Madadaelto Kadi ti Daga?

“TI PANUNGPALAN ti lubong ket kanayon a makapainteres a topiko, nangruna kadagiti pelikula,” kinuna ti kolumnista a ni John Scalzi. Apay a makaatrakar kadagiti agbuybuya dagiti pelikula a mangiladawan iti panungpalan ti lubong? “Gapu ta nakabutbuteng dayta,” kinuna ni Scalzi. Umanamongkayo kadi? Rumbeng kadi a kabutengtayo no kasano ken kaano a maungaw ti daga, agraman ti amin a biag iti dayta?

Dandani inaldaw a makangngegtayo kadagiti kalamidad a mamagkintayeg kadagiti tattao iti intero a lubong. Maulit-ulit a maipabuya dagita a pasamak iti telebision ken iti Internet. No kanayontayo a mabuya ti pannakadadael dagiti tattao ken lugar, naglaka a sumken iti panunottayo a ti panungpalan ti lubong ket saan laeng a pelikula no di ket agpaypayso a pangta.

Ti kapanunotan dagiti sientista maipapan iti panungpalan ti lubong ti mangpakaro pay iti kasta a panagbuteng. Adda pay ketdi dagiti mangipadto iti petsa a panagpaso ti daga. Idi Marso 2008, impadamag ti Monthly Notices of the Royal Astronomical Society a sigun iti dua nga astronomo, iti las-ud ti agarup 7.59 bilion a tawen, dungparen ken runawen ti init daytoy daga.

Talaga kadi nga agpasonto ti daga?

Adda Kadi Panagpaso ti Planetatayo?

Ipasigurado kadatayo ti Biblia: “Tumaud ken lumabas dagiti kaputotan ngem agtalinaed ti daga nga awan pagbaliwanna.” (Eclesiastes 1:4, Ti Baro a Naimbag a Damag Biblia) Ni Jehova a Dios sititibker nga “imbangonna ti daga kadagiti naipasdek a dissona” ken diniseniona dayta nga agpaut “iti tiempo a di nakedngan, wenno iti agnanayon.” (Salmo 104:5) Narigat kadi a patien dagita a naipaltiing a sasao ti Dios? Apay a rumbeng a patiem nga agtalinaed ti daga idinto ta ibagbaga ti dadduma a sientista nga agpasonto ti planeta?

Bueno, panunotem dagiti tagilako a nakadispley iti paglakuan. Dadduma ti addaan iti etiketa a nakailanadan ti petsa ti panagpasoda. Siasino ti nangikeddeng iti panagpasoda? Dayta kadi ket imbaga laeng ti edukado a manedyer ti paglakuan? Siempre, saan! Ti nangaramid iti produkto ti nangikeddeng iti dayta. Patientayo dayta a petsa agsipud ta awan ti ad-adda a makaammo iti produkto no saan a ti nangaramid. No kasta, anian nga ad-adda pay nga agtalektayo iti Nangaramid iti planetatayo! Ibatad ti Saona nga ‘impasdekna a sititibker ti daga’ tapno agpaut iti agnanayon. Saanto nga agpaso ti daga.​—Salmo 119:90.

Ngem posible kadi a dagiti awanan panangipateg a tattao dadaelenda a naan-anay ti daga? Saan a pulos! Saan a kas kadagiti tattao a nagaramid kadagiti produkto, ni Jehova ‘kabaelanna nga aramiden amin a bambanag.’ (Job 42:2) Gapuna, maipanamnamana kadatayo: “Ti saok a rummuar manipud iti ngiwatko . . . sigurado nga agballiginto.” (Isaias 55:11) Masiguradotayo a ti “Nangaramid kadatayo” dina ipalubos nga adda aniaman a manglapped kenkuana a mangitungpal iti panggepna para iti daga. (Salmo 95:6) Ania dayta a panggep, ken kasano a tungpalen ti Dios dayta?

Ti Pagarian a Mangtungpal iti Panggep ti Dios

Malaksid nga impanamnamana a dinto pulos agpaso ti daga, ibaga pay kadatayo ti Sao ti Dios a binukelna dayta “tapno mapagnaedan.” (Isaias 45:18) Nupay rinibu a tawenen a mapagnanaedan daytoy daga, saan pay a natungpal ti talaga a panggep ti Dios para iti dayta.

