LEKSION 20

No Kasano a Maor-organisar ti Kongregasion Kristiano

Nayimprenta nga Edision

Ni Jehova ket Dios ti urnos. (1 Corinto 14:33) Isu a namnamaentayo nga organisado dagiti agdaydayaw kenkuana. Kasano a maor-organisar ti kongregasion Kristiano? Ania ti maitulongtayo tapno agtultuloy dayta a naurnos?

1. Asino ti ulo ti kongregasion?

“Ti Kristo ti ulo ti kongregasion.” (Efeso 5:23) Manipud langit, idadauluanna dagiti aktibidad ti ili ni Jehova iti intero a lubong. Inapointaran ni Jesus ti “matalek ken masirib nga adipen”—ti bassit a grupo dagiti eksperiensiado a panglakayen a maaw-awagan met iti Bagi a Manarawidwid. (Basaen ti Mateo 24:45-47.) Kas kadagiti apostol ken panglakayen idiay Jerusalem idi umuna a siglo, mangipapaay met ti Bagi a Manarawidwid iti instruksion kadagiti kongregasion iti intero a lubong. (Aramid 15:2) Ngem saan nga isuda ti lider ti organisasiontayo. Ad-adalenda ti Biblia tapno maammuanda ti kayat ni Jehova nga aramidenda, ken nakasaganada a sumurot iti panangidaulo ni Jesus.

2. Ania ti ar-aramiden dagiti panglakayen?

Dagiti panglakayen ket nataengan iti naespirituan a Kristiano a lallaki a mangisursuro iti Biblia. Kas papastor, tultulongan ken pabpabilgenda met ti ili ni Jehova. Awan ti sueldoda. Imbes ketdi, agserserbida a “situtulok iti sanguanan ti Dios; saan a gapu iti panagayat iti naagum a gunggona, no di ket sigagagar.” (1 Pedro 5:1, 2) Tultulongan ida dagiti ministerial nga adipen, nga inton agangay, ket mabalin a makualipikar met nga agserbi kas papanglakayen.

Mangapointar ti Bagi a Manarawidwid kadagiti panglakayen nga agserbi kas manangaywan iti sirkito. Bisbisitaen dagitoy a manangaywan iti sirkito ti agduduma a kongregasion tapno mangtedda iti instruksion ken pammabileg kadagiti kakabsat. Isuda ti mangpili kadagiti agbalin a panglakayen ken ministerial nga adipen a makagaw-at kadagiti kualipikasion nga adda iti Biblia.—1 Timoteo 3:1-10, 12; Tito 1:5-9.

3. Ania ti responsabilidad ti tunggal Saksi?

Amin nga adda iti kongregasion “idaydayawda . . . ti nagan ni Jehova”—makiparpartisiparda kadagiti gimong ti kongregasion ken ar-aramidenda ti amin a kabaelanda a makiraman iti ministerio.—Basaen ti Salmo 148:12, 13.

AMMUEM TI AD-ADU PAY

Ammuem no ania a klase a lider ni Jesus, no kasano a tultuladen dagiti panglakayen ti ulidanna, ken no kasanotayo nga agtulnog ken Jesus ken kadagiti panglakayen.

4. Ni Jesus ket naasi a lider

Adda nagsayaat nga iyaw-awis ni Jesus. Basaen ti Mateo 11:28-30, sa pagsaritaan daytoy a saludsod:

Ania ti kayat ni Jesus a mariknatayo iti panangidaulona?

Kasano a matulad dagiti panglakayen ti ulidan ni Jesus? I-play ti VIDEO.

VIDEO: Rimmesponde Dagiti Panglakayen Idi Nagginggined Idiay Nepal (4:56)

Nalawag nga isursuro ti Biblia no kasano ti rumbeng a panangaramid dagiti panglakayen iti trabahoda.

Basaen ti Isaias 32:2 ken 1 Pedro 5:1-3, sa pagsaritaan dagitoy a saludsod:

Ania ti mariknam ta naammuam a tultuladen dagiti panglakayen ti kinaasi ni Jesus?
Ania pay ti dadduma a pamay-an a matulad dagiti panglakayen ni Jesus?

5. Ar-aramiden dagiti panglakayen ti isursuroda

Ania ti kayat ni Jesus a pangibilangan dagiti panglakayen iti responsabilidadda? I-play ti VIDEO.

VIDEO: Mangidadaulo Dagiti Panglakayen! (7:39)

Nangted ni Jesus iti pagtuladan kadagiti mangidaulo iti kongregasion. Basaen ti Mateo 23:8-12, sa pagsaritaan daytoy a saludsod:

Ania ti ibagbaga ti Biblia a masapul nga aramiden dagiti panglakayen? Panagkunam, masursurot kadi dayta dagiti lider ti relihion?

A. Collage: Panglakayen a mangpempennek iti naespirituan a kasapulanna ken iti naespirituan a kasapulan ti pamiliana. 1. Agkarkararag sakbay nga agadal iti Biblia. 2. Sursuruanna ti anakna maipapan iti Biblia iti tulong ni baketna.

B. Ti isu met la a panglakayen ken ti asawana a mangbisbisita iti masakit a sister a kakongregasionda nga adda iti ospital.

Itultuloy a pabpabilgen dagiti panglakayen ti espiritualidadda ken ti espiritualidad ti pamiliada
Ipatpateg dagiti panglakayen ti amin a kakabsat iti kongregasion
Regular a mangaskasaba dagiti panglakayen
Dagiti panglakayen ket mannursuro. Tumultulongda met iti panagdalus ken iti dadduma pay a trabaho

6. Mabalintayo ti makitinnulong kadagiti panglakayen

Adda ibaga ti Biblia nga importante a rason a makitinnulongtayo kadagiti panglakayen. Basaen ti Hebreo 13:17, sa pagsaritaan dagitoy a saludsod:

Husto laeng kadi ti ibagbaga ti Biblia nga agtulnog ken agpasakuptayo kadagiti mangidadaulo kadatayo? Apay, wenno apay a saan?

Basaen ti Lucas 16:10, sa pagsaritaan daytoy a saludsod:

Apay nga importante a makitinnulongtayo kadagiti panglakayen uray kadagiti kasla babassit a banag?

KUNA TI DADDUMA: “Saanmo a kasapulan ti makimiembro iti maysa a relihion.”

Panagkunam, apay a nasayaat nga agbalintayo a paset ti maysa a kongregasion?

SUMARIO

Ni Jesus ti ulo ti kongregasion. Maragsakantayo a makitinnulong kadagiti panglakayen a pinilina ta pabpabilgendatayo ken isursurodatayo babaen ti ulidanda.