SAGRADO A PAMMAKDAAR
Mamimpat laeng nga agparang iti Kristiano a Griego a Kasuratan daytoy a sasao, ken daytoy ti pakaipatarusan ti Griego a sao a loʹgi·on (kaipapananna ti “bassit a sao”), bassit a porma ti loʹgos (sao). Idi damo, ti loʹgi·on kaipapananna laeng ti ababa a sagrado nga ebkas, ngem idi agangay mangipasimudaagen iti aniaman a nadibinuan a komunikasion wenno orakulo. Ti sumagmamano a bersion ipatarusda ti loʹgi·on kas ‘orakulo’ laeng. (AS, KJ, RS) Ti patarus ni Wuest aramatenna ti “nadibinuan nga ebkas” iti Aramid 7:38 ken Roma 3:2.
Dinakamat ni Esteban a ti Linteg a naited ken Moises iti Bantay Sinai ket “nabiag a sagrado a pammakdaar.” (Ara 7:38) Tuktukoyen idi ni apostol Pablo ti intero a Hebreo a Kasuratan ken nabatad nga uray met ti intero a naipaltiing a Kristiano a Kasuratan a naisurat agingga iti dayta a tiempo, idi a kinunana: “Ania, ngarud, ti pakaigundawayan ti Judio, wenno ania ti pagimbagan ti pannakakugit? Maysa a dakkel a banag iti tunggal wagas. Umuna iti amin, agsipud ta naitalek kadakuada dagiti sagrado a pammakdaar ti Dios.” (Ro 3:1, 2) Gapuna, naitalek kadagiti Judio ti panangisurat iti daytoy a pakabuklan ti naipaltiing a Kasuratan, a nagsuratda “bayat nga idaldalan ida ti nasantuan nga espiritu.”—2Pe 1:20, 21.
Iti surat kadagiti Hebreo iraman ni apostol Pablo kas “sagrado a pammakdaar” dagiti sursuro a nayawat iti sangatauan babaen ken Apo Jesu-Kristo, kadagiti apostolna, ken iti dadduma pay a napaltiingan a Kristiano a mannurat. (Heb 5:12; idiligyo ti Heb 6:1, 2.) Iyanninaw met ni Pedro daytoy a nalawa a saklaw ti “sagrado a pammakdaar” idi kinunana kadagiti pasurot ni Kristo, iti 1 Pedro 4:11: “No ti asinoman agsao, agsao koma a kasla dayta ti sagrado a pammakdaar ti Dios.” Ibilangna met a maipada ti autoridad ti sursurat ni apostol Pablo iti autoridad ti “dadduma a Kasuratan.”—2Pe 3:15, 16.
Ti Griego a Septuagint masansan nga aramatenna ti sao a loʹgi·on, kas iti panangipatarusna iti Salmo 12:6 (11:6, LXX): “Ti sasao ni Jehova ket nasin-aw a sasao.” Kastoy ti mabasa iti patarus ni Bagster iti Septuagint iti daytoy a bersikulo: “Dagiti orakulo ti Apo ket nasin-aw nga orakulo.”