Ni Jehova ket “naragsak a Dios” ken “managayat iti kinahustisia.” (1 Timoteo 1:11; Salmo 37:28) Panggep ti Dios nga agbiag a naragsak ti amin a tattao ken addanto kinahustisia. Tapno matungpal ti panggepna, impadto ti Dios a mangipasdekto iti Pagarian idiay langit a mangituray iti intero a daga. (Daniel 2:44) Idi adda ni Jesus ditoy daga, masansan a saritaenna ti panangituray ti Pagarian. Pinaregtana dagiti adalanna nga ikararagda dayta gapu ta ammona amin dagiti bendision nga agpaayto iti daga iti sidong dayta a Pagarian. (Mateo 6:9, 10; 24:14) Ania ti sumagmamano kadagita a bendision?

▪ Agarinto ti talna ken kinatalged ta inkari ti Dios a pagpatinggaenna ti amin a gubat.​—Salmo 46:9.

▪ Addanto umdas a taraon para iti amin.​—Salmo 72:16.

▪ Awanton ti parikut iti salun-at agsipud ta “awanto ti agtataeng nga agkuna: ‘Masakitak.’”​—Isaias 33:24.

▪ Awanton ti agladingit, ta “awanton ni patay.”​—Apocalipsis 21:4.

▪ Ikarkari ti Dios a ti ilina bangonendanto ti bukodda a balay, agbiagda a sitatalged, ken ‘agrag-oda iti agnanayon.’​—Isaias 65:17-24.

Awan duadua a kayatmo ti agbiag iti sidong dagita a kasasaad. Ni Jehova addaan iti nasged a regta wenno sumsumged a tarigagay a mangitungpal iti amin nga impadtona. (Isaias 9:6, 7) Ngem nalabit pampanunotem: ‘Rinibribu a tawenen ti napalabas sipud idi naisurat iti Biblia dagiti kari ti Dios. Apay a di pay la natungpal?’

Pakaispalantayo ti Panagan-anus ti Dios

Masiguradotayo a “saan a nabannayat ni Jehova maipapan iti karina.” Ilawlawag ti Biblia a siaayat nga an-anusannatayo ti Dios. Ngarud, naidagadag kadatayo nga ‘ibilangtayo ti kinaanus ni Apotayo kas pannakaisalakan.’ (2 Pedro 3:9, 15) Ngem apay a nasken iti pannakaisalakantayo ti panagan-anus ti Dios?

Umuna, ammo ti Dios a masapul a ‘dadaelenna dagidiay mangdaddadael iti daga’ tapno agbalin a natalged ken narang-ay a pagnaedan dagiti nalinteg. (Apocalipsis 11:18) Nupay kasta, gapu ta ay-ayaten ni Jehova dagiti tattao, “saanna a tarigagayan a madadael ti asinoman.” Isu a ti nailangitan nga Amatayo siaanus a ‘pakpakdaaranna daydiay nadangkes manipud nadangkes a dalanna.’ Gapuna, iwanwanwan ni Jehova ti pannakaikasaba ti mensahe maipapan iti Pagarian iti intero a lubong.a (Ezequiel 3:17, 18) Amin a mangipangag iti pakdaar ti Dios ken mangitunos ti biagda kadagiti nalinteg a prinsipiona maisalakan ken tagiragsakendanto ti agnanayon a biag iti paraiso a daga.

Agbaw-ingka iti Dios Tapno Maisalakanka

Ipasigurado ti Biblia nga adda “naimbag a damag” para kadatayo. (Mateo 24:14) Ipanamnama ti di matungday a sao ti Dios a dinto pulos madadael daytoy daga! Sigun pay kadagiti padto ti Biblia, agtalektayo nga ‘iti apagbiit laengen a kanito, daydiay nadangkes awanton.’ Din agbayag, dagidiay tattao nga ibilang ti Dios a nalinteg “tagikuaendanto ti daga, ket pudno a maragsakandanto iti napalalo iti kinaruay ti talna.” (Salmo 37:9-11, 29; Mateo 5:5; Apocalipsis 21:3, 4) Kabayatanna, siaanus ken agtultuloy nga iyaw-awis ti Dios: “Bumaw-ingkayo kaniak ket maisalakankayo, dakayo amin nga adda kadagiti ungto ti daga.” (Isaias 45:22) Ania ti aramidem?

Apay a dimo pagreggetan ti agbaw-ing iti Dios? Idagadag kadatayo ti Salmo 37:34: “Manginanamaka ken Jehova ket salimetmetam ti dalanna, ket itan-oknakanto a mangtagikua iti daga.” Maragsakan dagiti Saksi ni Jehova a tumulong kenka a mangammo iti ad-adu pay maipapan iti manayon a panggep ti Dios iti daga ken no kasanoka nga agbiag tapno makitam ti kaitungpalan dayta a panggep.

[Footnote]

[Picture Credit Line iti panid 22]

Rinetrato ti NASA