategmo ti Asawam?

10. Kasano a maipateg ti lalaki ti asawana?

¹⁰ No ipategmo ti asawam, isu ket aywanam gapu ta ay-ayatem. Adda sumagmamano a pamay-an a maaramidmo dayta. Umuna, mangbusboska iti umdas a panawen a makikadua iti asawam. No maliwayam nga aramiden dayta, mabalin a bumaaw ti ayatna kenka. Laglagipem met a mabalin a saan nga umdas ti ipagarupmo a kaadu ti panawen ken atension a kasapulan ni baketmo. Ken saanmo laeng nga ibaga nga ipatpategmo ni baketmo. Masapul a mariknana dayta. Insurat ni Pablo: “Tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.” (1 Corinto 10:24) Kas naayat nga asawa, kayatmo a siguraduen nga ammom ti talaga a kasapulan ni baketmo.​—Filipos 2:4.

11. Kasano a ti panangtrato ti lalaki iti asawana ket makaapektar iti relasionna iti Dios ken iti kongregasion?

¹¹ Maipakitam met nga ipatpategmo ni baketmo babaen ti nadungngo a panangtratom kenkuana, agpada iti sao ken aramid. (Proverbio 12:18) Insurat ni Pablo kadagiti taga-Colosas: “Dakayo nga assawa a lallaki, itultuloyyo nga ayaten dagiti assawayo ket dikay agpungtot a sipapait kadakuada.” (Colosas 3:19) Sigun iti maysa a reperensia, dagiti maudi a paset dayta a sinao ni Pablo ket mabalin a maipaulog kas “dimo tratuen ti asawam a kasla babaonen” wenno “dimo pagbalinen nga adipen.” Ti maysa a diktador a lalaki​—iti man pribado wenno iti publiko​—ket sigurado a saan a mangipatpateg iti asawana. No nagubsang ti panangtratona ken ni baketna, mabalin a maapektaran ti relasionna iti Dios. Nagsurat ni apostol Pedro kadagiti assawa a lallaki: “Agtultuloykayo a makipagtaeng [kadagiti assawayo] iti umasping a pamay-an maitunos iti pannakaammo, nga itudinganyo ida iti dayaw a kas iti narasrasi a basehas, ti babai, yantangay makipagtawidkayo met kadakuada iti di kaikarian a parabur ti biag, tapno saan a malappedan dagiti kararagyo.”c​—1 Pedro 3:7.

12. Ania ti masursuro ti Kristiano nga asawa a lalaki iti wagas a panangtrato ni Jesus iti kongregasion Kristiano?

¹² Saanmo a tagilag-anen ti panagayat ni baketmo. Ipanamnamam kenkuana ti agtultuloy a panagayatmo. Nangipakita ni Jesus iti ulidan kadagiti Kristiano nga assawa a lallaki babaen ti wagas a panangtratona iti kongregasion Kristiano. Isu ket nadungngo, naasi, ken manangpakawan​—uray pay no maulit-ulit a nangipakita dagiti pasurotna kadagiti di makaay-ayo a kababalin. Gapuna, nabaelan ni Jesus nga ibaga kadagiti dadduma: “Umaykayo kaniak, . . . ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” (Mateo 11:28, 29) Kas panangtuladna ken ni Jesus, ti Kristiano a lalaki tratuenna ni baketna a kas iti panangtrato ni Jesus iti kongregasion. Ti lalaki a pudpudno a mangipatpateg iti asawana, agpadpada iti sao ken aramid, ket pudno a makapagin-awa ken ni baketna.

Dagiti Assawa a Babbai nga Agbibiag Maitunos Kadagiti Prinsipio ti Biblia

13. Ania dagiti prinsipio a linaon ti Biblia a makatulong kadagiti assawa a babbai?

¹³ Naglaon met ti Biblia kadagiti prinsipio a makatulong kadagiti assawa a babbai. Kuna ti Efeso 5:22-24, 33: “Dagiti babbai agpasakupda koma kadagiti assawada a kas iti Apo, agsipud ta ti lalaki isu ti ulo ti asawana a kas met ti Kristo isu ti ulo ti kongregasion, yantangay isu ti manangisalakan iti daytoy a bagi. Iti kinapudnona, no kasano a ti kongregasion agpaspasakup iti Kristo, kasta met koma dagiti babbai kadagiti assawada iti amin a banag. . . . Ti babai rebbeng nga addaan iti nauneg a panagraem iti asawana.”

14. Apay a saan a mangipababa kadagiti babbai ti Nainkasuratan a prinsipio ti panagpasakup?

¹⁴ Imutektekanyo ti panangipaganetget ni Pablo iti panagpasakup ken panagraem. Naipalagip iti babai nga agpasakup iti asawana. Maitunos dayta iti urnos ti Dios. Adda pagpasakupan ti tunggal sibibiag a parsua idiay langit ken ditoy daga. Uray ni Jesus agpasakup ken ni Jehova a Dios. (1 Corinto 11:3) Siempre, nalaklaka nga agtultuloy nga agpasakup ti babai no watwaten ni lakayna ti kinaulona iti umiso a pamay-an.

15. Ania ti sumagmamano a balakad ti Biblia kadagiti assawa a babbai?

¹⁵ Kinuna met ni Pablo a ti babai “rebbeng nga addaan iti nauneg a panagraem iti asawana.” Nasken nga iparangarang ti Kristiano a babai ti “naulimek ken naalumamay nga espiritu,” a di makirinnibal iti autoridad ni lakayna wenno mangaramid lattan iti bukodna a tignay. (1 Pedro 3:4) Ti maysa a nadiosan a babai ikagumaanna nga aramiden dagiti pagimbagan ti pamiliana ken pakaidayawan ti ulona. (Tito 2:4, 5) Pagreggetanna a sawen dagiti makaay-ayo a banag maipapan ken ni lakayna ket saan a mangaramid iti aniaman banag a mangikkat iti panagraem iti asawana. Ikagumaanna met a suportaran dagiti desision ni lakayna tapno agballigi.​—Proverbio 14:1.

16. Ania ti masursuro dagiti Kristiano nga assawa a babbai kadagiti ulidan da Sara ken Rebecca?

¹⁶ Ti naulimek ken naalumamay nga espiritu dina kayat a sawen a saan a mabalin nga iyebkas ti Kristiano a babai ti opinionna wenno saan a napateg ti kapanunotanna. Dagiti nagkauna a nadiosan a babbai, a kas kada Sara ken Rebecca, dida nagkedked a nangyebkas iti opinionda kadagiti bambanag, ket ipakita ti rekord ti Biblia nga inanamongan ni Jehova dagita a tignayda. (Genesis 21:8-12; 27:46–28:4) Mabalin met nga iyebkas dagiti Kristiano a babbai ti riknada. Ngem aramidenda koma dayta a sidadayaw, saan ket nga iti mangibabain a tono. Iti kasta, makitadanto nga ad-adda a makaay-ayo ti tignay dagiti assawada kadagiti opinionda.

Ti Akem ti Pannakisinggalut

17, 18. Kasano a madaeran dagiti assawa a lallaki ken babbai dagiti panangikagumaan ni Satanas a mangdadael iti relasion ti agassawa?

¹⁷ Ti panagasawa ket tungpal biag a pannakisinggalut. Gapuna, ti asawa a lalaki ken babai agpada koma a pudno a tarigagayanda nga agballigi ti relasionda. No awan ti silulukat a komunikasion, mabalin a lumanlan dagiti parikut agingga a nakaro unayen. Masansan a di agtungtong ti agassawa no tumaud dagiti parikut, a pakaigapuan ti sakit ti nakem. Dadduma nga assawa ti agbirok pay ketdi iti pamay-an tapno makalapsutda iti dayta a relasion, nalabit babaen ti pannakikamalala. Impakdaar ni Jesus: “Ti tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.”​—Mateo 5:28.

¹⁸ Binalakadan ni apostol Pablo ti amin a Kristiano agraman dagiti naasawaan: “Agpungtotkayo, nupay kasta dikay agbasol; saannakay koma a malnekan ti init a sipupungtotkayo pay, dikay met ikkan ti lugar ti Diablo.” (Efeso 4:26, 27) Ti kangrunaan a kabusortayo, ni Satanas a Diablo, ikagkagumaanna a gundawayan dagiti saan a panagkikinnaawatan a mabalin a tumaud iti nagbabaetan dagiti Kristiano. Diyo ipalubos nga agballigi ti Diablo! No tumaud dagiti parikut, sukimatenyo no ania ti ibaga ti Biblia maipapan iti kapanunotan ni Jehova kadagiti bambanag, nga usarenyo dagiti publikasion a naibatay iti Biblia. Sikakalmado ken sipupudno a pagsaritaanyo dagiti di pagkikinnaawatan. Ikagumaanyo nga iyaplikar dagiti naadalyo a pagalagadan ni Jehova. (Santiago 1:22-25) No maipapan iti relasionyo kas agassawa, determinadokayo koma nga agtultuloy a makipagna iti Dios kas agassawa, ket diyo ipalubos nga adda asinoman a mamagsina iti pinagtipon ti Dios!​—Mikias 6:8.

[Footnotes]

Malagipyo Kadi?

• Apay a maipasango kadagiti parikut uray dagiti Kristiano a pagassawaan?

• Kasano a maipaay ti lalaki dagiti kasapulan ti asawana ken kasano a maipakitana nga ipatpategna ni baketna?

• Kasano a maipakita ti babai a raraemenna unay ni lakayna?

• Kasano a mapalagda ti lalaki ken babai ti singgalut ti panagasawada?

[Ladawan iti panid 20]

Nasken nga aywanan a naimbag ti lalaki ti asawana, saan laeng nga iti material no di ket iti naespirituan a banag

[Ladawan iti panid 21]

Makapagin-awa iti babai no isu ket ipatpateg ti asawana

[Ladawan iti panid 23]

Dagiti Kristiano nga assawa a babbai iyebkasda ti riknada iti nadayaw a pamay-an